پاکستان میوزک انڈسٹری کے نامور کمپوزر و گلوکار اور اسٹرنگز بینڈ کے رکن بلال مقصود نے سوال کیا ہے کہ خبر دیکھ کر مجھے خوشی ہوئی کیونکہ یہ ہماری فلم انڈسڑی کی بحالی کے لیے بہترین اقدام ہے لیکن یہاں میں یہ پوچھنا چاہتا ہوں کہ پاکستان میوزک انڈسٹری کے لیے کونسے اقدامات کیے جارہے ہیں؟
باغی ٹی وی : سماجی رابطے کی ویب سائٹ انسٹاگرام پر بلال مقصود نے اپنا ایک ویڈیو پیغام جاری کیا جس میں اُنہوں نے کہا کہ میں نے اخبار میں ایک خبر پڑھی جس میں بتایا گیا تھا کہ حکومت نے فلم انڈسٹری کی بحالی کے لیے پیکیج کا اعلان کیا ہے۔
بلال مقصود نے کہا کہ خبر دیکھ کر مجھے خوشی ہوئی کیونکہ یہ ہماری فلم انڈسڑی کی بحالی کے لیے بہترین اقدام ہے لیکن یہاں میں یہ پوچھنا چاہتا ہوں کہ پاکستان میوزک انڈسٹری کے لیے کونسے اقدامات کیے جارہے ہیں؟
https://www.instagram.com/tv/CFUvFHiH-1K/?igshid=ejukupsxlnsi
گلوکار نے کہا کہ ہمیں بتائیں کہ اس ملک میں گلوکاروں کی کیا اہمیت ہے اہمیت ہے بھی یا نہیں کیونکہ ہماری عوام کا جو نظریہ ہے اُس کے مطابق موسیقی کی دُنیا سے تعلق رکھنے والے فنکاروں کو بُرا سمجھاجاتا ہے اور اُن کے لیے نامناسب الفاظ استعمال کیے جاتے ہیں۔
اُنہوں نے کہا کہ ’اگر ہماری حکومت کو لگتا ہے کہ گلوکاروں کے بارے میں عوام کا نظریہ اور سوچ بالکل درست ہے تو ہمیں بتائیں۔
بلال مقصود نے کہا کہ ’اگر میں وزیراعظم عمران خان کی بات کروں تو مجھے نہیں لگتا اُن کی سوچ بھی عوام جیسی ہوگی کیونکہ عمران خان کی دوستی بڑے بڑے نامور موسیقاروں سے ہے اور مجھے یقین ہے کہ وہ ہمارے متعلق اس طرح نہیں سوچتے بلکہ ایک مثبت سوچ رکھتے ہوں گے۔
گلوکاروں کے لئے سوشل میڈیا پلیٹ فارمز پر نازیبا الفاظ استعمال کئے جاتے ہیں اس سب کو ختم کرنا بے حد ضروری ہے نہیں تو ایک وقت ایسا آئے گا پاکستان سے میوزک ختم ہو جائے گا-
انہوں نے کہا کہ عزت بہت ضروری ہے ایک آرٹسٹ کے لئےمیں چاہتا ہوں کہ وزیراعظم عمران خان صاحب ایسے پلیٹ فارمز بنائیں جہاں عوام کی اس غلط سوچ کو تبدیل کیا جائے۔
بلال مقصود نے کہا کہ ایک گلوکار کے لیے سب سے اہم اُس کی عزت ہے اور حکومت کو چاہیے کہ فنکاروں کو عزت دیں اور لوگوں کا نظریہ تبدیل کریں۔
آخر میں اُنہوں نے کہا کہ ملک میں مختلف پلیٹ فارمز بنائے جائیں جن کے ذریعے میوزک انڈسٹر ی کے لیے اقدامات کیے جائیں کیونکہ یہ بہت ضروری ہے۔
انسٹاگرام پر اپنا ویڈیو پیغام پوسٹ کرتے ہوئے بلال مقصود نے لکھا کہ مجھے لگتا ہے کہ اس اہم مسئلے پر لازمی توجہ دی جانی چاہیے۔
واضح رہے کہ حال ہی میں وزیراعظم عمران خان کی زیرصدارت ملکی تشخص، تہذیب اور ثقافت کواُجاگر کرنے کے حوالے سے اجلاس ہوا تھا جس میں حکومت نے فلم انڈسٹری کی بحالی کے لیے بھی پیکیج کا اعلان کیا تھابجٹ میں فلم انڈسٹری کی بحالی کے لیے چار نکاتی پیکیج کا اعلان کیا گیا تھا۔ ڈرامہ، فلم سازی اور سنیما کے آلات کی درآمد پر کسٹم ڈیوٹی کم کرکے 3 فیصد اور سیلز ٹیکس کم کر کے 5 فیصد کردیا گیا ہے-
