Category: شوبز

نئی دہلی: دہلی پولیس نے ایک مسلح جھڑپ کے دوران معروف بھارتی اسٹینڈ اپ کامیڈین اور بگ باس کے فاتح منور فاروقی کو قتل کرنے کے منصوبے میں ملوث دو شوٹرز کو گرفتار کرلیا۔

بھارتی میڈیا کے مطابق گرفتار ملزمان کی شناخت راہول اور ساہل کے ناموں سے ہوئی ہے۔ دونوں کو مبینہ طور پر بیرونِ ملک مقیم گینگسٹر روہت گودارا کی ہدایت پر دہلی بھیجا گیا تھا تاکہ منور فاروقی کو قتل کیا جا سکے۔ بتایا جا رہا ہے کہ گودارا، گولڈی برار اور ویرندر چران کے ساتھ مل کر اس منصوبے پر کام کر رہا تھا۔ذرائع کا کہنا ہے کہ ملزمان نے ممبئی اور بنگلورو میں منور فاروقی کی نقل و حرکت پر نظر رکھنے کے لیے ریکی بھی کی تھی تاکہ حملے کے لیے موزوں وقت اور مقام کا تعین کیا جا سکے۔پولیس کے مطابق جھڑپ کے دوران ملزم راہول کو گولی لگی جسے فوری طور پر اسپتال منتقل کیا گیا۔ راہول کے خلاف ہریانہ میں دسمبر 2024ء کے تہرے قتل کیس میں بھی تفتیش جاری ہے۔

دہلی پولیس حکام نے تصدیق کی ہے کہ اس معاملے میں مزید چھاپہ مار کارروائیاں جاری ہیں تاکہ گینگ کے دیگر کارندوں کو بھی گرفتار کرکے کسی بڑے جانی نقصان کو روکا جا سکے۔

واضح رہے کہ منور فاروقی سوشل میڈیا پر انتہائی مقبول ہیں، انسٹاگرام پر ان کے ایک کروڑ بیالیس لاکھ سے زائد فالوورز ہیں۔ بگ باس جیتنے کے بعد ان کی شہرت میں مزید اضافہ ہوا ہے اور وہ مختلف ریئیلٹی شوز اور اسٹیج پرفارمنس کے ذریعے بھارتی شوبز انڈسٹری میں نمایاں مقام حاصل کرچکے ہیں۔

بالی ووڈ کے مسٹر پرفیکشنسٹ عامر خان کی گرل فرینڈ گوری سپراٹ پاپرازی (فوٹو گرافرز) پر برس پڑیں۔

عامر خان نے جب 60 برس کی عمر میں اپنے رشتے کا اعلان کیا اور اپنی گرل فرینڈ گوری سپراٹ کو متعارف کرایا تو سب حیران رہ گئے تھے،عامر نے واضح کیا تھا کہ گوری کو شہرت کی خواہش ہے نہ ہی میڈیا کی توجہ پسند ہے۔ تاہم اس کے باوجود ہر بار جب وہ شہر میں نظر آتی ہیں فوٹوگرافرز ان کا پیچھا کرتے ہیں، جس نے آخرکار انہیں ناراض کر دیا۔

گوری جب چہل قدمی کے لیے نکلیں تو فوٹوگرافرز کو اپنے پیچھے دیکھ کر انہوں نے سخت جھنجھلاہٹ کا اظہار کیا۔،سوشل میڈیا پر ایک ویڈیو وائرل ہو رہی ہے جس میں ان کو کہتے سنا جاسکتا ہے کہ ارے مجھے اکیلا چھوڑ دو نا، میں بس واک پر جا رہی ہوں۔

اس سے قبل عامر خان کو ایئرپورٹ پر گوری کے ساتھ دیکھا گیا تھا، پاپرازی کے کیمروں نے ان دونوں کے درمیان ہونے والے مختصر رومانوی لمحات بھی قید کرلیے جو سوشل میڈیا پر تیزی سے وائرل ہوئے تھے۔

عامر خان نے حالیہ دنوں میں ایک پوڈکاسٹ میں گفتگو کرتے ہوئے بتایا کہ شادی نہ کرنے کا فیصلہ انہوں نے اپنی زندگی میں گوری کے آنے کے بعد بدلا، اداکار نے کہا کہ گوری مجھے اس وقت ملی جب میں سمجھ بیٹھا تھا کہ اب میری عمر گزر چکی ہے، میں نے تھراپی شروع کی تھی اور وہاں سے سیکھا کہ پہلے خود سے محبت کرنی چاہیے، تبھی آپ دوسروں کو سچ میں محبت دے سکتے ہیں۔

پاکستانی اداکارہ صائمہ قریشی کا کہنا ہے کہ 95 فیصد مرد دوسری شادی کے خواہشمند ہیں لہٰذا حرام کاموں سے بہتر مرد دوسری شادی کرلے۔

اداکارہ صائمہ قریشی نے حال ہی میں دیے گئے انٹرویو میں مختلف موضوعات پر گفتگو کے ساتھ ساتھ مردوں کی دوسری شادی اور غیر ازدواجی تعلقات پر بھی بات کی،ایک سوال کے جواب میں صائمہ قریشی نے کہا کہ 95 فیصد مرد دوسری شادی کرنا چاہتے ہیں، ہمارے میڈیا میں بھی ایسی کئی خواتین ہیں جنہوں نے شوہروں کی دوسری شادیاں خود کروائی ہیں حتیٰ کہ ایسے بھی کئی خاندان ہیں جہاں مرد کی 2 بیویاں ایک دوسرے کے ساتھ رہتی ہیں،ہمارے یہاں مرد غیر ازدواجی تعلقات بنانے سے نہیں ڈرتے حتیٰ کہ انہیں اپنی بیوی کو اعتماد میں لےکر اس لڑکی سے نکاح کرلینا چاہیے کیوں کہ ایک مرد کی غلط حرکت پوری نسل تباہ کردیتی ہے۔

صائمہ قریشی کا کہنا تھا کہ مردوں کو کسی کے جذبات کے ساتھ کھیلنے یا پھر کسی کو اپنے جھوٹے وعدوں میں پھنسانے سے پہلے یہ سوچ لینا چاہیے کہ ان کی اپنی اولاد بھی ہے لہٰذا حرام کام کرنے سے بہتر ہے کہ مرد دوسری شادی کرلیں۔

واضح رہے کہ اس سے قبل بھی اداکارہ صائمہ قریشی نے اپنے ایک انٹرویو میں کہا تھا کہ شوہر کو دوسری شادی کے لیے پہلی بیوی سے اجازت لینے کی ضرورت نہیں ہے، اداکارہ کے وائرل ویڈیو کلپ پر انہیں شدید تنقید کا سامنا کرنا پڑا تھا،

گریمی ایوارڈ یافتہ مشہور امریکی گلوکار اور نغمہ نگار بریٹ جیمز اپنی اہلیہ اور بیٹی سمیت ایک نجی طیارہ حادثے میں ہلاک ہوگئے۔

غیر ملکی خبر رساں ادارے کے مطابق یہ افسوسناک واقعہ 18 ستمبر کو پیش آیا، جب 57 سالہ بریٹ جیمز اپنی اہلیہ اور 28 سالہ بیٹی کے ہمراہ نجی طیارے میں سفر کررہے تھے۔ طیارے نے امریکی شہر نیش ول کے جان سی ٹیون ایئرپورٹ سے پرواز بھری تھی۔ تاہم سہ پہر تقریباً 3 بجے شمالی کیرولائنا کے علاقے فرینکلن میں ایک اسکول کے قریب کھیت میں گر کر تباہ ہوگیا۔حادثے میں طیارے میں سوار تینوں افراد موقع پر ہی جان کی بازی ہار گئے۔ خوش قسمتی سے اسکول کے کسی طالب علم یا عملے کو کوئی جانی نقصان نہیں پہنچا۔ امریکی میڈیا رپورٹس کے مطابق تباہ ہونے والا طیارہ بریٹ جیمز کے نام پر رجسٹرڈ تھا۔ حادثے کی فوری وجوہات سامنے نہیں آئیں، البتہ تحقیقاتی اداروں نے واقعے کی چھان بین شروع کردی ہے۔

بریٹ جیمز نے 1990 کی دہائی میں اپنا پہلا سولو البم ریلیز کیا تھا، تاہم وہ گلوکاری کے ساتھ ساتھ نغمہ نگاری میں بھی غیر معمولی شہرت رکھتے تھے۔ انہوں نے اپنے کیریئر کے دوران درجنوں مقبول فنکاروں کے لیے سینکڑوں گانے لکھے اور گائے۔ موسیقی کی دنیا میں ان کی گراں قدر خدمات کے اعتراف میں انہیں دو مرتبہ گریمی ایوارڈ سے نوازا جا چکا تھا۔بریٹ جیمز کے اچانک انتقال نے شوبز انڈسٹری اور مداحوں کو گہرے صدمے سے دوچار کر دیا ہے۔ سماجی اور موسیقی کے حلقوں کی جانب سے ان کے اہل خانہ سے اظہار تعزیت کا سلسلہ جاری ہے۔