ندا ڈار کی قیادت میں پاکستان کی خواتین کرکٹ ٹیم جمعہ کو جنوبی افریقہ کی خواتین ٹیم کے خلاف اس سوچ کے ساتھ میدان میں اترے گی کہ ٹی ٹوئنٹی سیریز میں تین صفر کی شاندار کارکردگی کو ون ڈے سیریز میں بھی برقرار رکھنا ہے۔
کراچی کا نیشنل بینک اسٹیڈیم جمعہ کو دونوں ٹیموں کے درمیان تین میچوں کی سیریز کے پہلے ون ڈے انٹرنیشنل کی میزبانی کرے گا ۔ اسی میدان میں بقیہ دو ون ڈے انٹرنیشنل گیارہ اور چودہ ستمبر کو کھیلےجائیں گے ۔ یہ سیریز آئی سی سی ویمنز چیمپئن شپ کا حصہ ہے۔
پاکستان ویمنز ٹیم کی کپتان ندا ڈار جمعہ کے روز اپنے ون ڈے انٹرنیشنل میچوں کی سنچری مکمل کریں گی وہ اس میچ کو اپنی شاندار کارکردگی سے یادگار بنانے کی خواہش مند ہیں۔ 36 سالہ ندا ڈار کا جنوبی افریقہ کے خلاف ریکارڈ اچھا ہے۔ وہ جنوبی افریقہ کے خلاف 16ون ڈے انٹرنیشنل میں تین نصف سنچریوں کی مدد سے246 رنز بنانے کے علاوہ 18 وکٹیں بھی حاصل کرچکی ہیں۔
,پاکستان اس وقت آئی سی سی ویمنز چیمپئن شپ میں نو میچز کھیل کر دس پوائنٹس کے ساتھ چوتھے نمبر پر ہے۔یہ چیمپئن شپ میں پاکستان کی ہوم گراؤنڈ پر تیسری سیریز ہوگی اس سے قبل اس نے سری لنکا کو دو ایک سے اور آئرلینڈ کو تین صفر سے ہرایا تھا جبکہ آسٹریلیا میں اسے تین صفر سے شکست کا سامنا کرنا پڑا تھا۔
دوسری جانب جنوبی افریقہ آئی سی سی چیمپئن شپ میں نویں نمبر پر ہے اس نے ابھی تک ایک سیریز کھیلی ہے جو آئرلینڈ کے خلاف تھی اور وہ اس نے تین صفر سے جیتی تھی۔
پاکستانی اسکواڈ میں شوال ذوالفقار کو 16 ویں کھلاڑی کے طور پر شامل بھی کیا گیا ہے۔ ڈسکہ سے تعلق رکھنے والی شوال ذوالفقار نے ٹی ٹوئنٹی انٹرنیشنل سیریز میں اپنے کرئیر کا آغاز کیا تھا۔ وہ انڈر نائنٹین ورلڈ کپ اور ایمرجنگ ایشیا کپ میں بھی پاکستان کی نمائندگی کرچکی ہیں۔
جنوبی افریقہ آئی سی سی کی عالمی رینکنگ میں تیسرے جبکہ پاکستان دسویں نمبر پر ہے۔
پاکستانی ٹیم اس سیریز میں سدرہ امین۔ فاطمہ ثنا اور غلام فاطمہ پر انحصار کرے گی ۔ سدرہ امین ابتک آئی سی سی چیمپئن شپ کے نو میچوں میں535 رنز بناکر بیٹنگ چارٹ میں دوسرے نمبر پر ہیں۔ انہوں نے جنوبی افریقہ کے خلاف ٹی ٹوئنٹی سیریز میں133 رنز بنائے تھے۔
آئی سی سی چیمپئن شپ کے بولنگ چارٹ میں فاطمہ ثنا16 وکٹیں حاصل کرچکی ہیں۔ لیگ اسپنر غلام فاطمہ نے چیمپئن شپ کے چھ میچوں میں 12 وکٹیں حاصل کی ہیں جن میں آئرلینڈ کے خلاف لاہور میں پانچ وکٹوں کی عمدہ کارکردگی بھی شامل ہے۔
جنوبی افریقہ اور پاکستان کے درمیان پچیس میچز کھیلے جاچکے ہیں جن میں سے جنوبی افریقہ نے انیس اور پاکستان نے چار میچز جیتے ہیں ایک میچ ٹائی اور ایک نامکمل رہا ہے۔
لیفٹ آرم اسپنر نشرہ سندھو کا کہنا ہے کہ ٹی ٹوئنٹی سیریز کی جیت سے ہمارے اعتماد میں اضافہ ہوا ہے ۔ یہ جیت ہماری انتھک محنت کا نتیجہ تھی ہم نے اپنی مہارت میں اضافے کے لیے بہت کام کیا ہے۔ہمیں پتہ ہے کہ جنوبی افریقہ ون ڈے فارمیٹ میں بہت اچھی ٹیم ہے لیکن ہم اس چیلنج کا سامنا کرنے کے لیے تیار ہیں۔ہماری توجہ اچھی کارکردگی اور زیادہ سے زیادہ پوائنٹس لے کر چیمپئن شپ میں اپنی پوزیشن بہتر کرنے پر مرکوز ہے۔
جنوبی افریقہ کی آل راؤنڈر میزینین کیپ کا پاکستان کے خلاف ریکارڈ بہت اچھا رہا ہے انہوں نے پاکستان کے خلاف سولہ ون ڈے انٹرنیشنل میں406 رنز بنانے کے علاوہ17 وکٹیں حاصل کررکھی ہیں۔وہ کہتی ہیں کہ مجھے پاکستان کے ساتھ کھیلنا ہمیشہ اچھا لگا ہے ون ڈے میرا پسندیدہ فارمیٹ ہے ۔یہ میرا مضبوط فارمیٹ ہےحالانکہ میں ٹی ٹوئنٹی میں بھی کھیل کر لطف اندوز ہوتی ہوں۔ مجھے امید ہے کہ میری پاکستان کے خلاف اچھی کارکردگی کا سلسلہ جاری رہے گا۔ٹی ٹوئنٹی سیریز میں مجھے پاکستانی ٹیم نئی نظر آئی ہے اور یہ خواتین کرکٹ کے لیے خوش آئند بات ہے۔
ان کا کہنا ہے کہ انہیں افسوس ہے کہ ٹی ٹوئنٹی سیریز میں ان کی ٹیم میچوں کو جیت پر ختم نہیں کرپائی ۔ہماری ٹیم بھی ماضی کے مقابلے میں نوجوان سائیڈ ہے۔ان کنڈیشنز میں آپ کو تجربے کی زیادہ ضرورت ہوتی ہے۔
پاکستان اور جنوبی افریقہ کی خواتین سیریز پی ٹی وی اسپورٹس اور پی ٹی وی نیشنل پر براہ راست دکھائی جائے گی جبکہ اس کی لائیو اسٹریمنگ اے آر وائی زیپ پر ہوگی۔ یہ میچ دوپہر ساڑھے تین بجے شروع ہونگے ۔ ٹاس تین بجے ہوگا۔
شائقین کے لیے فضل محمود حنیف محمد اور جاوید میانداد انکلوژر رکھے گئے ہیں۔ شائقین اسٹیڈیم کے باکس آفس سے بھی ٹکٹ خرید سکتے ہیں۔ جبکہ یہ ٹکٹ pcb.bookme.pk پر بھی دستیاب ہیں۔
پاکستان کا ون ڈے اسکواڈ۔
ندا ڈار ( کپتان ) عالیہ ریاض۔ بسمہ معروف۔ ڈیانا بیگ۔ فاطمہ ثنا۔ غلام فاطمہ ۔ منیبہ علی۔ نشرہ سندھو۔ عمیمہ سہیل، شوال ذوالفقار، صدف شمس۔ سعدیہ اقبال۔ سدرہ امین۔ سدرہ نواز ( وکٹ کیپر ) ام ہانی اور وحیدہ اختر۔
