Category: کھیل

لاہور :سری لنکا سے پہلا ایک روزہ میچ ، قومی ٹیم کے کھلاڑی پرجوش بھی پر عزم بھی ، کھلاڑیوں کی خوشی دیدنی ہے ، سری لنکا کے خلاف ایک روزہ سیریز کے لیے اعلان کردہ 16 رکنی اسکواڈ میں شامل 12 کھلاڑی پہلی بار پاکستان میں اپنا ڈیبیو کریں گے۔ آصف علی، فخر زمان، شاداب خان، عماد وسیم، محمد عامر، امام الحق، محمد حسنین، افتخار احمد، محمد رضوان، عثمان شنواری، محمد نواز اور عابد علی پہلی باراپنے ملک میں ایک روزہ میچ کھیلیں گے۔ پاکستان اور سری لنکا کے درمیان 3 میچوں پر مشتمل ایک روزہ سیریز 27 ستمبر سے 2 اکتوبر تک کراچی میں کھیلی جائے گی۔

باغی ٹی وی کے مطابق پاکستان کی جانب سے 44 ایک روزہ میچز کھیلنے والے فخر زمان قومی کرکٹ ٹیم کا مستقل رکن ہیں۔ بائیں ہاتھ کے بلے باز اپنے ایک روزہ کیریئر میں اب تک 1828 رنز بناچکے ہیں تاہم اس میں سے ایک رن بھی پاکستان کے میدانوں میں نہیں بنا۔45.70 کی اوسط سےرنز بنانے والے فخر زمان کے کیریئر میں4 سنچریاں اور 11 نصف سنچریاں شامل ہیں۔

باغی ٹی وی کے مطابق 3 سال سے قومی کرکٹ ٹیم کی نمائندگی کرنے والے بائیں ہاتھ کے اوپنر کا کہنا ہےکہ انہیں اپنے ہوم میچز بیرون ملک کھیلنے کا دکھ ہوتا ہے۔اپنے کراؤڈ کے سامنے کرکٹ کھیلنا کسی اعزاز سے کم نہیں۔

فخر زمان نے کہا کہ سری لنکا کےخلاف ایک روزہ ٹیم میں شامل ہر کھلاڑی پرجوش ہے۔ ایک عرصہ بعد پاکستان میں مکمل سیریز کھیلنے کے لیے ہر کھلاڑی نے انفرادی اہداف بنا رکھے ہیں۔اوپنر نے کہا کہ اسکواڈ میں شامل ہر کھلاڑی اپنے ہم وطنوں کے سامنے بہترین کارکردگی دکھانے کا عزم رکھتا ہے۔

ذرائع کے مطابق قومی کرکٹر نے کہا کہ پاکستان میں پہلا ایک روزہ میچ ان کے لیےمیں ڈیبیو کے مترادف ہے۔ انہوں نے کہا کہ ورلڈکپ ماضی کاحصہ ہوچکا اب تمام تر توجہ اس سیریز پر مرکوز ہے۔ سری لنکا کے خلاف سیریز میں تیز ترین سنچری اسکور کرنا ان کا ہدف ہے۔

باغی ٹی وی کے مطابق شاداب خان41 ایک روزہ میچز میں پاکستان کی نمائندگی کرچکے ہیں۔ ایک روزہ کیریئر میں شاداب خان 56 وکٹیں اور 337 رنز بناچکے ہیں۔ آلراؤنڈ اس سے قبل بھی نیشنل اسٹیڈیم کراچی میں ویسٹ انڈیز کے خلاف ٹی ٹونٹی سیریز کھیل چکے ہیں۔شاداب خان کا کہنا ہےکہ سری لنکا کے خلاف سیریز پاکستان میں ان کے کیریئر کی پہلی ایک روزہ سیریزہوگی۔ امید ہےقومی ٹیم جلد اپنے ٹیسٹ میچز بھی پاکستان میں کھیلے گی۔

آلراؤنڈرشاداب خان نے کہا کہ 2018 میں ویسٹ انڈیز کے خلاف ٹی ٹونٹی سیریز میں جب نیشنل اسٹیڈیم کراچی کے میدان میں اترے تو انکلوژرزتماشائیوں سے کھچاکھچ بھرے ہوئے تھے۔انہوں نے کہا کہ امید ہے کہ سری لنکا کے خلاف ایک روزہ سیریز کے تمام میچز میں شائقین کرکٹ کی ایک بڑی تعدا د اسٹیڈیم کا رخ کرے گی۔

سری لنکا کے خلاف سیریز میں بہترین کارکردگی کا عزم لیے شاداب خان نے کہا کہ ٹیم کی جیت میں اہم کردار ادا کرنا اصل ہدف ہے۔ تمام کھلاڑی ہوم کراؤڈ کے سامنے بہترین نتائج دینا چاہتے ہیں۔قومی کرکٹ ٹیم کے باؤلر عماد وسیم آئی سی سی ٹی ٹونٹی رینکنگ میں دوسرے جبکہ شاداب خان تیسرے نمبر پر موجود ہیں۔آلراؤنڈر نے کہا کہ انہیں عماد وسیم کے ہمراہ باؤلنگ کرنے کا مزہ آتا ہے۔ میچ کے دوران وکٹوں کے حصول کے لیے ہم دونوں میں بہترین ربط ہوتا ہے۔

باغی ٹی وی کے مطابق پاکستان کی جانب سے 14 ایک روزہ میچز کھیلنے والے محمد نواز بھی پہلی بار پاکستان میں ایک روزہ کرکٹ میچ کھیلیں گے۔ اب تک اپنے کیریئر میں آلراؤنڈر نے 5.18 کے اکانومی ریٹ سے 16 وکٹیں حاصل کررکھی ہیں۔ محمد نواز 22.11 کی اوسط سے 199 رنز بھی بنا چکے ہیں۔

ذرائع کےمطابق کرکٹر محمد نواز نے کہا کہ صرف ٹیم میں واپسی ہی نہیں بلکہ وہ پہلی بار پاکستان میں ایک روز ہ سیریز کھیلنے کے لیے بہت پرجوش ہیں۔ انہوں نے کہا کہ وہ دنیا بھر میں لیگ کرکٹ کھیل چکے ہیں مگر پاکستانی کراؤڈ کا نعم البدل کہیں بھی نہیں ملا۔آلراؤنڈر نے کہا کہ پی ایس ایل میں کھچا کھچ بھرے میدانوں میں باؤلنگ کرنے کا مزہ دوبالا ہوجاتا تھا۔ امید ہےکہ سری لنکا کے خلاف سیریز کے لیے بھی نیشنل اسٹیڈیم کراچی میں شائقین کرکٹ کی ایک بڑی تعداد دونوں ٹیموں کو سپورٹ کرنے میدان میں آئے گی۔

وکٹ کیپر بیٹسمین محمد رضوان 32 ایک روزہ میچز میں پاکستان کی نمائندگی کرچکے ہیں۔ وکٹ کیپر بیٹسمین 33.57 کی اوسط سے 705 رنز بناچکے ہیں۔ 2 سنچریاں اور 3 نصف سنچریاں اسکور کرنے والے محمد رضوان کا ایک روزہ کرکٹ میں بہترین اسکور 115 رنز ہے۔

پاکستان آمد پر سری لنکا کرکٹ ٹیم کے لیے نیک تمناؤں کا اظہار کرتے ہوئےمحمد رضوان نے کہا سیریز کے لیے تیاریاں مکمل ہیں۔ انتظار صرف اس لمحے کا ہے جب میچ شروع ہوا۔ انہوں نے کہا جوش و لولہ سے بھرپور ہوم کراؤڈ کےسامنے کھیلنے سے ٹیم کا مورال بلند ہوگا۔

لاہور :قومي ٹيم کے سابق کپتان محمد يوسف کا کہنا ہے کہ سري لنکا کا پاکستان آنا خوش آئيند ہے۔پاکستان میں ڈومیسٹک کرکٹ اسٹرکچر ہر برس تبدیل ہوتاہوجاتا ہے۔مصباح الحق کي تقرري ميرٹ کے خلاف ہے۔وقار يونس کا عہدہ قبول کرنا حيران کن ہے۔ ان خيالات کا اظہار انہوں نے ميڈيا سے گفتگو کرتے ہوئے کيا۔ ان کا کہنا تھا کہ سری لنکا کے سرکردہ کرکٹرز کے پاکستان نا آنے سے کوئي فرق نہیں پڑتا ان کی ٹیم کا دورہ کرنا ہي اچھی بات ہے، اگر بڑے نام والے کرکٹر بھي ہوتے تو پاکستان ٹیم ان سے بہت بہتر ہے ۔

باغی ٹی وی کےمطابق محمد يوسف کا کہنا تھا کہ پاکستان میں ڈومیسٹک کرکٹ اسٹرکچر ہر برس تبدیل ہوتا رہا ہے، اس مرتبہ کچھ زیادہ ہی تبدیلیاں کر دی گئی ہیں اور ٹیموں کی تعداد کو کم کر دیا گیا ہے، میں سمجھتا ہوں کہ 8 سے 10 ٹیمیں فرسٹ اوراتني ہي سکينڈ میں ہوتیں اور دونوں کو فرسٹ کلاس کا درجہ حاصل ہوتا ليکن موجودہ سسٹم سے اب بہت کم کھلاڑی فرسٹ کلاس کرکٹ کھیل سکیں گے۔

باغی ٹی وی کے مطابق محمد يوسف کا کہنا تھا کہ مصباح الحق کی تقرری میرٹ پر نہیں ہوئی ہیڈ کوچ تو قومی ٹیم کے ساتھ ہو گا وہ کیسے فرسٹ کلاس میچز میں کھلاڑیوں کی کارکردگی کو اپنی نظر سے دیکھے گا يا پھر وہ فیصلہ اسکور کارڈز پر کرے گا یا پھر جو صوبائی کوچز سلیکٹرز کی حیثیت سے چیف سلیکٹر کو بتائیں گے اس پر فيصلہ ہوگا۔ اگر صوبائی کوچز نے ہی سب کام کرنا ہے تو پھر چیف سلیکٹر کی کیا ضرورت ہے۔ اگر میرٹ پر تقرری بنتی ہے تو پھر وقار یونس کی بنتی تھي انہیں ہیڈ کوچ اور چیف سلیکٹر ہونا چاہیے تھا لیکن میں حیران اور پریشان ہوں کہ انہوں نے کیسے اس سے کم کابولنگ کوچ کا عہدہ قبول کر لیا۔ اس میں کوئی شک نہیں ہے کہ وقار یونس بہت زبردست فاسٹ بولر تھے لیکن وقار کو جب بھي کوئي عہدہ ملتا ہے تو ان کا رویہ بدل جاتا ہے وقار کو اپنی اس عادت کو بدلنا ہو گا۔

قومی ٹیم کے سابق کپتان محمد یوسف نے کہا کہ مصباح الحق نے اپنے دور میں اظہر علی کو ون ڈے ٹیم میں نہیں ہونے ديا ليکن جب ون ڈے کرکٹ چھوڑی تو اظہر علی کو کپتان بنوا دیا اس سے ان کی کرکٹ سے دیانت داری کا اندازہ لگایا جا سکتا ہے۔ان کا کہنا تھا ایک طرف کرکٹ بورڈ کہہ رہا تھا کہ ورلڈ کپ میں ٹیم کی کارکردگی اتنی بھی بری نہیں رہی لیکن پھر کیا ہوتا ہے کہ کوچز تبدیل کر دیئے جاتے ہیں اور کپتان وہی رہتا ہے۔ مصباح الحق نے کرکٹ کمیٹی میں سب سے زیادہ مخالفت کوچز کی، کی کیونکہ انہوں نے خود کوچ بننا تھا، اسی سے ظاہر ہوتا ہے کہ تقرری میرٹ پر نہیں ہوئی۔

کراچی : پاکستان اور سری لنکا کی کرکٹ ٹیموں کے پریکٹس سیشنزکراچي ميں تيز بارش کے باعث منسوخ کر دیئے گئے۔پاکستان اور سری لنکا کے درمیان ون ڈے سيريز کا پہلا ميچ 27 ستمبر کو کھیلا جانا ہے لیکن کراچی میں تین روز سے جاري کہیں ہلکی اور کہیں تیز بارش جاری ہے، شہر کے مختلف مقامات پر آج 35 ملی لیٹر تک بارش ریکارڈ کی گئی۔

باغی ٹی وی کے مطابق پاکستان اور سری لنکا کے درمیان سیریز کے پہلے ون ڈے سے قبل دونوں ٹیمیں پریکٹس کے لیے نیشنل اسٹیڈیم پہنچیں تاہم اچانک شروع ہونے والی تيز بارش کے باعث پہلے سری لنکا نے پریکٹس سیشن منسوخ کیا، بعدزاں پاکستان کرکٹ ٹیم کو بھی پریکٹس سیشن منسوخ کرنا پڑا۔

لاہور : سري لنکا کے خلاف ٹي ٹوينٹي سيريز کے ليے قذافي اسٹيڈيم ميں تيارياں مکمل کرلي گئيں۔ قذافي اسٹيڈيم ميں رنگ و روغن کا کام ۔اور اسٹينڈز ميں کيمروں کي تنصيب اور پچ کي تياري کا کام مکمل کرليا گيا۔

باغی ٹی وی کے مطابق پاکستان اور سري لنکا کے درميان تين ٹي ٹوينٹي ميچز کي سيريز کے ليے پی سی بی ہیڈکوارٹر میں تیاریاں اپنے عروج پر پہنچ گئی ہیں۔پویلینز کی چھتوں کی مرمت کے ساتھ رنگ و روغن کا کام بھی آخری مرحلے میں ہے جب کہ سٹینڈز میں لگی کرسیوں کو بھی چمکایا جارہا ہے ٹي ٹوينٹي سيريز کا پہلا ميچ پانچ اکتوبر کو قذافي اسٹيڈيم مي کھيلا جاے گا۔

باغی ٹی وی کے مطابق ميچيز کے ليے آٹھ پچز تيار کي گئي ہيں ۔ گھانس سے بھرپور پچز روايتي طور پر رنز سے بھر پور ہوں گي ۔ جس پر شاہقين کو رنز سے بھرپور کرکٹ ديکھنے کو ملے گي۔ جبکہ اسٹينڈز ميں نصب کيمروں کي جانچ پڑتال بھي کرلي گي ہے۔

لاہور : پاکستان کرکٹ ٹيم کے ہيڈ کوچ مصباح الحق کا کہنا ہے کہ پاکستان ہو یا کوئی اور ملک، اب کہیں بھی کچھ بھی ہوسکتا ہے، ہمیں کرکٹ کو جاری رکھنا چاہیے، دنیا کو چاہیے کہ اب وہ پاکستان آکر کرکٹ کھیلے، اب یہاں کے فینز کو زیادہ دير ایکشن سے محروم نہیں رکھا جاسکتا۔ انہوں نے کہا کہ اچھا ہوتا اگر سری لنکا کی فل اسٹرینتھ ٹیم یہاں ہوتی لیکن جو ٹیم آئی ہے وہ بھی بہتر ہے اور پاکستان ٹیم کو سرپرائز کرسکتی ہے۔

باغی ٹی وی کے مطابق پاکستان کرکٹ ٹیم کے کوچ مصباح الحق نے کہا کہ بطور پروفیشنل کرکٹرز وہ یہ نہیں سوچتے کہ کون سا کھلاڑی ہے اور کون سا نہیں، سری لنکا کی ٹیم ویسے ہی نوجوان پلییئرز پر مشتمل ہے۔قومی ٹیم کے ہيڈ کوچ کے مطابق سری لنکا سے سیریز ميں نوجوان کرکٹرز کیلئے بھی کارکردگي دکھانے کے مواقع موجود ہيں کھلاڑی سیریز میں اپني سو فیصد پرفارمنس دیں گے، پاکستان اس سیریز میں بھرپور کرکٹ کھیلے گا اور امید ہے کہ فینز کو اچھی کرکٹ دیکھنے کو ملے گی۔

باغی ٹی وی کے مطابق کوچ مصباح الحق کا کہنا تھا کہ یہ سب کیلئے اہم لمحہ ہے کیوں کہ پاکستان کافی عرصہ بعد ہوم گراؤنڈ پر ون ڈے انٹرنیشنل کھیل رہا ہے۔ قومی ٹیم کے کپتان سرفراز احمد سے متعلق ہیڈ کوچ نے کہا کہ سرفراز احمد نے بہت محنت کی ہے، اس کی کپتانی کی کامیابی کیلئے ضروری ہے کہ وہ خود بھی پرفارم کرے، میری تمام سپورٹ سرفراز احمد کے ساتھ ہے اور امید ہے کہ وہ سیریز میں اچھا پرفارم کرے گا۔ ان کا کہنا تھا کہ پہلے بھی سرفراز کی حمایت کی اور آج بھی ان کی سپورٹ کرتے ہیں، ماضی میں سرفراز نے بطور کپتان کافی اچھے نتائج دییے ہیں جن میں چیمپئنز ٹرافی کی جیت اور ٹی ٹوئنٹی میں نمبر ایک ہونا شامل ہے، چیزیں اوپر نیچے ہوجاتی ہیں جو جلد بہتر ہوجائیں گی۔

پاکستان قومی ٹیم کے ہیڈ کوچ نے مزید کہا کہ وہ اس بات کی حوصلہ افزائی کرتے ہیں کہ پلیئرز اپنا نیچرل گیم کھیلیں، جارح مزاج بیٹسمین اگر ٹک ٹک کرنے لگے گا تو نہیں کھیل پائے گا، ضرورت اس بات کی ہے کہ ٹیسٹ کیلئے ایک مضبوط ٹیم تیار کی جائے، اور یہی ان کا فوکس ہے۔ مصباح کا کہنا تھا کہ ڈومیسٹک کرکٹ سے انٹرنیشنل کرکٹ میں آنے کیلئے صرف پرفارمنس ہی کافی نہیں، پلیئرز کو معیار کے مختلف باکسز پر ٹک مارک کرنا ضروری ہے جس کے بعد وہ انٹرنیشنل معیار پر پورا اترتاہے، ڈومیسٹک کرکٹ کا معیار بہتر ہونے سے امید ہے کہ کرکٹ بھی بہتر ہوگی۔

مصباح الحق نے کہا آسٹریلیا میں ہمیشہ بیٹنگ کی وجہ سے پریشانی رہتی تھی لیکن پچھلے دورے میں بیٹنگ سے زیادہ پریشان بولنگ نے کیا تھا، آسٹریلیا میں کامیابی کیلئے ضروری ہے کہ حریف کی 20 وکٹیں حاصل کی جائیں۔ ایک سوال پر چیف سلیکٹر کا کہنا تھا کہ فاسٹ بولرز کا ٹیسٹ کرکٹ چھوڑنا اچھی بات نہیں کیوں کہ ٹیسٹ کی کارکردگی کو ہمیشہ یاد رکھا جاتا ہے لیکن اب یہ ایک کھلاڑی ہی بہتر بتاسکتا ہے کہ اس کا جسم کتنا ورک لوڈ برداشت کرسکتا ہے۔

باغی ٹی وی کے مطابق ایک سوال کے جواب میں مصباح الحق نے کہا کہ مکی آرتھر اور انضمام الحق کی مینجمنٹ نے اچھے کام بھی کیے، بابر اعظم جیسے ورلڈ کلاس کھلاڑی کا آنا، شاہین آفریدی اور شاداب جیسے بولرز ملنا ، اس کا سابق مینجمنٹ کو کریڈیٹ جاتا ہے، جو ان کے اچھے کام ہوئے، ہم ان کو آگے بڑھائیں گے۔ یاد رہے کہ مصباح الحق کے قومی ٹیم کے چیف سلیکٹر اور ہیڈ کوچ بننے کے بعد پاکستان اور سری لنکا کے درمیان پہلی سیریز ہے جس کیلئے انہوں نے ٹیم کا اعلان کیا ہے۔ سری لنکا کی ٹیم پاکستان پہنچ چکی ہے اور وہ کراچی میں 3 ایک روزہ اور لاہور میں 3 ٹی ٹوئنٹی میچز کھیلے گی۔ پاکستان اور سری لنکا کے درمیان پہلا ون ڈے انٹرنیشنل میچ 27 ستمبر کو نیشنل اسٹیڈیم میں کھیلا جائے گا۔