لاہور:انٹر بورڈ اسپورٹس گالا 2021 کا ٹائٹل لاہور اور فیصل آباد بورڈ نے جیت لیا،اطلاعات کے مطابق لاہور اور فیصل آباد بورڈ نے انٹر بورڈ اسپورٹس گالا 2021 کا ٹائٹل جیت لیا ہے۔جبکہ اس سلسلے میں ایک بہت بڑی تقریب کا انعقاد بھی کیا گیا ہے
تفصیلات کے مطابق پاکستان اسپورٹس کمپلیکس اسلام آباد کے ہاکی گراؤنڈ میں انٹر بورڈ سپورٹس گالا 2021 کی اختتامی تقریب کا انعقاد کیا گیا۔
لڑکوں کی کیٹیگری میں بورڈ آف انٹرمیڈیٹ اینڈ سیکنڈری ایجوکیشن فیصل آباد اور لڑکیوں کی کیٹیگری میں بورڈ آف انٹرمیڈیٹ اینڈ سیکنڈری ایجوکیشن لاہور نے انٹر بورڈ سپورٹس گالا 2021 کا ٹائٹل جیت لیا۔
پارلیمانی سیکرٹری برائے وفاقی تعلیم و پیشہ ورانہ تربیت محترمہ وجیہہ قمر نے اختتامی تقریب میں بطور مہمان خصوصی شرکت کی۔
تقریب سے خطاب کرتے ہوئے انہوں نے کہا کہ صحت مند جسم کا صحت مند دماغ ہوتا ہے اور کھیل دماغ کو صحت مند اور متحرک رکھنے میں اہم کردار ادا کرتا ہے، پہلے کہا جاتا تھا کہ کامیاب زندگی کے لیے تعلیم ضروری ہے لیکن اس دورِ حاضر میں کھیل بھی کامیاب زندگی میں اہم کردار ادا کرتے ہیں۔ انہوں نے طلباء کو مشورہ دیا کہ وہ اپنی معمول کی پڑھائی کے علاوہ ہم نصابی سرگرمیوں میں بھی حصہ لیں۔
انہوں نے یہ بھی کہا کہ اب اسپورٹس گالا ختم ہو چکا ہے اور یہ وقت ہے کہ پڑھائی کر کے سالانہ امتحان میں اچھے نمبر حاصل کریں جیسے وہ کھیلوں میں محنت کرتے ہیں۔
محترمہ وجیہہ قمر نے اس تقریب کو کامیاب بنانے میں سیکرٹری ڈاکٹر ملاح آئی بی سی سی اور مردان بورڈ کی کوششوں کےساتھ ساتھ آئی بی ایس سی کو سراہا اور کہا کہ پہلے آئی بی سی سی صرف تصدیق اور ایکولینس کے لیے جانا جاتا تھا لیکن اب ڈاکٹر ملاح کی کوششوں سے آئی بی سی سی کا مثبت امیج بن رہا ہے۔
وجیہہ قمر نے کہا کہ ان کی قیادت میں تنظیم تعلیمی اصلاحات، بہتر خدمات کی فراہمی، آٹومیشن اور ڈیجیٹلائزیشن، نصابی، ہم نصابی اور غیر نصابی سرگرمیاں وغیرہ لا رہی ہے۔انٹر بورڈ اسپورٹس گالا 2021 (گرلز کیٹیگری) میں 840 طالبات نے 3 گیمز میں حصہ لیا۔
بیڈمنٹن میں بی آئی ایس سی لاہور نے ٹائٹل جیتا، ایف بی آئی ایس سی دوسری اور بی آئی ایس ای ایبٹ آباد نے تیسری پوزیشن حاصل کی۔
ہاکی میں بی آئی ایس ای لاہور نے ٹائٹل جیتا اور بی آئی ایس ای فیصل آباد اور لاڑکانہ نے بالترتیب دوسری اور تیسری پوزیشن حاصل کی، جبکہ اتھلیٹکس میں بھی بی آئی ایس ای لاہور نے پہلی پوزیشن حاصل کی اور بی آئی ایس ای ڈی جی خان اور ایف بی آئی ایس ای بالترتیب دوسرے اور تیسرے نمبر پر رہے۔محترمہ وجیہہ قمر نے نمایاں کارکردگی کا مظاہرہ کرنے والے کھلاڑیوں اور ٹیموں میں انعامات تقسیم کئے۔
