Tag: باغی ٹی وی

اسلام آباد(سٹاف رپورٹر) پاکستان مسلم لیگ کے راہنماء اور سابق وفاقی وزیر دانیال عزیز نے کہا ہے کہ ریاست مدینہ کے جعلی دعویداروں الزامات کی سیاست کو پروان چڑھایا ہے۔ شہزاد اکبر کے جھوٹے الزامات پر انہیں عدالت میں لیکر جائونگا، شہزاد اکبر کی جانب سے من گھڑت اور بے ہودہ الزامات لگائے ہیں۔ انہوں نے اپنی پریس کانفرنس میں جو کاغذات بانٹے ان میں میرے والد کا نام محمد عزیز لکھا ہوا ہے جبکہ میرے والد کا نام انور عزیز ہے انکو میرے والد کے نام کا ہی نہیں پتہ اور چلے ہیں الزام لگانے۔ نیشنل پریس کلب اسلام میں میں ایک ہنگامی پریس کانفرنس کرتے ہوئے دانیال عزیز کا کہنا تھا کہ شہزاد اکبر کی طرف سے ان پر لگائے جانے والے تمام تر الزامات بن گھڑت اور جھوٹ کا پلندہ ہیں۔ جس زمین کا ذکر مشیر موصوف نے کیا ہے وہ میرے والد صاحب نے میری پیدائش سے بھی قبل حکومت پنجاب کی اس وقت کی اسکیم کے تحت اور تمام قانونی تقاضے پورے کرنے کے بعد حاصل کی تھی جب وہ خود ابھی سیاست میں بھی نہیں آئے تھے۔ میرا اس زمین سے کوئی تعلق نہیں ہے۔ وہ میرے والد کے ہی پاس تھی۔ اور میرے والد حکومت پنجاب کو اس معاملے میں عدالت میں لیکر گئے تھے مگر نوٹسز کے باوجود حکومت پنجاب کی طرف سے کوئی بھی اس کیس میں پیش نہیں ہوتا تھا جس پر عدالت نے ذمہ داران کے وارنٹ گرفتاری جاری کئے جس پر ڈی سی سرگودھا اور دوسرے افسران کو ہتھکڑیاں لگا کر عدالت میں پیش کیا گیا تھا۔ شہزاد اکبر پریس کانفرنس میں یہ دعویٰ کرتے ہیں کہ حکومت نے یہ زمین واگزار کروا لی ہے مگر عدالت نے اپنے حکم میں حکومت پنجاب سے کہا ہے کہ وہ اس زمین کو انگلی بھی نہیں لگا سکتے۔ اور اب یہ عدالت کا حکم وصول کرنے سے انکاری ہیں۔ دانیال عزیز نے کہا کہ یہ انصاف کا اور صادق اور امین ہونے کا ڈھنڈورہ پیٹے ہیں مگر خود عالت کا حکم ماننے سے بھاگتے پھر رہے ہیں۔ انصاف کی دھجیاں تو پی ٹی آئی حکومت اڑا رہی ہے جو انصاف کی دعویدار بنی پھرتی ہے۔ کیا یہی ریاست مدینہ ہے جس کی مثالیں دی جاتی تھیں؟ انہوں نے مزید کہا کہ میں ابھی امریکہ سے واپس آیا ہوں جہاں میرے والد کا نومبر میں کورونا کے باعث انتقال ہو گیا ہے جن کے کفن دفن سے اور باقی رسم رواج سے فارغ ہونے کے بعد شہزاد اکبر کو انصاف کے کہٹرے میں کھڑا کرونگا اور سب کچھ ثبوتوں کے ساتھ ثابت کرونگا۔

پاکستان مسلم لیگ نون کے مرکزی رہنما خیبر پختون خوا کے سابق گورنر سردار مہتاب احمد خان نے کیا ہے کہ صرف انتخابات کے لئے دوسرے صوبے میں ووٹ منتقل کروانا جمہوری اصولوں کے خلاف ہے اپنے ایک بیان میں انہوں نے میڈیا میں نشر ہونے والی اس خبر کی سختی سے تردید کی جس میں ان کے پنجاب سے سینیٹ کا انتخاب لڑنے کا دعوی کیا گیا تھا انہوں نے  اس کی تردید کرتے ہوئے کہا اس خبر میں مبالغہ آرائی سے کام لیا گیا ہے انہوں نے کہا کہ  پنجاب سے سینیٹ کا انتخاب لڑنے کو اصول پسندی اور سیاسی جدوجہد کے خلاف سمجھتا ہوں جس کے لئے 35 سال سے جدوجہد کررہا ہوں انہوں نے کہا کہ انہوں نے خیبر پختون خوا کے گورنر اور وزیر اعلی کے طور پر خدمات سر انجام دی ہیں اور خیبر پختون خوا اسمبلی میں قائد حزب اختلاف بھی  رہا یوں وہ اس بات کو کبھی اپنے لئے پسند نہیں کریں گے کہ وہ کسی اور صوبے سے سینیٹ کا انتخاب میں حصہ لیں انہوں نے کہا کہ سیاسی شخصیات کو اپنے صوبے سے ہی سینیٹ کے انتخاب میں حصہ لینے کو ترجیح دینی چاہیے یہی بہترین سیاسی اور جمہوری  اصول ہے اور وفاق کی روح کے عین مطابق ہے کیونکہ محض سینیٹ کے انتخابات کے لئے اپنا ووٹ کسی دوسرے میں منتقل کرنا سیاسی اور جمہوری اصولوں کے منافی اور کسی حد تک دوسروں کی حق تلفی ہے 

*مؤرخہ 4 فروری 2021*
صوبائی صدر پاک سر زمین پارٹی خیبر پختوںخوا امتیاز اسد تنولی: تحریک آزادئ کشمیر بھارت میں مسلمانوں سمیت تمام مظلوم قومیتوں کی آزادی کا سرچشمہ بن گیا ہے۔
بھارت کے طول و عرض میں تقویت پاتی آزادی کی تحریکیں تحریک آزادئ کشمیر سے متاثر ہیں اور انکے لیے عزم و ہمت و استقلال کی روشن مثال ہے۔ انشاء اللہ بہت جلد کشمیر سمیت بھارت کے مسلمان آزاد فضاؤں میں سانس لیں گے۔
کشمیر اور پاکستان لازم و ملزوم ہیں۔
کشمیریوں کی پاکستان سے محبت و عقیدت لازوال ہے۔لاکھوں ماؤں بہنوں اور جوانوں کی قربانیوں، بدترین تشدد اور نسل کشی کے باوجود تحریک آزادئ کشمیر آتش فشاں بن گیا ہے۔ پونے دو سال سے جاری بدترین لاک ڈاؤن کے باوجود بھارت کشمیریوں کے حق خودارادیت کے جذبے کو رتی برابر بھی مدھم نا کرسکا ہے۔ اہل کشمیر پاکستان کا جھنڈا اٹھاکر نعرے لگاتے ہیں اور پاکستان کے جھنڈے میں لپیٹ کر اپنے شہیدوں کو دفناتے ہیں۔
بھارت کشمیریوں کو پاکستان سے والہانہ محبت کی سزا دے رہا ہے۔ پاک سر زمین پارٹی پاکستان کی واحد سیاسی جماعت ہے جو آزادی کشمیر کے لیے اخلاقی حمایت سے آگے بڑھ کر عملی اقدامات اٹھانے پر یقین رکھتی ہے۔ پی ایس پی تحریک آزادئ کشمیر اور پاکستان کے دفاع میں برسرپیکار اگلی صف کی واحد سیاسی جماعت ہے۔
پی ایس پی جانوں پر کھیل کر تحریک آزادئ کشمیر کو پاکستان میں دوام بخش رہی ہے۔
پی ایس پی نے کشمیر کی جنگ پاکستان میں لڑی ہے۔
پاکستان کی معاشی شہ رگ کراچی میں پی ایس پی نے بھارتی تسلط کا بےخوفی سے مقابلہ کیا اور شکست دی ہے۔
جب جب مقبوضہ کشمیر میں تحریک آزادی کشمیر زور پکڑتی تھی تب تب را کے ایجنٹس پاکستان اور پورے پاکستان میں خون کی ہولی کھیلتے تھے، دنیا بھر کا میڈیا آزادئ کشمیر کی بات نہیں بلکہ پاکستان میں جاری خون کی ہولی کو موضوع بحث بناتا۔ پاکستان کا بچہ بچہ آخری سانس تک کشمیری عوام کے ساتھ کھڑا ہوگا۔
اقوامِ عالم کو کشمیر کے دیرینہ عالمی مسئلے کا پائیدار حل تلاش کرنا ہوگا ورنہ یہ تیسری عالمی جنگ کا شاخسانہ ثابت ہوسکتا ہے۔ یومِ یکجہتی کشمیر کے موقع پر پاک سر زمین پارٹی کشمیری عوام سے تجدید عہد کرتی ہے کہ جدوجہد آزادئ میں اہل کشمیر کو کسی صورت تنہا نہیں چھوڑیں گے۔ پی ایس پی کشمیریوں کے حق خودارادیت کے لیے عملی اقدامات اٹھانے سے گریز نہیں کرئے گی۔
پاکستان میں بھارتی تسلط کو زیر و زبر کرنے والے انشاء اللہ کشمیر میں بھارتی تسلط کے خاتمے کا موجب بنیں گے۔