Tag: قصوریات

قصور
الیکشن نے وقتی طور پہ بیروزگار نوجوانوں کو روزگار دیا،پھولوں کی پتیاں،کھانے کی اشیاء جلسوں میں فروخت کرکے کمانے لگے،تاہم مستقل روزگار کے لئے پریشان،کیا لیڈران کے سروں سے پانی کی طرح پیسہ بہانے والے لوگوں کے پاس بےروزگاروں کو کام کروانے کا پیسہ نہیں؟

تفصیلات کے مطابق 8 فروری کو ہونے والے انتخابات کی بدولت ملک بھر کی طرح ضلع قصور میں بھی الیکشن کمپین چل رہی ہے جس کی وجہ سے جگہ جگہ جلسے جلوس ہو رہے ہیں
جلسوں،جلوسوں میں امیدواروں پہ پھولوں کی پتیاں پھینکنا،مالائیں پہننا،شرکاء کو کھانے کھلانا,ساونڈ سسٹم لگانا،کرسیاں لگانا اور نت نئی خدمت جاری ہے جس کا فائدہ اٹھا کر بےروزگار نوجوانوں نے پھولوں کی پٹیاں،مالائیں،ساؤنڈ سسٹم،بینر سازی و دیگر کام شروع کئے ہیں جس کے باعث ان نوجوانوں کو 8 فروری تک وقتی روزگار تو ملا ہے تاہم مستقل روزگار کے لئے نوجوان پریشان ہیں کہ قوم کے پاس جتنا پیسہ ان لیڈران کے سروں سے وارنے کا ہے کیا کسی کے پاس اتنا پیسہ کسی بےروزگار نوجوانوں کو اچھا حلال روزگار کروانے کا نہیں؟
لیڈران نے کیا روزگار دیا اور اگے کیا روزگار دیں گے؟
یہ سوچ سوچ کر بےروزگار نوجوان وقت گزار رہے ہیں اور ماضی کی طرح اس بار بھی تماشہ دیکھ رہے ہیں

قصور
پی پی،178,176 177,این اے 131 ،132 کی عوامی سروے رپورٹ کے مطابق لوگوں نے ووٹ لینے آنے والے ایم پی اے،ایم این اے کے امیدواروں سے کارکردگی رپورٹ مانگنا شروع کر دی ہے جس پہ ابتک کی پانچ سالہ کارکردگی پہ وفاقی اور صوبائی اسمبلی کے گزشتہ دور میں جیتنے والے ممبروں کو سخت تنقید کا نشانہ بنایا جا رہا ہے عوام کو پوچھنا ہے کہ گزشتہ پانچ سال میں ہمیں کیا دیا گیا ہے؟
منی موٹر وے لاہور قصور روڈ پانچ سال سے ٹوٹ پھوٹ کا شکار رہی لوگ چیختے چلاتے رہے مگر پانچ سال تک سڑک نا بنی اور اگر کام شروع بھی ہوا تو رکا رہا اور بالآخر نگران گورنمنٹ میں کچھ کام ہوا آخر اس کا ذمہ دار کون؟
قصور رائیونڈ روڈ کہ جس کو 2020 میں 4 کروڑ 20 لاکھ کا فنڈ جاری کیا گیا مگر ایک پیسے کا کام نا ہوا مگر اب نگران حکومت میں 90 فیصد کام پایہ تکمیل تک پہنچا اس کے باعث کئی لوگ موت کے منہ میں چلے گئے جب حادثات ہوتے رہے لوگ مرتے رہے تو گورنمنٹ کہاں تھی؟
اسی طرح براعظم ایشیا کا سب سے بڑا واٹر ٹریٹمنٹ پلانٹ قصور عرصہ دراز سے بند پڑا ہے اس پہ کیا کام کیا گیا اور کھربوں روپیہ سے لگایا گیا پلانٹ عوام کو کیا فائدہ دے سکا؟
40 لاکھ آبادی والا ضلع قصور ابھی تک یونیورسٹی سے محروم ہے اور روزانہ سینکڑوں طالبعلم قصور سے سفر کرکے لاہور جاتے ہیں ابتک یونیورسٹی کیوں نہیں بنائی گئی اور لوگوں کو یونیورسٹی کے قیام پہ بیوقوف ہی بنایا جاتا رہا تاہم عملاً کچھ نا کیا گیا
قصور کے بیشتر گلی محلے اور ضلع قصور کا سب سے بڑا گاؤں کھارا کہ جس کی آبادی تقریباً 40 ہزار ہے اور ووٹ تقریباً 15 ہزار ہے اس کو بار بار عوامی مطالبے پہ نا تو گیس کی سپلائی دی گئی نا دیگر سہولیات حتی کہ گزشتہ 5 سالوں سے گیس پائپ سڑکوں پہ پڑے ہیں کیا یہ لوگ جانور ہیں جو سب سے زیادہ اکثریتی ووٹ ہونے کے باوجود نالیوں،سڑکوں،واٹر سپلائی اور سوئی گیس سے محروم ہیں؟
ڈی ایچ کیو ہسپتال سیاست کی نذر ہے ابھی بھی ڈاکٹرز مریض کو دیکھتے ہی لاہور لیجانے کی گردان رٹاتے ہیں بلہے شاہ ہسپتال قصور جو کہ ڈسٹرکٹ ہیڈ کوارٹرز ہسپتال ہے اس سے عوام کو کیا فائدہ حاصل ہوا؟
آٹے کے لائنوں میں لگی عوام سوال کرتی ہے کہ کل تک سارا سارا دن لائن میں لگ کر 10 کلو آٹا لینے والی عوام اب ووٹ کسے دے؟
کیا کچھ کیا آپ نے ہم عوام کیلئے؟
عوامی سروے کے مطابق لوگوں میں اس بار سخت غم و غصہ پایا جا رہا ہے اور لوگ اپنی بہت سی محرومیوں پہ سوال کررہے ہیں جس پہ نئے امیدوار پھر وعدے کر رہے ہیں جبکہ پرانے ممبرز اپنی شرمندگی مٹانے کی خاطر ٹامک ٹوئیاں مارنے کیساتھ ایک بار پھر سے آزمانے کا راگ الاپنے میں مصروف ہیں

قصور
سخت سردی و دھند،ٹھنڈا موسم،الیکشن کمپین التواء کا شکار،اس بار روایتی سیاسی جماعتوں کی بجائے مذہبی جماعتوں کے حق میں عوام کا زیادہ جھکاؤ،اس نظام سے بغاوت کے لوگ بھی میدان میں، ووٹ نا ڈالنے کا عزم

تفصیلات کے مطابق قصور میں سخت سرد ترین موسم ہے اور دھند کا راج بھی برقرار ہے جس کے باعث الیکشن کمپین التواء کا شکار ہے گزشتہ الیکشن کی نسبت اس سال الیکشن کمپین نا ہونے کے برابر ہے
ابھی چیدہ چیدہ فلیکس و بینرز نظر آ رہے ہیں وگرنہ الیکشن کے قریب آتے ہی الیکشن کمپین زوروں پہ ہوتی تھی اور ہر طرف بینرز و فلیکسز کا راج ہوتا تھا اس بار امیدواروں کی طرف سے گلی محلے و گاؤں دیہات میں لوگوں کے پاس جانے کا تسلسل بھی پہلے کی نسبت بہت کم ہے جبکہ دوسری طرف عوامی سروے کے تحت لوگوں کا رجحان اس بار روایتی سیاسی پارٹیوں کی بجائے مذہبی جماعتوں اور امیدواروں کی طرف زیادہ ہے نیز اس بار بہت سے لوگ ایسے بھی ہیں جو اس جمہوری نظام سے بغاوت کا اعلان کرتے ہیں اور اس عمل کو فضول اور بے معنی قرار دیتے ہیں اور عہد کرتے ہیں کہ وہ ووٹ نا ڈالیں گے

قصور
انسداد پولیو مہم جاری،والدین اپنے چھوٹے بچوں کو پولیو سے بچاؤ کے قطرے لازمی پلوائیں اور پولیو ورکرز کیساتھ تعاون کریں،محکمہ صحت و ضلعی انتظامیہ کی اپیل

تفصیلات کے مطابق قصور ضلع بھر میں بچوں کو پولیو سے بچاؤ کی خاطر انسداد پولیو مہم جاری ہے جو کہ 8 جنوری 2024 سے شروع ہے اور 12 جنوری تک جاری رہے گی
سینکڑوں انسداد پولیو ٹیمیں گھر گھر جا کر چھوٹے بچوں کو پولیو سے بچاؤ کے قطرے پلا رہے ہیں
ضلعی انتظامیہ قصور و محکمہ صحت قصور نے شہریوں سے اپیل کی ہے کہ اپنے چھوٹے بچوں کو پولیو سے بچاؤ کے قطرے لازمی پلائیں اور پولیو ٹیموں سے بھرپور تعاون کیا جائے
انسداد پولیو مہم کی نگرانی ڈپٹی کمشنر قصور و سی ای او ہیلتھ قصور خود کر رہے ہیں جبکہ پولیو ٹیموں کی سیکیورٹی کیلئے ڈسٹرکٹ پولیس ان کی معاونت کر رہی ہے

قصور
نا بجلی نا دھوپ،موبائل ٹاورز سگنلز دینے کی بجائے لوگوں کو حکومت کی طرح پریشانیاں دینے لگے،لوگ پریشان

تفصیلات کے مطابق تقریباً ایک ماہ سے قصور ضلع بھر میں غیر اعلانیہ لوڈ شیڈنگ کا سلسلہ تیز سے تیز تر ہوتا چلا جا رہا ہے
چوبیس گھنٹوں میں بمشکل 4 سے 6 گھنٹے بجلی میسر ہوتی ہے باقی وقت لوگ پتھر کے دور کی طرح گزارتے ہیں اوپر سے گزشتہ کافی دنوں سے دھند اور بادلوں کا سلسلہ بھی شروع ہے جس کے باعث سولر سسٹم کام نہیں کرتا
بجلی کی بندش کے باعث موبائل ٹاورز بند رہتے ہیں اور موسم کی خرابی سے سولر سسٹم بھی کرنٹ نہیں دیتے جس کی بدولت موبائل ٹاورز بند رہتے ہیں اور بجائے موبائل فونز کو سگنلز دینے کے حکومت کی طرح لوگوں کو پریشانیاں دے رہے ہیں جس کے باعث کام موجودہ حالات میں دھندے سے فارغ لوگ ایک دوسرے سے موبائل پہ بات چیت کرنے سے بھی قاصر ہیں
شہریوں نے موبائل کمپنیوں کو ٹاورز کو جنریٹرز پہ چلانے کی استدعا کی ہے

قصور
چونیاں میں پولیس مقابلہ،دو ڈاکو گرفتار،اسلحہ برامد

تفصیلات کے مطابق تھانہ سٹی چونیاں کے علاقہ میں رات کو پولیس مقابلہ ہوا جس میں انتہائی خطرناک دو ڈاکو زخمی حالت میں گرفتار ہوئے ہیں
گرفتار زخمی ڈاکو کی شناخت مبارک سکنہ بھوپے وال اور عابد سکنہ کوٹ گاماں کے ناموں سے ہوئی جو ڈیڑھ درجن سے زائد وارداتوں میں پولیس کو مطلوب تھے
تھانہ سٹی چونیاں کو بذریعہ 15 پر راہگیر دی اطلاع دی کہ اس کیساتھ سروہی روڈ پر واردات ہوئی ہے جس کی اطلاع موصول ہوتے ہیں تھانہ سٹی چونیاں پولیس فوری بائی پاس چونیاں انڈسٹریل ایریا میں پہنچی اور ناکہ بندی کی تو چار ڈاکوؤں نے ناکہ بندی اور پولیس پارٹی کو دیکھ کر مختلف اطراف سے سیدھی فائرنگ شروع کر دی جس کے نتیجے میں ملزمان کی اپنی فائرنگ سے دو ڈاکو زخمی ہوئے جن کو زخمی حالت میں گرفتار کر لیا ہے جبکہ دو ڈاکو فرار ہونے میں کامیاب ہو گئے ہیں
پولیس کا کہنا ہے کہ گرفتار ملزمان کے فرار ہونے والے ساتھی ڈاکوؤں کو شناخت کر لیا گیا ہے جن کی گرفتاری کیلئے سپیشل ٹیمیں تشکیل دے دی گئی ہیں اور جلد ان کو پابند سلاسل کر دیا جائے گا

قصور
واپڈا اہلکاروں کی ہڈ حرامی عروج پہ،بل بجلی گھر گھر بانٹنے کی بجائے قریبی دکانوں،ڈیروں میں پکڑا کر ڈیوٹی کرنا اپنا حق سمجھ لیا،ڈی سی نوٹس کی اپیل

تفصیلات کے مطابق قصور لیسکو واپڈا میں ہڈ حرامی اپنے عروج پہ ہے خاص کر بل ڈیسٹری بیوٹرز حضرات کہ جن کی ڈیوٹی گھر گھر بل پہنچانے کی ہے وہ بی ڈی حضرات بجائے لوگوں کو گھر گھر بل پہنچانے کے گلی محلوں میں واقع دکانوں اور ڈیروں پہ بل بجلی پکڑا کر بھاگ جاتے ہیں اور اس طریقہ واردات کو اپنی ڈیوٹی سمجھتے ہیں
عوام پہلے ہی بار بار کی لوڈشیڈنگ سے پریشان ہے اوپر سے بل بجلی بھی لوگوں کو گھروں میں نہیں ملتے
بعض اوقات بلوں پہ اردو میں نام نہیں لکھے ہوتے جس سے کم پڑھے لکھے اور ان پڑھ لوگوں کو اپنا بل ڈھونڈنے کیلئے دوسروں کی منت سماجت کرنی پڑتی ہے
نیز بیشتر صارفین کے بل غائب ہو جاتے ہیں جس پہ مجبوری میں صارفین مذید پیسے دے کر اپنا بل بازار سے نکلواتے ہیں اور ادا کرتے ہیں
شہریوں نے واپڈا اہلکاران کی ہڈ حرامی پہ احتجاج کیا ہے اور ڈی سی قصور سے نوٹس کی اپیل کی ہے

قصور
موٹر سائیکل چوری و ڈکیتی کا سلسلہ نا رک سکا،شہری اپنی موٹر سائیکلوں سے،گاڑیوں سے محروم ،پولیس چوروں کو پکڑنے سے قاصر،آئی جی پنجاب سے نوٹس کی اپیل

تفصیلات کے مطابق قصور ضلع بھر میں ائے روز موٹر سائیکل چوری و ڈکیتی کی وارداتوں کا سلسلہ جاری ہے
کچھ ماہ سے شہریوں سے لوڈر رکشے،موٹر سائیکلیں اور کاریں گن پوائنٹ پہ چھیننے کی کافی وارداتیں دیکھنے کو ملی ہیں
غریب لوگ اپنے ذرائع آمدن لوڈر رکشوں سے بھی محروم ہو رہے ہیں اوپر سے اس مہنگائی کے دور میں چار لاکھ کا لوڈر رکشہ اور لاکھوں روپیہ کی کوٹر سائیکل لینا غریب کے بس سے باہر ہو چکا ہے
اسی طرح ہر روز ضلع بھر میں موٹر سائیکل چوری کی وارداتیں زوروں پہ ہیں جس میں ہر گزرتے دن کیساتھ اضافہ ہو رہا ہے
گزشتہ دن بروز جمعہ بوقت دوپہر 3 بجے چونیاں کے شہر الہ آباد کے نواح میں واقع ٹبہ بھاگیوال کے رہائشی مظہر کے گھر کے باہر تالہ لگی موٹر نمبری LEX_19_8692 نامعلوم چور لے اڑے جس پہ متاثرہ شہری سخت پریشان ہے اور پولیس سے اپنی موٹر سائیکل ڈھونڈنے کی استدعا کرتا ہے
شہریوں نے چوری و ڈکیتی کی بڑھتی ہوئی وارداتوں کے پیش نظر آئی جی پنجاب سے نوٹس کی اپیل کی ہے

قصور
بجلی کی تاریخی لوڈشیڈنگ ،سردی ہونے کے باوجود چوبیس گھنٹے تک کی لوڈشیڈنگ، جانور ہم عوام ہیں یاں واپڈا اہلکاران؟ لوگوں کا حکمرانوں سے سوال

تفصیلات کے مطابق لیسکو واپڈا قصور نے قیام پاکستان سے ابتک تاریخی لوڈشیڈنگ کرکے لوگوں کو یہ بات سوچنے پہ مجبور کر دیا ہے کہ ہم عوام جانور ہیں یاں کہ واپڈا اہلکاران کہ جن کو انسانی ضروریات کا ہرگز احساس نہیں
لیسکو سب ڈویژن بہادر پورہ قصور میں گزشتہ کئی دن سے رات 8 بجے سے دن 9 بجے تک مسلسل بجلی بند رہتی ہے اور دن کے اوقات بھی بار بار بجلی آتی جاتی ہے
اسی طرح لیسکو سب ڈویژن راجہ جنگ قصور کے بیشتر دیہات میں دن 9 بجے سے رات 6 بجے تک مسلسل بجلی بند رہتی ہے جس سے اس کے باوجود لوگ پانی کی بوند کو بھی ترس جاتے ہیں اور بجلی سے وابستہ کاروباری افراد فاقے کرنے پہ مجبور ہو چکے ہیں
شہریوں کا حکمرانوں سے سوال ہے کہ اگر بجلی پانی سے بنتی ہے تو فیول پرائس ایڈجسمنٹ ہمیں کیوں ڈالی جاتی ہے اور اگر ہماری بجلی رینٹل پاور پلانٹس سے پیدا ہوتی ہے تو پانی کی کمی اور پہاڑوں پہ برف کا بہانہ کیوں؟
اہلیان علاقہ نے وزیراعظم پاکستان اور وزیراعلی پنجاب سے استدعا کی ہے کہ ہمیں جانوروں جیسی زندگی جینے پہ مجبور کرنے والے واپڈا اہلکاران کے خلاف کاروائی کی جائے اور ہمیں بجلی فراہم کی جائے