نیویارک سٹی کے میئر ایرک ایڈمز نے اعلان کیا ہے کہ روزویلٹ ہوٹل میں قائم مہاجرین کے استقبالیہ اور ہنگامی امدادی مرکز کو بند کیا جا رہا ہے۔ اس فیصلے کے ساتھ ہی 220 ملین ڈالر کا لیز معاہدہ بھی اختتام پذیر ہو گیا ہے۔
میڈیا رہپورٹس کے مطابق میئر ایرک ایڈمز نے سوشل میڈیا پلیٹ فارم ’ایکس‘ پر کہا کہ آج سے روزویلٹ ہوٹل میں قائم پناہ گزینوں کے استقبالیہ اور ہنگامی امدادی مرکز کو بند کرنے کا عمل شروع کیا جا رہا ہے۔ انہوں نے کہا کہ مؤثر حکمت عملیوں اور قومی سطح پر بہتر پالیسیوں کے نتیجے میں ہم اس مرکز کو بند کر رہے ہیں، جو 2023 میں پناہ گزینوں کی مدد کے لیے قائم کیا گیا تھا۔نیو یارک میں تارکین وطن کی آمد میں نمایاں کمی ہوئی ہے۔ بحران کے دوران شہر میں ہر ہفتے 4 ہزار تارکین وطن آرہے تھے، جو اب کم ہو کر تقریباً 350 رہ گئے ہیں۔
گزشتہ تین سال میں 2 لاکھ 32 ہزار سے زائد مہاجرین نے نیویارک میں پناہ لی۔ روزویلٹ ہوٹل وہ جگہ تھی جہاں 75 فیصد مہاجرین کی رجسٹریشن اور دیکھ بھال کا انتظام کیا گیا تھا، جو حکام کے مطابق ایک مؤثر اقدام ثابت ہوا۔ایرک ایڈمز کا کہنا تھا کہ کامیاب حکمت عملیوں کی بدولت مہاجرین کو ان کے سفر کے اگلے مرحلے میں مدد دینے کے قابل ہوئے اور اس کے ساتھ ساتھ ٹیکس دہندگان کے کروڑوں ڈالر بھی بچائے گئے،روزویلٹ ہوٹل، جو پاکستان انٹرنیشنل ایئرلائنز (پی آئی اے) کی ملکیت ہے، 2020 میں کووڈ19 وبا کے دوران ہونے والے مالی نقصانات کے باعث بند کر دیا گیا تھا۔ تاہم، 2023 میں پاکستانی حکومت نے نیویارک سٹی حکومت کے ساتھ 220 ملین ڈالر کے 3 سالہ لیز معاہدے پر دستخط کیے، جس کے تحت اسے مہاجرین کے لیے پناہ گاہ کے طور پر فعال کیا گیا۔
فروری 2024 میں پاکستانی حکومت نے ہوٹل کی مشترکہ شراکت داری میں تعمیر کے لیے جونز لینگ لا سیلے امریکہ انکارپوریٹڈ (جے ایل ایل) کی سربراہی میں ایک کنسورشیم کے ساتھ فنانشل ایڈوائزری سروسز ایگریمنٹ (ایف اے ایس اے) پر دستخط کیے۔نومبر 2024 میں یہ معلوم ہوا کہ قطر نے پاکستان کے ساتھ مل کر روزویلٹ ہوٹل کے انتظام میں شراکت داری پر غور کیا تھا۔یہ تاریخی ہوٹل 1924 میں کھولا گیا تھا اور امریکی صدر تھیوڈور روزویلٹ کے نام سے منسوب ہے۔ ہوٹل نیو یارک کے مرکزی ریلوے اسٹیشن گرینڈ سینٹرل ٹرمینل کے قریب واقع ہے۔
پانی و بجلی کی بندش کیخلاف کراچی شہر میں احتجاجی مظاہرے، بدترین ٹریفک جام
خیبرپختونخوا میں تعلیم کا جنازہ.تحریر: جان محمد رمضان
چیمپینز ٹرافی ناکامی، مینجمنٹ اور ٹیم میں بڑی تبدیلیاں ہونگی
