Tag: baaghi

مسلم لیگ ن کے ممبر قومی اسمبلی رانا ثنا اللہ کے جوڈیشل ریمانڈ میں 11 روز کی توسیع

لاہور ۔ 29 جولائی(اے پی پی )لاہور کی انسداد منشیات عدالت نے مسلم لیگ ن کے سینئر رہنما و ممبر قومی اسمبلی رانا ثنا اللہ کے جوڈیشل ریمانڈ میں مزید 11 روز کی توسیع کر دی ہے ۔ انسداد منشیات عدالت لاہور کے جج خالد بشیر نے کیس کی سماعت کی ۔ عدالت نے آئندہ سماعت پر اے این ایف حکام سے چالان کی تفصیلی کاپیاں طلب کر لیں ۔ دوران سماعت فاضل جج خالد بشیر نے ریمارکس دیے کہ رانا ثناء اللہ کمرہ عدالت میں موجود ہیں تو انہیں روسٹرم پر بلوا لیں جس پر انھیں روسٹرم پر بلوایا گیا ۔ دوران سماعت عدالت کی جانب سے ملزم سے پوچھا گیا کہ آپ کا جیل میں میڈیکل کیا گیا تھا جس پر رانا ثناء اللہ کا کہنا تھا کہ میرا معمول کے مطابق میڈیکل کیا گیا مگر میری میڈیکل رپورٹس اور ادویات نہیں دی جا رہی ہیں ،جس پر عدالت نے کہا کہ آپ تحریری درخواست دائر کریں اس پر اے این ایف اور جیل حکام کا جواب ریکارڈ پر آجائے گا ۔ رانا ثناء اللہ نے اس دوران عدالت سے استدعا کی کہ میری میڈیکل رپورٹس کرائی جائیں ۔ عدالت نے رانا ثناء اللہ کی میڈیکل کی درخواست پر جیل حکام سے جواب طلب کرلیا، عدالت نے 31 اگست تک جیل حکام کو رپورٹ جمع کرانے کا حکم دے دیا ۔ عدالت نے رانا ثنا اللہ کے جوڈیشل ریمانڈ میں مزید 11 روز کی توسیع کرتے ہوئے کیس کی مزید سماعت سماعت 9 اگست تک ملتوی کر دی ۔ علاوہ ازیں سماعت شروع ہونے سے قبل قومی اسمبلی میں اپوزیشن لیڈر میاں شہباز شریف اور سابق ایم این اے طلال چودھری نے رانا ثناء اللہ سے ملاقات کی ۔

اسٹیج ڈرامہ” پسندنہ پسند مرضی آپ کی ” انڈسٹری کے بڑے نام کام کرنے کو تیار۔

زاہد شاہ نے ملکی تاریخ کے سب سے میگا بجٹ ڈرامے کی تیاریاں شروع کردی۔ خوبصورت موسیقی اورسپر ساؤنڈ ٹریکس کے ساتھ ڈرامے میں کو نہایت مہارت سے پیش کیا جائے گا۔ طاس سے قبل سب سے مہنگے ڈرامے بنانے کا اعزاز بھی میرے ہی پاس ہے۔ جو جنون اور دھن کے پکے ہوتے ہیں ان کی پرواز کا سفرہمیشہ جاری رہتاہے۔ اسٹیج ڈرامہ پسند نہ پسند مرضی آپ فن کی دنیا کو حیران کردے گا،زاہد شاہکراچی (29جولائی 2019)ملک کے نامور رائیٹر ڈائیریکٹر زاہد پاکستان کے سب سے بڑے میگا بجٹ ڈرامے کی تیاریوں میں مصروف۔ اسٹیج ڈرامہ” پسندنہ پسند مرضی آپ کی ” جس میں پاکستان کی تاریخ میں پہلی بار فلم انڈسٹری کے بڑے بڑے نام اپنے فن کا مظاہرہ کرتے ہوئے دکھائی دینگے،زرائع کے مطابق زاہد شاہ کے نئے اسٹیج ڈرامے میں،ماضی کے فلم اسٹار شاہد اورجاوید شیخ سمیت کئی بڑے نامور ادکار ایک ساتھ اسٹیج پر کام کرتے دکھائی دینگے،اسٹیج ڈرامہ پسندنہ پسند مرضی آپکی میں کامیڈی کی دنیا کے کنگ،شکیل شاہ اورسلیم شیخ،یوسف پٹھان اور اسٹیج کی دنیا کی خوبصورت اداکارہ صائمہ حسنین سمیت دیگر فنکار بھرپورانداز میں شائقین میں اپنے فن کے جلوئے بکھیرتے ہوئے دکھائی دینگے،اس موقع معروف رائیٹر ڈائیریکٹر اور ملک میں کئی کامیاب اسٹیج ڈراموں کے خالق زاہد شاہ نے میڈیا کے نمائندوں سے بات چیت بھی کی جس میں ان کا کہنا تھا کہ اس میں کوئی شک نہیں کہ میں تاریخ کے سب سے مہنگے ترین ڈرامے پرکام کرنے جارہاہوں اور اس سے قبل بھی سب سے مہنگے ڈرامے بنانے کا اعزاز بھی میرے ہی پاس ہے مگر آنے والا میرامزاحیہ اور اصلاحی ڈرامہ "پسند نہ پسند مرضی آپکی دیکھنے والوں کو خوابوں کی دنیا میں لے جائے گااور اس ڈرامے میں جو بڑے نام میں سامنے لیکر آنا چاہتاہوں ان کے ناموں کو ڈرامے کی تاریخ سے قبل بتانا قبل ازوقت ثابت ہوگا،انہوں نے کہاکہ اس ڈرامے میں کو نہایت عمدگی اور مہارت سے پیش کیا جائے گا،جو اسٹیج کی روایات کو چار چاند لگادیگا،جبکہ موجودہ ڈرامے میں موسیقی پر بھی خاص توجہ دی جائے گی جس کے لیے سپر ساؤنڈ ٹریکس کا بندوبست کیا جائے گا،ایک سوال کے جواب میں ان کا کہنا تھا کہ میں مخالفین کے سوالوں کے جوابات منہ پردینے کا عادی ہواچھا برا وقت آتارہتاہے مگر جو جنون اور دھن کے پکے ہوتے ہیں ان کی پرواز کا سفرہمیشہ جاری رہتاہے۔ 

تحریک انصاف عوام کی امیدوں پر پورا اترے گی،رکن پنجاب اسمبلی ملک اسد کھوکھر

لاہور ۔ 29 جولائی(اے پی پی )پاکستا ن تحریک انصاف کے رہنماء و ممبر پنجاب اسمبلی ملک اسد کھوکھر نے کہا ہے کہ وزیراعظم عمران خان کی قیادت میں وطن عزیز سے فرسودہ نظام کے خاتمے ،ملکی استحکام اور پاکستان کو اقوام عالم میں باوقار مقام دلوانے کے سفر کا آغاز ہواہے،ایک سال قبل آنے والی تبدیلی کا سفر درست سمت میں جاری ہے ،پی ٹی آئی عوام کی امیدوں پر پورا اترے گی ۔ اپنے ایک بیان میں انہوں نے کہا کہ تحریک انصاف نے ملک میں عوام کی طاقت سے سیاسی جدوجہد کی نئی مثال قائم کی ، مشکل حالات سے گزر چکے، ملک میں جلد اچھے دن آنے والے ہیں ،عوام سے کئے گئے وعدے پورے کریں گے ۔ ملک اسد کھوکھر نے کہا کہ اپوزیشن جماعتیں اپنا چوری کا مال بچانے کیلئے جمع ہوئی ہیں ، ڈالر لوٹنے والوں کو اپنے اعمال کا خمیازہ بھگتناہو گا ۔

محکمہ زراعت پنجاب کے ترجمان نے کہا ہے کہ کپاس کے ضرررساں کیڑوں اور وائرس کا حملہ کھالوں اور وٹوں کے کناروں پر موجود جڑی بوٹیوں سے شروع ہوتا ہے

لاہور ۔ 29 جولائی(اے پی پی ) محکمہ زراعت پنجاب کے ترجمان نے کہا ہے کہ کپاس کے ضرررساں کیڑوں اور وائرس کا حملہ کھالوں اور وٹوں کے کناروں پر موجود جڑی بوٹیوں سے شروع ہوتا ہے‘لہٰذا کھال اوروٹوں کوجڑی بوٹیوں سے صاف رکھیں ‘ کپا س کی زیادہ پیداوار کے حصول کے لیے فصل کی بہتر کاشت اور ابتدائی نگہداشت بہت اہمیت کی حامل ہے‘ بجائی کے بعد کپاس کے کھیت میں جڑی بو ٹیوں کے اگاءو سے پیشگی تحفظ بہت ضروری ہے کیو نکہ جڑی بوٹیاں کپاس کی فصل کو غیر معمولی نقصان پہنچاتی ہیں ‘ جڑی بوٹیاں فصل کی پیداوار میں بہت زیادہ کمی کا موجب بنتی ہیں ‘ فصل کے نقصان دہ کیڑوں کو محفوظ پناہ گاہ مہیا کرتی ہیں ‘ خوراکی اجزاء مثلاً پانی، ہوا، روشنی اور نامیاتی مادوں کے حصول میں فصل کی حصہ دار ہوتی ہیں ‘ کپاس کی پتہ مروڑ وائرس اورر ملی بگ کے پھیلاءو کا موجب بھی بنتی ہیں ‘ کاشتکار ہر بار وتر آنے پر گوڈی کریں ،اس سے کپاس کی فصل کی جڑیں بھی مضبوط ہوں گی اور کپاس کی فصل سے جڑی بوٹیاں بھی تلف ہو جائیں گی‘ترجمان نے بتایا کہ بارشوں میں کپاس کی فصل کی خصوصی دیکھ بھال کریں اور اگر بارش کا پانی زیادہ کھڑا ہو جائے تو اس کو کسی ساتھ والے خالی کھیت میں منتقل کردیں کیونکہ کپاس کا پودا پانی کے معاملے میں بہت حساس ہوتا ہے اور اگر بارش کا پانی 48 گھنٹے تک کھڑا رہے تو کپاس کا پودا مرنا شروع ہو جاتا ہے اور پیداوار میں کمی واقع ہوتی ہے‘ انہوں نے کہا کہ اگر بارش کا پانی زیادہ مقدار میں اکٹھا ہو جائے تو پمپ کی مدد سے پانی کو کسی اور کھیت میں منتقل کر دیا جائے تاکہ کپاس کی فصل نقصان سے محفوظ رہے‘ترجمان نے کہا کہ کپاس کے کاشتکار ضرررساں کیڑوں سے تحفظ کیلئے ہفتہ میں دوبار پیسٹ سکاءوٹنگ کریں اور کیڑوں کے حملہ مشاہدہ میں آنے پر محکمہ زراعت توسیع و پیسٹ وارننگ کے مقامی مشورہ سے سپرے کریں ‘اگر کپاس کی رنگت پیلاہٹ مائل ہو جائے تو محکمہ زراعت پنجاب کے عملے سے مشورہ کے بعد مناسب گروتھ ریگولیٹر کا سپرے کریں ‘ترجمان نے مزید کہا کہ محکمہ موسمیات کی پیش گوئی کے مطابق آئندہ چند روز میں مزید بارشیں ہونے کی توقع ہے لہذٰا کاشتکار حضرات اپنی فصلوں کی دیکھ بھال کیلئے ریڈیو اور ٹی وی سے نشر ہونے والی موسمی پیش گوئی پر نظر رکھیں ‘بارانی علاقوں میں کاشتکارمون سون کی بارشوں کے وتر کو محفوظ رکھنے کیلئے محکمہ زراعت کے تجویز کردہ طریقوں کے مطابق گہرا ہل چلائیں تاکہ تل،مونگ،ماش،باجرہ اور جوار کی کاشت کا بندوبست ہو سکے ۔

پی سی بی کرکٹ کمیٹی کا اجلاس 2 اگست کو ہوگا، ایم ڈی وسیم احمد خان صدارت کریں گے

لاہور ۔ 29 جولائی (اے پی پی) پاکستان کرکٹ بورڈ کی کرکٹ کمیٹی کا اہم اجلاس 2 اگست کو نیشنل کرکٹ اکیڈمی لاہور میں ہوگا ۔ پاکستان کرکٹ بورڈ کے منیجنگ ڈائریکٹر وسیم خان کمیٹی کی سربراہی کریں گے ۔ قومی کرکٹ ٹیم کے سابق کپتان وسیم اکرم، مصباح الحق، عروج ممتاز، ذاکر خان ( ڈائریکٹر انٹرنیشنل کرکٹ اور سیکرٹری کمیٹی)، مدثر نذر(ڈائریکٹر اکیڈمیز) اور ہارون رشید ( ڈائریکٹر ڈومیسٹک کرکٹ) اجلاس میں شرکت کریں گے ۔ چیف سلیکٹر انضمام الحق جن کا کنٹریکٹ 31 جولائی تک ہے ۔ ہیڈ کوچ مکی آرتھر اور کپتان سرفراز احمد بھی شرکا کمیٹی کو بریفینگ دینے کے ساتھ آئندہ کےلئے تجاویز دیں گے ۔ کرکٹ کمیٹی ایک ایڈوائزری پینل ہے جس کی ذمہ داری سفارشات مرتب کرکے چیئرمین پی سی بی کو بھجوانا ہے ۔ قومی مینز اینڈ ویمنز کے ساتھ ساتھ انڈر ۔ 19 اور انڈر ۔ 16 کرکٹ ٹیموں کی کارکردگی کی روشنی میں سفارشات مرتب کرکے چیئرمین پی سی بی کو بھجوانا اجلاس کے ایجنڈے میں شامل ہے ۔ وسیم اکرم ویڈیو لنک کے ذریعے اجلاس میں شرکت کریں گے جبکہ دیگر تمام اراکین اجلاس میں شرکت کےلئے نیشنل کرکٹ اکیڈمی لاہور پہنچیں گے ۔ اجلاس کے بعد کوئی پریس کانفرنس نہیں کی جائے گی ۔ کمیٹی چیئرمین پی سی بی کو سفارشات بھجوائے گی ۔ قومی کرکٹ ٹیم کی مینجمنٹ کے دو اراکین ہیڈ کوچ مکی آرتھر اور بیٹنگ کوچ گرانٹ فلاور قومی ٹیم کی ورلڈ کپ اور گذشتہ چند سالوں کی کارکردگی کی رپورٹ کمیٹی کے اجلاس میں پیش کریں گے، دونوں کوچز کا کنٹریکٹ ورلڈ کپ تک تھا تاہم مکی آرتھر قومی ٹیم کے ساتھ مزید کام کرنے کی خواہش رکھتے ہیں ۔ ذراءع کا کہنا ہے مکی آرتھر کے معاہدے میں اگلے برس مینز ٹی ٹونٹی ورلڈ کپ تک معاہدے میں توسیع ہوسکتی ہے، ورلڈ کپ میں پاکستان کے سیمی فائنل میں نہ پہنچنے پر چیف سلیکٹر کے کنٹریکٹ میں توسیع نہیں ہوئی اور کپتان سرفراز احمد سے بھی تینوں فارمیٹ میں سے کسی ایک یا دو کی کپتانی کی ذمہ داری واپس لئے جانے کی اطلاعات ہیں تاہم اس بات کے روشن امکانات ہیں کہ سرفراز احمد سے قومی ٹیسٹ ٹیم کی کپتانی واپس لی جاسکتی ہے تاہم ون ڈے اور ٹی ٹونٹی کی کپتانی کے بارے میں غور جاری ہے ۔ سرفراز احمد کی کی ٹی ٹونٹی کرکٹ ٹیم کی کپتانی کو کوئی خطرہ نہیں ہے تاہم ٹیسٹ اور ون ڈے کےلئے نیا کپتان سامنے آسکتا ہے ۔ اس عہدے کےلئے عماد وسیم ، شان مسعود، اسد شفیق اور دیگر کرکٹرز کا نام زیر غور ہے جبکہ انضمام الحق کے 31 جولائی کو کنٹریکٹ کے ختم ہونے کے بعد نئی سلیکشن کمیٹی بھی تشکیل دی جائے گی اور اس کےلئے بھی کئی نام زیر غور ہیں ۔