Tag: Ghani Mehmood Kasuri

قصور
گزشتہ دن موضع نوری والا میں معمولی تکرار پر فائرنگ، ایک جاں بحق، چھ زخمی،پولیس نے مقدمہ درج کر لیا
تفصیلات کے مطابق قصور کے تھانہ گنڈا سنگھ والا کے نواحی گاؤں موضع نوری والا میں گزشتہ دن ایک انتہائی افسوناک واقعہ پیش آیا جس میں معمولی تکرار کے بعد دوستوں کے درمیان جھگڑا ہوا جو اندھا دھند فائرنگ میں تبدیل ہو گیا
اس واقعہ میں 55 سالہ مصطفیٰ ولد صادق جاں بحق اور 6 افراد زخمی ہوئے زخمیوں کو ہسپتال منتقل کیا گیا
بعد ازاں مشتعل ورثاء نے مبینہ ملزمان کی حویلی اور ڈیرے کو آگ لگا دی جس سے ایک کار، ایک ٹریکٹر اور موٹر سائیکل جل گئے
پولیس کی بھاری نفری موقع پر پہنچ گئی اور حالات کو قابو میں کیا
پولیس نے دس نامزد اور چھ سے سات نامعلوم ملزمان کے خلاف مقدمہ درج کر کے کارروائی کا آغاز کر دیا ہے

#قصوریات

قصور
تھانہ سٹی اے ڈویژن قصور پولیس نے ایس ایچ او مشتاق حیدر کی سربراہی میں تھانہ کی حدود میں کائیٹ ایکٹ کے تحت کارروائی کرتے ہوئے پتنگ بازی کے سامان کی بڑی کھیپ برآمد کر لی

تفصیلات کے ایس ایچ او تھانہ سٹی اے ڈویژن مشتاق حیدر کی سربراہی میں پولیس نے کائیٹ فلائنگ ایکٹ کی خلاف ورزی کو ناکام بنا دیا
تھانہ کی حدود نفیس کالونی کے قریب ایس آئی ظفر اقبال نے دورانِ گشت ایک مشکوک شخص کو روک کر تلاشی لی
تلاشی کے دوران ملزم کے قبضے سے 100 عدد پتنگیں،گڈیاں برآمد ہوئیں
ملزم نے ابتدائی پوچھ گچھ پر اپنا نام عدنان علی ولد جاوید قوم ملک، سکنہ محلہ کوٹ رکن دین قصور بتایا
پولیس کے مطابق ملزم کی جانب سے کائیٹ ایکٹ کی خلاف ورزی ثابت ہونے پر اس کے خلاف کائیٹ ایکٹ 2025 کے تحت مقدمہ درج کر کے قانونی کارروائی کا آغاز کر دیا گیا ہے جبکہ مزید تفتیش جاری ہے۔
پولیس حکام کا کہنا ہے کہ پتنگ بازی اور اس سے متعلقہ سامان کی فروخت و ترسیل کے خلاف زیرو ٹالرنس پالیسی کے تحت کارروائیاں جاری رہیں گی، تاکہ شہریوں کی جان و مال کے تحفظ کو یقینی بنایا جا سکے
قصور پولیس نے اس سے قبل کئی بار واضع کیا ہے کہ قصور میں بسنت کی کوئی اجازت نہیں لہذہ شہری خلاف ورزی سے باز رہیں

قصور
مارکیٹ کمیٹی سے جاری کردہ ریٹ لسٹوں پر تاریخ کا اندارج نا ہونا معمول،خریدار پریشان

تفصیلات کے مطابق قصور مارکیٹ کمیٹی کی طرف سے جاری کی جانے والی پھلوں اور سبزیوں کی ریٹ لسٹ پر تاریخ شامل نہ ہونے کی وجہ سے شہری پریشان ہیں
کوئی پتہ نہیں چلتا کہ جو ریٹ لسٹ دکھائی جا رہی ہے یہ کتنی پرانی ہے
دکانداروں کو 20 روپیہ کے عیوض فراہم کی جانے والی یہ ریٹ لسٹ نئی ہے یا پرانی اس کا تعین ممکن نہیں ہو پاتا جس سے خرید و فروخت میں مشکلات کا سامنا ہے
شہریوں نے ڈی سی قصور سے مطالبہ کیا ہے کہ ریٹ لسٹ پر واضح تاریخ درج کی جائے تاکہ عوام کو شفاف معلومات میسر ہوں اور مارکیٹ میں بے ضابطگیوں سے بچا جا سکے

قصور
طالبات نے پنجاب لیول پر پہلی پوزیشن حاصل کرکے محکمہ تعلیم و والدین کا نام روشن کر دیا

تفصیلات کے مطابق ضلع قصور کی طالبات نے ایک بار پھر اپنی صلاحیتوں کا لوہا منوا لیا
گورنمنٹ گرلز ہائی سکول شہباز خان روڈ قصور کی ہونہار طالبات نے انٹر بورڈ چیمپئن شپ میں پنجاب لیول پر پہلی پوزیشن حاصل کر کے ضلع اور محکمہ تعلیم کا نام روشن کر دیا
اس شاندار کامیابی پر محکمہ تعلیم قصور میں خوشی کی لہر دوڑ گئی ہے جبکہ تعلیمی حلقوں کا کہنا ہے کہ یہ کامیابی طالبات کی محنت، اساتذہ کی پیشہ ورانہ تربیت اور والدین کے بھرپور تعاون کا عملی ثبوت ہے
طالبات کی اس نمایاں کارکردگی نے یہ ثابت کر دیا ہے کہ ضلع قصور کی بیٹیاں نہ صرف تعلیمی میدان بلکہ کھیلوں کے میدان میں بھی کسی سے کم نہیں ہیں
ڈسٹرکٹ ایجوکیشن اتھارٹی ضلع قصور کی جانب سے کامیاب طالبات، ان کی پوری ٹیم، اساتذہ اور والدین کو دلی مبارکباد پیش کی گئی ہے اور اس امید کا اظہار کیا گیا ہے کہ مستقبل میں بھی ضلع قصور کی طالبات اسی جذبے اور محنت کے ساتھ مزید کامیابیاں سمیٹیں گی

قصور میں شدید دھند، حدِ نگاہ تقریباً صفر , نظامِ زندگی مفلوج

قصور میں شدید سردی کے ساتھ گھنی دھند نے معمولاتِ زندگی بری طرح متاثر کر دیے ہیں
شہر اور گردونواح میں صبح کے اوقات میں حدِ نگاہ تقریباً صفر ریکارڈ کی گئی، جس کے باعث سڑکوں پر ٹریفک کی روانی شدید متاثر ہوئی اور متعدد مقامات پر گاڑیوں کی طویل قطاریں لگ گئیں
لاہور قصور منی موٹر وے اور اہم شاہراہوں پر دھند کے باعث سفر انتہائی خطرناک ہو گیا جبکہ متعدد حادثات کی اطلاعات بھی موصول ہوئیں ہیں
ضلعی انتظامیہ و ٹریفک پولیس نے شہریوں کو غیر ضروری سفر سے گریز اور فوگ لائٹس کے استعمال کی ہدایت کی ہے
شدید دھند کے باعث تعلیمی اداروں میں حاضری کم رہی، جبکہ دفاتر اور کاروباری سرگرمیاں بھی سست روی کا شکار ہوئیں
محکمہ موسمیات کا کہنا ہے کہ آئندہ چند گھنٹوں کے دوران دھند کی شدت برقرار رہنے کا امکان ہے خصوصاً صبح اور رات کے اوقات میں صورتحال مزید خراب ہو سکتی ہے
انتظامیہ نے شہریوں سے اپیل کی ہے کہ وہ احتیاطی تدابیر اختیار کریں، رفتار کم رکھیں، ہیڈ لائٹس اور فوگ لائٹس آن رکھیں اور ممکن ہو تو دن کے اوقات میں ہی سفر کریں تاکہ کسی ناخوشگوار واقعے سے بچا جا سکے

قصور
شدید دھند سے موسم سرد اور خشک،محکمہ موسمیات کی عوام سے اپیل

تفصیلات کے مطابق محکمہ موسمیات نے آئندہ چوبیس گھنٹوں کے دوران ضلع قصور اور اس کے گرد و نواح میں شدید دھند کا خدشہ ظاہر کیا ہے
تازہ رپورٹ کے مطابق موسم سرد اور خشک رہے گا جبکہ بالخصوص صبح سویرے اور رات کے اوقات میں درمیانی سے شدید دھند چھائی رہنے کا امکان ہے جس کے باعث حدِ نگاہ نمایاں طور پر کم ہو سکتی ہے
محکمہ موسمیات نے شہریوں کو ہدایت کی ہے کہ غیر ضروری سفر سے گریز کریں جبکہ سفر کی صورت میں گاڑیوں پر فوگ لائٹس کا استعمال اور رفتار کم رکھیں تاکہ کسی بھی ناخوشگوار حادثے سے بچا جا سکے
ضلعی انتظامیہ نے بھی عوام سے احتیاطی تدابیر اختیار کرنے کی اپیل کی ہے

قصور
لیسکو واپڈا نے قصور میں بجلی کے میٹر سست کرنے والے دو صارفین کے خلاف کارروائی کی ہے
تفصیلات کے مطابق لیسکو واپڈا قصور ایس ڈی او واپڈا لیسکو پھول نگر محمد عبد اللہ کی جانب سے پولیس تھانہ سٹی پھول نگر میں مقدمات درج کرائے گئے۔
دورانِ چیکنگ میانکے موڑ پھول نگر اور چاہ نائیانوالہ پھول نگر میں صارفین محمد اشرف ولد عبدالقیوم اور یوسف ولد نواب کے میٹر سست پائے گئے جنہیں ناجائز طریقے سے سست کیا گیا تھا
پولیس نے ایس ڈی او واپڈا کی مدعیت میں دونوں افراد کے خلاف مقدمات درج کر کے کارروائی شروع کر دی ہے پولیس اور واپڈا حکام اس سلسلے میں مذید چھان بین کر رہے ہیں

قصور
تحصیل چونیاں کے تھانہ کنگن پور میں بڑی واردات،ایف آئی آر درج

تفصیلات کے مطابق قصور کی تحصیل چونیاں کے تھانہ کنگن پور کی حدود موضع موکل میں چوری کی بڑی واردات پیش آئی ہے جس میں نامعلوم چور کپڑے کی ایک دکان سے تقریباً 16 لاکھ روپءہ مالیت کا کپڑا چوری کر کے فرار ہو گئے

متاثرہ دکاندار عبدالووف ولد عبد الرحمن کی درخواست پر تھانہ کنگن پور پولیس نے مقدمہ درج کر لیا ہے
پولیس کے مطابق واقعہ کی مختلف پہلوؤں سے تفتیش جاری ہے اور ملزمان کی گرفتاری کے لئے چھاپے مارے جا رہے ہیں
پولیس کا کہنا ہے کہ جلد ملزمان کو گرفتار کر کے مسروقہ مال برآمد کر لیا جائے گا

قصور
پیٹرولیم مصنوعات کی قیمتوں میں کمی، کرایوں میں کمی نہ ہو سکی
یکم جنوری کو وفاقی حکومت کی جانب سے پیٹرولیم مصنوعات کی قیمتوں میں کمی کا اعلان کیا گیا، جس کے بعد عوام نے توقع کی تھی کہ اس کا براہِ راست فائدہ روزمرہ اخراجات خصوصاً ٹرانسپورٹ کرایوں میں کمی کی صورت میں سامنے آئے گا۔ تاہم قیمتوں میں کمی کے باوجود پبلک ٹرانسپورٹ کے کرایوں میں تاحال کوئی واضح کمی دیکھنے میں نہیں آئی۔
شہریوں کا کہنا ہے کہ پیٹرول اور ڈیزل سستا ہونے کے باوجود بسوں، ویگنوں، رکشوں اور دیگر سواریوں کے کرائے بدستور سابقہ سطح پر برقرار ہیں، جس سے عوام کو شدید مایوسی کا سامنا ہے۔ مسافروں کے مطابق ہر بار پیٹرول مہنگا ہونے پر فوری طور پر کرایے بڑھا دیے جاتے ہیں، مگر جب قیمتوں میں کمی ہوتی ہے تو اس کا فائدہ عام آدمی تک منتقل نہیں کیا جاتا

دوسری جانب ٹرانسپورٹرز کا مؤقف ہے کہ کرایوں میں کمی فوری طور پر ممکن نہیں کیونکہ دیگر اخراجات جیسے پرزہ جات، مرمت، ٹائرز اور دیگر آپریشنل لاگت میں کوئی کمی نہیں ہوئی۔ ان کا کہنا ہے کہ صرف ایندھن کی قیمت کم ہونے سے مجموعی اخراجات میں نمایاں فرق نہیں پڑتا۔
شہری حلقوں اور سماجی شہری تنظیموں نے حکومت اور ضلعی انتظامیہ سے مطالبہ کیا ہے کہ پیٹرولیم مصنوعات کی قیمتوں میں کمی کے اثرات عوام تک پہنچانے کے لیے کرایوں میں مناسب کمی کو یقینی بنایا جائے اور اس ضمن میں ٹرانسپورٹ کرایوں کی باقاعدہ نگرانی کی جائے، تاکہ عام آدمی کو حقیقی ریلیف مل سکے

قصور
ضلع بھر میں منشیات کے خلاف مؤثر کارروائیاں، ایک نیا موقع، ایک بڑی ذمہ داری

تفصیلات کے مطابق قصور ضلع بھر میں پولیس کی جانب سے منشیات فروشی کے خلاف جاری سخت اور مسلسل کارروائیاں لائقِ تحسین ہیں جس کی بدولت منشیات فروشی نیٹ ورک کو شدید دھچکا پہنچا ہے
اس باعث عام شہریوں، بالخصوص نوجوان نسل کو اس مہلک لعنت سے وقتی تحفظ بھی حاصل ہوا ہے جو ایک مثبت پیش رفت ہے جس کے دور رس سماجی اثرات مرتب ہو سکتے ہیں
تاہم اس تصویر کا ایک دوسرا اور زیادہ حساس رخ بھی ہے
وہ افراد جو طویل عرصے سے نشے کے عادی تھے اب منشیات کی عدم دستیابی کے باعث شدید جسمانی اور ذہنی اذیت کا شکار ہیں
نشہ چھوٹنے کی یہ کیفیت اگر نظر انداز کی گئی تو یہ لوگ یا تو دوبارہ غیر قانونی راستوں کی طرف جائیں گے یا کسی اور تباہ کن عمل کا شکار ہو سکتے ہیں
یہی وہ نکتہ ہے جہاں حکومت اور محکمہ صحت کو پولیس کی اس کامیاب کارروائی کو ایک سنہری موقع میں بدلنا چاہیے
ضرورت اس امر کی ہے کہ نشے کے عادی افراد کو مجرم نہیں بلکہ مریض سمجھا جائے اور انہیں طبی و نفسیاتی امداد فراہم کی جائے تاکہ وہ مستقل طور پر معمول کی زندگی کی طرف لوٹ سکیں
حکومت کو چاہیے کہ ڈی ایچ کیو، ٹی ایچ کیو، آر ایچ سی اور بیسک ہیلتھ یونٹس میں خصوصی سیلز قائم کرے جہاں نشے کے عادی افراد کے لیے مکمل طبی سہولیات میسر ہوں
جہاں ان سیلز میں نہ صرف ضروری ادویات فراہم کی جائیں بلکہ ماہر ڈاکٹروں اور نفسیاتی معالجین کی خدمات بھی دستیاب ہوں جو ان افراد کی ذہنی بحالی اور نشے سے مستقل نجات میں مدد دے سکیں
اگر ریاست واقعی منشیات سے پاک معاشرہ چاہتی ہے تو محض سپلائی لائن توڑنا کافی نہیں بلکہ نشے کے شکار انسانوں کی بحالی بھی اسی جنگ کا لازمی حصہ ہے
۔قصور میں جاری کارروائیاں ایک مضبوط بنیاد فراہم کر چکی ہیں، اب ضرورت اس بنیاد پر ایک جامع اور انسانی فلاح پر مبنی پالیسی کھڑی کرنے کی ہے