Author: +9251

وزیر مملکت خزانہ ڈاکٹر عائشہ غوث پاشا نے کہا ہے کہ سرکاری کمپنیوں کے نقصانات ایک کھرب روپے سالانہ سے بھی زائد ہیں۔

وزارت خزانہ میں سرکاری کمپنیوں میں اصلاحات کے موضوع پر منعقدہ سیمینار سے خطاب کرتے ہوئے وزیر مملکت کا کہنا تھا کہ 200 سے زائد سرکاری کمپنیاں مختلف شعبوں میں کام کر رہی ہیں۔ کچھ کمپنیاں ’’کمپنیز ایکٹ‘‘اور کچھ پارلیمنٹ کے قانون کے تحت قائم ہیں ۔ انہوں نے کہا کہ کچھ کمپنیاں نقصانات میں ہیں ۔ سرکاری کمپنیوں کے نقصانات ایک کھرب روپے سالانہ سے زائد ہیں۔

وزیر مملکت کا کہنا تھا کہ نقصان میں چلنے والی سرکاری کمپنیاں بھی مالی خسارے کا باعث ہیں۔ سرکاری کمپنیاں عالمی معیار کے مطابق چلانا وقت کی ضرورت ہے ۔ حکومت وسائل پیدا کرنے پر بھر پور توجہ دے رہی ہے۔ اخراجات میں کمی اور خسارے کم کرنے پر توجہ دے رہے ہیں۔حکومت نے سرکاری کمپنیوں کے لیے نیا قانون تیار کیا ہے ۔

ڈاکٹر عائشہ غوث پاشا نے خطاب کرتے ہوئے کہا کہ اس سیمینار سے سرکاری کمپنیوں کی کارکردگی بہتر بنانے کے لیے اچھی سفارشات ملنے کی امید ہے.

نئے قانون کے تحت سرکاری کمپنیوں کی کارکردگی پر نظر رکھنے کے لیے وزارت خزانہ میں مانیٹرنگ یونٹ قائم کیا جائے گا۔ انہوں نے کہا کہ وزارت خزانہ سرکاری کمپنیوں کو کنٹرول کرنا نہیں چاہتی بلکہ ان کمپنیوں کے انتظامی اور مالی معاملات قانون کے مطابق چلنے میں دلچسپی رکھتی ہے۔

دنیا بھر کی معیشت پر نظر رکھنے والی ریٹنگ ایجنسیز فچ اور موڈیز کے مطابق پاکستان کو آئی ایم ایف سے قرض ملنے کے بعد مارکیٹ میں خاطر خواہ اعتماد آئے گا۔

ریٹنگ ایجنسیز فچ اور موڈیز کی آؤٹ لک رپورٹ میں کہا گیا ہے کہ پاکستان کو آئی ایم ایف سے ایک ارب 20کروڑ ڈالر ملنے کی امید ہے، آئی ایم ایف سے قرض ملنے کے بعد پاکستانی کرنسی اور بانڈز پر دباؤ کم کرنے میں مدد ملے گی۔

رپورٹ میں کہا گیا ہے کہ پاکستان کو آئی ایم ایف سے قرض ملنے کے بعد مارکیٹ میں خاطر خواہ اعتماد آئے گا اور آئی ایم ایف کی منظوری سے پاکستان کو کثیرالجہتی اداروں سے اضافی فنڈز کی راہیں کھلیں گی۔

ریٹنگ ایجنسیز کی آؤٹ لک رپورٹ میں کہا گیا ہے کہ رواں ماہ پاکستان کی کرنسی اور بانڈز پر ضرب لگی ہے، سیاسی غیر یقینی صورتحال کے سبب آئی ایم ایف مدد میں تاخیر ہو رہی ہے جس کی وجہ سے مقامی سرمایہ کاروں میں بھی بے چینی پائی جاتی ہے۔

رپورٹ کے مطابق پاکستانی حکومت سری لنکا کی طرح کے ڈیفالٹ کے خوف سے نکلنے کی کوشش کر رہی ہے، پاکستان ڈیفالٹ کا خوف دور کرنے کے لیے آئی ایم ایف، چین اور سعودی عرب سے امداد کے لیے کوشاں ہے۔

سپریم کورٹ نے اورسیز پاکستانیوں کے ووٹ ڈالنے سے متعلق عمران خا ن کی درخواست پراعتراضات ختم کردئیے۔

سپریم کورٹ کے جسٹس سجاد علی شاہ نے پی ٹی آئی کے چئیرمین عمران خان کی اوورسیز پاکستانیوں کے ووٹ ڈالنے سے متعلق درخواست پررجسٹرار آفس کے اعتراضات پر ان چیمبر سماعت کی۔

سپریم کورٹ نے عمران خان کی درخواست پررجسٹرار آفس کے اعتراضات ختم کردئیے۔ رجسٹرار سپریم کورٹ نے درخواست میں متعلقہ فورم پر نہ جانے اور براہ راست سپریم کورٹ آنے پراعتراضات عائد کئے تھے۔

عمران خان نے آئندہ انتخابات میں اوورسیز پاکستانیوں کو ووٹ ڈالنے کا حق دلوانے کے لئے کیلئے سپریم کورٹ میں درخواست دائر کر رکھی ہے۔

واضح رہے کہ: درخواست گزار کی جانب سے کہا گیا تھا کہ الیکشن کمیشن کو حکم دیا جائے کہ وہ نادرا کو فنڈز فراہم کرے اور نادرا اوورسیز پاکستانیوں کے لیے ووٹ ڈالنے کا باقاعدہ طریقہ کار بنائے۔

یاد رہے کہ رواں برس مئی میں پی ڈی ایم کی اتحادی حکومت نے قومی اسمبلی سے الیکشن ایکٹ 2017 میں ترمیم کا بل منظور کرایا تھا۔
اس بل کے تحت پی ٹی آئی حکومت میں الیکٹرانک ووٹنگ مشین اور اوورسیز پاکستانیوں کو ووٹنگ کا حق دینے کے حوالے سے کی گئی ترامیم ختم کردی گئی تھیں۔

.ڈی جی نیب لاہور شہزاد سلیم کی پبلک اکاؤنٹس کمیٹی میں طلبی کے خلاف درخواست پر سماعت کے دوران قائم مقام چیف جسٹس عامر فاروق نے ریمارکس دیے ہیں کہ پبلک اکاؤنٹس کمیٹی پبلک ڈومین میں وہی درخواست دیکھ سکتی ہےجو فنانس سے متعلقہ ہو۔

اسلام آباد ہائی کورٹ میں دوران سماعت قائم مقام چیف جسٹس عامر فاروق نے کہا کہ پی اے سی فنڈنگ اور فنانس سے متعلق بلائے تو کوئی ایشو نہیں ، سوال صرف اتنا ہے کہ اس معاملے میں پبلک اکاؤنٹس کمیٹی کا دائرہ اختیار ہے ؟ یہ کورٹ یہ پٹیشن سنتے ہوئے کیا کسی کو سزائے موت دے سکتی ہے ؟

نجی ٹی وی کے مطابق: ڈپٹی اٹارنی جنرل ارشد محمود کیانی نے دلائل دیتے ہوئے کہا کہ مفاد عامہ میں کوئی درخواست آئے تو پبلک اکاؤنٹس کمیٹی دیکھ سکتی ہے، جس پر قائم مقام چیف جسٹس نے ریمارکس دیے کہ پبلک اکاؤنٹس کمیٹی پبلک ڈومین میں وہی درخواست دیکھ سکتی ہےجو فنانس سے متعلقہ ہو ۔ ہر ادارے کی اپنی عزت ہے پارلیمنٹ ہو یا عدلیہ

ڈی جی نیب کے وکیل نے کہا کہ میرے کلائنٹ کو پی اے سی کے سامنے پیش ہونے میں کوئی ہچکچاہٹ نہیں۔ عدالت گزشتہ اجلاس کے میٹنگ منٹس پیش کرنے کی اجازت دے ، عدالت دیکھے کہ انہوں نے کس طرح سے جواب دیے ہیں۔ وکیل نے کہا کہ کل سپریم کورٹ میں جو پٹیشن منظور ہوئی، اس میں، میں بھی وکیل تھا۔ کل کی پٹیشن کے بعد سپریم کورٹ سے قابل سماعت کا معاملہ طے ہوگیا۔

عدالت کا کہنا تھا کہ نیب کو فنڈنگ کے معاملات میں اگر بلایا جاتا ہے تو کوئی حرج نہیں لیکن جہاں دائرہ اختیار کا ایشو ہو تو عدالت نے دیکھنا ہے۔ اکاؤنٹس کے علاوہ جو کر رہے ہیں کیا یہ ان کا دائرہ اختیار بنتا ہے یا نہیں ، قائم مقام چیف جسٹس نے ریمارکس دیے کہ لاہور ہائیکورٹ کی ججز اور وکلا کی لائبریری ہمارے ہاں سے بہتر ہے ۔

عدالت نے فریقین کو آئندہ سماعت پر درخواستیں قابل سماعت ہونے پر دلائل دینے کی ہدایت کرتے ہوئے قائم مقام چیئرمین نیب کی درخواست پر بھی سیکرٹری قومی اسمبلی و دیگر کو نوٹس جاری کردیے۔ عدالت نے طلبی کے لیے بلانے پر کوئی تادیبی کارروائی نہ کرنے کے حکم میں آئندہ سماعت تک توسیع کردی۔

عدالت نے چیئرمین نیب، ڈی جی نیب کی درخواستوں کے قابل سماعت ہونے اور طیبہ گل ہراسگی درخواست سننے کے پبلک اکاؤنٹس کمیٹی کے دائرہ اختیار سے متعلق دلائل طلب کرتے ہوئے کیس کی مزید سماعت 11 اگست تک ملتوی کردی۔

عوامی مسلم لیگ کے سربراہ شیخ رشید کا کہنا ہے کہ دو ووٹوں کی حکومت کےلئے واحد راستہ نیا الیکشن رہ گیا ہے۔

عوام مسلم لیگ کے رہنما شیخ رشید نے بیان میں کہا کہ لوگ مسائل میں مر رہے ہیں اورحکومت میڈیا میڈیا کھیل رہی ہے۔ دو ووٹوں کی حکومت کے لئے نئے الیکشن واحد راستہ رہ گیا ہے۔

2 ووٹوں کی حکومت کے لیے نیا الیکشن ہی واحد راستہ رہ گیا ہے۔لوگ مسائل میں مر رہے ہیں اور حکومت میڈیا میڈیا کھیل رہی ہے۔حکومت سپریم کورٹ کے بارے میں دھمکیاں اور نازیبا زبان استعمال کر رہی ہے۔آپ کو اثاثے بیچنے کی پڑی ہے جبکہ سٹاک ایکسچینج کریش ہو رہی ہے اور ڈالر 250 کا ہونے جارہا ہے

— Sheikh Rashid Ahmed (@ShkhRasheed) July 27, 2022

شیخ رشید کا مزید کہنا تھا کہ اقتدار حمزہ کا ختم ہوا ہے اورمشتعل فضل الرحمٰن ہورہے ہیں۔( ن) لیگ واضح طورپر دو گروپوں میں تقسیم ہونے جارہی ہے۔ ایک اقتدار سے چمٹے رہنے اور دوسرا الیکشن میں جانے کا حامی ہے۔ پی ڈی ایم کا سربراہی اجلاس شرمندگی کا انبار ہوگا۔

اقتدار حمزہ کا ختم ہوا ہے اور مشتعل فضل الرحمن ہو رہے ہے۔ن لیگ2 واضح گروپوں میں تقسیم ہونے جارہی ہے،ایک اقدار میں چمٹے رہنے اور دوسرا الیکشن میں جانے کا حامی ہے۔PDMکا سربراہی اجلاس شرمندگی کا انبار ہوگا۔بجلی 7روپے فی یونٹ اور مہنگی کر دی ہے۔گھی اور پیٹرول مزید مہنگا ہونے جارہا ہے

— Sheikh Rashid Ahmed (@ShkhRasheed) July 27, 2022

انہوں نے کہا کہ حکومت سپریم کورٹ کے بارے میں نازیبا زبان استعمال کررہی ہے اوردھمکیاں دے رہی ہے۔ آپ کو اثاثے بیچنے کی پڑی ہے جب کہ اسٹاک ایکسچینج کریش ہورہی ہے اورڈالرڈھائی سو روپے کا ہونے جارہا ہے۔ بجلی 7روپے فی یونٹ اور مہنگی کر دی ہے۔ جبکہ گھی اور پیٹرول مزید مہنگا ہونے جارہا ہے۔

چین نے سی پیک کے تمام منصوبوں کو محفوظ ، بہترین اور اعلی معیار کے مطابق آگے بڑھانے کیلیے پاکستان کے ساتھ کام کرنے کے عزم کا اعادہ کیا ہے تاکہ دونوں ممالک کے عوام اس سے بہتر استفادہ کر سکیں۔

بیجنگ میں بریفنگ کے دوران چین کی وزارت خارجہ کے ترجمان ژا لی جیان نے کہا کہ اس سلسلے میں دونوں ممالک کی قیادت کے درمیان جن امور پر اتفاق رائے ہوا تھا چین اس پر عملدرآمد کیلیے تیار ہے ، پاکستان اور چین نے سی پیک میں تیسرے فریق کی شمولیت ، میڈیا اور تھنک ٹینکس سے تبادلہ خیال اور سی پیک منصوبوں کو افغانستان تک توسیع دینے پر اتفاق کیا ہے۔

ایک ٹویٹ میں چین میں پاکستان کے سفیر معین الحق نے کہا کہ عالمی تعاون کے بارے میں سی پیک کے مشترکہ ورکنگ گروپ کے تیسرے اجلاس میں سی پیک کے اعلی معیار کے ترقیاتی کام پر زور دیا گیا ہے۔

وزیر اعلیٰ پنجاب چوہدری پرویزالٰہی آج پاکستان تحریک انصاف کے چیئرمین عمران خان سے ملاقات کریں گے۔

ذرائع کے مطابق پرویزالٰہی نے رات گئے وزیر اعلیٰ پنجاب کا حلف اٹھانے کے بعد اسلام آباد میں ہی قیام کرنے کا فیصلہ کیا ہے۔

ذرائع کا کہنا ہے کہ پرویزالٰہی صبح عمران خان سے ملاقات میں پنجاب میں اسپیکر،کابینہ اور دیگر اہم تقرریوں کے لیےمشاورت کریں گے۔اس کے علاوہ سیاسی اور عوامی مسائل پر ڈلیور کرنے کے لیے ٹاسک بھی طے کیے جائیں گے۔

ذرائع کے مطابق وزیراعلیٰ پنجاب پرویزالٰہی عمران خان سے ملاقات کے بعد آج دوپہر اسلام آباد سے واپس لاہور آئیں گے جس کے بعد وہ باضابطہ طور پر عہدے کا چارج سنبھالیں گے۔

واضح رہے کہ پرویز الہٰی نے وزیر اعلیٰ پنجاب کے عہدے کا حلف اٹھالیا۔

گورنر پنجاب کی جانب سے حلف لینے سے انکار کے بعد صدر مملکت عارف علوی نے مسلم لیگ ق کے رہنما چوہدری پرویز الٰہی سے حلف لیا۔

اس سے قبل چوہدری پرویز الٰہی حلف برداری کے لیے خصوصی طیارے کے ذریعے لاہور سے اسلام آباد پہنچے تھے۔