Author: +9251

اسلام آباد اور راولپنڈی میں پیر کی رات سے شروع ہونے والی طوفانی بارش کی وجہ سے نالہ لئی کی سطح میں خطرناک حد تک اضافہ ہوگیا ہے جبکہ نالہ لئی پر خطرے کے سائرن بھی بجا دیئے گئے ہیں۔

سماء کے مطابق: پانی کی سطح 15 فٹ تک پہنچ گئی ہے، پاک فوج کے دستے کسی بھی ہنگامی صورتحال سے نمٹنے کےلیے نالہ لئی پرموجود ہیں، ریسکیو 1122 کا عملہ بھی گوالمنڈی کے مقام پر نالہ لئی پر موجود ہے۔

واسا کا عملہ متحرک ہوگیا ہے، ایم ڈی واسا کا کہنا ہے کہ جڑواں شہروں میں 60 ملی میٹر بارش ریکارڈ کی جا چکی ہے، نالہ لئی میں کٹاریاں کے مقام پر پانی کا بہائو 12 فٹ جبکہ گوالمنڈی پل پر 9 فٹ ہے، شہر میں نشیبی علاقوں میں ہیوی مشینری پہنچا دی گئی ہے۔

محکمہ موسمیات نے آئندہ 24 گھنٹوں میں مزید بارش کی پیشگوئی کی ہے۔

قبل ازیں اسلام آباد، راول پنڈی سمیت ملک کے بیشتر علاقوں میں تیز ہواؤں کے ساتھ موسلادھار بارش سے جل تھل ایک ہوگیا۔ مری، وزیرآباد، گجرات سیالکوٹ اور دیگرشہروں میں بادل برس پڑے۔

محکمہ موسمیات نے آج بھی ملک کے اکثر علاقوں میں بادل برسنے کی پیشگوئی کی ہے، بارشوں کا سلسلہ مزید چند روز تک جاری رہنے کی پیش گوئی کی گئی ہے۔

حال ہی میں سابق وزیراعظم عمران خان برطانوی سفیر سے ملاقات کی ہے لیکن اس پر انہیں صحافتی اور سیاسی حلقوں میں کافی تنقید کا سامنا ہے۔

صحافی کامران یوسف کہتے ہیں کہ: عمران خان کہتے تھے کہ حزب اختلاف کے رہنماوں کا کیا کام ہے کہ وہ مغربی سفارت کاروں سے ملاقات کریں۔

عمران خان کی برطانیہ کے سفیر سے ملاقات۔
خان صاحب کہتے تھے اپوزیشن والوں کا کیا کام ہے مغربی سفارت کاروں سے ملنے کا

ویسے سفارت کاروں کا کام ہی یہی ہوتا ہے وہ الگ بات ہے کہ خان صاحب ملیں تو ٹھیک ان کے مخالفین ملیں تو سازش! pic.twitter.com/AQWDzFCFJP

— Kamran Yousaf (@Kamran_Yousaf) July 5, 2022

صحافی نے مزید کہا کہ: ویسے سفارت کاروں کا کام ہی یہی ہوتا ہے کہ وہ جس ملک میں بطور سفیر بھیجے گئے ان کے سیاستدانوں اور لوگوں کے ساتھ اچھے روابط بنائیں۔

ان کا کہنا تھا کہ: وہ الگ بات ہے کہ عمران خان ملیں تو ٹھیک ہے لیکن اگر ان کے مخالفین ملیں کسی سفارت کاروں سے ملاقات کرلیں تو سازش ہوگئی۔

پروفیسر طارق رحمانی کا خیال ہے کہ: ‏عمران خان ملک کی سب سے بڑی جماعت کے سربراہ اور ایک سابق وزیراعظم ہیں

ان سے سفارت کار کا ملنا سمجھ آتا ہے۔

انہوں نے مزید کہا کہ: عدم اعتماد کے دنوں میں امریکی سفارت کاروں کا ملک کے چھوٹے بڑے سیاستدانوں اور سزا یافتہ مجرم،  ملزم اور اداروں کے لوگوں سے ملنا سفارتی پروٹوکول کے خلاف تھا۔

ڈیرہ اسماعیل خان میں نئی سبزی منڈی موڑ پر نامعلوم افراد کی فائرنگ سے دو ٹریفک پولیس اہلکار جاں بحق ہوگئے۔

پولیس کے مطابق: ڈیرہ اسماعیل خان میں نئی سبزی منڈی کے مقام پر نامعلوم افراد نے دو ٹریفک پولیس اہلکاروں پر فائرنگ کردی جس سے وہ شدید زخمی ہوگئے۔

واقعے کی اطلاع ملنے پر ریسکیو اہلکاروں نے دونوں زخمی پولیس اہلکاروں کو اسپتال منتقل کیا جہاں وہ زخموں کی تاب نہ لاتے ہوئے جاں بحق ہوگئے۔

پولیس کے مطابق جاں بحق ہونے والوں میں ٹریفک آفیسر شوکت خان اورحبیب اللہ شامل ہیں۔

معروف صحافی اور ٹاک شوکیپٹل ٹاک کے میزبان حامد میرنے نجی ٹی وی جیو نیوزسے گفتگو کرتے ہوئے کہاکہ:تین چار سال پہلے جج ارشد ملک کی ایک ویڈیو ٹیپ آئی تھی جس پر ان کے خلاف کارروائی ہوئی اور انہیں نوکری سے فارغ کیاگیا، اس پر سپریم کورٹ نے بھی ایکشن لیا اوراس کیس میں عدالت کا فیصلہ بھی موجود ہے۔

سینئر صحافی کا کہنا تھا کہ : سپریم کورٹ کے فیصلے میں کہا گیا کہ جو آڈیو یا ویڈیو ہے اس کو قابل قبول بنانے کے لیے کیا کیا شرائط ہونی چاہئیں، اس فیصلے میں 21 شرائط لکھی گئی ہیں، اس میں اہم ترین شرط ہے کہ آڈیو یا ویڈیو ٹیپ جس نے ریکارڈ کی اسے عدالت میں بتانا ہوگا کہ یہ میں نے ٹیپ کی اور کیوں کی ہے، عدالتی فیصلے کے مطابق کسی بھی ٹیپ کو قابل قبول بنانے کے لیے اس کا فارنزک بھی ضروری ہے، اس کی ٹرانسکرپشن کو عدالت میں پیش کرکے میچ کیا جائے گا۔

انہوں نے کہا کہ :ٹیپس کے معاملے پر پی ٹی آئی کی لیڈر شپ کے مؤقف میں کافی تضاد ہے، شہباز گل ٹیپ کو جعلی قرار دے رہے ہیں جب کہ شیریں مزاری کہہ رہی ہیں کہ یہ ٹیپ سکیور لائن سے ریکارڈ کی گئی ہے مگر شیریں مزاری کا مطالبہ جائز ہےکہ بتایا جائے یہ کس نے ٹیپ کی ہے۔

حامد میر کا کہنا تھا کہ :اس کے علاوہ بھی ویڈیو ٹیپس کے بارے میں سن رہے ہیں، میرا خیال ہے وہ سامنے نہیں آئیں گی کیونکہ وہ سامنے لائی بھی جائیں تو آپ ان کو ٹی وی اسکرین پر پلے نہیں کرسکتے، جیسے جج ارشد ملک کی ویڈیو ٹیپ کے خلاف کارروائی ہوگئی لیکن وہ ٹی وی پر دکھانےقابل نہیں تھی۔

انہوں نے مزید کہا کہ: اس طرح کی کچھ ٹیپس آسکتی ہیں، کچھ میں نے بھی دیکھی ہیں جو عمران خان کی نہیں پی ٹی آئی کے کچھ صاحبان کی تھیں، جب میں نے وہ دیکھیں تو افسوس ہوا اور میرا خیال ہے کہ وہ ٹی وی اسکرین پر نہیں چل سکتیں۔

حامد میر کا جیو سے گفتگو میں کہنا تھا کہ: یہ ٹیپس آسکتی ہیں لیکن ان کی بنیاد پر کارروائی کا آگے بڑھنا کافی مشکل ہوگا۔

وزیراعظم شہباز شریف نے ایک بیان میں کہا ہے کہ معاشی حالات بہتر ہوتے ہی عوام کو مزید سہولیات فراہم کریں گے۔

وزیراعظم شہباز شریف نے سوشل میڈیا ہلیٹ فورم ٹوئٹر پر جاری کردہ ایک بیان میں کہا کہ: پہلے دن سےغریب ترین طبقے کو مشکل معاشی حالات کے اثر سےبچانا ہماری اولین ترجیح رہی ہے۔معاشی حالات بہتر ہوتے کے ساتھ ہی ہم عوام کومزیدسہولیات فراہم کریں گے۔

پنجاب میں ماہانہ 100 یونٹس استعمال کرنے والوں کو مفت بجلی فراہم کرنے کے فیصلے سے متعلق وزیراعظم کا کہنا تھا کہ وزیر اعلٰی پنجاب کا ماہانہ 100 یونٹس تک استعمال کرنے والےخاندانوں کے لیے بجلی کی مفت فراہمی کا اعلان نہایت خوش آئند ہے۔

وزیر اعظم کے اس بیان کے بعد ایک شہری آصف نے سوال کیا کہ: یہ ریلیف حکومت پاکستان پورے پاکستان میں کیوں نہیں دیتی ہے؟ کیا بلوچستان،خیبر پختونخواہ، سندھ، آزاد کشمیر، گلگت بلتستان اور اسلام آباد میں پاکستانی نہیں بستے پنجاب کے جن حلقوں میں ضمنی الیکشن ہورہے ہیں وہاں لوڈشیڈنگ نہیں ہورہی کیا باقی پاکستانیوں کا یہ حق نہیں ہے؟

یہ ریلیف حکومت پاکستان پورے پاکستان میں کیوں نہیں دیتی کیا بلوچستان کے پی سندھ آزاد کشمیر گلگت بلتستان اسلام آباد میں پاکستانی نہیں بستے پنجاب کے جن حلقوں میں ضمنی الیکشن ہورہے ہیں وہاں لوڈشیڈنگ نہیں ہورہی کیا باقی پاکستانیوں کا یہ حق نہیں ہے؟؟؟؟

— Asif Irfan (@asifirfanch) July 5, 2022

ایک اور صارف گوہر علی نے کہا: بجائے یہ سیاسی سٹںنٹس کرنے کے بجلی پر سبسڈی دو جو دو ماہ میں بجلی کی قیمتیں بڑھائیں ہیں اسکو کم کرو.