کراچی: معروف ٹک ٹاکر حریم شاہ کا شوہر بھتہ خوری اور منشیات فروشی میں ملوث برطرف سپاہی نکلا۔
تفصیلات کے مطابق حریم شاہ کے شوہر بلال شاہ کو جرائم پیشہ سرگرمیوں میں ملوث ہونے پر سندھ پولیس سے یکم اکتوبر 2021 کو برطرف کیا گیا۔حریم شاہ کے شوہر بلال شاہ کے خلاف اسپیشل برانچ نے خفیہ رپورٹ میں بھتہ جمع کرنے، منشیات فروشی، مساج سنٹر سے بھتہ وصول کرنے کا انکشاف کیا۔
بلال شاہ ڈیفینس 6 مسلم کمرشل اور خیابان بخاری میں شام کے اوقات سیاہ ویگیو گاڑی میں مختلف ہوٹلوں میں ہوتا تھا۔اسپیشل برانچ رپورٹ کے مطابق بلال شاہ کے موبائل فون کی لوکیشن اور انٹیلی جنس رپورٹ سے ثابت ہوا ہے کہ وہ جرائم پیشہ سرگرمیوں میں ملوث ہے ۔
ایس ایس پی عرفان زمان 21 ستمبر 2021 کو اسپیشل برانچ کی رپورٹ پر ایس ایس پی ہیڈر کواٹر عرفان زمان نے بلال شاہ کے خلاف انکوائری شروع کی۔
ایس ایس پی ہیڈ کوارٹر کی جانب سے بلال شاہ کو 3 شوکاز نوٹس بھیجے گئے لیکن اس کسی کا جواب نہیں دیا جس پر اسے ملازمت سے برطرف کیا گیا۔رپورٹ میں مزید دعویٰ کیا گیا ہے کہ بلا شاہ قیوم آباد کی کچی آبادی کا رہائشی ہے کچھ ماہ قبل ہی ڈیفینس میں رہائش اختیار کی۔بلال شاہ بطور کانسٹیبل بلال ہاؤس میں رہا جس پر اس نے اپنی تصاویر کئی اہم شخصیات کے ساتھ بنوائیں۔
پولیس افسران بھی اس بات پر حیران ہیں کہ بلال شاہ کے پاس ویگیو، مہنگی گھڑی کہاں سے آئی اور بلال شاہ کے شاہانہ اخراجات پر بھی پولیس افسران کو تشویش تھی۔ خیال رہے کہ حریم شاہ نے 28 جون کو پی پی پی رہنما سے شادی کا دعویٰ کیا تھا۔حریم شاہ نے اگرچہ پیپلز پارٹی کے رہنما سے شادی کا دعویٰ کیا تھا لیکن انہوں نے کسی بھی صوبائی وزیر یا رکن اسمبلی کا نام نہیں لیا تھا۔
ان کے دعوے کے بعد پیپلز پارٹی کے بعض رہنماوں کے ساتھ سوشل میڈیا پر ان کی تصاویر شیئر کی گئیں، جس کے بعد رکن اسمبلی سید ذوالفقار علی شاہ، صوبائی وزیر سعید غنی، تیمور ٹالپر اور مرتضیٰ وہاب نے بھی ٹک ٹاک اسٹار سے متعلق اپنی خبروں کو مسترد کیا تھا۔بعدازاں حریم شاہ نے اعتراف کیا کہ ان کی شادی کسی صوبائی وزیر سے نہیں بلکہ بلال شاہ نامی شخص سے ہوئی۔
