Author: +9251

کراچی: وزیر اطلاعات سندھ سعید غنی اور وزیر بلدیات سندھ سید ناصر حسین شاہ کی چیرمین پی ایس پی مصطفٰی کمال کی رہائش گاہ آمد۔

تفصیلات کے مطابق وزیر اطلاعات سندھ سعید غنی اور وزیر بلدیات سندھ سید ناصر حسین شاہ کی چیرمین پی ایس پی مصطفٰی کمال کی رہائش گاہ پہنچے ۔ اور صوبائی وزراء نے مصطفٰی کمال کے بھائی کے انتقال پر ان سے تعزیت کی۔ صوبائی وزراء نے مرحوم کے ایصال ثواب و مغفرت کے لئے فاتحہ خوانی بھی کی۔
اللہ رب العزت مرحوم کو جنت الفردوس میں اعلی مقام عطا فرمائے اور اہل خانہ صبر جمیل عطا فرمائے آمین۔

کراچی : وزیر اعلیٰ سندھ کے مشیرِ زراعت منظور حسین وسان سے چین کے قونصل جنرل لی بی جیان نے ملاقات کی۔اس موقع پر نائب قونصل ڈینگ ھائی ڑیاو Deng Haixiaoاور چائنا مشینری انجینئرنگ کارپوریشن کے نائب جنرل مینیجر ڈائے باؤ Bao Dai بھی ان کے ہمراہ تھے۔اس موقع پر باہمی دلچسپی کے امور اور تعلقات کے مزید استحکام پر بات چیت ہوئی۔
گفتگو کے دوران منظور حسین وسان نے کہا کہ چین اور پاکستان کی دوستی پہاڑوں سے بلند و مضبوط اور سمندروں سے زیادہ گہری ہے۔انہوں نے کہا کہ چین نے زندگی کے تمام شعبوں میں بے مثال ترقی کی ہے۔ہم زرعئی شعبے میں چین کے تجربات سے استفادہ کرنا چاہتے ہیں تاکہ اپنی زرعئی معیشت کو مستحکم کرسکیں۔انہوں نے کہا کہ سندھ حکومت جدید زرعئی مشینری و آلات اور تازہ ترین زرعئی تحقیق میں تبادلے سے زرعئی معیشت کو بہتر بنانا چاہتی ہے اورسندھ کی زراعت کو جدید خطوط پر استوار کرنے میں چینی معاونت کا خیر مقدم کیا جائے گا۔
انہوں نے بتایا کہ ہم زرعئی پیداور کی ویلو ایڈیشن کے جدید طریقوں کو اپنا رہے ہیںاور زرعئی پیداوار کی کولڈ اسٹوریج اور ٹرانسپورٹیشن کے نظام کو بہتر بنانا چاہتے ہیں۔انہوں نے کیا کہ آب پاشی کے مفید نظام کے لئے جدید طریقوں کا استعمال سندھ حکومت کی ترجیح ہے۔انہوں نے کہا کہ سماجی و معاشی ترقی کے ضمن میں چین کے تجربات بہت قیمتی ہیں۔انہوں نے سندھ میں سرمایہ کاری کے مختلف امکانات کی نشاندھی کرتے ہوئے کہا کہ سندھ حکومت زراعت ، کاشتکاری، آب پاشی، کولڈ اسٹوریج اور دیگر تمام شعبوں میں چینی سرمایہ کاری کا خیر مقدم کرے گی۔
اس موقع پر چینی قونصل جنرل نے سندھ حکومت اور مشیر زراعت کی کارکردگی کو سراہا اور کہا کہ چین توانائی، زراعت اور دیگر شعبوں میں پاکستان کے ساتھ تعاون جاری رکھے گا انہوں نے کہا کہ سی پیک منصوبہ پاکستان اور چین کے تعلقات کا اہم ترین مظہر ہے۔اس موقع پر مشیرِ زراعت سندھ منظور حسین وسان نے کہا کہ سندھ کے آم، امرود، کھجور، سرخ مرچ اور دیگر پھل اور سبزیاں بہترین برآمدی معیار کی حامل ہیں اور سندھ حکومت چینی سرمایہ کاروں کو ہر ممکن سہولیات مہیا کرے گی۔
انہوں نے کہا کہ بڑھتی ہوئی ابادی کے پیش نظر خوراک کی ضروریات کو پورا کرنے کے لئے جدید زرعی طریقوں کا استعمال ضروری ہے۔مشیر زراعت منظور وسان نے خیر پور اسپیشل اکنامک زون میں زرعئ شعبے کے حوالے سے سرمایہ کاری مواقعوں سے آگاہ کیا۔اس موقع پر مشیر زراعت سندھ منظور حسین وسان نے معزز مہمانوں کو سندھ ٹوپی اور اجرک کے ثقافتی تحفے بھی پیش کئے۔انہوں نے معزز مہمانوں کو خیر پور کی اہم ترین زرعی پیداوار کھجور بھی پیش کی۔چینی قونصل جنرل نے دونوں ملکوں کے مابین مختلف شعبوں میں تعلقات بڑھانے پر اتفاق کیا۔مشیرِ زراعت سندھ منظور حسین وسان نے کہا کہ سندھ کی ثقافت ہزاروں سال قدیم ہے۔منظور وسان نے کہا کہ موہنجو ڈارو 5 ہزار سال پہلے دنیا کا تہذیب یافتہ ترین شہر تھا ۔

کراچی: آسٹریلیا کرکٹ بورڈ کا 4 رکنی وفد بدھ کو نیشنل اسٹیڈیم کراچی کا دورہ کرے گا۔

تفصیلات کے مطابق گزشتہ شب پاکستان پہنچنے والا وفد آسٹریلوی کرکٹ ٹیم کے دورہ پاکستان کے سلسلے میں کراچی کے بعد اسلام آباد اور لاہور میں بھی کرکٹ، سیکیورٹی، لاجسٹک اور کوویڈ 19 کی صورتحال کا جائزہ لے گا۔

سیکیورٹی ماہرین پر مشتمل وفد 13 اور 14 دسمبر کو پاکستان اور ویسٹ انڈیز کے درمیان کراچی میں شیڈول میچز کا بھی جائزہ لے گا۔ مقامی انتظامیہ اور پی سی بی حکام کی جانب سے بریفنگ دی جائے گی۔

بورڈ کے ڈائریکٹر انٹرنیشنل کرکٹ ذاکر خان اور ڈائریکٹر سیکیورٹی کرنل (ر) آصف موجود ہوں گے۔ دورے کے اختتام پر مہمان سیکیورٹی وفد اپنی رپورٹ کرکٹ بورڈ آسٹریلیا کو پیش کرے گا۔

رپورٹ کی روشنی میں آسٹریلوی کرکٹ ٹیم کے آئندہ سال مارچ، اپریل میں دورہ پاکستان کا فیصلہ ہوگا۔ آسٹریلیا کے دورہ پاکستان میں تین ٹیسٹ، اتنے ہی ایک روزہ انٹرنیشنل اور ایک ٹی ٹونٹی میچ کھیلا جانا ہے۔

واضح رہے کہ 1998ء کے بعد پہلی بار آسٹریلوی ٹیم پاکستان کا دورہ کرے گی۔

کراچی : کراچی میں انٹرنیشنل کرکٹ کی بہار کا انتظار ہونے لگا جب کہ ویسٹ انڈیز سے ہوم سیریز کیلیے11وائٹ بال کرکٹرز منگل کی شام تک مقامی ہوٹل میں رپورٹ کریں گے۔

پاکستانی ٹیسٹ اسکواڈ اس وقت بنگلادیش میں موجود ہے، دوسری طرف کراچی میں ویسٹ انڈیز کیخلاف وائٹ بال میچز کی تیاری جاری ہے، نیوزی لینڈ اور انگلینڈ کے پاکستان میں کھیلنے سے انکارپر انٹرنیشنل کرکٹ کی بحالی کا سفر جاری رکھنے کیلیے کسی غیر ملکی ٹیم کی آمد انتہائی اہمیت کی حامل تھی۔

ماضی میں بھی مشکل وقت میں پاکستان کا ساتھ دینے والے کیریبیئنز کے اگرچہ چند اسٹار کرکٹرز دورے پر نہیں آ رہے، مگر اس کے باوجود موجودہ صورتحال میں محدود اوورز کی کرکٹ کے یہ مقابلے غیر اہم نہیں سمجھے جا سکتے،نیشنل اسٹیڈیم میں سجنے والے اس میلے کو شائقین کی بھرپور توجہ حاصل ہونے کی امید ہے، سیریز کیلیے کراچی میں منگل سے رونق لگنا شروع ہوجائے گی ۔
پہلے مرحلے میں پاکستان میں موجود 11کرکٹرز منگل کی شام تک مقامی ہوٹل میں رپورٹ کریں گے، ان میں نائب کپتان شاداب خان،فخرزمان، آصف علی،حیدر علی،افتخار احمد، خوشدل شاہ، حارث رؤف،وسیم جونیئر، شاہنواز دھانی،محمد حسنین اور عثمان قادر شامل ہیں اس وقت بارش زدہ ڈھاکا ٹیسٹ میں شریک بابر اعظم،محمد رضوان، محمد نواز اور شاہین شاہ آفریدی جمعرات کی شام ساڑھے 6بجے کراچی پہنچ کر اسکواڈ کو جوائن کرلیں گے۔

ویسٹ انڈیز سے صرف ون ڈے سیریز کیلیے منتخب امام الحق اور سعود شکیل کے ساتھ ریزرو پلیئر عبداللہ شفیق بھی بنگلادیش میں ہیں،تینوں کپتان اور دیگر کھلاڑیوں کے ساتھ کراچی میں رپورٹ کریں گے۔

ٹیم ذرائع کے مطابق کیریبیئنز سے ٹی ٹوئنٹی اور ون ڈے سیریز کیلیے منتخب تمام کھلاڑی ایک ساتھ بایوببل کا حصہ بنیں گے، بنگلادیش سے واپس آنے والے پلیئرز میں سے سرفراز احمد ڈراپ ہوگئے جبکہ حسن علی کو آرام دیا گیا ہے، اظہر علی، فواد عالم، کامران غلام، فہیم اشرف،محمد عباس، بلال آصف، نعمان علی، ساجد خان، زاہد محمود اور نسیم شاہ صرف بنگلادیش سے ٹیسٹ سیریز کیلیے ٹیم کا حصہ تھے،ان تمام کو وطن واپسی پر گھروں میں وقت گزارنے کا موقع ملے گا۔

دوسری جانب ویسٹ انڈین اسکواڈ کی ایئرپورٹ آمد صبح ساڑھے 10 بجے ہوجائے گی،مہمان کرکٹرز، معاون اسٹاف عملہ اور بنگلادیش سے آنے والے مہمان کرکٹرز کا صرف ایک روز کا قرنطینہ ہوگا، اس دوران کورونا ٹیسٹ رپورٹ کا منفی آنا بھی ضروری ہے۔

جمعے کو دونوں اسکواڈ کی بھرپور مشقوں کا آغاز ہوجائے گا،سیریز کے انتظامات مکمل کرنے کا سلسلہ بھی زوروشور سے جاری ہے، میچز کے میزبان نیشنل اسٹیڈیم میں صفائی ستھرائی اور تزئین و آرائش کا کام ہونے لگا، پریکٹس اور میچ پچز کی تیاری مکمل ہورہی ہے۔

ذرائع کے مطابق شائقین کو بھرپور تفریح کا موقع فراہم کرنے کیلیے سپورٹنگ پچز تیار کرنے کی ہدایت کردی گئی، کیوریٹرز پْرامید ہیں کہ موسم گرم نہ ہونے کی وجہ سے ان کو مطلوبہ معیار کی پچز فراہم کرنے میں آسانی ہوگی۔

یاد رہے کہ پاکستان اور ویسٹ انڈیز کے مابین 3ٹی ٹوئنٹی میچز کی سیریز کا پہلا مقابلہ 13دسمبر کو ہوگا،دوسرا معرکہ 14اور تیسرا 16دسمبر کو شیڈول ہے۔پہلا ون ڈے 18دسمبر کو کھیلا جائے گا، دوسرا 20اور تیسرا 22دسمبر کو ہوگا۔