Author: +9251

اسلام آباد: یوٹیلیٹی اسٹورز پر مختلف برانڈز کے گھی کی قیمتوں میں فی کلو 40 سے 109 روپے جبکہ 10 لیٹر کے کین پر 1090 روپے تک کا اضافہ کردیا گیا۔

ذرائع کے مطابق یوٹیلیٹی اسٹورز پر مہنگائی کا نیا طوفان برپا کردیا گیا ہے، اور مختلف برانڈز کے گھی کی قیمتوں میں 40 سے 1090 روپے تک کا اضافہ کردیا گیا ہے۔ اس حوالے سے نوٹیفکیشن بھی جاری کردیا گیا ہے، جب کہ قیمتوں میں اضافے کا اطلاق فوری ہوگا۔

یوٹیلیٹی اسٹورز پر ملنے والے ڈالڈا گھی کی فی کلو قیمت میں 109 روپے اور 10 لیٹر کین میں 1090 روپے کا ہوشربا اضافہ کیا گیا ہے، جس کے بعد ڈالڈا گھی کا 10 لیٹر کا کین 2500 روپے سے بڑھ کر 3590 روپے کا ہوگیا ہے۔ اسی طرح میزان گھی کے 10 لیٹر ٹن کی قیمت میں 475 روپے کا اضافہ کیا گیا ہے، جس کے بعد میزان گھی کے 10 لیٹر ٹن کی قیمت 2885 سے بڑھا کر 3360 روپے مقرر کی گئی ہے۔

یوٹیلیٹی اسٹورز پر 5 لیٹر پلانٹا کوکنگ آئل کی قیمت میں 463 روپے کا اضافہ کیا گیا ہے، جب کہ من پسند کوکنگ آئل کی قیمت 465 روپے تک بڑھا دی گئی ہے، جس کے بعد من پسند 5 لیٹر کوکنگ آئل ٹن کی قیمت 1245 سے بڑھ کر 1710 روپے ہوگئی ہے۔

کراچی :20 کلو آٹے کا تھیلا 1500 روپے کا ہوگیا ،اطلاعات کے مطابق ادارہ شماریاتکراچی کے شہری ملک میں سب سے مہنگا آٹا خریدنے پر مجبور ہیں۔

ادارہ شماریات کی جانب سے جاری اعداد و شمار کے مطابق کراچی میں آٹے کا 20 کلو کا تھیلا 1500 روپے تک ہے اور کراچی میں یہ تھیلا پنجاب سے 400 روپے تک مہنگا ہے۔

ادارہ شماریات نے بتایا کہ پنجاب کے تمام بڑے شہروں میں آٹے کے تھیلا 1100 روپے تک ہے جبکہ پنجاب میں آٹا دیگر صوبوں کے مقابلے میں سب سے زیادہ سستا ہے۔

ادارہ شماریات کا کہنا ہے کہ حیدر آباد میں 1460 اور سکھر میں آٹے کا تھیلا 1340روپے تک ہے، لاڑکانہ میں آٹے کا تھیلا 1320روپے تک میں فروخت ہورہا ہے۔

ادارہ شماریات کے مطابق خضدار میں آٹے کے تھیلے کی قیمت 1400 روپے تک ہے جبکہ کوئٹہ میں 1380 روپے اورپشاور میں آٹا تھیلے کی قیمت 1100 روپے تک ہے۔ادارہ شماریات کا کہنا ہے کہ اسلام آباد اور راولپنڈی میں آٹے کا تھیلا 1100 روپے تک کا ہے۔

ادھر یوٹیلٹی اسٹورز پر مختلف اشیا کی قیمتیں پھر بڑھ گئیں، کپڑے دھونےکے 2 کلو پاؤڈرکی قیمت میں بھی 10 سے 21 روپے تک کا اضافہ ہوا ہے، باڈی لوشن کی 100 گرام قیمت 20 روپےتک بڑھ گئی ہے۔

جوتے چمکانے والی 42 ملی گرام کریم کی قیمت میں 10 روپے ،کپڑوں کے لیے 500 ملی لیٹر لیکوئڈ بلیچ کی قیمت میں 20 روپے اور ایک لیٹر ٹائلٹ کلینرکی قیمت 41 روپے تک بڑھادی گئی ۔

مختلف برانڈز کے شیمپوز کی 180 ملی لیٹر قیمت میں 4 روپے،نہانے کے صابن کی 60 گرام قیمت میں 15 روپے ، ہینڈ واش کی 228ملی لیٹر قیمت میں 9 روپے ،شربت کی 800 ملی لیٹر بوتل کی قیمت میں 40 روپے اضافہ ہوگیا۔

اچارکی 300 گرام قیمت 20 سے 44 روپے تک بڑھا دی گئی ہے ، نوڈلز اور کیڑے مار ادویات ، ڈش واش سمیت متعدد اشیائے ضروریہ بھی مہنگی کردی گئی ہیں ۔

ترجمان کا کہنا ہے کہ اوپن مارکیٹ میں قیمتوں میں اضافے کا اثریوٹیلٹی اسٹورزپربھی پڑاہے

وفاقی وزیر داخلہ شیخ رشید نےکہا ہےکہ ڈائریکٹر جنرل انٹرسروسز انٹیلی جنس (ڈی جی آئی ایس آئی) کی تعیناتی کے حوالے سے معاملات طے ہیں، اعلان اگلے7 دن تک ہوسکتا ہے۔

ایک نجی ٹی وی میں گفتگو کرتے ہوئے شیخ رشید نےکہا کہ احتیاط کے طور پر7 دن کا کہہ رہاہوں، اعلان ایک دو دن میں بھی ہوسکتا ہے، لوگ جلدی گھبرا جاتے ہیں، عمران خان نے پارلیمانی پارٹی کو اعتماد میں لیا ہے۔

وزیر داخلہ کا کہنا تھا کہ آج جمعہ ہے اگلے جمعے تک سب ٹھیک ہوجائےگا، معاملات طے ہوچکے ہیں ، طریقہ کار کا اعلان 7 دن میں ہوجائےگا، ہوسکتا ہےکل اعلان ہو جائے یا پیرکو ہوجائے ، اگلے جمعے تک سب ٹھیک ہوجائےگا۔

شیخ رشید کا کہنا تھا کہ میری زندگی میں ایسے معاملات لاتعداد آئے ہیں، عمران خان کے ساتھ آیا ہوں اور اسی کے ساتھ جاؤں گا، بعض باتوں کاجواب عمران خان ہی دے سکتے ہیں ، مجھے اندازہ ہے لیکن کیاکرنا ہے فیصلہ عمران خان کا ہوگا، عمران خان نے کہا کہ ان کی باجوہ صاحب سے ملاقات ہوئی اور معاملات طے ہوگئے ہیں۔

ان کا کہنا تھا کہ عمران خان کی خوش قسمتی ہےکہ انہیں ایسی ناکارہ اپوزیشن ملی ہے، حکومت کا چوتھا سال ہے ، اس سال کارکردگی دکھانی ہے ، پانچواں سال تو الیکشن کا ہوتا ہے، پاکستان میں کوئی الیکشن ایسانہیں جس پر دھاندلی کاالزام نہ لگاہو، اپوزیشن سیاسی باتیں کرے، الیکٹرونک ووٹنگ پر آج ہم قانون سازی کردیں، الیکشن کمیشن عمل درآمدکا پابند ہے۔

لاہور:ایشیا کرکٹ کپ 2023کی میزبانی کون کرے گا:نام سامنے آگیا ،اطلاعات کے مطابق پاکستان کو 2023ایشیا کرکٹ کپ کی میزبانی مل گئی ہے۔

دبئی میں آج ایشین کرکٹ کونسل(اے سی سی ) کا اجلاس ہوا جس میں چیئرمین پی سی بی رمیز راجہ اور بھارتی کرکٹ بورڈ کے صدر سارو گنگولی کی بھی ملاقات ہوئی جبکہ گنگولی نے راجہ کو آئی پی ایل کا فائنل دیکھنے کی بھی دعوت دی۔

2022 کے ایشیا کرکٹ کپ کی میزبانی سری لنکا کو دیدی گئی ہے جو کہ ٹی 20فارمیٹ کی بنیاد پر کھیلا جائے ۔ایشین کرکٹ ٹیمیں 2023میں پاکستان میں کھیلنے آئیں گی جبکہ یہ فیصلہ دبئی میں اے سی سی کے اجلاس میں کیا گیا۔

ذرائع نے بتایا ہےکہ چیئرمین پی سی بی رمیز راجہ کی آج وطن واپسی شیڈول ہے، رمیز راجہ نے اماراتی ، بنگلا دیشی اور سری لنکن کرکٹ حکام سے بھی سائیڈ لائنز پر ملاقاتیں کی ہیں۔