Author: +9251

واشنگٹن :کورونا وائرس سے متعلق عالمی ادارہ صحت جتنے چاہیں اشتہارت فیس بک پر چلا سکتے ہیں ،فیس بک کے بانی مارک زکر برگ نے عالمی ادارہ صحت کو کورونا وائرس سے متعلق غلط خبریں روکنے کے لیے مفت اشتہارات کی پیشکش کردی۔

مارک زکر برگ کا اپنی پوسٹ میں کہنا تھا کہ ہم ڈبلیو ایچ او کو ان کی ضرورت کےمطابق مفت اشتہارات کا موقع دے رہے ہیں جس کا مقصد کورونا وائرس سے متعلق درست معلومات کی ترسیل ہےانہوں نے کہا کہ کورونا وائرس سے متعلق عالمی ادارہ صحت جتنے چاہے اشتہارت فیس بک پر چلا سکتا ہے۔

سی ای او کے مطابق ایسے افراد کوبلاک کیا جائے گا جو اشتہارات کا ناجائز استعمال کریں گے، مثال کے طور پر کسی نے اپنی پروڈکٹ کے حوالے سے دعویٰ کیا ہو کہ اس کے استعمال سے مرض ٹھیک ہوجائے گا تو اسے بلاک کردیا جائے گا۔

خیال رہے کہ گزشتہ دنوں ایسے بھی واقعات سامنے آئے ہیں جن میں کئی پروڈکٹس کے حوالے سے دعویٰ کیا گیا تھا کہ ان کے استعمال سے کورونا وائرس سے بچا جاسکتا ہے۔اس حوالے سے فیس بک نے حکمت عملی بنالی ہے جس کا مقصد صارفین کو درست و تصدیق شدہ معلومات کی فراہمی، غلط معلومات یا اطلاعات کو روکنا اور تصدیق شدہ اعداد وشمار پیش کرنا ہے۔

صارفین فیس بک پر ’کورونا وائرس‘ لکھیں گے تو ان کے سامنے ایک پوپ اپ آئے گا جس سے انہیں عالمی ادارہ صحت یا مقامی ہیلتھ اتھارٹی کی جانب سے تصدیق شدہ تازہ ترین معلومات فراہم کی جائیں گی۔خیال رہے کہ گزشتہ دنوں فیس بک نے بھی کورونا وائرس کے باعث سالانہ ڈیویلپر کانفرنس منسوخ کردی ہے جبکہ یہ کانفرنس رواں برس مئی میں امریکی ریاست کیلیفورنیا کے شہر سان ہوزے میں ہونا تھی۔

یاد رہے کہ چین کے شہر ووہان سے پھیلنے والے مہلک کورونا وائرس سے چین میں اب تک 2981 افراد ہلاک ہوچکے ہیں جبکہ متاثرہ افراد کی تعداد 80 ہزار 282 ہے جس میں سے 50 ہزار افراد صحتیاب ہوچکے ہیں۔چین کے علاوہ کورونا وائرس 60 سے زائد ممالک میں پھیل چکا ہے جہاں اب تک 240 افراد زندگی کی بازی ہار چکے ہیں جبکہ سب سے زیادہ ہلاکتیں ایران، اٹلی اور جنوبی کوریا میں ہوئی ہیں۔

اٹلی :اٹلی میں کورونا وائرس سے مزید 28 افراد جاں بحق ، ہلاکتیں 100 سے تجاوز کرگئیں ، رپورٹس کے مطابق یورپی ملک اٹلی میں کورونا وائرس سے مزید 28 افراد ہلاک ہوگئے جس کے بعد تعداد 100 سے تجاوز کرگئی۔

اٹلی کے سول پروٹیکشن ایجنسی کے مطابق گزشتہ 24 گھنٹوں کے دوران مزید 587 افراد میں کورونا وائرس کی تشخیص ہوئی ہے جس کے بعد مجموعی تعداد 3 ہزار 89 تک جاپہنچی ہے۔ایجنسی کا کہنا ہے کہ کورونا وائرس سے مزید 28 افراد ہلاک ہوئے ہیں جس کے ساتھ ہی مرنے والوں کی تعداد 107 ہوگئی ہے۔

اٹلی میں ہلاکتوں اور نئے کیسز کی تصدیق کے بعد ملک بھر کے تعلیمی ادارے 15 مارچ تک بند کردیے گئے ہیں۔وزیر تعلیم کا تعلیمی ادارے بند کرنے کے فیصلے پر کہنا تھا کہ حکومت کے لیے یہ فیصلہ مشکل تھا۔

دوسری جانب اطالوی حکومت کی جانب سے ہیلتھ ایڈوائرزی جاری کرنے کا امکان ہے جس میں عوام سے اگلے 30 دن تک طرزِ زندگی میں تبدیلی کا کہا جائے گا۔ایڈوائزری میں عوام سے گلے ملنے، ہاتھ ملانے اور بڑے اجتماعات سے دور رہنے کا کہا جائے گا۔

یاد رہے کہ چین کے شہر ووہان سے پھیلنے والے مہلک کورونا وائرس سے چین میں اب تک3ہزارسے زائد افراد ہلاک ہوچکے ہیں جبکہ متاثرہ افراد کی تعداد 80 ہزار 282 ہے جس میں سے 50 ہزار افراد صحتیاب ہوچکے ہیں۔چین کے علاوہ کورونا وائرس 67 سے زائد ممالک میں پھیل چکا ہے جہاں اب تک 240 افراد زندگی کی بازی ہار چکے ہیں جبکہ سب سے زیادہ ہلاکتیں ایران، اٹلی اور جنوبی کوریا میں ہوئی ہیں۔

کھٹمنڈو:جانوروں کی آپس میں محبت کا دردناک واقعہ : نیپال میں ایک دوسرے کو بچانے کی کوشش میں 13 بندر ڈوب کر ہلاک،اطلاعات کےمطابق نیپال میں ایک بندر کے تالاب میں گر جانے کے بعد اسے بچانے کی کوشش میں یکے بعد دیگرے جانے والے 12 بندر بھی ڈوب کر ہلاک ہوگئے۔

عالمی خبر رساں ادارے کے مطابق نیپال کے ایک گاؤں میں رات بھر ہونے والی بارشوں کے باعث تالاب کی سطح میں غیر معمولی اضافہ ہوگیا تھا اور اس دوران وہاں پانی پینے کی کوشش میں ایک بندر تالاب میں گر گیا جسے بچانے کے لیے یکے بعد دیگرے درجن سے زائد بندروں نے چھلانگیں لگائیں تاہم ایک دوسرے کو بچانے کی کوشش میں ایک بھی بندر باہر نکلنے میں کامیاب نہیں ہوسکا۔

گورکھا میونسپل ادارے نے امدادی کاموں کا آغاز کرتے ہوئے تالاب سے 13 جنگلی بندروں کی لاشیں نکالی ہیں۔ اس تالاب میں بندروں کے ڈوبنے کا 6 ماہ کے اندر یہ دوسرا بڑا واقعہ ہے اس سے قبل اسی تالاب میں ایک ہی وقت میں 16 بندر ڈوب کر ہلاک ہوگئے تھے۔شہریوں نے مقامی انتظامیہ سے بندروں کی حفاظت کے لیے فوری طور پر ضروری اقدامات اُٹھانے کا مطالبہ کرتے ہوئے کہا کہ جانوروں کے تحفظ کے لیے خاطر خواہ انتظامات نہیں کیے گئے ہیں۔

ٹینیسی :امریکا میں 24 افراد ہلاک ، درجنوں زخمی ، ایمرجنسی نافذ کردی گئی ا،طلاعات کےمطابق امريکا میں بڑے پیمانے پرہلاکتیں ہوئی ہیں اوربڑی تعداد میں لوگ زخمی بھی ہوگئے ہیں، ادھرریاست کے مختلف علاقوں میں ایمرجنسی نافذ کردی گئی ہے

عالمی خبر رساں ادارے کے مطابق امریکی ریاست ٹینیسی کے شہر نیش ول میں زور دار طوفانی بگولوں سے بڑے پیمانے پر جانی و مالی نقصان ہوا ہے، سبک رفتار بگولوں نے اپنے درمیان آنے والی ہر چیز کو تہس نہس کرکے رکھ دیا جس کے نتیجے میں مجموعی طور پر 24 سے زائد ہلاکتیں ہوئیں، درجنوں زخمی ہیں اور متعدد شہری لاپتہ ہیں۔

طوفانی بگولوں سے 140 عمارتوں کو شدید نقصان پہنچا اور زیادہ تر ہلاکتیں بھی گھروں کی چھتیں اور دیواریں گرنے سے ہوئیں۔ گھروں کے ملبے سے لاشیں ملنے کا سلسلہ تاحال جاری ہے۔ ہزاروں شہری بے گھر ہوگئے ہیں جب کہ بجلی کا نظام بھی درہم برہم ہو گیا ہے۔

متاثرہ افراد کے لیے عارضی پناہ گاہیں قائم کردی گئی ہیں جہاں شہریوں کو قیام و طعام کے علاوہ طبی امداد بھی فراہم کی جارہی ہے۔ ٹینیسی کے گورنر نے متاثرہ علاقوں میں ہنگامی حالت نافذ کرنے کا اعلان کیا ہے جب کہ امریکی صدر بھی متاثرہ علاقوں کا دورہ کریں گے۔