کوئٹہ :چیف جسٹس آف بلوچستان ہائی کورٹ کے لیے قرعہ جسٹس جمال خان مندوخیل کے نام نکل آیا ، اطلاعات کے مطابق صدر مملکت ڈاکٹرعارف علوی نے جسٹس جمال خان مندوخیل کو بلوچستان ہائیکورٹ (بی ایچ سی) کا نیا چیف جسٹس تعینات کرنے کی منظوری دے دی۔
ذرائع کے مطابق جسٹس جمال خان مندوخیل کی بلوچستان ہائی کورٹ میں بطور چیف جسٹس تعیناتی کا اطلاق 5 اکتوبر سے ہوگا۔واضح رہے کہ 4 اکتوبر کو بلوچستان ہائی کورٹ کی چیف جسٹس طاہرہ صفدر کی مدت پوری ہوجائے گی۔چیف جسٹس طاہرہ صفدر پاکستان میں ہائی کورٹ کی پہلی خاتون چیف جسٹس ہیں جنہوں نے گزشتہ برس حلف اٹھایا تھا۔
بلوچستان ہائی کورٹ کے نئے چیف جسٹس جمال خان مندوخیل کی تعیناتی کے ساتھ ہی ان کی بائیوگرافی بھی اس وقت بڑی تیزی سے زیر نظر ہے ، تفصیلات کےمطابق نئے چیف جسٹس بلوچستان ہائی کورٹ 12 نومبر 1961 کو کوئٹہ میں پیدا ہوئے اور ان کے بیٹے صنعت کار ہیں۔
خاندانی ذرائع کے مطابق بلوچستان ہائی کورٹ کے نئے جسٹس جمال خان مندوخیل نے اپنی ابتدائی تعلیم فیڈرل گورنمنٹ ہائی اسکول کوئٹہ کینٹونمنٹ سے حاصل کی اور بلوچستان یونیورسٹی کے شعبہ پولیٹیکل سائنس اور شعبہ اقتصادیات سے ماسٹرزکیے۔
جسٹس جمال خان مندوخیل نے قانون کی ڈگری 1987 میں یونیورسٹی لا کالج کوئٹہ سے حاصل کی اور 1988 میں بطور وکیل اپنی پیشہ وارانہ زندگی کا آغاز کیا۔بعدازاں وہ 31 مئی 1990 کو ہائی کورٹ اور12 مئی 2001 کو سپریم کورٹ کے وکیل مقرر ہوئے۔اس کے علاوہ نئے چیف جسٹس جمال خان مندوخیل سپریم کورٹ بار ایسوسی ایشن کے لائف ٹائم ممبر بھی بنے۔
جسٹس جمال خان مندوخیل 4 مرتبہ جون 2011، مارچ 2013، جون 2013 اور دسمبر 2013 میں قائم مقام چیف جسٹس کا حلف اٹھایا۔ دوسری طرف جسٹس جمال خان مندوخیل کے بارے میں غیر جانبدار حلقوں کا کہنا ہے کہ بہت قابل اور ایماندار جج ہیں اور وہ بلوچستان میں نظام عدل کی بہتری کے لیے اپنا کردار بھرپور انداز سے ادا کریںگے
