Author: +9251

قندوز : افغان طالبان کی طرف سے کل کیا جانے والا حملہ اس قدر شدید تھا کہ اس حملے کے نتیجے میں‌آخری اطلاعات آنے تک 67 سے زائد افغان کٹھ پتلی ، امریکی اور اتحادی فوج اپنی جانوں سے ہاتھ دھو بیٹھے ہیں‌اور یہ بھی اطلاعات ہیں کہ اتوار کی صبح تک بعض علاقوں میں‌لڑائی جاری ہےاور افغان طالبان نے قندوز کے بہت سے علاقے پر اپنا قبضہ مستحکم کرلیا ہے ،

افغان صدر اشرف غنی کے ترجمان صدیق صدیقی نے بھی اس بات کی تصدیق کردی ہے کہ ہفتے اور اتوار کی درمیانی شب افغان طالبان نے شہر پر کئی سمتوں سے حملہ کیا تھا ،افغان طالبان کے قندوز پر حملے کے بعد سرکاری فورسز سے ان کی شدید لڑائی اور فائرنگ کا تبادلہ ہوا، حملے کے ساتھ ہی شہر کی بجلی معطل ہو گئی اور شہری گھروں میں محصور ہو گئے، جب کہ ٹیلی فونز اور رابطے کے دیگر ذرائع بھی معطل ہوگئے۔

افغان میڈیا کے مطابق قندوز میں ہونے والے دھماکے میں اب تک 31 اہلکاروں کی ہلاکت کی تصدیق ہوچکی ہے،جبکہ درجنوں فوجی ابھی تک لاپتہ ہیں، دوسری جانب افغان طالبان کے ترجمان ذبیح اللہ مجاہد نے بھی دھماکے کی ذمہ داری قبول کرتے ہوئے کہا کہ یہ دھماکہ خودکش حملہ تھا جو ہم نے کیا اور اس کی ذمہ داری بھی قبول کرتے ہیں۔افغان طالبان کی طرف سے 67 سے زائد فوجیوں کی ہلاکت کا دعویٰ کیا جارہا ہے.

واشنگٹن : افغانستان میں افغانیوں کو قتل کرنے کی دھمکی دینے والے ڈونلڈ ٹرمپ کے اپنے ملک میں‌فتنوں اور پرتشدد مظاہروں میں 26 سے زائد افراد ہلاک ہوگئے ہیں، اطلاعات یہی ہیں کہ امریکی صدر ڈونلڈ ٹرمپ کوفائرنگ کے واقعے سے آگاہ کر دیا گیا ہے۔

ابھی تازہ واقعہ میں امریکی ریاست ٹیکساس کے شہر اوڈیسا میں فائرنگ سے 5 افراد ہلاک اور 3 پولیس اہل کاروں سمیت 21 زخمی ہوگئے۔پولیس کے مطابق حملہ آور کو گولی مار کر ہلاک کر دیا گیا۔ حملہ آور سفید فام ہے جس کی عمر لگ بھگ تیس برس تھی حملہ آور نے فائرنگ کا آغاز ٹریفک سگنل پر پولیس اہل کار کو نشانہ بناکر کیا اور پھر پوسٹل سروس کی وین ہائی جیک کرکے فرار ہوگیا۔اطلاعات کے مطابق دیگر ریاستوں سے بھی ہلاکتوں کی خبریں موصول ہورہی ہیں

پولیس کے مطابق وین ڈرائیو کرنے کے دوران ملزم نے اندھا دھند فائرنگ کی اور بعد میں پولیس کے ساتھ فائرنگ کے تبادلے میں مارا گیا۔اس سے پہلے پولیس کا کہنا تھا کہ حملہ آور وں کی تعداد 2 ہے۔ جنہوں نے اوڈیسا اور مڈلینڈ شہروں میں فائرنگ کی تاہم اب کہا گیا ہے کہ حملہ آور ایک ہی تھا۔امریکی صدر ٹرمپ نے واقعے پر گہری تشویش کا اظہار کرتے ہوئے کہا ہے کہ قانون نافذ کرنے والے ادارے اپنا کام کررہے ہیں

بیجنگ : امریکہ اور چین کے درمیان کشیدگی بڑھنے لگی ، اطلاعات کے مطابق چین کی وزارت دفاع کے ترجمان نے امریکہ کو جزیرہ تائیوان کو اسلحے کی فروخت کی بابت خبردار کیا ہے۔

چینی وزارت دفاع کے ترجمان رن گوا چینگ نے بیجنگ میں ایک انٹرویو میں کہا کہ امریکہ، تائیوان کو اسلحے کی ترسیل کے نتائج کا ذمہ دار ہے اور اسے اس اقدام کے نتائج قبول کرنا پڑیں گے۔

بیجنگ سے چینی وزارت خارجہ کے مطابق چین کی وزارت دفاع کے ترجمان نے کہا کہ حزیرہ تائیوان کو امریکہ کی جانب سے اسلحے کی فروخت، چین کے داخلی امور میں واشنگٹن کی سنجیدہ مداخلت شمار ہوتی ہے اور یہ متحدہ چین کے اصول کے منافی ہے۔

وزارت دفاع کے ترجمان رن گوا چینگ نے تاکید کے ساتھ کہا کہ واشنگٹن کو جزیرہ تائیوان کو دوارب ڈالر کے اسلحے کی فروخت کو فورا روک دینا چاہئے۔ بیجنگ نے اس سے پہلے بھی امریکہ کو خبردار کیا تھا کہ اگر وہ تائیوان کو جنگی طیارے بیچےگا تو اسے چین کے جوابی اقدام کا سامنا کرنا پڑے گا۔

یہ بھی خبریں گردش کررہی ہیں‌کہ امریکہ نے جزیرہ تائیوان کی ساٹھ سے زیادہ ایف سولہ جنگی طیاروں کی خریداری کی درخواست منظور کر لی ہے۔ حکومت چین نے بارہا اعلان کیا ہے کہ وہ تائیوان کی خودمختاری قبول نہیں کرے گا۔چین ، تائیوان کو اپنا اٹوٹ حصہ سمجھتا ہے۔

واشنگٹن : امریکی صدر ڈونلڈ ٹرمپ نے اعلان کیا ہے کہ واشنگٹن اور افغان طالبان کے درمیان اب تک کوئی سمجھوتہ نہیں ہوسکا ہے۔امریکی صدر ڈونالڈ ٹرمپ نے اعلان کیا کہ قطر میں امریکہ اور طالبان کے نمائندوں کے درمیان اتفاق رائے حاصل نہیں ہو سکا ہے

دوسری طرف امریکی صدر نے دعوی کیا کہ افغان طالبان اور امریکی نمائندوں کے درمیان اب تک کی بات چیت اچھی رہی ہے۔ اس سے قبل افغان طالبان کے ترجمان ذبیح اللہ مجاہد نے اعلان کیا تھا کہ قطر میں افغان طالبان اور امریکہ کے درمیان ہونے والے مذاکرات میں کوئی پیشرفت نہیں ہوسکی ہے۔

یاد رہے کہ امریکہ اور افغان طالبان کے درمیان مذاکرات کا نواں دور ایسے عالم میں جاری ہے کہ ان مذاکرات میں اب تک کوئی کامیابی حاصل نہیں ہوئی ہے۔

تہران :ایران کے دشمن یاد رکھیں کہ انہوں نے ذرا بھی غلطی کی تو منہ توڑ جواب دیں‌گے ، ایران کی بری فوج کے کمانڈر نے کہا ہے کہ ملک کی مسلح افواج جارحیت کی صورت میں دشمن کو منھ توڑ جواب دیں گی۔بریگیڈیئر جنرل کیومرث حیدری کا کہنا تھا کہ پچھلے عشروں کے دوران دشمن نے متعدد بار علاقے میں قدم رکھنے کی کوشش کی لیکن ایران کی مسلح افواج کی طاقت اور تسلط نے دشمن کو قدم جمانے کا موقع نہیں دیا۔

ایرانی میڈیا کے مطابق ایران کی بری فوج کے کمانڈر نے ایرانی عوام کے خلاف ظالمانہ اقتصادی پابندیوں کو عالمی سامراجی طاقتوں کی اسلامی نظام سے دشمنی کا نتیجہ قرار دیتے ہوئے کہا کہ دشمن کو اس سے کچھ حاصل نہیں ہوگا۔

تہران سے ذرائع کےمطابق بریگیڈیئر جنرل کیومرث حیدری نے خبردار کیا کہ اگر ایرانی بحری جہازوں کو دنیا بھر میں کہیں بھی روکا گیا تو تہران جوابی اقدم سےگریز نہیں کرے گااور دشمن کی گستاخی کا اسی شدت کے ساتھ جواب دیا جائےگا۔