Author: +9251

بھارتی میڈیا نے دعویٰ کیا ہے کہ انڈیا نے پاکستان سے خالصتان کی حامی تنظیم سکھ فار جسٹس پر پابندی عائد کرنے کا مطالبہ کیا ہے.

باغی ٹی وی کی رپورٹ کے مطابق انڈیا نے مذکورہ تنظیم پر 10 جولائی کو پابندی لگائی تھی. بھارتی میڈیا کا کہنا ہے کہ کرتارپور راہداری کے حوالہ سے پاکستانی حکام سے مذاکرات کے دوران انڈیا نے یہ معاملہ اٹھایا ہے. ہندوستانی وفد کی قیادت کرنے والے وزارت داخلہ کے جوائنٹ سکریٹری ایس سی ایل داس نے میڈیا سے گفتگو کرتے ہوئے کہا کہ انڈیا اس مطالبہ پر مضبوطی سے قائم ہے ۔

بھارتی میڈیا کا یہ بھی کہنا ہے کہ پاکستان نے اسے یقین دلایا ہے کہ اس کی سرزمین انڈیا مخالف سرگرمیوں کیلئے استعمال نہیں‌ ہو گی اور یہ کہ وہ نیویارک میں واقع اور پاکستان میں بھی مبینہ طور پر سرگرم تنظیم ’سکھ فار جسٹس‘ پر پابندی عائد کرنے کے بھارتی مطالبہ پر نوٹس لے گا۔ بھارتی میڈیا کا کہنا ہے کہ کرتار پور راہداری مذاکرات سے ایک دن قبل گوپال سنگھ چاولہ کو کرتار پور راہداری سے متعلق سرکاری پینل سے ہٹادیا لیکن چاولہ کی جگہ ایک نئے رکن امیر سنگھ کو پینل میں جگہ دی ہے ۔ بھارتی میڈیا نے دعویٰ کیا ہے کہ انڈیا نے چاولہ کو پینل میں رکھنے کی مخالفت کی تھی جس پر اسے اسے پینل سے ہٹایا گیا.

واضح رہے کہ بھارتی وزارت خارجہ کی جانب سے چند ماہ قبل امریکہ، کینیڈا، آسٹریلیا اور یوروپین یونین ممالک کو خطوط ارسال کئے گئے تھے جس میں مطالبہ کیا گیا تھا کہ سکھ کمیونٹی ریفرنڈم 2020 کی آڑ میں بھارت کو توڑنے کی سازش کر رہی ہے لہذا سکھ فار جسٹس نامی تنظیم پر پابندی عائد کی جائے.

بحر احمر میں سمندری حیات اور ساحلی علاقوں کو شدید خطرہ لاحق ہو گیا.

تفصیلات کے مطابق یمن میں حکومت نے ایک بار پھر بحر احمر میں تیل کے ضخیم رساؤ کے حوالے سے خبردار کیا ہے۔ اس کی وجہ حوثیوں کا ایک تیل بردارجہاز کی مرمت کے کام میں رکاوٹیں ڈالنا ہے۔ جہاز میں دس لاکھ بیرل سے زیادہ خام تیل لدا ہوا ہے۔

یمنی کابینہ کی پریذیڈنسی کی جانب سے ٹویٹر پر ایک معلوماتی وڈیو پوسٹ کی گئی ہے۔ وڈیو میں باور کرایا گیا ہے کہ مذکورہ آفت کے جنم لینے پر سمندری زندگی اور ساحل کے کنارے واقع ممالک کو ایک بڑے خطرے کا سامنا ہو گا۔

علاوہ ازیں یہ بھی بتایا گیا ہے کہ یمنی حکومت کئی بار اقوام متحدہ سے مخاطب ہو کر مطالبہ کر چکی ہے کہ حوثی ملیشیا پر دباؤ ڈالا جائے تا کہ راس عیسی کی بندرگاہ پر موجود "صافر” آئل ٹینکر کا معائنہ اور اس کی مرمت ممکن بنائی جا سکے۔
ماہرین کا کہنا ہے کہ "صافر” آئل ٹینکر میں موجود تقریبا 15 لاکھ بیرل تیل کا رساؤ جاری رہا تو اس کے نتیجے میں جنم لینے والی اقتصادی اور ماحولیاتی تباہی کی پرچھائیاں نہ صرف یمن بلکہ پڑوسی ممالک پر بھی پڑیں گی۔

امریکہ کے شہر نیو یارک اور مین ہیٹن میں بجلی کے بریک ڈاؤن کے باعث متعدد علاقے تاریکی میں ڈوب گئے، جس سے نظام زندگی مفلوج ہو کر رہ گیا۔

تفصیلات کے مطابق امریکا ایک بار پھر تاریکی میں ڈوب گیا.نیویارک سٹی فائر بریگیڈ حکام کے مطابق ویسٹ ایونیو کے علاقے میں ٹرانسفارمر کو لگنے والی آگ سے علاقے میں ہزاروں صارفین بجلی سے محروم ہو گئے۔حکام کا کہنا ہے کہ بجلی کی بندش سے سب ویز،بڑے کاروباری مراکز، اور تھیٹرز بھی اندھیرے میں ڈوب گئے۔ جبکہ گھریلو صارفین اور کاروباری مراکز کی بجلی ترجیحی بنیادوں پر جزوی طور پر بحال کر دی گئی ہے۔بجلی کا نظام معطل ہونے پر مین ہیٹن اور اس سے ملحقہ علاقوں کے رہائشی گھروں سے باہر نکل آئے، جس کے باعث مرکزی شاہراہوں پر ٹریفک کا دباؤ بڑھ گیا۔
بجلی کے بریک ڈاؤن کے باعث ٹائم اسکوائر کے بڑے تشہیری بورڈز بھی تاریکی میں ڈوب گئے جبکہ ٹریفک سگنلز بھی بند ہو گئے۔اس سے قبل 1977ء میں نیویارک کو اس طرح کے بریک ڈاؤن کا سامنا کرنا پڑا تھا، جب شہر کا بیشتر حصہ تاریکی میں ڈوب گیا تھا۔نیویارک سٹی کے گورنر آندریو کومو کا کہنا ہے کہ بجلی کے بریک ڈاؤن کے دوران کسی کے زخمی ہونے کی اطلاع نہیں ملی۔ تاہم یہ واقعہ ناقابل قبول ہے۔