Author: Aqsa Younas Rana


کولمبیا کے صدر گستاوو پیٹرو نے امریکی صدر ڈونلڈ ٹرمپ کی دھمکیوں کے جواب میں سخت موقف اختیار کرتے ہوئے ہتھیار اٹھانے کا اعلان کیا ہے۔
صدر گستاوو پیٹرو نے سوشل میڈیا پلیٹ فارم ایکس پر جاری بیان میں کہا کہ اگر امریکی صدر کی جانب سے دھمکیوں کا سامنا کرنا پڑا تو وہ وطن کے دفاع کے لیے ہتھیار اٹھانے پر مجبور ہوں گے۔ ان کا کہنا تھا کہ انہوں نے ماضی میں ہتھیار نہ اٹھانے کی قسم کھائی تھی، لیکن اگر ملک کی سلامتی کو خطرہ ہوا تو وہ اس فیصلے پر نظرِ ثانی کرنے کے لیے تیار ہیں۔
‎یہ بیان ایسے وقت میں سامنے آیا ہے جب امریکا نے ہفتے کے اختتام پر فوجی کارروائی کے ذریعے پڑوسی ملک وینزویلا کے صدر نکولس مادورو کو حراست میں لینے کا دعویٰ کیا ہے، جس کے بعد خطے میں کشیدگی میں اضافہ دیکھا جا رہا ہے۔
‎واضح رہے کہ امریکی صدر ڈونلڈ ٹرمپ نے حال ہی میں کولمبیا کے صدر کو خبردار کرتے ہوئے سخت زبان استعمال کی تھی اور انہیں توہین آمیز انداز میں ایک “بیمار آدمی” قرار دیا تھا۔ صدر ٹرمپ کا کہنا تھا کہ کولمبیا کی قیادت منشیات کی تیاری اور امریکا کو کوکین کی فراہمی میں دلچسپی رکھتی ہے، لیکن یہ سلسلہ زیادہ دیر تک جاری نہیں رہ سکے گا۔
‎ایک موقع پر صدر ٹرمپ سے سوال کیا گیا کہ کیا وہ کولمبیا کے خلاف امریکی فوجی کارروائی کی بات کر رہے ہیں، جس پر انہوں نے کہا کہ موجودہ کولمبیائی حکومت کے خلاف فوجی آپریشن کے امکان کا سن کر انہیں اچھا لگا۔
‎صدر پیٹرو نے اپنے بیان میں کہا کہ کولمبیا کی انسدادِ منشیات پالیسی مضبوط ہے، تاہم انہوں نے اس بات پر زور دیا کہ فوجی طاقت کے استعمال کی بھی ایک حد ہوتی ہے اور مسائل کا حل طاقت کے بجائے سمجھداری سے نکالا جانا چاہیے۔


غزہ میں تباہ شدہ عمارتیں شہریوں کے لیے جان لیوا خطرہ بنتی جا رہی ہیں۔ بارش کے بعد ایک کمزور اور لرزتی عمارت گر گئی، جس کے نتیجے میں دو فلسطینی جان سے ہاتھ دھو بیٹھے۔ علاقے میں پہلے ہی درجنوں عمارتیں شدید بمباری کے باعث غیر محفوظ ہو چکی ہیں۔
رپورٹس کے مطابق سردی میں اضافے نے خیموں میں رہنے والے خاندانوں کی مشکلات مزید بڑھا دی ہیں۔ بارش اور کم درجۂ حرارت کے باعث بچوں، بزرگوں اور بیمار افراد کے لیے حالات نہایت سخت ہو گئے ہیں۔
‎ادھر مغربی کنارے میں اسرائیلی فورسز نے مختلف علاقوں میں چھاپے مارے، جن کے دوران خاتون صحافی سمیت درجنوں فلسطینیوں کو حراست میں لے لیا گیا۔ اس دوران اتوار کو اسرائیلی فائرنگ سے شہید ہونے والے نوجوان کی تدفین میں ہزاروں افراد نے شرکت کی، جہاں فضا سوگ اور غصے سے بھری رہی۔
‎اسرائیلی میڈیا کے مطابق وزیراعظم نیتن یاہو کی حکومت نے غیرقانونی یہودی آباد کاروں کو بھاری ہتھیار فراہم کرنے کا فیصلہ کیا ہے، جس سے علاقے میں کشیدگی مزید بڑھنے کا خدشہ ظاہر کیا جا رہا ہے۔

‎پاکستان اور چین نے افغانستان میں سرگرم دہشت گرد تنظیموں کے خلاف واضح اور قابلِ تصدیق اقدامات کا مطالبہ کیا ہے اور کہا ہے کہ افغان سرزمین کسی بھی ملک کے خلاف استعمال نہیں ہونی چاہیے۔
‎یہ بات دونوں ممالک کے مشترکہ اعلامیے میں کہی گئی ہے، جو پیر کے روز پاکستان اور چین کے وزرائے خارجہ کے اسٹریٹجک ڈائیلاگ کے ساتویں مرحلے کے اختتام پر جاری کیا گیا۔ اس وقت پاکستان کے وزیرِ خارجہ اسحاق ڈار دو روزہ دورے پر بیجنگ میں موجود ہیں۔
‎اعلامیے کے مطابق بات چیت کے دوران دونوں ممالک نے دوطرفہ تعلقات اور مختلف شعبوں میں تعاون پر تفصیل سے غور کیا۔ ان شعبوں میں اسٹریٹجک اور سیاسی روابط، دفاع اور سلامتی، معیشت، تجارت، سرمایہ کاری اور ثقافتی روابط شامل تھے۔
‎پاکستان اور چین نے اس بات پر اتفاق کیا کہ اسٹریٹجک رابطوں کو مزید مضبوط کیا جائے، باہمی اعتماد بڑھایا جائے اور مشترکہ مفادات کا تحفظ کیا جائے۔ دونوں ممالک نے خطے اور خطے سے باہر امن، ترقی اور خوشحالی کے فروغ کے عزم کا بھی اعادہ کیا۔
‎مشترکہ اعلامیے میں کہا گیا ہے کہ افغانستان میں موجود تمام دہشت گرد تنظیموں کے خاتمے کے لیے مزید واضح اور قابلِ تصدیق اقدامات ضروری ہیں، کیونکہ یہ گروہ نہ صرف خطے بلکہ عالمی سلامتی کے لیے بھی ایک سنگین خطرہ بنے ہوئے ہیں۔