Author: Aqsa Younas Rana

‎ملک بھر میں سونے کی قیمت میں کمی کا رجحان دیکھا گیا ہے جس کے بعد فی تولہ سونا ایک ہزار روپے سستا ہو گیا، جس سے خریداروں کے لیے قدرے آسانی پیدا ہوئی ہے۔
‎آل پاکستان جیمز اینڈ جیولرز ایسوسی ایشن کے مطابق حالیہ کمی کے بعد فی تولہ سونے کی قیمت کم ہو کر 4 لاکھ 67 ہزار 262 روپے تک آ گئی ہے، جو گزشتہ دنوں کے مقابلے میں واضح کمی ظاہر کرتی ہے۔
‎اسی طرح 10 گرام سونے کی قیمت میں بھی 858 روپے کی کمی ریکارڈ کی گئی ہے اور یہ اب 4 لاکھ 601 روپے میں فروخت ہو رہا ہے، جس سے زیورات کی خریداری کرنے والوں کو کچھ ریلیف ملا ہے۔
‎عالمی سطح پر بھی سونے کی قیمت میں کمی دیکھنے میں آئی ہے جہاں فی اونس سونا 10 ڈالر کم ہو کر 4445 ڈالر تک آ گیا ہے، جس کے اثرات براہ راست مقامی مارکیٹ پر بھی مرتب ہو رہے ہیں۔
‎ماہرین کے مطابق عالمی مارکیٹ میں قیمتوں میں اتار چڑھاؤ، ڈالر کی قدر اور معاشی غیر یقینی صورتحال جیسے عوامل سونے کی قیمتوں پر اثر انداز ہوتے ہیں، اور یہی وجہ ہے کہ مقامی مارکیٹ میں بھی قیمتوں میں کمی واقع ہوئی ہے۔
‎تجزیہ کاروں کا کہنا ہے کہ اگر عالمی مارکیٹ میں یہی رجحان برقرار رہا تو آنے والے دنوں میں سونے کی قیمتوں میں مزید کمی کا امکان بھی موجود ہے۔

‎وفاقی حکومت نے ملک بھر میں اسمارٹ لاک ڈاؤن نافذ کرنے کا فیصلہ کر لیا ہے جبکہ اس حوالے سے مکمل پلان تیار کر لیا گیا ہے اور اس کا باضابطہ اعلان کل متوقع ہے۔
‎ذرائع کے مطابق بازار رات ساڑھے 9 بجے بند کیے جائیں گے جبکہ شادی ہالز کو رات 10 بجے تک محدود رکھنے کی تجویز دی گئی ہے۔ شادی تقریبات میں ون ڈش اور زیادہ سے زیادہ 200 افراد کی اجازت ہوگی۔
‎حکومت کی جانب سے توانائی اور فیول کی بچت کے لیے ہائبرڈ ورکنگ پالیسی بھی متعارف کرانے کی تیاری کی گئی ہے، جسے ابتدائی طور پر ایک ماہ کے لیے نافذ کیا جائے گا۔
‎سرکاری دفاتر میں ہفتے کے تین دن حاضری اور دو دن آن لائن کام ہوگا جبکہ سروسز دفاتر میں چار دن دفتر اور دو دن آن لائن کام کرنے کا شیڈول تجویز کیا گیا ہے۔ دفاتر میں 50 فیصد اسٹاف روٹیشن سسٹم کے تحت کام کرے گا۔
‎آن لائن حاضری کے لیے باقاعدہ مانیٹرنگ سسٹم قائم کیا جائے گا اور ہر افسر کے لیے کم از کم 65 فیصد حاضری لازمی قرار دی جائے گی۔ ہفتہ وار آڈٹ بھی لازم ہوگا۔
‎پرائیویٹ دفاتر کو بھی 50 فیصد آن لائن ورکنگ اپنانے کی ہدایت دی جائے گی تاکہ آمدورفت اور بجلی کے استعمال میں کمی لائی جا سکے۔
‎گاڑیوں کے استعمال پر بھی سخت پابندیاں عائد کرنے کی تجویز ہے، جس کے تحت سرکاری گاڑیوں کا نجی استعمال ممنوع ہوگا اور خلاف ورزی پر گاڑی ضبطی اور فیول ریکوری جیسے اقدامات کیے جائیں گے۔
‎توانائی بچت کے تحت صبح 10:30 بجے سے پہلے اے سی کے استعمال پر پابندی ہوگی جبکہ 60 دن کے اندر 50 فیصد دفاتر کو سولر توانائی پر منتقل کرنے کی ہدایت دی گئی ہے۔
‎تعلیمی اداروں میں ہفتے کے تین دن آن لائن اور تین دن فزیکل کلاسز کا نظام متعارف کرایا جائے گا، جبکہ ابتدائی طور پر مزید 15 دن مکمل آن لائن کلاسز کا امکان بھی ظاہر کیا گیا ہے۔
‎مزید برآں حکومت ٹیکس نظام میں بھی تبدیلی پر غور کر رہی ہے، جس میں انٹرنیٹ اور ٹیلی فون ٹیکس میں کمی جبکہ پراپرٹی اور گاڑیوں کی خرید و فروخت پر ٹیکس میں اضافہ شامل ہے۔ ٹول ٹیکس میں 50 روپے اضافے اور ریلوے ٹکٹوں پر 15 فیصد رعایت کی تجویز بھی زیر غور ہے۔
‎حکام کا کہنا ہے کہ ان اقدامات کا مقصد توانائی بحران پر قابو پانا اور معیشت کو مستحکم کرنا ہے۔

‎پاکستان بھر میں فضائی سفر کرنے والے مسافروں کو کرایوں میں نمایاں اضافے کا سامنا ہے کیونکہ جیٹ فیول کی قیمتوں میں غیر معمولی اضافہ ہوا ہے۔ اگرچہ بنیادی ٹکٹ قیمتیں برقرار رکھی گئی ہیں، لیکن فیول سرچارج نے مجموعی اخراجات کو کافی بڑھا دیا ہے۔
‎جیٹ فیول کی قیمت 176 روپے فی لیٹر سے بڑھ کر 417 روپے فی لیٹر تک پہنچ گئی ہے، جس کے باعث خدشہ ظاہر کیا جا رہا ہے کہ فضائی سفر عام افراد کی پہنچ سے مزید دور ہو سکتا ہے۔
‎ایئرلائنز نے بنیادی کرایوں میں تبدیلی نہیں کی، لیکن فیول ایڈجسٹمنٹ کے باعث ٹکٹ کی مجموعی قیمتوں میں نمایاں اضافہ ہو گیا ہے۔
‎پاکستان انٹرنیشنل ایئرلائن (پی آئی اے) کے ترجمان کے مطابق کئی ایئرلائنز نے فیول سرچارج کے ذریعے کرایوں میں 100 فیصد تک اضافہ کیا ہے، جبکہ تمام ایئرلائنز نے اپنی قیمتوں میں ایندھن کی بنیاد پر ردوبدل کیا ہے۔
‎پی آئی اے نے مختلف روٹس پر نئے سرچارجز نافذ کر دیے ہیں۔ اندرون ملک پروازوں پر 10 ڈالر اضافی چارج کیا جا رہا ہے، جبکہ بین الاقوامی پروازوں پر اس سے زیادہ اضافہ دیکھنے میں آیا ہے۔
‎کینیڈا جانے والی پروازوں پر 100 ڈالر تک، برطانیہ کے لیے 75 ڈالر اور سعودی عرب و دیگر خلیجی ممالک کے لیے 50 ڈالر تک اضافی چارجز عائد کیے گئے ہیں۔
‎نجی ایئرلائنز نے بھی اسی رجحان کو اپناتے ہوئے ٹکٹوں پر 15 سے 150 ڈالر تک اضافی فیس عائد کر دی ہے، جو مختلف روٹس اور ایئرلائنز کے حساب سے مختلف ہے۔

‎وزیراعظم شہباز شریف نے کہا ہے کہ ہر شہری کو اپنا گھر فراہم کرنا حکومت کی اولین ترجیح ہے اور اس مقصد کے لیے آسان شرائط پر قرضوں کی فراہمی کو یقینی بنایا جائے گا۔
‎اسلام آباد میں وزیراعظم کی زیر صدارت ہاؤسنگ اور تعمیراتی شعبے میں سرمایہ کاری کے فروغ سے متعلق ایک اہم اجلاس منعقد ہوا جس میں مختلف تجاویز پر غور کیا گیا۔
‎اجلاس میں تعمیرات اور ہاؤسنگ سیکٹر پر قائم ٹاسک فورس اور ورکنگ گروپس نے اپنی سفارشات پیش کیں جبکہ کم لاگت گھروں کی فراہمی اور اس شعبے میں روزگار کے مواقع بڑھانے پر بھی تفصیلی بات چیت کی گئی۔
‎وزیراعظم نے کہا کہ تعمیراتی سرگرمیوں میں تیزی سے نہ صرف رہائشی مسائل حل ہوں گے بلکہ ملک میں لاکھوں نئے روزگار کے مواقع بھی پیدا ہوں گے۔
‎انہوں نے اس عزم کا اظہار کیا کہ سمندر پار پاکستانیوں اور غیر ملکی سرمایہ کاروں کا اعتماد بحال کیا جائے گا اور ان کی سرمایہ کاری کو مکمل تحفظ فراہم کیا جائے گا۔