Author: Aqsa Younas Rana


ایرانی میڈیا کے مطابق ایران نے کویت کی سرحد کے قریب ایک اور امریکی جدید جنگی طیارہ مار گرانے کا دعویٰ کیا ہے۔ رپورٹ میں کہا گیا ہے کہ پاسداران انقلاب نے جنوب مغربی سرحدی علاقے میں امریکی ایف 15 ایگل طیارے کو نشانہ بنایا۔
ایرانی حکام کے مطابق کویت کی سرحد کے قریب اب تک تین امریکی جنگی طیارے گرائے جا چکے ہیں اور یہ کارروائیاں خطے میں جاری کشیدگی کے دوران کی گئیں۔
‎دوسری جانب امریکی سینٹ کام نے ایرانی دعوے کو مسترد کرتے ہوئے کہا ہے کہ کسی امریکی طیارے کے تباہ ہونے کی اطلاع درست نہیں ہے۔

پاسدارانِ انقلابِ ایران کی جانب سے ‘آپریشن وعدہ صادق 4’ کے تحت اسرائیل کے خلاف ایک بڑی عسکری کارروائی کا اعلان کیا گیا ہے۔ ایرانی خبر رساں ایجنسیوں کے مطابق، اس آپریشن میں پہلی بار ایران کے جدید ترین ‘خرمشہر-4’ اسٹریٹجک بیلسٹک میزائلوں کا استعمال کیا گیا ہے۔ ان میزائلوں نے اسرائیل کے انتہائی حساس مقامات کو نشانہ بنایا، جن میں تل ابیب کا مرکز، بن گوریون ایئرپورٹ اور اسرائیلی فضائیہ کا 27واں اسکواڈرن اڈہ شامل ہیں۔
خرمشہر-4 میزائل: تکنیکی تفصیلات
اس میزائل کو ایران کے میزائل ذخیرے میں ایک "گیم چینجر” کے طور پر دیکھا جا رہا ہے۔ اس کی نمایاں خصوصیات درج ذیل ہیں:
وزن اور لمبائی: یہ میزائل تقریباً 13 میٹر لمبا اور 30 ٹن وزنی ہے۔
پیل لوڈ: یہ ایک ٹن سے زائد دھماکہ خیز مواد لے جانے کی مکمل صلاحیت رکھتا ہے۔
رفتار: اس میزائل کی رفتار آواز کی رفتار سے 16 گنا زیادہ ہے، جو اسے انتہائی تیز رفتار بناتی ہے۔
فلائٹ ٹائم: اپنی غیر معمولی رفتار کے باعث، یہ میزائل ہدف تک پہنچنے میں صرف 10 سے 12 منٹ کا وقت لیتا ہے، جس سے دشمن کے دفاعی نظاموں (مثلاً آئرن ڈوم یا دیگر) کے لیے مؤثر ردعمل دینا تقریباً ناممکن ہو جاتا ہے۔
جدید وارہیڈ (MaRV): خرمشہر-4 کا وارہیڈ ‘منوورایبل’ (Maneuverable) ہے، یعنی یہ پرواز کے دوران اپنی سمت تبدیل کر سکتا ہے، جس سے اسے ٹریس کرنا اور مار گرانا دفاعی نظاموں کے لیے ایک بڑا چیلنج بن جاتا ہے۔


شمالی کوریا کے سربراہ کم جونگ ان نے پانچ ہزار ٹن وزنی جدید جنگی بحری جہاز کا دورہ کیا اور اسی جہاز سے کیے گئے میزائل تجربے کا خود معائنہ کیا۔
شمالی کوریا کے سرکاری میڈیا کے سی این اے کے مطابق میزائل تجربے کے موقع پر کم جونگ ان نے کہا کہ ملک کی بحریہ اب طاقتور جارحانہ صلاحیت حاصل کر چکی ہے اور سمندری دفاع کو مزید مضبوط بنایا جا رہا ہے۔
‎کم جونگ ان نے بحرالکاہل میں امریکا اور اس کے اتحادیوں کی جانب سے مبینہ اشتعال انگیزیوں کا حوالہ دیتے ہوئے کہا کہ شمالی کوریا اپنی بحری طاقت کو مزید جدید بنانے کے لیے اقدامات جاری رکھے گا۔
‎نمپو شپ یارڈ کے دورے کے دوران انہوں نے نئی قومی حکمت عملی کے تحت ہدایات جاری کیں کہ آئندہ پانچ سالہ منصوبے میں ہر سال اسی طرز کے یا اس سے بڑے دو جنگی بحری جہاز تیار کیے جائیں۔
‎سرکاری میڈیا کے مطابق کم جونگ ان نے اسی بحری جہاز سے داغے گئے اسٹریٹجک کروز میزائل کے تجربے کی بھی نگرانی کی۔ انہوں نے کہا کہ بحریہ کی جدید کاری کا مقصد ملکی خود مختاری کا دفاع کرنا اور سمندری حدود میں کسی بھی دشمن کو بھرپور جواب دینا ہے۔


چین نے مشرق وسطیٰ میں بڑھتی ہوئی کشیدگی پر تشویش ظاہر کرتے ہوئے فوجی کارروائیاں فوری طور پر روکنے اور خطے میں امن و استحکام برقرار رکھنے کے لیے مذاکرات دوبارہ شروع کرنے پر زور دیا ہے۔
بین الاقوامی خبر رساں اداروں کے مطابق چین کی چودہویں قومی عوامی کانگریس کے چوتھے اجلاس کے ترجمان لو کنجیان نے پریس کانفرنس میں کہا کہ چین ایک ذمہ دار بڑے ملک کے طور پر خطے میں امن کے قیام کے لیے اپنا کردار ادا کرتا رہے گا۔
‎انہوں نے کہا کہ چین موجودہ صورتحال پر گہری نظر رکھے ہوئے ہے اور ایران کی خودمختاری، سلامتی اور علاقائی سالمیت کا مکمل احترام کیا جانا چاہیے۔
‎ترجمان کے مطابق تمام ممالک کے درمیان باہمی احترام اور برابری ضروری ہے چاہے وہ بڑے ممالک ہوں یا چھوٹے۔ ان کا کہنا تھا کہ یہی اصول تاریخ کی ترقی اور اقوام متحدہ کے چارٹر کی بنیادی روح کے مطابق ہے۔
‎لو کنجیان نے مزید کہا کہ کسی بھی ملک کو بین الاقوامی معاملات میں بالادستی قائم کرنے، دوسرے ممالک کے مستقبل کے فیصلے کرنے یا ترقی کے فوائد پر اجارہ داری قائم کرنے کا حق حاصل نہیں۔


وزیراعلیٰ بلوچستان میر سرفراز بگٹی نے کہا ہے کہ ایران پر امریکی اور اسرائیلی حملوں کے بعد پیدا ہونے والی صورتحال کے دوران اب تک 1979 افراد تفتان بارڈر کے راستے پاکستان پہنچ چکے ہیں جن میں 37 سفارتکار بھی شامل ہیں۔
انہوں نے بتایا کہ ایران میں جاری کشیدہ حالات کے باعث حکومت بلوچستان کی تمام متعلقہ مشینری کو الرٹ رکھا گیا ہے جبکہ پاکستان ایران سرحد کے ذریعے پاکستانی شہریوں اور غیر ملکیوں کی آمد کا سلسلہ جاری ہے۔
‎وزیراعلیٰ بلوچستان کے مطابق تفتان بارڈر پر آنے والے تمام افراد کو ضروری سہولیات اور معاونت فراہم کی جا رہی ہے تاکہ انہیں کسی قسم کی مشکلات کا سامنا نہ کرنا پڑے۔ ان کا کہنا تھا کہ اب تک مجموعی طور پر 1979 افراد اس سرحدی راستے سے پاکستان میں داخل ہو چکے ہیں۔
‎دوسری جانب ایران میں پاکستان کے سفیر مدثر ٹیپو نے بیان میں کہا ہے کہ ایران میں موجود وہ پاکستانی شہری جو وطن واپس آنا چاہتے ہیں فوری طور پر پاکستانی سفارتخانے سے رابطہ کریں۔ انہوں نے کہا کہ شہری تہران میں پاکستانی سفارتخانے یا مشہد اور زاہدان کے قونصل خانوں سے بھی رابطہ کر سکتے ہیں۔
‎مدثر ٹیپو کے مطابق موجودہ صورتحال کے باعث مشکلات میں اضافہ ہو رہا ہے اس لیے پاکستانی شہری بروقت رابطہ کریں تاکہ ان کے محفوظ اور جلد انخلا کو یقینی بنایا جا سکے۔
ادھر وزیراعظم کی زیر صدارت ہونے والے ایک اجلاس میں ایران سے پاکستانیوں کے انخلا کے اقدامات کا جائزہ لیا گیا۔ اجلاس میں بتایا گیا کہ ایران سے پاکستانی شہری محفوظ طریقے سے وطن واپس پہنچ رہے ہیں جبکہ آذربائیجان میں پاکستانی سفارتخانہ بھی مکمل طور پر متحرک ہے۔وزیراعظم نے اس حوالے سے آذربائیجان کی مدد پر اظہار تشکر بھی کیا۔

‎امریکی صدر ڈونلڈ ٹرمپ نے مشرق وسطیٰ میں جاری کشیدگی کے دوران آبنائے ہرمز کو ہر صورت کھلا رکھنے اور خلیج سے گزرنے والی بحری تجارت کے تحفظ کو یقینی بنانے کا اعلان کیا ہے۔
‎تفصیلات کے مطابق صدر ٹرمپ نے خلیج سے گزرنے والے تجارتی جہازوں کے لیے دوہرے تحفظ کا حکم دیا ہے۔ ان کے مطابق ضرورت پڑنے پر امریکی بحریہ کے جنگی جہاز کمرشل اور تجارتی جہازوں کی نگرانی کریں گے اور انہیں محفوظ راستہ فراہم کریں گے۔
‎امریکی صدر نے خلیج میں سفر کرنے والے تیل بردار جہازوں کو انشورنس اور سیکیورٹی فراہم کرنے کی ہدایت بھی جاری کی ہے۔ اس فیصلے کے تحت امریکا تجارتی جہازوں کو انشورنس کی ضمانت فراہم کرے گا تاکہ کشیدہ صورتحال کے باوجود عالمی تجارت متاثر نہ ہو۔
‎اپنے خطاب میں ٹرمپ نے کہا کہ امریکا دنیا بھر میں توانائی کی آزادانہ ترسیل کو یقینی بنائے گا اور اس میں کسی بھی قسم کی رکاوٹ برداشت نہیں کی جائے گی۔ ان کا کہنا تھا کہ خلیج سے گزرنے والی توانائی کی سپلائی کو ہر صورت برقرار رکھا جائے گا تاکہ عالمی منڈیوں میں تیل کی فراہمی متاثر نہ ہو۔

‎ایران کی جانب سے سعودی عرب پر دو کروز میزائل اور متعدد ڈرونز فائر کیے گئے، تاہم سعودی دفاعی نظام نے ان میں سے بیشتر کو تباہ کر دیا۔
‎سعودی وزارت دفاع کے مطابق راس تنورا میں واقع آرامکو ریفائنری کو ڈرون حملے کا نشانہ بنایا گیا، تاہم اس حملے میں کسی جانی یا مالی نقصان کی اطلاع نہیں ملی۔
‎حکام کے مطابق سعودی عرب کے مشرقی علاقے میں داغے گئے کروز میزائلوں کو بھی فضائی دفاعی نظام نے فضا ہی میں تباہ کر دیا۔
‎خبر رساں ادارے رائٹرز کے مطابق ایران نے پیر کے روز سی آئی اے کے ایک اسٹیشن کو بھی نشانہ بنانے کی کوشش کی تھی۔
‎دوسری جانب ترکیہ کی جانب بھی پہلی بار میزائل فائر کیا گیا جسے نیٹو کے فضائی دفاعی نظام نے ترک حدود میں داخل ہونے سے پہلے ہی تباہ کر دیا۔
‎ترک وزیر خارجہ نے اپنے ایرانی ہم منصب سے فون پر رابطہ کر کے اس واقعے پر احتجاج ریکارڈ کرایا جبکہ نیٹو نے بھی حملے کی مذمت کی ہے۔