وفاقی وزیر مواصلات عبدالعلیم خان کی ہدایات پر رائٹ آف وے (آر او ڈبلیوز) کے حوالے سے اہم اقدامات کا آغاز کر دیا گیا ہے۔ نیشنل ہائی وے اتھارٹی (این ایچ اے) نے ملک بھر کی شاہراہوں کے دونوں اطراف موجود تجارتی سرگرمیوں کو باقاعدہ ریگولیٹ کرنے کا فیصلہ کیا ہے۔
این ایچ اے کے مطابق عوامی شراکت داری کے تحت آر او ڈبلیوز کو آؤٹ سورس کیا جائے گا، جس کا مقصد کاروباری مواقع بڑھانا اور نظام میں شفافیت لانا ہے۔ اس سلسلے میں این ایچ اے کی جانب سے باقاعدہ اشتہارات بھی جاری کر دیے گئے ہیں۔
رپورٹ کے مطابق تجاوزات کے خاتمے اور ریونیو میں مزید اضافے کے لیے اہم فیصلے کیے گئے ہیں، جن کے تحت ہوٹلز، پیٹرول پمپس اور دیگر تجارتی سرگرمیوں سے این او سی فیس اور کرایوں کی وصولی آؤٹ سورس کی جائے گی۔
یہ منصوبہ چاروں صوبوں میں قومی شاہراہوں کے اطراف کاروبار کے نئے مواقع پیدا کرے گا، جبکہ این فائیو سے این ایٹی تک کے مختلف آر او ڈبلیوز کو مرحلہ وار لیز پر دینے کا بھی فیصلہ کیا گیا ہے۔ این ایچ اے حکام کے مطابق اس اقدام سے نہ صرف آمدن میں اضافہ ہوگا بلکہ شاہراہوں کے اطراف غیر قانونی تجاوزات پر بھی قابو پایا جا سکے گا۔
Author: Aqsa Younas Rana
-
این ایچ اے کا شاہراہوں کے اطراف تجارتی سرگرمیوں کو ریگولیٹ کرنے کا فیصلہ
-
امریکا بھارت تجارتی کشیدگی میں اڈانی کیس مودی حکومت کیلئے نیا سفارتی بحران بن گیا
امریکا اور بھارت کے درمیان بڑھتی تجارتی کشیدگی کے دوران اڈانی کیس بھارتی وزیر اعظم نریندر مودی کی حکومت کیلئے ایک اور سنگین سفارتی چیلنج بن کر سامنے آ گیا ہے۔ امریکی جریدے بلومبرگ کے مطابق نریندر مودی طویل عرصے تک اڈانی گروپ کے سربراہ گوتم اڈانی اور ان کے بھتیجے کو امریکی سمن سے بچانے کی کوشش کرتے رہے، تاہم امریکی سیکیورٹیز اینڈ ایکسچینج کمیشن نے کارروائی آگے بڑھانے کا فیصلہ کر لیا۔
بلومبرگ کی رپورٹ میں کہا گیا ہے کہ عالمی اداروں نے مودی حکومت کی سرپرستی میں مبینہ طور پر اڈانی گروپ کو دیے گئے تحفظ پر سوالات اٹھا دیے ہیں، جس سے بھارت میں کرپشن اور دھوکہ دہی کے الزامات عالمی سطح پر نمایاں ہو گئے ہیں۔
بین الاقوامی میڈیا کے مطابق امریکا میں جاری تحقیقات کے دوران اڈانی پر 250 ملین ڈالر کی مبینہ رشوت خوری کے انکشافات سامنے آئے، جنہوں نے بھارت کی عالمی ساکھ کو شدید دھچکا پہنچایا۔ رپورٹ میں مزید کہا گیا ہے کہ گزشتہ ایک سال سے اڈانی گروپ امریکا میں رشوت خوری اور فراڈ سے متعلق مقدمات کی زد میں ہے۔
امریکی محکمہ انصاف کی جانب سے براہِ راست سمن جاری ہونے کے بعد اڈانی گروپ نے ممکنہ قانونی نتائج سے بچنے کے لیے سیٹلمنٹ کی کوششیں تیز کر دی ہیں، جبکہ یہ معاملہ مودی حکومت کیلئے اندرونی کے ساتھ ساتھ بین الاقوامی دباؤ میں بھی اضافے کا باعث بن رہا ہے۔ -
طالبان رجیم کو سفارتی محاذ پر بڑا دھچکا، آسٹریلیا کا افغان سفارتخانہ بند کرنے کا اعلان
طالبان رجیم کو عالمی سفارتی محاذ پر ایک اور بڑا دھچکا لگا ہے، جہاں آسٹریلیا نے افغان سفارتخانہ بند کرنے کا اعلان کر دیا ہے۔ آسٹریلوی حکومت نے واضح طور پر طالبان حکومت کو افغان عوام کا جائز نمائندہ تسلیم کرنے سے انکار کر دیا ہے۔
آسٹریلیا کے معتبر ذرائع ابلاغ ایس بی ایس نیوز اور نیشنل ٹریبون کے مطابق کابل میں افغان سفارتخانہ جون 2026 کے بعد اپنی تمام سفارتی سرگرمیاں بند کر دے گا۔ رپورٹ میں بتایا گیا ہے کہ یہ فیصلہ طالبان کے دوبارہ اقتدار میں آنے کے بعد عالمی سطح پر بڑھتی ہوئی سفارتی تنہائی کا تسلسل ہے۔
طالبان رجیم کی شدت پسندانہ سوچ، آمرانہ طرزِ حکومت اور انسانی حقوق کی خلاف ورزیوں کے باعث پہلے ہی متعدد ممالک افغان سفارتخانوں کو بند کر چکے ہیں جبکہ کئی ریاستوں نے افغان مہاجرین کے داخلے پر پابندیاں عائد کرتے ہوئے ملک بدری کے اقدامات بھی کیے ہیں۔
ماہرین کا کہنا ہے کہ افغان سفارتخانے کی بندش محض ایک انتظامی فیصلہ نہیں بلکہ طالبان رجیم کے خلاف عالمی عدم اعتماد اور سفارتی بے اعتمادی کی واضح علامت ہے، جو آنے والے دنوں میں افغانستان کی عالمی تنہائی کو مزید گہرا کر سکتی ہے۔ -
ڈیرہ غازی خان میں پنجاب سے بلوچستان جانے والے تمام راستے بند
ڈیرہ غازی خان میں پنجاب سے بلوچستان جانے والے تمام زمینی راستے بند کر دیے گئے ہیں۔ ڈپٹی کمشنر ڈی جی خان کے مطابق بلوچستان جانے والی اہم شاہراہیں فورٹ منرو کے راستے اور تونسہ۔موسیٰ خیل روڈ کو مکمل طور پر بند کر دیا گیا ہے، جس کے باعث مسافر فی الحال ڈی جی خان کے ذریعے بلوچستان سفر نہیں کر سکتے۔
ڈپٹی کمشنر کے احکامات کے بعد بلوچستان سے ملنے والے سرحدی علاقوں بواٹہ اور سخی سرور پر بھی ٹریفک کو روک دیا گیا ہے تاکہ کسی بھی ممکنہ صورتحال سے نمٹا جا سکے۔
دوسری جانب کوئٹہ سے اندرونِ ملک اور چمن کے لیے ٹرین سروس آج دوسرے روز بھی معطل رہی۔ پشاور کے لیے جعفر ایکسپریس اور چمن کے لیے مسافر ٹرین روانہ نہ ہو سکیں، جس کے باعث مسافروں کو شدید مشکلات کا سامنا ہے۔ -
بلوچستان پاکستان ہے، اس پر اٹھنے والا ہر ہاتھ توڑ دیا جائے گا: وزیراعلیٰ پنجاب مریم نواز
وزیراعلیٰ پنجاب مریم نواز نے بلوچستان میں حالیہ دہشت گرد حملوں کی سخت الفاظ میں مذمت کرتے ہوئے کہا ہے کہ بلوچستان پاکستان ہے اور پاکستان ہی بلوچستان ہے، اور ہر پاکستانی کے دل میں اس صوبے اور اس کے عوام کے لیے گہری محبت موجود ہے۔
مریم نواز نے حملہ آوروں کو پسپا کرنے پر سیکیورٹی فورسز کی بہادری کو سراہتے ہوئے کہا کہ بلوچستان کے ایک ایک انچ کا بھرپور دفاع کیا جائے گا اور ریاست دشمن عناصر کو کسی صورت برداشت نہیں کیا جائے گا۔
ان کا کہنا تھا کہ بلوچستان کے خلاف اٹھنے والا ہر ہاتھ پوری قوت سے روکا جائے گا اور دہشت گردوں کو بہائے گئے ہر قطرہ خون کا حساب دینا ہوگا۔
وزیراعلیٰ پنجاب نے واضح کیا کہ پوری قوم دہشت گردی کے خلاف متحد ہے اور دشمن کے ایجنڈے پر کام کرنے والے عناصر کسی رعایت کے مستحق نہیں۔ انہوں نے کہا کہ پنجاب سمیت پورا پاکستان بلوچستان کے محب وطن عوام کے ساتھ شانہ بشانہ کھڑا ہے اور ہر سطح پر ان کی حمایت جاری رہے گی۔ -
شوہر حق مہر کی رقم ادا کرنے کا پابند ہے, چیف جسٹس یحییٰ آفریدی
چیف جسٹس پاکستان یحییٰ آفریدی نے واضح کیا ہے کہ شوہر اپنے نکاح نامے میں درج حق مہر کی رقم ادا کرنے کا پابند ہے۔ چیف جسٹس کی سربراہی میں دو رکنی بینچ نے جہیز اور حق مہر سے متعلق کیسز کی سماعت کی۔
سماعت کے دوران وکیل درخواست گزار نے موقف اختیار کیا کہ حق مہر میں 40 تولہ سونا بہت زیادہ ہے، جبکہ ان کا موکل 20 تولہ سونا دینے کے لیے تیار ہے۔ چیف جسٹس نے کہا کہ اگر رقم 20 تولے سے بڑھائی جائے تو ممکن ہے کہ خاتون تصفیہ پر آمادہ ہو جائیں، تاہم عدالت ایسے معاملات میں براہِ راست مداخلت نہیں کر سکتی۔
چیف جسٹس نے مزید کہا کہ نکاح کے وقت نکاح نامے میں درج حق مہر کی ادائیگی شوہر کے لیے لازم ہے اور اسے اہلیہ کو ادا کرنا ہوگا۔
بعد ازاں سپریم کورٹ نے جہیز اور حق مہر سے متعلق متعدد درخواستیں خارج کر دی ہیں۔ -
گوگل میپس میں نیا اے آئی فیچر، پیدل اور سائیکل صارفین کے لیے بھی متعارف
گوگل نے اپنی مقبول ترین نیوی گیشن سروس میپس کو ایک جدید آرٹیفیشل انٹیلی جنس (AI) فیچر سے لیس کر دیا ہے۔ یہ فیچر بنیادی طور پر جیمنائی ماڈل پر مبنی ہے اور نومبر 2025 میں ڈرائیونگ کے دوران ہینڈز فری نیوی گیشن کے لیے متعارف کرایا گیا تھا۔
اب یہ فیچر نہ صرف ڈرائیونگ کے دوران بلکہ پیدل چلنے اور سائیکل چلانے والوں کے لیے بھی دستیاب ہے، تاکہ ہر طرح کے حالات میں صارفین کو فوری اور مفید رہنمائی فراہم کی جا سکے۔
گوگل کی بلاگ پوسٹ کے مطابق یہ فیچر دنیا بھر میں دستیاب ہو رہا ہے، جہاں بھی جیمنائی AI ماڈل موجود ہے، صارفین اسے اینڈرائیڈ اور آئی او ایس ڈیوائسز پر استعمال کر سکیں گے۔ ویب ورژن میں یہ فیچر فی الحال دستیاب نہیں ہے۔
صارفین کو بس "اوکے گوگل” کہہ کر اپنا سوال پوچھنا ہوگا، اور جیمنائی اسی تناظر میں فوری ہینڈز فری جوابات فراہم کرے گا۔ اس کے علاوہ، صارفین AI کو ہدایت دے کر مختلف افراد کو ٹیکسٹ بھی بھیج سکتے ہیں، بشرطیکہ پرمیشن فراہم کی جائے۔
گوگل کا کہنا ہے کہ یہ نیا فیچر دنیا بھر کے صارفین کے لیے نیوی گیشن کو زیادہ آسان اور مؤثر بنانے کے لیے متعارف کرایا گیا ہے۔ -
اسرائیلی فوج کی غزہ میں 71 ہزار فلسطینیوں کو شہید کرنے کی تصدیق
تل ابیب سے موصولہ رپورٹس کے مطابق اسرائیلی فوج نے غزہ میں 71 ہزار فلسطینیوں کے شہید ہونے کا اعتراف کر لیا ہے۔ اسرائیلی میڈیا کی رپورٹ میں بتایا گیا کہ ایک سینئر فوجی عہدیدار نے کہا کہ حماس کے زیر انتظام غزہ وزارتِ صحت کے جاری کردہ ہلاکتوں کے اعداد و شمار مجموعی طور پر درست ہیں۔
رپورٹ میں واضح کیا گیا کہ یہ اعداد و شمار صرف اسرائیلی فوجی کارروائیوں میں شہید ہونے والے افراد پر مشتمل ہیں، جبکہ ملبے تلے دبے لاپتا افراد، بھوک اور بیماری سے ہونے والی اموات شامل نہیں۔
اسرائیلی فوجی حکام کے مطابق عام شہریوں اور جنگجوؤں کے درمیان ہلاکتوں کے تناسب کا جائزہ ابھی جاری ہے۔ اس سے قبل اسرائیل غزہ وزارتِ صحت کے اعداد و شمار کو مسترد کرتا رہا تھا، تاہم اقوام متحدہ نے ان کو معتبر قرار دیا۔
غزہ وزارتِ صحت کے مطابق 7 اکتوبر 2023 کے بعد سے اب تک 71 ہزار 667 فلسطینی اسرائیلی حملوں میں شہید ہو چکے ہیں۔ -
جے یو آئی نے قبل از وقت انتخابات کا مطالبہ کر دیا
اسلام آباد: جمعیت علمائے اسلام (ف) نے ملک میں قبل از وقت انتخابات کرانے کا مطالبہ کر دیا ہے۔ جے یو آئی کے سینیٹر کامران مرتضیٰ نے اے آر وائی نیوز سے گفتگو کرتے ہوئے کہا کہ پارٹی قبل از وقت انتخابات کی مکمل حمایت کرتی ہے اور مطالبہ کرتی ہے کہ انتخابات ایک سال کے اندر منعقد کیے جائیں۔
سینیٹر کامران مرتضیٰ نے کہا کہ قبل از وقت انتخابات سے قبل تمام سیاسی جماعتوں پر مشتمل قومی حکومت تشکیل دی جائے تاکہ انتخابات شفاف اور منصفانہ ہوں۔
ان کا کہنا تھا کہ نگراں حکومت کا تجربہ ناکام رہا ہے اور موجودہ طریقہ کار میں تبدیلی کی ضرورت ہے۔ انہوں نے 27 ویں آئینی ترمیم کو ختم کر کے 26 ویں ترمیم پر دوبارہ بحث کرانے پر زور دیا۔
کامران مرتضیٰ نے مزید کہا کہ حکومت کی جانب سے پی ٹی آئی کو جے یو آئی کی پیشکش تک نہیں پہنچائی گئی، جبکہ اگر پی ٹی آئی کے وکلا رہنما آج عدالت جاتے تو چیف جسٹس سے ملاقات ممکن ہو جاتی۔ -
کوئٹہ: سلنڈر لیکج سے گھر میں گیس بھرنے سے 4 افراد جاں بحق
کوئٹہ کے علاقے نواں کلی میں عبدالخالق روڈ، لبیر کالونی میں واقع رہائشی مکان میں سلنڈر لیکج کے باعث گیس بھر گئی، جس سے دم گھٹنے کے نتیجے میں 4 افراد جاں بحق ہو گئے۔
ریسکیو حکام کے مطابق جاں بحق ہونے والوں میں 2 بچے اور ایک خاتون شامل ہیں۔ واقعے کے بعد حکام نے جائے حادثہ پر پہنچ کر لاشیں نکالنے اور علاقے کو محفوظ بنانے کے اقدامات کیے۔
یہ حادثہ گھریلو حفاظتی انتظامات کی کمی اور گیس سلنڈرز کے صحیح استعمال نہ کرنے کی سنگین صورت حال کو ظاہر کرتا ہے۔