Author: Aqsa Younas Rana

‎حکومت پنجاب نے شعبہ کان کنی کو فروغ دینے کا فیصلہ کر لیا ہے اور محفوظ جنگلات و پروٹیکٹڈ ایریاز میں بھی کان کنی کی اجازت دینے کی تجویز سامنے آ گئی ہے۔
‎پنجاب اسمبلی میں ایک ہی نوعیت کے تین مختلف مسودہ قوانین پیش کر دیے گئے ہیں۔ مسودہ قانون کے متن کے مطابق صوبے میں معدنی وسائل کے حصول کی راہ ہموار کرنے اور کان کنی کی سرگرمیوں کی اجازت دینے کی سفارش کی گئی ہے۔
‎ذرائع کے مطابق مجوزہ قانون سازی کا مقصد معدنی شعبے میں سرمایہ کاری کو فروغ دینا اور وسائل کے استعمال کو بڑھانا ہے، تاہم ماحولیاتی تحفظ سے متعلق خدشات پر بھی بحث متوقع ہے۔

‎وزیر مملکت برائے داخلہ امور طلال چوہدری نے واضح کیا ہے کہ وادی تیراہ میں اس وقت کوئی آپریشن نہیں ہو رہا اور جب بھی کوئی کارروائی کی گئی تو اس کا باقاعدہ اعلان کیا جائے گا۔
‎گفتگو کرتے ہوئے طلال چوہدری نے الزام عائد کیا کہ پی ٹی آئی وادی تیراہ کے معاملے پر منفی سیاست کر رہی ہے۔ انہوں نے کہا کہ نیشنل ایکشن پلان کے تحت کارروائیاں جاری رہیں گی اور دہشت گردی کے خلاف ریاستی اقدامات جاری رکھے جائیں گے۔
‎وزیر مملکت نے کہا کہ کوہستان اسکینڈل سب کے سامنے ہے اور پی ٹی آئی اپنی کرپشن چھپانے کے لیے ایسے بیانات دے رہی ہے۔ ان کا کہنا تھا کہ عوام کو گمراہ کرنے کے بجائے حقائق کو سامنے رکھا جانا چاہیے۔

نئے مالی سال 2026-27 کے لیے میکرو اکنامک فریم ورک تیار کر لیا گیا ہے، جبکہ حکومت نے رواں مالی سال کے معاشی ترقی کے ہدف پر نظرثانی بھی کر دی ہے۔
‎دستاویز کے مطابق موجودہ مالی سال میں معاشی شرح نمو 4.2 فیصد کے بجائے 4 فیصد رہنے کا امکان ہے۔ آئندہ مالی سال 2026-27 کے لیے جی ڈی پی گروتھ کا ہدف 5.1 فیصد مقرر کیا گیا ہے۔
‎رپورٹ میں بتایا گیا ہے کہ اسٹیٹ بینک آف پاکستان کے مطابق رواں مالی سال معاشی ترقی 3.75 سے 4.75 فیصد کے درمیان رہ سکتی ہے۔ مہنگائی رواں مالی سال کے لیے مقررہ 7.5 فیصد ہدف کے مقابلے میں 6.1 فیصد رہنے کی توقع ہے، جبکہ آئندہ مالی سال مہنگائی بڑھ کر 6.5 فیصد تک جا سکتی ہے۔

پاکستان انٹرنیشنل ایئرلائنز (PIA) کے نجکاری کے بعد ایک اہم قیادت کا فیصلہ سامنے آیا ہے، جس کے تحت سعدیہ عرفان آئندہ چند ہفتوں میں ایئرلائن میں چیف ہیومن ریسورس افسر کے عہدے سنبھالیں گی۔
‎سعدیہ عرفان انسانی وسائل کے شعبے کی تجربہ کار پیشہ ور ہیں اور ان کے پاس 30 سال سے زائد کا وسیع تجربہ ہے۔ اس وقت وہ فاطمہ گروپ میں گروپ ہیومن ریسورسز ڈائریکٹر کے طور پر خدمات انجام دے رہی ہیں، جو فاطمہ فرٹیلائزر کمپنی لمیٹڈ کی مرکزی کمپنی ہے۔ ان کا تقریباً آٹھ سالہ دورانیہ فاطمہ گروپ میں تبدیلی اور ترقی کے اقدامات کے لیے جانا جاتا ہے، جن میں 91 فیصد ریکارڈ ایمپلائی انگیجمنٹ انڈیکس حاصل کرنا، خواتین کے لیے قیادت اور نمائندگی بڑھانے کے پروگرام، اور ہیومن ریسورس کے عمل کو ڈیجیٹلائز کر کے ڈیٹا پر مبنی اور کاغذ سے پاک نظام بنانا شامل ہیں۔
‎سعدیہ عرفان نے فاطمہ گروپ سے قبل عالمی سطح کی کمپنیوں پپسی کو اور نیسلے میں سینئر ایچ آر عہدوں پر خدمات انجام دیں، جہاں انہوں نے مڈل ایسٹ، ویسٹ ایشیا، افریقہ، پاکستان اور افغانستان میں اہم انسانی وسائل کے اقدامات کی قیادت کی۔ پپسی کو میں ان کی قیادت میں ڈائیورسٹی اینڈ انکلوجن کے لیے ہروی رسل ایوارڈ، متعدد "بہترین کام کرنے کی جگہ” کے اعزازات، اور خطے میں سب سے زیادہ خواتین کی بورڈ نمائندگی اور ایمپلائی انگیجمنٹ اسکور حاصل ہوئے۔
‎سعدیہ عرفان کی شمولیت PIA میں انسانی وسائل اور قیادت کے نظام کو مضبوط بنانے اور جدید انتظامی ماڈلز متعارف کرانے میں ایک اہم قدم سمجھا جا رہا ہے۔

‎اقتصادی رابطہ کمیٹی (ای سی سی) نے پاسکو کی 5 لاکھ میٹرک ٹن گندم نیلام کرنے کی منظوری دے دی ہے جبکہ پنجاب میں آٹے کی فراہمی یقینی بنانے کے لیے 3 لاکھ میٹرک ٹن گندم دینے کی اجازت بھی دی گئی ہے۔
‎وفاقی وزیر خزانہ محمد اورنگزیب کی زیر صدارت اقتصادی رابطہ کمیٹی کا اجلاس ہوا جس میں متعدد اہم معاشی فیصلے کیے گئے۔ اجلاس میں درآمدی یوریا پر وفاق اور صوبوں کے درمیان 50، 50 فیصد سبسڈی کی منظوری بھی دی گئی۔
‎ای سی سی نے خیبرپختونخوا میں ترقیاتی منصوبوں کے لیے 1.9 ارب روپے جاری کرنے کی اجازت دی۔ اس کے علاوہ پاکستان پوسٹ کے ذمے یوٹیلیٹی کمپنیوں کے بقایا جات کی ادائیگی کے لیے 10.98 ارب روپے جاری کرنے کی ہدایت کی گئی ہے۔
‎اجلاس میں حفاظتی ٹیکہ جات کے قومی پروگرام کے لیے 29.6 ارب روپے کے اضافی فنڈز کی بھی منظوری دے دی گئی۔

‎وفاقی وزیر برائے مذہبی امور و بین المذاہب ہم آہنگی سردار محمد یوسف نے بدھ کو بتایا کہ حج 2025 کے اخراجات میں بچت کے باعث 75 فیصد حجاج کو ساڑھے تین ارب روپے واپس کیے گئے ہیں۔
‎اسلام آباد میں پریس کانفرنس کے دوران وزیر مذہبی امور نے کہا کہ ہر حاجی کو 12 ہزار سے 1 لاکھ 10 ہزار روپے تک کی رقم واپس کی گئی۔ سعودی عرب نے 2025 کے لیے پاکستان کے لیے ایک لاکھ 79 ہزار 210 حجاج کا کوٹہ دیا تھا، جسے سرکاری اور نجی سکیموں کے درمیان برابر تقسیم کیا گیا۔
‎سردار یوسف نے بتایا کہ حج کے طویل اور مختصر دورانیے کے پیکجز کی قیمت میں بھی کمی کی گئی، طویل دورانیے کا پیکج 10 لاکھ 50 ہزار روپے جبکہ مختصر دورانیے کا 11 لاکھ روپے مقرر کیا گیا۔
‎وزیر نے بتایا کہ سعودی وزارت حج و عمرہ نے پاکستان کو حج 2025 کے شاندار انتظامات پر ایکسی لینس ایوارڈ بھی دیا۔ حج کے دوران پاکستان حج مشن نے 1 لاکھ 19 ہزار سرکاری اور 60 ہزار نجی عازمین کی رجسٹریشن مکمل کی اور خوراک، ٹرانسپورٹ اور دیگر انتظامات کو حتمی شکل دی۔
‎سردار یوسف کے مطابق ڈیجیٹل سہولیات متعارف کرائی گئیں، جن میں ’پاک حج موبائل ایپ‘ کے ذریعے رہنمائی، تربیت، رہائش، پروازیں، خیمے اور مناسک حج کی مکمل معلومات فراہم کی گئیں۔ نجی حج سکیم میں اصلاحات کے بعد شکایات میں واضح کمی آئی۔
‎انہوں نے بتایا کہ روٹ ٹو مکہ منصوبے میں اسلام آباد کے بعد کراچی ایئرپورٹ کو بھی شامل کیا گیا ہے اور لاہور ایئرپورٹ کی شمولیت کے لیے کوششیں جاری ہیں۔ حج پالیسی 2026 پچھلی اصلاحات کی بنیاد پر ترتیب دی گئی ہے تاکہ لاگت کم اور سہولیات بڑھائی جا سکیں۔