Author: Aqsa Younas Rana

‎امریکہ کی کئی ریاستیں شدید برفانی طوفان کی لپیٹ میں ہیں، جس سے معمولاتِ زندگی متاثر ہو گئے ہیں اور کم از کم 30 افراد ہلاک ہو چکے ہیں۔
‎پیر کو مزید برف باری کے بعد لاکھوں امریکیوں نے نقطہ انجماد سے نیچے درجہ حرارت میں بجلی کے بغیر رات گزاری۔ تقریباً ساڑھے چھ لاکھ گھروں کو بجلی کی فراہمی معطل رہی۔
‎جمعے سے اب تک برفانی طوفان کے باعث 20 ہزار سے زائد پروازیں منسوخ ہو چکی ہیں، جس میں گزشتہ روز 5100 اور اتوار کو 11 ہزار سے زیادہ پروازیں شامل تھیں۔
‎خبر رساں ادارے ‘ایسوسی ایٹڈ پریس’ کے مطابق امریکہ کے مختلف حصوں میں مرنے والوں میں نوعمر نوجوان، بزرگ اور خواتین شامل ہیں، اور نیویارک شہر میں 8 افراد ہلاک ہوئے۔
‎ریاست آرکنسا سے نیوانگلینڈ تک تقریباً 2100 کلومیٹر کے خطے میں کئی کئی انچ برف پڑی، کچھ علاقوں میں ایک فٹ جبکہ بعض میں ڈیڑھ فٹ تک برف جمع ہوئی۔ درجہ حرارت منفی 25 ڈگری سینٹی گریڈ تک پہنچ گیا اور کئی اسکول بند رہے۔
‎امریکی موسمیات کے محکمے نے کہا کہ سردی میں کمی کا فی الحال کوئی امکان نہیں، بلکہ قطبِ شمالی کی سرد ہواؤں کا نیا سلسلہ آنے کی پیش گوئی ہے، جس سے مشرقی ساحلی علاقوں میں مزید برف باری کا امکان ہے۔

‎افغانستان کے سابق وزیر خزانہ انوار الحق احدی نے طالبان حکومت کے معاشی ترقی کے دعوؤں کو بے بنیاد قرار دیتے ہوئے کہا ہے کہ افغانستان کا اقتصادی مستقبل شدید خطرات سے دوچار ہو چکا ہے۔
‎افغانستان انٹرنیشنل کو دیے گئے انٹرویو میں انوار الحق احدی کا کہنا تھا کہ طالبان کے زیرِ انتظام افغانستان میں سرمایہ کاری کے لیے بنیادی قانونی اور ادارہ جاتی فریم ورک تک موجود نہیں۔ ان کے مطابق ریاستی ادارے طالبان کے حمایت یافتہ افراد کے کنٹرول میں ہیں، جس سے شفافیت اور اعتماد مکمل طور پر ختم ہو چکا ہے۔
‎انہوں نے کہا کہ سرمایہ کاروں کے لیے حالات انتہائی غیر محفوظ ہیں، نہ مناسب سیکیورٹی دستیاب ہے اور نہ ہی تربیت یافتہ افرادی قوت موجود ہے۔ بین الاقوامی پابندیوں، واضح معاشی پالیسیوں کی عدم موجودگی اور عالمی تنہائی کے باعث بیرونی سرمایہ کاری تقریباً ختم ہو چکی ہے۔
‎اقوام متحدہ کی ایک حالیہ رپورٹ کے مطابق افغانستان میں دہشت گردی اور کمزور معیشت کے باعث بیروزگاری کی شرح بڑھ کر 75 فیصد تک پہنچ گئی ہے، جو طالبان حکومت کی معاشی کارکردگی پر ایک بڑا سوالیہ نشان ہے۔

‎امریکا کی کئی ریاستیں شدید برفانی طوفان، برف باری اور بارش کی لپیٹ میں ہیں، مختلف حادثات میں تین افراد ہلاک جبکہ متعدد زخمی ہو گئے ہیں۔
‎میڈیا رپورٹس کے مطابق خراب موسم کے باعث 20 کروڑ سے زائد افراد متاثر ہونے کا خدشہ ہے۔ ٹیکساس، اوکلاہوما اور آرکنساس میں شدید برف باری کے بعد 22 ریاستوں میں ایمرجنسی نافذ کر دی گئی ہے۔
‎واشنگٹن، نیویارک، فلاڈیلفیا اور بوسٹن میں مزید برف باری کی پیشگوئی کی گئی ہے، جبکہ نیویارک کے میئر نے شہریوں کو گھروں میں رہنے کی ہدایت جاری کی ہے۔ 9 ریاستوں میں نیشنل گارڈ کو الرٹ کر دیا گیا ہے۔
‎برف باری کے باعث 12 ہزار سے زائد پروازیں منسوخ کر دی گئی ہیں جبکہ 84 ہزار سے زیادہ صارفین بجلی سے محروم ہیں۔ شمالی ڈکوٹا میں درجہ حرارت منفی 50 ڈگری تک گر گیا ہے۔
‎امریکی صدر ڈونلڈ ٹرمپ کا کہنا ہے کہ ریاستی اداروں کے ساتھ مل کر شہریوں کی حفاظت یقینی بنائی جا رہی ہے اور تمام ریاستوں سے مسلسل رابطے میں ہیں۔

‎امریکا میں فیڈرل ایجنٹس کی فائرنگ کا ایک اور واقعہ سامنے آ گیا ہے، جہاں منیاپولس میں بارڈر پیٹرول ایجنٹ کی گولی سے ایک اسپتال نرس ہلاک ہو گیا۔
‎خبر رساں ادارے روئٹرز کے مطابق مقتول کی شناخت 37 سالہ الیکس پریٹی کے نام سے ہوئی ہے، جو پیشے کے اعتبار سے نرس تھا۔ رواں ماہ فیڈرل ایجنٹس کی فائرنگ کا یہ تیسرا واقعہ ہے، جس کے بعد منیسوٹا کے مختلف شہروں میں دوبارہ احتجاج شروع ہو گیا ہے۔
‎ہوم لینڈ سیکیورٹی کا مؤقف ہے کہ مقتول کے پاس ہینڈ گن موجود تھی اور اسے غیر مسلح کرنے کی کوشش کے دوران اس نے مزاحمت کی۔ تاہم عینی شاہدین کی ویڈیوز، جن کی تصدیق روئٹرز نے کی ہے، میں الیکس پریٹی کو ہاتھ میں فون پکڑے ہوئے دیکھا جا سکتا ہے، جبکہ وہ دیگر مظاہرین کی مدد کر رہا تھا جنہیں ایجنٹس نے زمین پر دھکیل دیا تھا۔
‎واقعے کے بعد فیڈرل ایجنٹس کے طرزِ عمل پر ایک بار پھر شدید سوالات اٹھنے لگے ہیں۔

‎کیتھولک عیسائیوں کے مذہبی پیشوا پوپ لیو چہارم نے کہا ہے کہ مصنوعی ذہانت انسانی شناخت، تعلقات اور سماجی توازن کے لیے ایک سنجیدہ خطرہ بن چکی ہے۔
‎اپنے پیغام میں پوپ لیو نے کہا کہ ٹیکنالوجی کا مقصد انسان کی خدمت ہونا چاہیے، نہ کہ اسے بدل دینا۔ انہوں نے خبردار کیا کہ جدید ڈیجیٹل ٹیکنالوجیز، خاص طور پر وہ اے آئی نظام جو آوازوں، چہروں اور جذبات کی نقل کر سکتے ہیں، انسانوں کے لیے خطرناک ثابت ہو سکتے ہیں۔
‎پوپ لیو نے مصنوعی ذہانت کے لیے مؤثر گورننس اور عالمی قوانین کی ضرورت پر زور دیتے ہوئے کہا کہ نوجوانوں کی تعلیم و تربیت ناگزیر ہے تاکہ وہ یہ سمجھ سکیں کہ الگورتھمز کس طرح ان کے حقیقت کے ادراک کو متاثر کرتے ہیں۔
‎انہوں نے اس امر پر بھی تشویش کا اظہار کیا کہ اے آئی کی ترقی چند بڑی کمپنیوں کے ہاتھوں میں مرکوز ہو چکی ہے، جو غیر معمولی طاقت حاصل کر رہی ہیں، جبکہ یہ ٹیکنالوجی حقیقت اور گمان کے درمیان فرق کو مزید دھندلا کر رہی ہے۔