Author: Aqsa Younas Rana

کیلیفورنیا کے شہر لاس اینجلس میں اس ہفتے ایک تاریخی مقدمہ شروع ہو رہا ہے، جو یہ واضح کر سکتا ہے کہ آیا بڑی سوشل میڈیا کمپنیاں بچوں کو اپنے پلیٹ فارمز کا عادی بنانے کے لیے جان بوجھ کر تیار کر رہی تھیں۔
‎کیلیفورنیا کی ریاستی عدالت میں منگل کو جیوری کے انتخاب کا عمل شروع ہو گا، اور اسے ایک ’رہنما‘ مقدمہ قرار دیا جا رہا ہے کیونکہ اس کا نتیجہ امریکہ بھر میں اسی نوعیت کے مقدمات کے رجحان کو متاثر کر سکتا ہے۔
‎اس مقدمے میں فریقِ مخالف الفابیٹ، بائٹ ڈانس اور میٹا ہیں، جو بالترتیب یوٹیوب، ٹک ٹاک اور انسٹاگرام کی مالک کمپنیاں ہیں۔ امکان ہے کہ میٹا کے شریک بانی اور سی ای او مارک زکربرگ کو بھی بطور گواہ طلب کیا جائے گا۔
‎مقدمے میں مدعیوں کے وکلا نے الزام لگایا ہے کہ یہ کمپنیاں نوجوان صارفین کو ایسے مواد سے متاثر اور عادی بنا رہی تھیں جس سے وہ مایوسی، کھانے پینے کے مسائل، نفسیاتی ہسپتالوں میں داخلے اور بعض معاملات میں خودکشی کی طرف بھی مائل ہوئے۔
‎وکلا نے بتایا کہ وہی قانونی حکمت عملی اختیار کی جا رہی ہے جو 1990 اور 2000 کی دہائیوں میں تمباکو کی صنعت کے خلاف استعمال ہوئی تھی، جب یہ دلیل دی گئی تھی کہ کمپنیوں نے نقصان دہ مصنوعات فروخت کیں۔

‎اسپین نے تقریباً 5 لاکھ غیر دستاویزی تارکین وطن کو قانونی حیثیت دینے کا فیصلہ کیا ہے۔
‎غیر ملکی خبر ایجنسی کے مطابق ہسپانوی وزیر برائے مائیگریشن ایلماسیز نے کہا کہ حکومت ایک حکومتی فرمان کی منظوری دے رہی ہے جس کے تحت یہ اقدام نافذ ہوگا۔ قانونی حیثیت حاصل کرنے والے افراد ملک کے کسی بھی حصے میں اور کسی بھی شعبے میں کام کر سکیں گے۔
‎ایلماسیز نے کہا کہ حکومت امیگریشن کا نظام انسانی حقوق، معاشرتی شمولیت، باہمی ہم آہنگی، اقتصادی ترقی اور سماجی اتحاد کے اصولوں کے مطابق بنانا چاہتی ہے۔ یہ فیصلہ یورپ میں سخت پالیسیوں کے برعکس اسپین کی نرمی کا مظہر ہے۔
‎فیصلے سے فائدہ اٹھانے والے افراد وہ ہوں گے جو کم از کم پانچ ماہ سے اسپین میں مقیم ہوں اور جن کا مجرمانہ ریکارڈ صاف ہو۔ یہ قانون ان بچوں پر بھی لاگو ہوگا جو پہلے ہی اسپین میں رہائش پذیر ہیں۔
‎درخواستیں اپریل میں جمع کرائی جا سکیں گی اور جون کے آخر تک اس عمل کا سلسلہ جاری رہے گا۔ خبر ایجنسی کے مطابق اس منصوبے کو سرکاری فرمان کے ذریعے نافذ کیا جائے گا اور پارلیمنٹ کی منظوری درکار نہیں ہوگی کیونکہ سوشلسٹ قیادت والی اتحادی حکومت کے پاس وہاں اکثریت نہیں ہے۔