Author: ڈاکٹرغلام مصطفی بڈانی

بہاولپور (باغی ٹی وی ، نامہ نگار حبیب خان) ورلڈ ہیپاٹائٹس ڈے کے موقع پر اسلامیہ یونیورسٹی بہاولپور کے میڈیکل اینڈ ہیلتھ ڈویژن کے زیر اہتمام ایک اہم سیمینار کا انعقاد کیا گیا، جس میں صحت عامہ سے متعلق ماہرین، اساتذہ، فیکلٹی ممبران اور ملازمین نے بھرپور شرکت کی۔ سیمینار کا مقصد ہیپاٹائٹس کے پھیلاؤ کی روک تھام، اس سے بچاؤ، اور صحت کی اہمیت کو اجاگر کرنا تھا۔

وائس چانسلر پروفیسر ڈاکٹر محمد کامران نے خطاب کرتے ہوئے کہا کہ "تندرستی ہزار نعمت ہے” اور ایک تندرست معاشرہ ہی ترقی کی ضمانت ہوتا ہے۔ انہوں نے بتایا کہ اسلامیہ یونیورسٹی بہاولپور پہلے ہی "ہیپاٹائٹس فری کیمپس” کے ہدف پر کام کر رہی ہے اور ملازمین و طلبا کی صحت کے تحفظ کے لیے جامع اقدامات کیے جا رہے ہیں۔

ڈاکٹر قاضی مسرور علی، سابق ہیڈ آف ڈیپارٹمنٹ قائداعظم میڈیکل کالج، نے ہیپاٹائٹس کے پھیلاؤ میں سماجی رویوں کی تبدیلی کو کلیدی عنصر قرار دیتے ہوئے کہا کہ صاف ستھری زندگی اور طبی اصولوں کی پابندی ہی اس موذی مرض سے بچاؤ کا بہترین ذریعہ ہے۔ انہوں نے ویکسینیشن، محفوظ انجیکشن اور باقاعدہ طبی معائنہ کو بھی ناگزیر قرار دیا۔

ڈائریکٹر ہیلتھ بہاولپور ڈاکٹر سید تنویر حسین نے ورلڈ ہیلتھ آرگنائزیشن (WHO) کے اعداد و شمار پیش کرتے ہوئے بتایا کہ پاکستان اور نائجیریا دنیا کے وہ دو ممالک ہیں جہاں ہیپاٹائٹس کا پھیلاؤ سب سے زیادہ ہے، اور پاکستان میں اس وقت 1.2 کروڑ افراد ہیپاٹائٹس بی یا سی سے متاثر ہیں۔

چیف میڈیکل آفیسر ڈاکٹر محمد عثمان چیمہ نے بتایا کہ یونیورسٹی میں 2020 سے ایک فعال ہیپاٹائٹس کلینک کام کر رہا ہے جہاں فیکلٹی، طلبہ اور ملازمین کی اسکریننگ اور علاج کی سہولیات دستیاب ہیں۔ انہوں نے کہا کہ یہ مہم ہیپاٹائٹس فری کیمپس کے ویژن کی عملی مثال ہے۔

سیمینار کے دوران پرنسپل میڈیکل آفیسر ڈاکٹر ملیحہ عارف نے ہیپاٹائٹس کی وجوہات، احتیاطی تدابیر اور طبی پہلوؤں پر مفصل پریزنٹیشن دی، جبکہ ویمن میڈیکل آفیسر ڈاکٹر صباء طاہر نے نظامت کے فرائض انجام دیے۔

اس بامقصد سیمینار کے ذریعے نہ صرف ہیپاٹائٹس کے حوالے سے آگاہی میں اضافہ ہوا بلکہ یہ پیغام بھی عام ہوا کہ اگر صحت کے اصولوں کو زندگی کا حصہ بنا لیا جائے تو ہیپاٹائٹس جیسے مہلک امراض سے نجات ممکن ہے۔ شرکاء نے یونیورسٹی انتظامیہ کے اس مثبت اقدام کو سراہا اور امید ظاہر کی کہ اسلامیہ یونیورسٹی بہاولپور جلد "ہیپاٹائٹس فری کیمپس” کا ہدف حاصل کر لے گی۔

اوچ شریف (باغی ٹی وی ، نامہ نگار حبیب خان) احمد پور شرقیہ کی سبزی و فروٹ منڈی میں پرائس کنٹرول کا مکمل فقدان، آڑھتیوں نے من مانی نرخ مقرر کرنا شروع کر دیے، جس سے مہنگائی کا طوفان عوام کے لیے ناقابلِ برداشت ہوتا جا رہا ہے۔ شہریوں نے شکایت کی ہے کہ انتظامیہ اور پرائس کنٹرول مجسٹریٹس کی عدم موجودگی کے باعث روزمرہ سبزیوں اور پھلوں کی قیمتیں آسمان کو چھو رہی ہیں، جبکہ معیار بھی شدید متاثر ہوا ہے۔

ذرائع کے مطابق منڈی میں سرکاری نرخ نامے صرف کاغذی کارروائی تک محدود ہو چکے ہیں، اور آڑھتی 20 سے 30 فیصد زائد نرخ وصول کر کے صارفین کو دونوں ہاتھوں سے لوٹ رہے ہیں۔ مختلف اقسام کی اشیاء کو مصنوعی طور پر "اعلیٰ” اور "ادنیٰ” درجہ دے کر نرخوں میں اضافہ کر دیا جاتا ہے۔ منڈی میں روزانہ کی بنیاد پر ہونے والی بولیوں میں انتظامیہ کی غیر موجودگی نے آڑھتیوں کو مکمل آزادی دے رکھی ہے۔

شہریوں نے باغی ٹی وی سے گفتگو کرتے ہوئے کہا کہ جب بھی مہنگائی کی خبریں میڈیا پر آتی ہیں، متعلقہ افسران چند دنوں کے لیے متحرک ہوتے ہیں لیکن جلد ہی سارا عمل پھر پرانی ڈگر پر آ جاتا ہے۔ ایسی عارضی کارروائیاں عوام کو مستقل ریلیف فراہم کرنے میں ناکام رہی ہیں۔

سماجی اور فلاحی تنظیموں کے نمائندوں نے وزیراعلیٰ پنجاب مریم نواز شریف، کمشنر بہاولپور اور ڈپٹی کمشنر بہاولپور سے اپیل کی ہے کہ احمدپور شرقیہ کی سبزی و فروٹ منڈیوں میں روزانہ کی بنیاد پر مجسٹریٹس اور دیگر ذمہ دار افسران کی حاضری یقینی بنائی جائے تاکہ قیمتوں پر کنٹرول قائم کیا جا سکے۔ ان کا کہنا ہے کہ اگر ایماندار اور بااختیار افسران بولی کے عمل کو خود مانیٹر کریں تو نرخوں میں استحکام ممکن ہے۔

شہریوں کا مزید کہنا ہے کہ اگر موجودہ حالات پر قابو نہ پایا گیا تو غریب طبقے کے لیے سستی سبزی اور پھل کا حصول خواب بن کر رہ جائے گا، جس سے معاشرتی بے چینی اور عوامی غصہ بڑھ سکتا ہے۔

اوچ شریف (باغی ٹی وی ،نامہ نگار حبیب خان) تحصیل احمد پور شرقیہ کی سب تحصیل اوچ شریف اور گردونواح میں کپاس کی فصل اس وقت شدید بحران کا شکار ہو چکی ہے، گرمی کی حبس، غیر معمولی موسمیاتی تبدیلیوں اور کیڑے مکوڑوں کے تباہ کن حملوں نے فصلوں کو ناقابلِ تلافی نقصان پہنچایا ہے، جبکہ محکمہ زراعت کی کارکردگی صرف واٹس ایپ گروپ تک محدود ہو کر رہ گئی ہے۔

چوک بھٹہ، خیرپور ڈاہا، دھوڑکوٹ، ترنڈ بشارت، سرور آباد، بکھری، حلیم پور، رسول پور، بیٹ احمد، بیٹ بختیاری، کچی شکرانی، مستوئی، طاہر والی، چنی گوٹھ سمیت متعدد دیہی علاقوں میں کپاس کی فصل پر سفید مکھی، گلابی سنڈی، سبز تیلہ اور تھرپس کے حملوں نے شدید تباہی مچا دی ہے۔ مقامی کاشتکاروں کے مطابق فصلیں سوکھ رہی ہیں، پتے جھڑ رہے ہیں اور پھول متاثر ہو رہے ہیں، لیکن محکمہ زراعت عملی طور پر غیر حاضر ہے۔

کسانوں نے الزام عائد کیا ہے کہ محکمہ زراعت کی ملی بھگت سے غیر معیاری زرعی ادویات مارکیٹ میں دھڑلّے سے فروخت ہو رہی ہیں، جن کی وجہ سے سپرے کے باوجود کیڑوں پر قابو نہیں پایا جا سکا۔ غیر مؤثر سپرے سے نہ صرف فصل تباہ ہوئی بلکہ کسانوں کے مالی وسائل بھی ضائع ہو گئے۔ ایک کاشتکار نے بتایا کہ "ہماری زمینیں جل رہی ہیں، لیکن محکمہ صرف مشورے واٹس ایپ پر بھیج رہا ہے، کوئی افسر فیلڈ میں نظر نہیں آتا۔”

کسانوں نے محکمہ زراعت کی کارکردگی کو شدید تنقید کا نشانہ بناتے ہوئے کہا ہے کہ صرف میٹنگز، تصاویر اور موبائل پیغامات سے زمینی حقائق نہیں بدل سکتے۔ انہوں نے مطالبہ کیا کہ فوری طور پر فیلڈ افسران کو متاثرہ علاقوں میں بھیجا جائے،غیر معیاری زرعی ادویات کی فروخت پر کریک ڈاؤن کیا جائے،کسانوں کو سستی، مؤثر اور معیاری سپرے مہیا کیا جائے،بیماریوں سے بچاؤ کی تربیت اور بروقت مشورے فیلڈ میں فراہم کیے جائیں۔

کاشتکاروں نے حکومت سے اپیل کی ہے کہ زراعت کو بچانے کے لیے ہنگامی بنیادوں پر اقدامات کیے جائیں، ورنہ نہ صرف کپاس کی پیداوار متاثر ہوگی بلکہ ملکی معیشت کو بھی بڑا دھچکا لگے گا۔ اگر یہ روش برقرار رہی تو کسان سڑکوں پر احتجاج پر مجبور ہوں گے۔

کیا محکمہ زراعت اب بھی واٹس ایپ سے باہر نکلے گا؟

اوچ شریف (باغی ٹی وی، نامہ نگار حبیب خان)میٹرک رزلٹ 2025 میں اوچ شریف روڈ پر واقع چنی گوٹھ کے نواحی علاقے چک نمبر 151 این پی کے لاریب پبلک ہائی سکول نے تعلیمی میدان میں سب کو پیچھے چھوڑ دیا۔ ادارے کی ہونہار طالبہ سعدیہ بی بی نے پنجاب بورڈ کے سالانہ امتحان میں 1141 نمبر حاصل کر کے نہ صرف اپنے اسکول بلکہ پورے علاقے کا نام فخر سے بلند کر دیا۔

اس شاندار کامیابی پر اسکول کے پرنسپل ڈاکٹر محمد اکرم خان نے طلبہ، والدین اور اساتذہ کو مبارکباد دیتے ہوئے کہا کہ:

"یہ کامیابی ہماری مشترکہ محنت کا نتیجہ ہے۔ میں والدین کا شکریہ ادا کرتا ہوں جنہوں نے ہم پر اعتماد کیا، اور اپنے جملہ سٹاف کو خراج تحسین پیش کرتا ہوں جنہوں نے بچوں کی تعلیمی و اخلاقی تربیت میں کوئی کسر نہیں چھوڑی۔”

یاد رہے کہ یہ اسکول پنجاب ایجوکیشن فاؤنڈیشن (PEF) سے الحاق شدہ ہے اور علاقے بھر میں گورنمنٹ و پرائیویٹ سیکٹر کے اداروں میں اپنی تعلیمی کارکردگی کے باعث ممتاز حیثیت رکھتا ہے۔ والدین نے بھی اس موقع پر اپنی خوشی کا اظہار کرتے ہوئے ادارے کی تعریف کی اور کہا کہ:

"ڈاکٹر محمد اکرم خان اور ان کے اساتذہ نے ہمارے بچوں کے روشن مستقبل کی ضمانت دی، ہم ان کے شکر گزار ہیں۔”

ڈاکٹر محمد اکرم خان نے مزید کہا کہ ان کی کوشش ہے کہ PEF کے معیار کے مطابق حکومت پنجاب کے تعلیمی ویژن کو سامنے رکھتے ہوئے ادارے میں ہائی کوالیفائیڈ اسٹاف کا انتخاب کیا جائے، طلبہ کی نگرانی کو مزید مؤثر بنایا جائے اور تدریس کے جدید اصولوں کو اپنایا جائے تاکہ ادارہ مزید کامیابیوں کی راہ پر گامزن رہے۔

اس کامیابی نے یہ ثابت کر دیا کہ اگر جذبہ، محنت اور نیت خالص ہو تو دیہی علاقوں کے تعلیمی ادارے بھی بڑے شہروں کا مقابلہ کر سکتے ہیں۔ سعدیہ بی بی کی کامیابی پورے علاقے کے لیے ایک روشن مثال بن گئی ہے۔

اوچ شریف (باغی ٹی وی، نامہ نگار حبیب خان)روحانی، تاریخی اور ثقافتی اعتبار سے پاکستان کے اہم ترین شہروں میں شمار ہونے والا اوچ شریف اس وقت سنگین صفائی کے بحران سے دوچار ہے۔ حضرت محبوب سبحانی شیخ عبدالقادر جیلانیؒ، مخدوم جہانیاں جہاں گشتؒ، اور مخدوم جلال الدین سرخ پوشؒ سمیت دیگر بزرگانِ دین کے مزارات کے اردگرد گندگی کے ڈھیر، ابلتی نالیاں، بدبو اور مچھروں کی بہتات نے زائرین کو پریشان کر دیا ہے۔

ملک بھر سے عقیدت کے جذبے سے سرشار ہو کر اوچ شریف پہنچنے والے زائرین اس صورتحال پر سخت نالاں دکھائی دیتے ہیں۔ رحیم یار خان سے آنے والے زائر محمد رمضان نے مایوسی کا اظہار کرتے ہوئے کہا کہ "ہم یہاں روحانی سکون کی تلاش میں آئے تھے، مگر گندگی اور بدبو نے سارا تاثر برباد کر دیا۔”

دیگر زائرین نے بھی شکایت کی کہ نہ تو پینے کا صاف پانی میسر ہے، نہ بیت الخلاء کا مناسب بندوبست، اور نہ ہی مچھروں سے بچاؤ کے لیے کوئی اقدام کیا گیا ہے۔ مزارات کے خادمین اور متولیان کے مطابق ضلعی انتظامیہ اور بہاولپور ویسٹ مینجمنٹ کمپنی (بی ڈبلیو ایم سی) کو بارہا تحریری اور زبانی شکایات کی گئیں، لیکن کوئی عملی پیش رفت نہیں ہوئی۔

نالیوں کی صفائی نہ ہونے کے باعث گندا پانی سڑکوں پر بہہ رہا ہے، جبکہ گندگی کے ڈھیر روز بروز بڑھتے جا رہے ہیں۔ مچھر مار سپرے اور فوگنگ جیسی بنیادی سہولیات کا مکمل فقدان ہے، جس سے نہ صرف شہر کی روحانی عظمت متاثر ہو رہی ہے بلکہ زائرین کی صحت کو بھی خطرات لاحق ہیں۔

شہریوں اور زائرین نے ڈپٹی کمشنر بہاولپور ڈاکٹر فرحان فاروق سے فوری نوٹس لینے کا مطالبہ کیا ہے اور درج ذیل اقدامات پر زور دیا ہے:

* تمام مزارات کے اطراف روزانہ کی بنیاد پر صفائی یقینی بنائی جائے۔
* بی ڈبلیو ایم سی مچھر مار اسپرے اور فوگنگ مہم فوری شروع کرے۔
* زائرین کے لیے صاف پانی، بیت الخلاء، اور سایہ دار بیٹھنے کی جگہیں مہیا کی جائیں۔
* مزارات کی بے حرمتی پر ذمہ داران کے خلاف سخت تادیبی کارروائی کی جائے۔

زائرین نے خبردار کیا ہے کہ اگر متعلقہ اداروں نے فوری اقدامات نہ کیے تو مقدس مقامات کی زیارت سے محروم ہونا پڑے گا۔ "یہ مزارات ہمارے ایمان اور عقیدت کا مرکز ہیں، لیکن انتظامیہ کی مجرمانہ خاموشی ہمیں یہاں آنے سے روک رہی ہے،” ایک زائر نے شدید افسوس کا اظہار کرتے ہوئے کہا۔

اب دیکھنا یہ ہے کہ ضلعی انتظامیہ اور محکمہ اوقاف کب تک خاموش تماشائی بنے رہتے ہیں یا زائرین کی اس آواز پر کوئی عملی قدم اٹھاتے ہیں۔