خواب، محنت اور عزت، شکریہ باغی ٹی وی
تحریر: حبیب خان اوچ شریف
ہر خواب کی تعبیر کے پیچھے برسوں کی محنت، خلوص، سچائی اور قربانیاں چھپی ہوتی ہیں۔ صحافت کے شعبے میں سچ بولنا، سچ دکھانا اور سچ کے ساتھ کھڑا رہنا ہمیشہ سے میرے پیشہ ورانہ عزم کا حصہ رہا ہے۔ یہی جذبہ لے کر میں نے باغی ٹی وی سے منسلک ہو کر اوچ شریف ضلع بہاولپور سے رپورٹنگ کا سفر شروع کیا۔
گزشتہ سال 2024 میرے لیے ایک ناقابلِ فراموش سال ثابت ہوا۔ اس سال مجھے میری پیشہ ورانہ محنت، لگن، حق گوئی اور صحافتی ذمہ داریوں کو احسن طریقے سے نبھانے پر ادارہ باغی ٹی وی کی جانب سے "رپورٹرز آف دی ایئر” جیسے باوقار اعزاز کے لیے نامزد کیا گیا۔ یہ میرے لیے ایک اعزاز ہی نہیں بلکہ میرے شہر، میرے قلم، میرے سچ اور میری محنت کی جیت ہے۔
اس سے بڑھ کر خوشی کا لمحہ وہ تھا جب باغی ٹی وی کے انچارج نمائندگان ڈاکٹر غلام مصطفیٰ بڈانی خود اوچ شریف تشریف لائے اور مجھے میرے شہر میں آ کر اعزازی سرٹیفکیٹ سے نوازا۔
سرٹیفکیٹ کی باوقار تقریب میں مہمانِ خصوصی فوکل پرسن ہیلتھ و پرائس کنٹرول مجسٹریٹ عمران حیدر سیال نے میرے ہاتھ میں وہ سند دی، جو میرے لیے صرف کاغذ نہیں بلکہ میرے سفر کی ایک روشن مہر ہے۔
اس موقع پر پریس کلب اوچ شریف کے صدر میاں محمد عامر صدیقی نے میرے مہمانوں کو پھولوں کے ہار پہنا کر جو پذیرائی دی، اس نے مجھے یہ احساس دلایا کہ صحافت صرف تنقید یا رپورٹنگ کا نام نہیں بلکہ تعلق، بھروسہ اور محبت کا پُل بھی ہے۔
میں معروف سینئر اینکرپرسن، CEO باغی ٹی وی اور "کھرا سچ” پروگرام کے میزبان جناب مبشر لقمان صاحب کا دل کی گہرائی سے شکریہ ادا کرتا ہوں، جن کی سرپرستی اور سچائی سے وابستگی ہم جیسے نوجوان صحافیوں کے لیے ایک مشعلِ راہ ہے۔
اسی طرح ایڈیٹر باغی ٹی وی جناب ممتاز حیدر اعوان صاحب کا بھی بے حد ممنون ہوں جنہوں نے ہم نمائندگان کو ہمیشہ اعتماد، رہنمائی اور حوصلہ دیا۔
اور خصوصی شکریہ ڈاکٹر غلام مصطفیٰ بڈانی کا جنہوں نے شدید گرمی اور طویل سفر کی پرواہ کیے بغیر اوچ شریف آ کر مجھے عزت و وقار سے نوازا۔ ان کا خلوص، محبت اور قرب میرے دل میں ہمیشہ نقش رہے گا۔
میں باغی ٹی وی کے اس پلیٹ فارم کو صرف ایک ادارہ نہیں سمجھتا بلکہ اسے اپنی صحافتی شناخت اور نظریاتی وابستگی کا مقام سمجھتا ہوں۔ مجھے فخر ہے کہ میں سچ کے اس قافلے کا حصہ ہوں، جو بغیر کسی خوف یا لالچ کے حق اور انصاف کی آواز بن کر کام کر رہا ہے۔
ان شاءاللّٰہ، یہ سفر جاری رہے گا باغی ٹی وی کے ساتھ، سچ کے ساتھ، خلوص کے ساتھ اور جذبے کے ساتھ۔
