Author: ڈاکٹرغلام مصطفی بڈانی

سیالکوٹ (باغی ٹی وی بیوروچیف شاہد ریاض)وفاقی بجٹ 2024-25 کے خلاف ملک بھر کی تاجر اور صنعتکار برادری نے شدید تحفظات کا اظہار کرتے ہوئے متحدہ آواز میں اس پر سخت تنقید کی ہے۔ سیالکوٹ چیمبر آف کامرس اینڈ انڈسٹری کے زیر اہتمام ہونے والی اہم پریس کانفرنس میں پاکستان کے مختلف بڑے شہروں کے چیمبرز آف کامرس نے ویڈیو لنک کے ذریعے شرکت کی اور بجٹ کو "بزنس دشمن” قرار دیا۔

سیالکوٹ چیمبر کے صدر اکرام الحق کی زیر صدارت اس اجلاس میں لاہور، کراچی، راولپنڈی، فیصل آباد، گوجرانوالہ، گجرات، ملتان اور دیگر شہروں کے چیمبر نمائندگان نے متفقہ موقف اختیار کرتے ہوئے کہا کہ حکومت نے مالی پالیسی مرتب کرتے وقت کاروباری طبقے کو یکسر نظر انداز کیا، جو کہ ملکی معیشت کے لیے نقصان دہ عمل ہے۔

اکرام الحق نے کہا کہ "اڑان پاکستان” جیسے قومی سطح کے ترقیاتی منصوبے محض سیاسی نعرے بن کر رہ جائیں گے اگر ان میں صنعتکاروں کو اعتماد میں نہیں لیا گیا۔ انہوں نے کہا کہ موجودہ بجٹ میں صنعتی شعبے کی قربانیوں کو فراموش کر دیا گیا ہے اور نہ ہی کاروباری برادری کو کسی قسم کا ریلیف دیا گیا ہے۔

پریس کانفرنس میں شریک مختلف چیمبرز کے صدور نے ایف بی آر کی پالیسیوں کو غیر شفاف اور مبہم قرار دیتے ہوئے کہا کہ ٹیکس نظام میں ایس آر اوز کی بھرمار اور پالیسی تضادات نے بزنس کمیونٹی کو مشکلات میں مبتلا کر دیا ہے۔ صنعتکاروں نے کہا کہ ٹیکس چھوٹ ختم کر دی گئی ہے جبکہ سابقہ بھاری ٹیکسوں کا بوجھ بدستور برقرار ہے، جو ملکی صنعت کو عالمی سطح پر غیر مسابقتی بنا رہا ہے۔

شرکاء نے اس بات پر بھی شدید تحفظات کا اظہار کیا کہ موجودہ ٹیکس پالیسیوں کے باعث پیداواری لاگت میں غیر معمولی اضافہ ہوا ہے، جس سے نہ صرف مقامی صنعت متاثر ہو رہی ہے بلکہ برآمدات میں بھی کمی کا خدشہ پیدا ہو گیا ہے۔ کاروباری رہنماؤں نے الزام عائد کیا کہ وزیر خزانہ سے مشاورت کے دوران ان کا رویہ غیر لچکدار اور سخت گیر تھا، جس سے تاجر برادری کو شدید مایوسی ہوئی۔

پریس کانفرنس کا اختتام ایک متفقہ اعلامیے پر ہوا، جس میں حکومت سے مطالبہ کیا گیا کہ وہ معاشی پالیسیاں ترتیب دینے سے پہلے تاجر اور صنعتکار برادری سے وسیع مشاورت کرے۔ اعلامیے میں خبردار کیا گیا کہ اگر موجودہ روش برقرار رہی تو پاکستان میں معاشی استحکام محض ایک خواب ہی بن کر رہ جائے گا۔

سیالکوٹ (باغی ٹی وی، بیوروچیف شاہد ریاض)ڈپٹی کمشنر سیالکوٹ صبا اصغر علی نے اعلان کیا ہے کہ اسسٹنٹ ایجوکیشن افسران (AEOs) کی انسپکشن کے نظام کو ڈیجیٹلائز کیا جا رہا ہے، جس کے تحت رئیل ٹائم مسائل کی نشاندہی اور فوری رپورٹنگ ممکن ہو سکے گی۔ انہوں نے کہا کہ اب اے ای اوز اپنے فیلڈ وزٹس کے دوران اسکولوں میں درپیش مسائل کو ڈیجیٹل ایپ کے ذریعے فوری طور پر اپ لوڈ کر سکیں گے، جس سے بروقت فیصلہ سازی اور مسئلہ حل کی راہ ہموار ہوگی۔

ڈپٹی کمشنر نے اے ای اوز کو ہدایت کی کہ وہ اپنے فرائض مکمل ایمانداری اور محنت سے انجام دیں، اور انسپکشن کے دوران نہ صرف مسائل کی نشاندہی کریں بلکہ ان کے حل کیلئے اسکول انتظامیہ کے ساتھ عملی اقدامات بھی کریں۔ ایسے مسائل جو ان کے دائرہ اختیار سے باہر ہوں، وہ ڈسٹرکٹ ایڈمنسٹریشن کے نوٹس میں لائیں تاکہ ان کا مؤثر تدارک ممکن ہو۔

اجلاس میں سی ای او ایجوکیشن مجاہد حسین علوی اور ڈسٹرکٹ ایجوکیشن اتھارٹی کے دیگر مقامی حکام بھی شریک تھے۔