اوکاڑہ (باغی ٹی وی، نامہ نگار ملک ظفر)اوکاڑہ میں دیپالپور روڈ پر 31 ٹو ایل کے قریب ایک افسوسناک ٹریفک حادثے میں دو نوجوان جان کی بازی ہار گئے جبکہ ایک نوجوان شدید زخمی ہو گیا۔ حادثہ اس وقت پیش آیا جب تیز رفتاری کے باعث موٹرسائیکل بے قابو ہو کر سامنے جانے والی ٹریکٹر ٹرالی سے ٹکرا گئی۔
ریسکیو ذرائع کے مطابق موٹرسائیکل پر سوار تین نوجوان دیپالپور روڈ پر سفر کر رہے تھے کہ اچانک ایک ٹریکٹر ٹرالی سے ٹکرا گئے۔ ٹکر اتنی شدید تھی کہ دو نوجوان موقع پر ہی دم توڑ گئے، جبکہ تیسرے کو شدید زخمی حالت میں قریبی ہسپتال منتقل کر دیا گیا ہے۔
واقعے کی اطلاع ملتے ہی پولیس اور ریسکیو 1122 کی ٹیمیں جائے حادثہ پر پہنچ گئیں، جاں بحق ہونے والے نوجوانوں کی لاشوں کو ضروری کارروائی کے بعد ورثاء کے حوالے کر دیا گیا۔ پولیس نے حادثے کی تحقیقات شروع کر دی ہیں۔
عینی شاہدین کے مطابق حادثے کی بنیادی وجہ موٹرسائیکل کی تیز رفتاری اور لاپروائی بتائی جا رہی ہے۔ عوامی حلقوں نے ضلعی انتظامیہ سے مطالبہ کیا ہے کہ دیپالپور روڈ پر ٹریفک قوانین پر سختی سے عملدرآمد کروایا جائے تاکہ قیمتی جانوں کا ضیاع روکا جا سکے۔
