Author: ڈاکٹرغلام مصطفی بڈانی

گودی میڈیا کی خونی اور جھوٹی صحافت، عالمی میڈیا نے پرخچے اُڑا دیئے!
تحریر: ڈاکٹر غلام مصطفےٰ بڈانی
بھارت اور پاکستان کے درمیان حالیہ فوجی کشیدگی کے دوران بھارتی میڈیا جسے "گودی میڈیا” کہا جاتا ہے نے جھوٹی خبروں اور پروپیگنڈے کی ایسی مہم چلائی کہ عالمی اداروں اور فیکٹ چیکرز کو اسے بے نقاب کرنا پڑا۔ دی نیویارک ٹائمز اور دی نیوز انٹرنیشنل کی رپورٹس کی روشنی میں یہ واضح ہوا کہ بھارتی میڈیا نے غیر مصدقہ دعوؤں کو قومیت پرستی کے جوش میں نشر کیا، جس سے نہ صرف صحافتی معیار کو نقصان پہنچا بلکہ خطے میں تناؤ بھی بڑھا۔

بھارتی میڈیا نے دعویٰ کیا کہ بھارتی فورسز نے پاکستان کے جوہری اڈے پر حملہ کیا، دو پاکستانی جنگی طیاروں کو مار گرایاہے اور کراچی کی بندرگاہ جو پاکستان کی معاشی شہ رگ ہے کو تباہ کردیا۔ یہ رپورٹس اتنی تفصیلی تھیں کہ عام ناظرین ان پر یقین کرنے پر مجبور ہوگئے۔ تاہم دی نیویارک ٹائمز نے واضح کیا کہ "ان دعوؤں میں سے کوئی بھی سچ نہیں تھا۔” اسی طرح دی نیوز انٹرنیشنل نے کراچی پر بھارتی بحریہ کے مبینہ حملے کی کہانی کو جھوٹ قرار دیا جو سوشل میڈیا پر وائرل ہوگئی تھی۔ بھارتی میڈیا کا یہ رویہ کوئی حادثاتی غلطی نہیں بلکہ ایک دانستہ کوشش تھی جو قومیت پرستی کے نام پر جھوٹ کو فروغ دے رہی تھی۔

یہ جھوٹی خبریں سوشل میڈیا سے شروع ہوکر مین اسٹریم میڈیا تک پہنچیں، جہاں کبھی معتبر سمجھے جانے والے اداروں نے بھی انہیں بغیر تصدیق کے نشر کیا۔ امریکن یونیورسٹی کی پروفیسر سمیترا بدریناتھن نے کہا کہ "اس بار جو بات منفرد تھی وہ یہ کہ معتبر صحافیوں اور بڑے میڈیا ہاؤسز نے کھلم کھلا من گھڑت کہانیاں چلائیں۔” ان کا کہنا تھا کہ جب قابل اعتماد ذرائع ہی جھوٹ پھیلانے لگیں تو یہ ایک سنگین بحران ہے۔ سوشل میڈیا پر جھوٹ کی بھرمار پہلے بھی دیکھی گئی لیکن مین اسٹریم میڈیا کا اس طرح پروپیگنڈے کا آلہ بننا بھارتی صحافت کے زوال کی واضح علامت ہے۔

بھارت میں صحافتی آزادی کا گراف 2014 سے مسلسل نیچے جا رہا ہے، جب سے نریندر مودی نے اقتدار سنبھالا۔ دی نیوز انٹرنیشنل کے مطابق بہت سے میڈیا ہاؤسز پر حکومتی ساکھ کو نقصان پہنچانے والی خبروں کو دبانے کا دباؤ ہے جبکہ بڑے ٹی وی چینلز حکومتی پالیسیوں کے ترجمان بن گئے ہیں۔ اس ماحول میں جنگ کے دوران قومیت پرستی کو ہوا دینا اور جھوٹی خبروں کو نشر کرنا معمول بن گیا۔ کارنیگی میلن یونیورسٹی کے پروفیسر ڈینیئل سلورمین نے کہا کہ "غلط معلومات کو جان بوجھ کر پھیلایا جاتا ہے تاکہ جذبات ابھریں اور تنازعہ بڑھے۔” بھارت اور پاکستان کی تاریخی دشمنی نے اس جھوٹ کو پھیلانے کے لیے زرخیز زمین فراہم کی۔

اس افراتفری میں بھارت کے معروف صحافی راجدیپ سردیسائی جو انڈیا ٹوڈے کے اینکر ہیں، کو اپنے چینل پر پاکستانی طیاروں کے مار گرائے جانے کی جھوٹی خبر نشر کرنے پر معافی مانگنی پڑی۔ دی نیویارک ٹائمز اور دی نیوز انٹرنیشنل دونوں نے اسے نمایاں کیا۔ سردیسائی نے اپنے یوٹیوب ویلاگ میں کہا کہ یہ جھوٹ "قومی مفاد کے نام پر دائیں بازو کی پروپیگنڈہ مشینری” کا حصہ تھا۔ ان کی معافی اس بات کی گواہی ہے کہ 24 گھنٹے کے نیوز سائیکل میں کس طرح میڈیا دباؤ کا شکار ہوکر جھوٹ کا آلہ بن جاتا ہے۔

بھارت کی فیکٹ چیکنگ ویب سائٹ آلٹ نیوز نے اس صورتحال میں روشنی کی کرن ثابت ہوئی۔ اس نے آج تک اور نیوز18 جیسے بڑے چینلز کی جھوٹی خبروں کو بے نقاب کیا، جن میں کراچی پر حملے کی من گھڑت کہانی بھی شامل تھی۔ دی نیویارک ٹائمز کے مطابق آلٹ نیوز کے بانی پراتیک سنہا نے کہا کہ "بھارت کا معلوماتی ماحول تباہ ہوچکا ہے۔” بدقسمتی سے فیکٹ چیکنگ کی یہ کوششیں مہنگی ثابت ہو رہی ہیں۔ آلٹ نیوز کو ہتک عزت کے مقدمات اور رپورٹرز کو ہراسانی کا سامنا ہے جو سچائی کی راہ میں رکاوٹ بن رہے ہیں۔

سوشل میڈیا نے اس جھوٹ کو پھیلانے میں کلیدی کردار ادا کیا۔ دی نیوز انٹرنیشنل نے بتایا کہ کراچی پر حملے کی جھوٹی خبروں کے ساتھ ایکس (سابقہ ٹوئٹر) پر "کراچی” اور "کراچی پورٹ” ٹرینڈ کر رہے تھے۔ سوشل میڈیا پر دھماکوں سے سیاہ بادل کی تصاویر گردش کر رہی تھیں جو بعد میں غزہ کی ثابت ہوئیں۔ بھارتی بحریہ نے تصادم کے بعد واضح کیا کہ اس نے کراچی پر کوئی حملہ نہیں کیا۔ یہ واقعات بتاتے ہیں کہ سوشل میڈیا اور مین اسٹریم میڈیا کا گٹھ جوڑ کس طرح جھوٹ کو حقیقت کا رنگ دیتا ہے۔

رپورٹرز وِد آؤٹ بارڈرز کے مطابق بھارت میں 200 ملین سے زیادہ گھرانوں کے پاس ٹیلی ویژن ہے اور 450 نجی ٹی وی چینلز خبریں نشر کرتے ہیں۔ اس طاقت کے ساتھ میڈیا کی ذمہ داری بھی بڑھ جاتی ہے لیکن حالیہ واقعات نے اسے نظرانداز کیا۔ دی نیویارک ٹائمز نے لکھا کہ "بھارتی صحافت جو کبھی اپنی جرات کے لیے جانی جاتی تھی، اب پروپیگنڈے کا آلہ بن رہی ہے۔” یہ زوال نہ صرف بھارت کے لیے بلکہ خطے کے امن کے لیے بھی خطرہ ہے۔

گودی میڈیا کی خونی اور جھوٹی صحافت نے جہاں بھارت کے اندر سچائی کا گلا گھونٹا وہیں دنیا بھر کے عوام کو بھی جھوٹے بیانیے کے ذریعے گمراہ کیا۔ ایسے حالات میں گودی میڈیا کسی ایک ملک نہیں بلکہ عالمی امن کیلئے بھی خطرہ بن چکا ہے۔ اگر یہ جھوٹ بے لگام رہا تو ایک دن یہ غلط معلومات جنگی تباہی کو جنم دے سکتی ہیں۔ اس سنگین صورتحال پر عالمی اداروں کو فوری نوٹس لینا چاہیے۔ اقوامِ متحدہ، انٹرنیشنل پریس کونسل اور عالمی عدالت انصاف کو چاہیے کہ وہ گودی میڈیا کے جھوٹے پراپیگنڈے پر باقاعدہ تحقیقات کریں، ذمہ داروں کا تعین کریں اور ان پر بین الاقوامی قوانین کے تحت مقدمات چلائیں۔ کیونکہ اب وقت آ چکا ہے کہ خونی صحافت کے مجرموں کو قرار واقعی سزا دی جائے تاکہ دنیا سچائی، صحافتی آزادی اور امن کی طرف واپس لوٹ سکے۔

بھارت میں انسانیت کا قتل عام
تحریر:ڈاکٹرغلام مصطفےٰ بڈانی
ایک خبر کے مطابق بھارتی نیوی نے روہنگیا مہاجرین کو بحیرہ انڈمان میں پھینک دیا ہے، جس پر اقوام متحدہ کے انسانی حقوق کمیشن نے نوٹس لے کر تحقیقات کا آغاز کر دیا ہے۔ کمیشن نے اسے "غیر انسانی”، "ناقابلِ قبول” اور بین الاقوامی قوانین کی "کھلی خلاف ورزی” قرار دیتے ہوئے بھارتی حکومت سے فوری وضاحت اور تحقیقات کا مطالبہ کیا ہے۔ یہ واقعہ بھارت کی تاریخ میں انسانیت کے خلاف جرائم کا ایک اور سیاہ باب ہے جو عالمی برادری کے ضمیر کو جھنجھوڑرہا ہے۔ اب آئیے بھارت کے انسانیت کے خلاف جرائم کا تاریخی طور پر جائزہ لیتے ہیں جو ایک ایسی داستان ہے جو منظم تشدد، نسل کشی اور انسانی حقوق کی پامالیوں سے بھری پڑی ہے۔

بھارت جو خود کو دنیا کی سب سے بڑی جمہوریت کہلوانے پر فخر کرتا ہے ایک ایسی سیاہ تاریخ کا حامل ملک ہے جو خونریزی اور ظلم کی داستانوں سے بھری ہوئی ہے۔ روہنگیا مہاجرین کے ساتھ حالیہ واقعہ کوئی ایک مثال نہیں ہے بلکہ اس کی جڑیں بھارت کی طویل تاریخ میں جُڑی ہوئی ہیں، جہاں مختلف مذہبی، نسلی اور علاقائی گروہوں کے خلاف منظم تشدد کی ایک طویل فہرست موجود ہے۔ اقوام متحدہ کے ماہر ٹام اینڈریوز نے روہنگیا واقعے کو ناقابلِ معافی قرار دیا اور ایکس (سابقہ ٹویٹر)پر پوسٹس کے مطابق اس میں عورتیں، بچے اور کمزور افراد شامل تھے۔ یہ الزامات اگرچہ ابھی تفتیش کے مراحل میں ہیں لیکن بھارت کے مظالم کی تاریخ گواہ ہے ۔

بھارت کی انسانیت کے خلاف جرائم کی تاریخ 1947 کی تقسیم سے بھی پہلے کی ہے لیکن جدید بھارت میں یہ سلسلہ کئی اہم واقعات سے واضح ہوتا ہے۔ 1984 کا آپریشن بلیو سٹار اس کی ایک خوفناک مثال ہے۔ اس آپریشن کے تحت بھارتی فوج نے امرتسر کے گولڈن ٹیمپل جو سکھوں کا مقدس ترین مقام ہے پر حملہ کیا تاکہ جرنیل سنگھ بھنڈرانوالہ اور دیگر سکھ عسکریت پسندوں کو ہٹایا جا سکے۔ سرکاری اعداد و شمار کے مطابق 493 شہری ہلاک ہوئے لیکن ایمنسٹی انٹرنیشنل جیسی تنظیموں کے مطابق 4,000 سے 8,000 سکھ زائرین جن میں عورتیں اور بچے شامل تھے، مارے گئے۔ فوج نے ٹینک، ہیلی کاپٹر اور بھاری ہتھیار استعمال کیے، جس سے گولڈن ٹیمپل اور اکال تخت کو شدید نقصان پہنچا۔ سکھ ریفرنس لائبریری جس میں نایاب مخطوطات اور تاریخی نوادرات تھے، نذر آتش کردی گئی ۔ اس واقعے نے سکھ برادری میں گہری دراڑ ڈالی اور اسے "سکھ نسل کشی” کا نام دیا گیا۔ اکال تخت نے اسے جینوسائیڈ تسلیم کیا لیکن بھارتی عدالتیں ذمہ داروں کو سزا دینے میں ناکام رہی ہیں۔

آپریشن بلیو سٹار کے بعد اندرا گاندھی کے قتل نے دہلی اور دیگر شہروں میں سکھوں کے خلاف منظم فسادات کو جنم دیا۔ سرکاری اعداد و شمار کے مطابق دہلی میں 2,800 اور پورے بھارت میں 3,350 سکھ قتل کر دئے گئے جبکہ غیر سرکاری ذرائع 8,000 سے 17,000 ہلاکتوں کا تخمینہ لگاتے ہیں۔ انسانی حقوق کی تنظیموں نے ان فسادات کو "ریاست کی سرپرستی میں قتل عام” قرار دیا کیونکہ کانگریس پارٹی کے رہنماؤں نے مبینہ طور پر ہجوم کو ہتھیار، کیروسین (مٹی کاتیل)اور سکھوں کے گھروں کی فہرستیں فراہم کیں۔ ہیومن رائٹس واچ کی 2011 کی رپورٹ کے مطابق بھارتی حکومت نے ان فسادات کے ذمہ داروں کے خلاف کوئی ٹھوس کارروائی نہیں کی، جو انصاف کی سنگین ناکامی کو ظاہر کرتا ہے۔

مقبوضہ جموں و کشمیر میں بھارتی فوج اور پولیس کے مظالم بھی انسانیت کے خلاف جرائم کی ایک واضح مثال ہیں۔ اقوام متحدہ کی 2025 کی رپورٹ کے مطابق بھارت نے غیر آئینی قوانین جیسے ان لا فل ایکٹیویٹیز پرینشن ایکٹ (UAPA) کے ذریعے صحافیوں، انسانی حقوق کے کارکنوں اور عام شہریوں کو ہراساں کیا۔ 2011 میں بھارتی حکومت نے خود اعتراف کیا کہ کشمیر میں 2,000 افراد کو اجتماعی قبروں میں دفن کیا گیا، جن پر فوج اور پولیس پر ماورائے عدالت قتل کے الزامات ہیں۔ پیلٹ گنوں کااندھادھند استعمال کیا گیا، جس سے ہزاروں افراد نابینا ہوئے اور آرمڈ فورسز اسپیشل پاورز ایکٹ (AFSPA) نے سیکیورٹی فورسز کولامتناہی اختیارات دیے کہ وہ جومظالم وقتل گری کریں انہیں کوئی نہیں پوچھے گا۔ اقوام متحدہ کے کمشنر وولکر ترک نے عالمی توجہ دلائی، لیکن بھارت نے اسے "اندرونی معاملہ” قرار دے کر بین الاقوامی تفتیش سے انکار کیا۔

بھارت کی شمال مشرقی ریاستیں جنہیں سیون سسٹرز کہا جاتا ہے (آسام، منی پور، ناگالینڈ، میزورم، میگھالیہ، اروناچل پردیش، تریپورہ) میں آزادی کی تحریکوں کو کچلنے کے لیے فوجی کارروائیاں کی گئیں۔ میزورم میں 1966 میں بھارتی فضائیہ نے اپنی سرزمین پر بمباری کی جو بھارت کی تاریخ میں اپنی نوعیت کا واحد واقعہ ہے۔ اس کے نتیجے میں ہزاروں شہری ہلاک ہوئے اور "گروپنگ آف ولیجز” پالیسی کے تحت ہزاروں میزو باشندوں کو جبری نقل مکانی کروائی گئی، جس سے ان کی ثقافت اور معاشرے کو نقصان پہنچا۔ ناگالینڈ اور منی پور میں AFSPA کے تحت سیکیورٹی فورسز پر عصمت دری، تشدد اور جبری گمشدگیوں کے الزامات ہیں۔ آسام میں 1990 کی دہائی میں "خفیہ قتل” کے واقعات رپورٹ ہوئے، جن میں سیکیورٹی فورسز نے مبینہ طور پر عسکریت پسندوں کے رشتہ داروں کو ہلاک کیا۔ ایمنسٹی انٹرنیشنل نے AFSPA کو انسانی حقوق کی خلاف ورزیوں کا سبب قرار دیا لیکن بھارت نے اسے برقرار رکھاہوا ہے۔

وسطی اور مشرقی بھارت میں نکسلائٹس کے خلاف آپریشنز جیسے آپریشن گرین ہنٹ (2009-2010)نے آدی واسی (قبائلی) آبادیوں کو نشانہ بنایا۔ ایمنسٹی انٹرنیشنل کی 2019 کی رپورٹ کے مطابق چھتیس گڑھ میں سیکیورٹی فورسز نے آدی واسی خواتین کے خلاف عصمت دری اور تشدد کے واقعات کو چھپایا اور ہزاروں قبائلی باشندوں کو ان کے گھروں سے بے دخل کیا گیا۔ اقوام متحدہ نے 2013 میں بھارت سے آدی واسیوں کے حقوق کے تحفظ کا مطالبہ کیا لیکن دہشت گرد بھارت کے کانوں پر جوں تک نہ رینگی اور کوئی پیش رفت نہ ہوئی۔

بھارت میں اقلیتوں خاص طور پر مسلمانوں کے خلاف منظم تشدد کی ایک طویل تاریخ ہے۔ 2002 کے گجرات فسادات میں ہزاروں مسلمان ہلاک اور زخمی ہوئے، جنہیں انسانی حقوق کی تنظیموں نے "ریاستی سرپرستی میں قتل عام” قرار دیا۔ سیٹزن شپ ایمنڈمنٹ ایکٹ (CAA) اور نیشنل رجسٹر آف سٹیزنز (NRC) جیسے قوانین نے مسلمانوں اور دیگر اقلیتوں کے خلاف امتیازی سلوک کو بڑھاوا دیا۔ اقوام متحدہ کی 2022 کی رپورٹ نے اسے انسانی حقوق کے عالمی چارٹر کی خلاف ورزی قرار دیالیکن بھارت کے خلاف کوئی عملی اقدام نہ کیا گیا۔

سری لنکا میں لبریشن ٹائیگرز آف تامل ایلم (LTTE) کے خلاف بھارت کی انڈین پیس کیپنگ فورس (IPKF) کی کارروائیاں (1987-1990) بھی انسانی حقوق کی سنگین خلاف ورزیوں کا باعث بنیں۔ IPKF پر تامل شہریوں کے خلاف تشدد، عصمت دری اور ماورائے عدالت قتل کے الزامات ہیں۔ اقوام متحدہ کی 2011 کی رپورٹ نے سری لنکا میں تامل شہریوں کے خلاف مظالم کو جنگی جرائم قرار دیا لیکن بھارت کو اس کے سیاسی اور جغرافیائی اثر و رسوخ کی وجہ سے کلین چٹ دے دی گئی۔ سری لنکا ایک چھوٹا اور کمزور ملک ہونے کی وجہ سے، اس کے جرائم عالمی برادری کی نظروں میں زیادہ نمایاں ہوئے جبکہ بھارت کے مظالم پر پردہ ڈال دیا گیا۔

ان تمام واقعات کے باوجود عالمی برادری کی خاموشی حیران کن ہے۔ بھارت کے انسانیت کے خلاف جرائم پر عالمی طاقتوں کی خاموشی کے پیچھے کئی وجوہات ہیں۔ سب سے پہلے بھارت کو چین کے مقابلے میں ایشیاءمیں ایک اہم اسٹریٹجک اتحادی سمجھا جاتا ہے۔ امریکہ، یورپی یونین اور دیگر مغربی ممالک بھارت کے ساتھ دفاعی اور اقتصادی شراکت داری کو ترجیح دیتے ہیں۔ دوسری وجہ بھارت کی معاشی طاقت ہے جو مغربی کمپنیوں کے لیے ایک بڑی مارکیٹ ہے۔ انسانی حقوق کے مسائل اٹھانے سے اقتصادی تعلقات خراب ہونے کا خطرہ ہے۔ تیسرا مغربی میڈیا بھارت کو "جمہوری ملک” کے طور پر پیش کرتا ہے جو اس کے مظالم کو پردے میں رکھتا ہے۔ آخر میں اقوام متحدہ کے پاس بھارت جیسے طاقتور ممالک کے خلاف سخت ایکشن لینے کی صلاحیت محدود ہے کیونکہ سلامتی کونسل کے مستقل ارکان کی ویٹو طاقت اور سیاسی دباؤبھارت کے خلاف کوئی کارروائی نہیں ہونے دیتے ،جس سے بھارت نے بلاروک ٹوک انسانیت کاقتل عام جاری رکھا ہوا ہے ۔

یہ عالمی برادری کی مجرمانہ خاموشی کے نتائج سنگین ہیں کہ بھارت کے مظالم نہ صرف متاثرین کے لیے تباہی کا باعث ہیں بلکہ بین الاقوامی قوانین اور انسانی حقوق کے اصولوں کوبھی پامال کرتے ہیں۔ اگر عالمی برادری نے اب بھی آواز نہ اٹھائی تو یہ ایک خطرناک مثال قائم کرے گی کہ طاقتور ممالک انسانی حقوق کی خلاف ورزیوں سے بچ سکتے ہیں۔ روہنگیا مہاجرین کا حالیہ واقعہ اس سلسلے کی ایک اور کڑی ہے جو عالمی ضمیر کو جھنجھوڑرہاہے۔

بھارت کے انسانیت کے خلاف جرائم کی اس تاریخ کو دیکھتے ہوئے، عالمی برادری سے مطالبہ ہے کہ وہ اپنے سوئے ہوئے ضمیرکو جگائے اور انصاف کے لیے آواز بلند کرے۔ اقوام متحدہ کو روہنگیا واقعے کی آزادانہ اور شفاف تفتیش کرنی چاہیے اور ذمہ داروں کو سزا دینی چاہیے۔ بھارت کو آرمڈ فورسز اسپیشل پاورز ایکٹ (AFSPA) اور ان لا فل ایکٹیویٹیز پرینشن ایکٹ (UAPA) جیسے جابرانہ قوانین ختم کرنے اور انسانی حقوق کے تحفظ کے لیے ٹھوس اقدامات کرنے کیلئے پابندکیاجائے اگربھارت نہ مانے تو اس اقتصادی ،تجارتی ،فوجی اور سفارتی پابندیاں لگائی جائیں۔ AFSPA ایک متنازع قانون ہے جو سیکیورٹی فورسز کو شورش زدہ علاقوں(جیسے کشمیر اور شمال مشرقی ریاستوں)میں وسیع اختیارات دیتا ہے بشمول بغیر وارنٹ گرفتاری، گولی مارنے کی اجازت اور قانونی استثنی، جس کے نتیجے میں ماورائے عدالت قتل، تشدد اور جبری گمشدگیوں کی شکایات عام ہیں۔ اسی طرح UAPA ایک انسداد دہشت گردی قانون ہے جو مبہم تعریفات اور سخت سزائوں کے ذریعے صحافیوں، کارکنوں اور عام شہریوں کو "دہشت گرد” قرار دے کر ان کے بنیادی حقوق سلب کرتا ہے جیسے کہ طویل عرصے تک بغیر مقدمے کے حراست میں رکھنا شامل ہے۔

اب وقت ہے کہ انسانی حقوق کی تنظیمیں بھارت کے مظالم کو عالمی عدالت انصاف (ICC) میں لے جائیں تاکہ انسانیت کے خلاف جرائم کی قانونی کارروائی ہو۔ اگر آج بھی اقسام عالم اور انسانی حقوق کی تنظیمیں ،روہنگیا، سکھ، کشمیری یا دیگر اقلیتوںکے ساتھ ہونے والے ظلم پر خاموشی رہیں تو کل کوئی اور نسلی گروہ یااقلیت ان کے ظلم کا شکار ہوں گے۔ وقت آ گیا ہے کہ عالمی برادری بھارت کے انسانیت کے قتل عام پر اپنی خاموشی توڑے اور انصاف کا تقاضہ پورا کرے اور بھارت کا کڑامحاسبہ کیا جائے اور اسے انصاف کے کٹہرے میں کھڑاکیا جائے۔