میرپورماتھیلو،باغی ٹی وی(نامہ نگارمشتاق لغاری)ملک کی موجودہ صورتحال کے پیشِ نظر ضلع گھوٹکی کے سرکاری ملازمین کی چھٹیاں منسوخ کر دی گئی ہیں، اور حفاظتی تدابیر اختیار کرنے کے لیے تمام انتظامات مکمل کرنے کا فیصلہ کیا گیا ہے۔ ڈاکٹروں، پیرا میڈیکل اسٹاف اور میونسپل عملے کو الرٹ رہنے کا حکم جاری کیا گیا ہے۔
ڈپٹی کمشنر گھوٹکی ڈاکٹر سید محمد علی کی زیر صدارت منعقدہ اجلاس میں ایس ایس پی ڈاکٹر سمیع اللہ سومرو، رینجرز، قانون نافذ کرنے والے اداروں کے افسران، محکمہ صحت، میونسپل، تعلیم، لوکل گورنمنٹ، سول ڈیفنس، سوشل ویلفیئر، ٹرانسپورٹ اور اطلاعات کے افسران سمیت صنعتی اداروں کے نمائندگان نے شرکت کی۔
ڈپٹی کمشنر نے اجلاس میں خطاب کرتے ہوئے کہا کہ ملک کی موجودہ صورتحال کے پیش نظر حفاظتی اقدامات کو انتہائی ضروری قرار دیا ہے تاکہ کسی بھی ہنگامی صورت حال سے فوری طور پر نمٹا جا سکے۔ اس سلسلے میں تمام متعلقہ محکموں کے ملازمین کی چھٹیاں منسوخ کر دی گئی ہیں اور انہیں ہدایت دی گئی ہے کہ وہ حفاظتی انتظامات کو یقینی بنائیں۔
انہوں نے ڈی ایچ او کو ہدایت کی کہ تمام ڈاکٹروں اور پیرا میڈیکل اسٹاف کو الرٹ رکھا جائے اور ایمبولینسز اور ضروری ادویات کی فراہمی کو یقینی بنایا جائے تاکہ کسی بھی ناگہانی صورت حال میں عوام کو کسی قسم کی دشواری کا سامنا نہ ہو۔
اس کے علاوہ، اسسٹنٹ کمشنرز کو ہدایت کی گئی کہ وہ اپنے اپنے تحصیل سطح پر جامع کنٹیجنسی پلان تیار کریں اور یونین کونسل سطح پر سائرن سسٹم کو فعال کریں۔ صنعتی اداروں کے نمائندوں سے کہا گیا کہ وہ احتیاطی تدابیر اختیار کرتے ہوئے ڈاکٹروں، پیرا میڈیکل اسٹاف، ایمبولینسز اور فائر بریگیڈ کی تفصیلات فراہم کریں تاکہ ان کو پلان میں شامل کیا جا سکے۔
اجلاس میں ایس ایس پی ڈاکٹر سمیع اللہ سومرو نے عوام کو اطمینان دلایا کہ خوفزدہ ہونے کی کوئی ضرورت نہیں ہے۔ انہوں نے کہا کہ ممکنہ ہنگامی حالات کے لیے تیاریاں صرف احتیاطی تدابیر ہیں، اور عوام کو سوشل میڈیا پر پھیلائی جانے والی افواہوں سے گریز کرنا چاہیے اور خبروں کی تصدیق کرنی چاہیے تاکہ کسی بھی من گھڑت اطلاعات سے بچا جا سکے۔ اس موقع پر بھارتی جارحیت کے دوران شہید ہونے والوں کے لیے فاتحہ خوانی بھی کی گئی۔
