Author: ڈاکٹرغلام مصطفی بڈانی

اوچ شریف (نامہ نگار حبیب خان) پاکستان جرنلسٹ ایسوسی ایشن بہاولپور ڈویژن کا ایک اہم اجلاس مقامی دفتر میں منعقد ہوا، جس میں صحافیوں کو درپیش مسائل، پیشہ ورانہ تربیت اور تنظیمی استحکام پر تفصیلی گفتگو کی گئی۔

اجلاس کی صدارت ایسوسی ایشن کے نائب صدر جنوبی پنجاب ڈاکٹر سید کاشف بخاری نے کی جبکہ انفارمیشن سیکریٹری ملک جمشید عطا، سینئر صحافیوں اور مختلف شہروں کے نمائندگان نے کثیر تعداد میں شرکت کی۔

اجلاس میں متفقہ طور پر صحافیوں کے حقوق کے تحفظ اور ان کے پیشہ ورانہ وقار میں اضافے کے لیے جلد ہی کارڈز کی تقسیم اور نوٹیفیکیشن کی ایک پروقار تقریب منعقد کرنے کا فیصلہ کیا گیا۔ اس کے علاوہ، تنظیمی نظم و ضبط کو بہتر بنانے اور اندرونی معاملات کو مزید مؤثر بنانے کے لیے مختلف کمیٹیوں کی تشکیل پر بھی غور کیا گیا۔

صدر بہاولپور ڈویژن چوہدری عثمان نے اپنے خطاب میں کہا کہ صحافت ایک مقدس پیشہ ہے اور اس کے وقار کو برقرار رکھنا سب کی مشترکہ ذمہ داری ہے۔ انہوں نے یقین دلایا کہ پاکستان جرنلسٹ ایسوسی ایشن اپنے ممبران کی فلاح و بہبود اور آزادی صحافت کے تحفظ کے لیے ہر ممکن کوششیں جاری رکھے گی۔

اجلاس کے اختتام پر شرکاء کا شکریہ ادا کیا گیا اور مستقبل کے لائحہ عمل پر تبادلہ خیال کے بعد اجلاس ختم ہوا۔

اوچ شریف (نامہ نگار حبیب خان) اوچ شریف کے نواحی علاقے دھوڑکوٹ میں عظیم روحانی پیشوا پیر سید شیر شاہ حقانی کی قیادت میں فلسطینی بھائیوں سے اظہارِ یکجہتی کے لیے ایک عظیم الشان احتجاجی ریلی نکالی گئی۔ ریلی میں سینکڑوں افراد نے شرکت کی جن میں معزز علماء کرام، مقامی دکاندار، نوجوان، بزرگ اور طلبہ شامل تھے۔

تفصیلات کے مطابق اوچ شریف کے نواحی علاقے دھوڑکوٹ میں معروف روحانی شخصیت پیر سید شیر شاہ حقانی کی قیادت میں فلسطینی مظلوموں سے اظہارِ یکجہتی کے لیے ایک تاریخی احتجاجی ریلی نکالی گئی، جس نے علاقے کی فضاؤں کو لبیک یا اقصیٰ اور مردہ باد اسرائیل کے نعروں سے گونجا دیا۔ ریلی میں مقامی علماء کرام مولانا طاہر زمان، استاد ریاض، جام اشرف سمیت سیاسی، سماجی و مذہبی حلقوں کی بڑی تعداد شریک ہوئی۔ عوام کا جذبہ دیدنی تھا، نوجوانوں نے فلسطینی پرچم اٹھا رکھے تھے۔

ریلی کا ایک اہم اور تاریخی لمحہ اس وقت دیکھنے میں آیا جب مقامی دکانداروں نے پیر سید شیر شاہ حقانی کی موجودگی میں احتجاجاً اسرائیلی ساختہ مشروبات کو سڑک پر لا کر توڑ دیا۔ بوتلوں کے ٹکڑے سڑک پر بکھر گئے اور عوام نے نعرے بلند کرتے ہوئے ان مصنوعات کے مکمل بائیکاٹ کا اعلان کیا۔ اس موقع پر شرکاء کی آنکھوں میں فلسطینی مظلوموں کے لیے درد اور غصہ نمایاں تھا۔

علماء کرام نے اپنے خطابات میں کہا کہ اسرائیلی مظالم دنیا کی تاریخ کا سیاہ باب ہیں، اور مسلم امہ کی خاموشی مزید المیے کو جنم دے رہی ہے۔ انہوں نے عالم اسلام سے مطالبہ کیا کہ وہ متحد ہو کر قبلۂ اول اور مظلوم فلسطینیوں کے تحفظ کے لیے مضبوط حکمت عملی اختیار کریں۔

پیر سید شیر شاہ حقانی نے ریلی کے شرکاء سے خطاب کرتے ہوئے کہا: "یہ وقت خوابِ غفلت سے جاگنے کا ہے۔ جو قومیں مظلوموں کا ساتھ نہیں دیتیں، تاریخ اُنہیں معاف نہیں کرتی۔ آج ہم نے نہ صرف آواز بلند کی ہے بلکہ عملی طور پر اسرائیلی مصنوعات کا بائیکاٹ کر کے دشمن کو پیغام دیا ہے کہ مسلمان جاگ چکا ہے۔”

ریلی کے اختتام پر پیر سید شیر شاہ حقانی نے انتہائی رقت آمیز دعا کرائی، جس میں فلسطینی شہداء کے درجات کی بلندی، زخمیوں کی شفا، اور امتِ مسلمہ کی بیداری کے لیے دعائیں کی گئیں۔ عوام کی آنکھیں اشکبار تھیں اور دلوں میں ایک نئی بیداری کی چنگاری سلگ رہی تھی۔

اوچ شریف ،باغی ٹی وی (نامہ نگارحبیب خان)ولی عہد امیر بہاولپور پرنس بہاول عبّاس عبّاسی نے اوچ شریف اور گردونواح کا دورہ کیا، جہاں عوام نے ان کا بھرپور استقبال کیا۔ پرنس بہاول عبّاس خان عبّاسی نے موضع کوٹ خلیفہ اور دیگر مقامات پر پہنچ کر مختلف شخصیات سے ملاقاتیں کیں اور تعزیتی دورے بھی کیے۔ انہوں نے ملک عظیم بخش کھنڈ اور سردار اللہ ڈتہ بھٹہ مرحوم کے اہل خانہ سے تعزیت کی اور مرحومین کے لیے فاتحہ خوانی کی۔

دورے کے دوران شہریوں نے پھول نچھاور کر کے اپنی محبت کا اظہار کیا۔ معروف سیاسی و سماجی رہنما ملک محمد وسیم کھنڈ کی قیادت میں علاقہ عمائدین کی بڑی تعداد موجود تھی جنہوں نے پرنس بہاول عبّاس کا پرتپاک خیرمقدم کیا۔ اس موقع پر سردار محمد یحییٰ خان کلاچی، سمیع اللہ عبّاسی، ملک خادم حسین، غلام فرید، امیر بخش، عبدالرشید، اجمل شاہ گیلانی، ساجد حسین، محمد عثمان، صابر حسین، ندیم کھنڈ، محمد یار بھٹہ، محمد اسلم بھٹہ و دیگر معززین بھی شریک تھے۔

علاقائی سطح پر اس دورے کو عوامی پذیرائی اور سیاسی رابطوں کے حوالے سے خاص اہمیت دی جا رہی ہے، جو پرنس بہاول عبّاس عبّاسی کی عوامی مقبولیت اور اثرورسوخ کا مظہر ہے۔