Author: ڈاکٹرغلام مصطفی بڈانی

ننکانہ صاحب (باغی ٹی وی نامہ نگار احسان اللہ ایاز) بابا گورو نانک یونیورسٹی ننکانہ صاحب میں یومِ ثقافتِ پنجاب کا شاندار انعقاد کیا گیا، جس میں پنجاب کی بھرپور تہذیبی، ثقافتی اور روایتی جھلکیاں پیش کی گئیں۔ اس موقع پر یونیورسٹی کے مختلف شعبہ جات کے طلبہ، طالبات اور اساتذہ نے پرجوش انداز میں شرکت کی۔

تقریب کے دوران طلبہ نے پنجاب کے متنوع ثقافتی پہلوؤں کو اجاگر کرتے ہوئے دلکش ثقافتی اسٹالز لگائے۔ ان اسٹالز میں سکھ ثقافت، روایتی ڈیرے کی ثقافت، لکڑی کے دیدہ زیب دستکاری کے نمونے اور خواتین کی روایتی سرگرمی "ترنجن” کی منظر کشی شامل تھی۔ اس کے علاوہ پنجابی کھانوں کے خصوصی اسٹالز بھی لگائے گئے، جن میں لسی، ساگ، مکئی کی روٹی، گڑ والے چاول اور چٹخارے دار گول گپوں نے حاضرین کی بھرپور توجہ حاصل کی۔

تقریب کا ایک اہم اور دلکش حصہ بابا گورو نانک یونیورسٹی کے طلبہ کی جانب سے پیش کیے گئے روایتی پنجابی رقص تھے، جنہوں نے ماحول کو روایتی رنگوں سے سجا دیا اور حاضرین کو مسحور کر دیا۔

یومِ ثقافتِ پنجاب کے کامیاب انعقاد کے لیے تمام تر انتظامات شعبہ پنجابی نے شعبہ انگریزی کے تعاون سے بخوبی سرانجام دیے۔ تقریب میں معزز اساتذہ کی کثیر تعداد نے شرکت کی، جن میں شعبہ پنجابی سے ڈاکٹر غضنفر حسین بخاری اور ڈاکٹر رضوان علی، شعبہ انگریزی سے ڈاکٹر قاسم شفیق، محترمہ عالیہ علی، جناب نعمان بن صفدر، جناب آصف ندیم اور محترمہ سعدیہ شمشاد نمایاں تھے۔ شعبہ ریاضی کی نمائندگی ڈاکٹر شاہد مبین، محترمہ مریم شفیق اور محترمہ اقرا نیاب نے کی، جبکہ شعبہ بزنس ایڈمنسٹریشن سے ڈاکٹر عمر فاروق اور ڈاکٹر فیصل عباس، شعبہ تعلقاتِ عامہ سے جناب محمد حارث سلیمی اور کوالٹی انہانسمنٹ سیل سے جناب علی رضا نے شرکت کی۔

یومِ ثقافتِ پنجاب نہ صرف طلبہ کے لیے اپنی تخلیقی صلاحیتوں کے اظہار کا ایک بہترین پلیٹ فارم ثابت ہوا بلکہ اس نے نوجوان نسل کو اپنی شاندار تہذیب و تمدن سے جڑنے، ثقافتی شعور بیدار کرنے اور اپنی علاقائی شناخت پر فخر محسوس کرنے کا قیمتی موقع بھی فراہم کیا۔

ننکانہ صاحب (باغی ٹی وی نامہ نگار احسان اللہ ایاز) پاکستان میں تعینات آئرلینڈ کی سفیر میری اونیل مولونے نے وزیر مملکت برائے موسمیاتی تبدیلی ڈاکٹر شذرہ منصب علی خان کھرل کے ہمراہ گوردوارہ جنم استھان کا دورہ کیا۔

گوردوارہ جنم استھان پہنچنے پر سفیر اور وزیر مملکت کا شاندار استقبال کیا گیا۔ ڈپٹی کمشنر ننکانہ صاحب محمد تسلیم اختر راؤ اور سکھ رہنماؤں نے معزز مہمانوں کا استقبال کیا۔ آئرلینڈ کی سفیر نے گوردوارہ جنم استھان کے مختلف حصوں کا معائنہ کیا اور انہیں گوردوارہ کی تاریخی اہمیت اور سکھ مذہب کی تعلیمات سے آگاہ کیا گیا۔ مہمانوں نے سکھ مذہب کی رسومات کی ادائیگی کا بھی مشاہدہ کیا۔

اس موقع پر آئرلینڈ کی سفیر میری اونیل مولونے اور وزیر مملکت کو یادگاری سروپا بھی پیش کیے گئے۔ سفیر میری اونیل مولونے نے گوردوارہ جنم استھان کی شاندار اور تاریخی عمارت دیکھ کر اپنی خوشی کا اظہار کیا اور کہا کہ پاکستان میں مختلف مذاہب کے پیروکاروں کو اکٹھا دیکھ کر بہت اچھا لگا۔ انہوں نے شاندار استقبال اور بہترین مہمان نوازی پر حکومت پاکستان کا شکریہ ادا کیا۔

ننکانہ صاحب (باغی ٹی وی نامہ نگار احسان اللہ ایاز) ڈسٹرکٹ بار ایسوسی ایشن ننکانہ صاحب اور ننکانہ صاحب پریس کلب کے زیر اہتمام فلسطینی بھائیوں کے ساتھ اظہار یکجہتی کے لیے ایک سیمینار کا انعقاد کیا گیا۔ سیمینار کے اختتام پر انجمن تاجران، سول سوسائٹی، صحافی برادری اور وکلاء نے مشترکہ طور پر ایک ریلی نکالی۔

یہ ریلی ڈسٹرکٹ بار ننکانہ صاحب سے شروع ہوئی اور پریس کلب سمیت شہر کے مختلف راستوں سے ہوتی ہوئی گولچکر پر اختتام پذیر ہوئی۔ ریلی میں وکلاء، صحافیوں کے علاوہ سیاسی، سماجی اور تاجر تنظیموں کے نمائندوں اور شہریوں کی ایک بڑی تعداد نے جوش و خروش سے شرکت کی۔

شرکاء نے اپنے ہاتھوں میں ایسے پلے کارڈز اور بینرز اٹھا رکھے تھے جن پر فلسطین کے حق میں اور اسرائیل کے خلاف نعرے درج تھے۔ ریلی کا بنیادی مقصد شہریوں کو اسرائیلی مصنوعات کا مکمل بائیکاٹ کرنے کی ترغیب دینا اور حکومت وقت کو اس بات کا احساس دلانا تھا کہ وہ دیگر مسلمان ممالک کے ساتھ مل کر اقوام متحدہ (UN) اور آرگنائزیشن آف اسلامک کوآپریشن (OIC) میں اسرائیل کے خلاف مؤثر اقدامات اٹھائیں، فلسطینی بھائیوں تک فوری طور پر غذا اور ادویات کی فراہمی کے لیے آواز بلند کریں، جنگ بندی کروائیں اور ان کی بحالی کے عمل کا آغاز کریں۔