سیالکوٹ،باغی ٹی وی (بیوروچیف شاہد ریاض )تھانہ کینٹ کے علاقے پلی تو خانہ میں گیس لیکج کے باعث ایک زوردار دھماکہ پیش آیا ہے، تاہم خوش قسمتی سے کوئی جانی نقصان نہیں ہوا۔ باغی ٹی وی نے اس دھماکے کی سی سی ٹی وی فوٹیج حاصل کر لی ہے۔
صبح کے وقت سیالکوٹ کے علاقے پلی توپ خانہ میں ایک زوردار دھماکے کی آواز دور دور تک سنی گئی۔ متعلقہ دکانداروں کا ابتدائی طور پر کہنا ہے کہ یہ دھماکہ گیس لیکج کے باعث رونما ہوا۔
دوسری جانب، اسی علاقے میں ایک اور واقعے میں زوردار دھماکہ خیز مواد سے نالے پر لگائی گئی کئی ٹن وزنی سلیب ریزہ ریزہ ہو گئی۔ اس دھماکے کی آواز بھی دور دراز علاقوں تک سنائی دی۔ دھماکے کے نتیجے میں تقریباً 50 سے 60 فٹ لمبائی اور تقریباً 10 فٹ چوڑائی والی کئی ٹن وزنی سلیب مکمل طور پر تباہ ہو گئی، جس سے علاقے میں خوف و ہراس پھیل گیا۔ اب یہ سوالات جنم لے رہے ہیں کہ آیا یہ واقعہ بھی گیس لیکج کا نتیجہ تھا یا پھر معاملہ کچھ اور ہے۔
علاقہ مکینوں کا کہنا ہے کہ علاقے میں مشکوک افراد کی نقل و حرکت عام ہے اور متعلقہ تھانہ کی پولیس کی جانب سے علاقے میں گشت نہ ہونے کے باعث مشکوک افراد راتوں کو دندناتے پھرتے دکھائی دیتے ہیں۔
تفصیلات کے مطابق، سیالکوٹ تھانہ کینٹ کے علاقے میں ایک گندے نالے میں زوردار دھماکہ ہوا، جس کے نتیجے میں 10 فٹ چوڑے اور تقریباً 50 سے 60 فٹ لمبے نالے پر نصب کئی ٹن وزنی سلیب ٹکڑے ٹکڑے ہو گئی۔ اگرچہ 5 سے 6 افراد نے اس دھماکے کو گیس لیکج کا نتیجہ قرار دیا ہے، تاہم درجنوں دیگر افراد اس رائے سے متفق نہیں ہیں۔ ان کا کہنا ہے کہ گندے نالے کی لمبائی کئی سو میٹر ہے اور اگر گیس لیک ہوتی تو وہ نالے کے ساتھ ساتھ خارج ہو جاتی، کیونکہ نالہ خشک نہیں رہتا بلکہ ہر وقت گندے پانی سے بھرا رہتا ہے۔ اس لیے گیس لیکج سے اتنے بڑے دھماکے کا ہونا ممکن نہیں لگتا۔ ان کا قوی یقین ہے کہ یہ دھماکہ کسی دھماکہ خیز مواد کے پھٹنے سے ہوا ہے، جس کی وجہ سے کئی ٹن وزنی سلیب دور تک ریزہ ریزہ ہو گئی۔
علاقہ مکینوں کا یہ بھی کہنا ہے کہ انہوں نے اکثر رات کے وقت علاقے میں مشکوک افراد کو گھومتے پھرتے دیکھا ہے لیکن علاقے میں متعلقہ پولیس کا گشت نہ ہونے کے برابر ہے۔ انہوں نے اس واقعے کو تقریباً 6 سے 7 ماہ قبل تھانہ کوٹلی لوہاراں کے گاؤں پڑوپی آرائیاں میں پیش آنے والے ایک ایسے ہی دھماکے سے جوڑا، جس میں ایک انجن کا کمرہ اینٹوں اور چھت سمیت تقریباً 70 فٹ تک بکھر گیا تھا، لیکن اس دھماکے کی وجہ بھی تاحال معلوم نہیں ہو سکی ہے۔
ابتدائی اطلاعات کے مطابق دھماکے کے نتیجے میں دکان کو جزوی نقصان پہنچا ہے۔ تاہم فوری طور پر کسی جانی نقصان کی اطلاع موصول نہیں ہوئی۔ پولیس اور ریسکیو ادارے موقع پر پہنچ گئے ہیں اور صورتحال کا جائزہ لے رہے ہیں۔ مزید تحقیقات جاری ہیں۔
