Author: ڈاکٹرغلام مصطفی بڈانی

سیالکوٹ (باغی ٹی وی سٹی رپورٹر مدثر رتو) ڈپٹی کمشنر سیالکوٹ محمد ذوالقرنین لنگڑیال نے اچانک تحصیل ہیڈکوارٹر ہسپتال پسرور کا دورہ کیا اور ڈاکٹروں و عملے کی حاضری چیک کی۔ انہوں نے ایمرجنسی، او پی ڈی اور مختلف وارڈز کا معائنہ کرتے ہوئے علاج کے لیے آئے ہوئے شہریوں اور ان کے لواحقین سے ہسپتال میں فراہم کی جانے والی طبی سہولیات اور ادویات کے بارے میں دریافت کیا۔

ڈپٹی کمشنر محمد ذوالقرنین لنگڑیال نے واضح کیا کہ وزیر اعلیٰ پنجاب مریم نواز شریف کی واضح ہدایات کے مطابق تمام سرکاری ہسپتالوں میں ایس او پیز کے تحت ضروری ادویات کی ہر وقت دستیابی اور مریضوں کو بلا تاخیر فراہمی یقینی بنائی جائے۔ انہوں نے ہدایت کی کہ تمام دستیاب ادویات کی فہرستیں اور ڈاکٹروں و عملے کا دن رات کا ڈیوٹی روسٹر ہسپتال کے نمایاں مقامات پر آویزاں کیا جائے۔ انہوں نے مزید کہا کہ وزیر اعلیٰ پنجاب کی ہدایت پر ضلعی انتظامیہ باقاعدگی سے ہسپتالوں کا معائنہ کر رہی ہے اور کسی بھی قسم کی کوتاہی یا غفلت کی صورت میں قانون کے مطابق سخت کارروائی عمل میں لائی جائے گی۔

ڈپٹی کمشنر نے اسسٹنٹ کمشنر پسرور سدرہ ستار کو خصوصی طور پر ہدایت کی کہ وہ ٹی ایچ کیو سمیت پسرور کے تمام دیہی اور بنیادی صحت مراکز کا باقاعدگی سے دورہ کریں اور وزیر اعلیٰ کے ویژن کے مطابق عوام کو بہترین طبی خدمات کی فراہمی کو ہر صورت یقینی بنائیں۔

اس کے علاوہ، ڈپٹی کمشنر نے پسرور شہر میں صفائی کی صورتحال کو بہتر بنانے کے لیے ایس ڈبلیو ایم سی کے مقامی حکام کے ہمراہ جلد شہر کا دورہ کرنے کا اعلان کیا۔ انہوں نے کہا کہ صفائی کے معاملے میں کسی قسم کی سستی یا غفلت برداشت نہیں کی جائے گی اور ذمہ دار حکام کا سختی سے محاسبہ کیا جائے گا۔ انہوں نے عوامی تفریح کے مقامات اور پبلک پارکس کو صاف ستھرا رکھنے اور شہر کی گرین بیلٹس اور چوکوں کو پودوں اور گھاس سے آراستہ کرنے کے لیے فوری اقدامات کرنے کی بھی ہدایت کی۔

اپنے دورے کے دوران، ڈپٹی کمشنر نے کیڈٹ کالج پسرور اور اسپیشل ایجوکیشن سنٹر پسرور کا بھی معائنہ کیا اور مختلف شعبہ جات اور کلاس رومز کا دورہ کیا۔

بعد ازاں، ڈپٹی کمشنر نے پسرور روڈ پر واقع افغان سٹیزن کیمپ کا بھی دورہ کیا اور وطن واپسی کے لیے جاری مہم کا جائزہ لیا۔ انہوں نے کہا کہ میپ کیے گئے تمام افغان شہری وزارت داخلہ کی ہدایات پر عمل کرتے ہوئے باعزت طریقے سے اپنے وطن واپس جائیں گے۔ انہوں نے اطمینان کا اظہار کیا کہ افغان کیمپ میں ان کی باعزت واپسی کے لیے ہر ممکن بہترین رہائشی سہولیات اور کھانے پینے کے مناسب انتظامات کیے گئے ہیں اور انہیں واپسی کے لیے ٹرانسپورٹ اور سیکیورٹی بھی فراہم کی جا رہی ہے۔

ڈسکہ (باغی ٹی وی نامہ نگار ملک عمران) خلق محمدی فاؤنڈیشن (KMF) نے اپنی روایت برقرار رکھتے ہوئے، چیئرمین الحاج بابا جی محمد خالد محمود مکی مدنی، صاحبزادہ عثمان خالد اور صاحبزادہ ڈاکٹر حسان خالد کی زیرنگرانی ایک خصوصی پروگرام کے تحت 12 یتیم اور مستحق بیٹیوں کو مکمل جہیز پیکج فراہم کیا۔ یہ تقریب انتہائی رازداری کے ساتھ منعقد کی گئی تاکہ مستحق خاندانوں کی عزت نفس مجروح نہ ہو۔

اس پروقار تقریب میں مہمان خصوصی کے طور پر چوہدری سلیم یونس چیمہ (چیئرمین اینجلز سکول سسٹم)، قاضی شبیر (سابق چیئرمین یونین کونسل)، خواجہ عاطف پاشی (سابق چیئرمین بلدیہ ڈسکہ)، سعید چیمہ (صدر آل پاکستان پرائیویٹ سکول سسٹم)، سیف بٹ (ماہر تعلیم)، قاری اعظم سعید اور محمودالحسنین ایڈووکیٹ سمیت دیگر معززین نے شرکت کی۔

یتیم اور مستحق بچیوں سے مخاطب ہوتے ہوئے صاحبزادہ عثمان خالد نے نہایت محبت بھرے انداز میں کہا کہ "میں آپ کا بھائی ہوں اور اللہ پاک آپ کی آئندہ زندگی اور نصیب بہترین فرمائے۔ اگر مستقبل میں آپ کو کسی بھی قسم کی کوئی مشکل پیش آئے تو میں اور میری پوری ٹیم ہر حال میں آپ کی مدد کے لیے حاضر ہیں۔”

تقریب کے مہمانان گرامی نے انتہائی احترام اور عزت کے ساتھ ان بیٹیوں کے سروں کو چادر سے ڈھانپا، جو اس بات کی علامت تھی کہ معاشرہ ان کے ساتھ کھڑا ہے۔

شرکاء نے خلق محمدی فاؤنڈیشن کے دیگر فلاحی منصوبوں، جن میں فری لنگر خانے، فری ڈسپنسری اور فری ایمبولینس سروسز شامل ہیں، کی بھی بھرپور تعریف کی اور ان کی انسانیت دوست کاوشوں کو سراہا۔ فاؤنڈیشن کا یہ اقدام معاشرے کے کمزور طبقات کی مدد کرنے اور ان کی زندگیوں میں خوشیاں لانے کے لیے ایک قابل تقلید مثال ہے۔

ڈسکہ (باغی ٹی وی نامہ نگار ملک عمران) تحصیل اینٹی ٹی بی ایسوسی ایشن ڈسکہ کے زیر اہتمام ٹی بی کیئر سنٹر میں ڈینگی سے بچاؤ کے حوالے سے ایک اہم آگاہی سیمینار اور واک کا اہتمام کیا گیا۔

سیمینار کا باقاعدہ آغاز تلاوت کلام پاک اور نعت رسول مقبول صلی اللہ علیہ وآلہ وسلم سے ہوا۔ جنرل سیکرٹری چوہدری قطب الدین نے شریک معزز مہمانوں کا شکریہ ادا کیا اور انسداد ڈینگی کے حوالے سے تفصیلی بریفنگ دی۔

اس موقع پر ڈینگی کے ماہر ڈاکٹر اصغر علی نے ڈینگی سے بچاؤ کی احتیاطی تدابیر پر روشنی ڈالتے ہوئے کہا کہ گھروں کے روشن دانوں اور کھڑکیوں پر جالی لگانا ڈینگی لاروے کی افزائش کو روکنے میں انتہائی مددگار ثابت ہوتا ہے۔ انہوں نے مزید زور دیا کہ گملوں، کیاریوں، ناکارہ ٹائروں اور لان وغیرہ میں پانی ہرگز کھڑا نہ ہونے دیں تاکہ معاشرے کو اس موذی مرض سے محفوظ رکھا جا سکے۔

سیمینار سے خطاب کرتے ہوئے سینئر نائب صدر خان عباس خان نے کہا کہ ڈینگی سے خوفزدہ ہونے کی بجائے اس کا مقابلہ کرنا ہوگا۔ انہوں نے تمام شہریوں پر زور دیا کہ وہ ایک ذمہ دار شہری کی حیثیت سے ڈینگی کے خلاف جنگ میں اپنا بھرپور کردار ادا کریں۔

دیگر مقررین جن میں ٹی بی سکرینر مرسی کور، لبنیٰ مشتاق، محمودالحسنین ایڈووکیٹ، مولانا ایوب خان اور سینئر صحافی امین رضا مغل شامل تھے، نے بھی ڈینگی کی روک تھام کی اہمیت اور اس کے لیے اجتماعی کوششوں کی ضرورت پر روشنی ڈالی۔

سیمینار کے اختتام پر انسداد ڈینگی کے حوالے سے ایک آگاہی واک کا بھی انعقاد کیا گیا، جس میں شرکاء نے پلے کارڈز اور بینرز اٹھا کر ڈینگی سے بچاؤ کے پیغامات عام کیے۔ واک کے اختتام پر ملک کی سلامتی، استحکام اور ڈینگی سے نجات کے لیے خصوصی دعا کی گئی۔

سیالکوٹ ( بیوروچیف شاہد ریاض+سٹی رپورٹر) ایڈیشنل ڈپٹی کمشنر جنرل ایوب بخاری نے کہا ہے کہ پنجاب کی ثقافت صدیوں پر محیط ایک زندہ اور تابندہ ورثہ ہے، جو اپنی منفرد زبان، ادب اور روایات کے ساتھ پانچ دریاؤں کی اس دھرتی کو ایک خاص پہچان بخشتا ہے۔ دنیا بھر میں بسنے والے پنجابی بجا طور پر اپنی اس شاندار ثقافت پر فخر کر سکتے ہیں۔ ان خیالات کا اظہار انہوں نے سوشل ویلفیئر ڈیپارٹمنٹ سیالکوٹ کے زیر اہتمام ماڈرن چلڈرن ہوم کی بچیوں کے "پنجابی ڈیہاڑ” کے موقع پر لگائے گئے دلکش دیہاتی میلے کے ماڈل کا معائنہ کرتے ہوئے کیا۔ اس موقع پر ڈپٹی ڈائریکٹر سوشل ویلفیئر شریف گھمن، انچارج ماڈرن چلڈرن ہوم اسماء احمد اور اسسٹنٹ ڈائریکٹر سوشل ویلفیئر ابرار ساہی بھی موجود تھے۔

اے ڈی سی جنرل ایوب بخاری نے میلے میں سجے پنجابی کھانوں کے متنوع اسٹالز، رنگ برنگے روایتی لباس، مہندی کے خوبصورت ڈیزائن، ڈھولک کی دلکش تھاپ اور دیگر شاندار دستکاریوں کے اسٹالز کا بغور معائنہ کیا۔ انہوں نے ان بچیوں کے فن اور ان کی جانب سے کی گئی محنت اور کاوشوں کو دل کھول کر سراہا۔ اس موقع پر مہمانوں کا روایتی انداز میں ڈھول کی تھاپ پر پرجوش استقبال کیا گیا اور انہیں پنجاب کی روایتی پگڑیوں اور پگوں سے عزت بخشی گئی۔ بعد ازاں، مہمانوں کو پنجاب کے روایتی مشروبات اور لذیذ کھانوں سے بھی تواضع کی گئی۔

اے ڈی سی جنرل ایوب بخاری نے مزید کہا کہ "پنجاب رہتل دیہاڑ” منانے کا بنیادی مقصد پنجابی روایات کو نئی نسل تک منتقل کرنا اور انہیں زندہ رکھنا ہے۔ اس طرح کے ایونٹس بچوں کو اپنی شاندار ثقافت سے روشناس کرانے کا ایک بہترین موقع فراہم کرتے ہیں، جس سے وہ اپنے ماضی سے جڑتے ہیں اور اپنی شناخت پر فخر محسوس کرتے ہیں۔ انہوں نے سوشل ویلفیئر ڈیپارٹمنٹ سیالکوٹ کی اس شاندار کاوش کو سراہا اور بچیوں کی حوصلہ افزائی کی۔

ڈسکہ،باغی ٹی وی ( نامہ نگار ملک عمران)سلسلہ نقشبندیہ اویسیہ تنظیم الااخوان ضلع سیالکوٹ کا ماہانہ ذکر قلبی اجتماع دارالعرفان ڈسکہ مرکز میں منعقد ہوا، جس میں خواتین سمیت ضلع بھر سے سالکین کی بڑی تعداد نے شرکت کی۔ روحانی سکون اور ذکرِ الٰہی سے لبریز اس اجتماع کا مقصد دلوں کو زندہ اور معاشرے میں روحانیت کو فروغ دینا تھا۔

اجتماع سے شیخِ سلسلہ و سربراہ تنظیم الااخوان پاکستان، امیر عبدالقدیر اعوان نے ویڈیو لنک کے ذریعے سالکین سے خصوصی خطاب کیا، جس میں روحانی تربیت، ذکر کی اہمیت اور اللہ تعالیٰ سے تعلق مضبوط کرنے پر زور دیا گیا۔

اس موقع پر صاحب مجاز عبدالحمید چھینہ ایڈووکیٹ نے نئے شامل ہونے والے افراد کو طریقہ ذکر سکھایا، جبکہ ضلعی جنرل سیکرٹری عارف رفیق نے ضلع بھر سے آئے ذمہ داران سے گفتگو کرتے ہوئے تنظیمی امور پر روشنی ڈالی۔

اجتماع کے اختتام پر ملکی سلامتی، امت مسلمہ کے اتحاد اور روحانی ترقی کے لیے خصوصی دعائیں کی گئیں، جنہوں نے اجتماع کی روحانیت کو مزید بامعنی بنا دیا۔