Author: ڈاکٹرغلام مصطفی بڈانی

سیالکوٹ ، باغی ٹی وی ( بیورو چیف شاہد ریاض) وزیر اعلیٰ پنجاب مریم نواز شریف نے عید الفطر کے موقع پر خصوصی بچوں کو ایک بڑا تحفہ دیا ہے۔ ڈپٹی کمشنر محمد ذوالقرنین لنگڑیال نے ضلع سیالکوٹ میں گورنمنٹ اسپیشل ایجوکیشن کے 8 اداروں میں زیر تعلیم 812 بچوں میں عید کے تحائف تقسیم کئے۔

گورنمنٹ سیکنڈری سکول آف اسپیشل ایجوکیشن نیکا پورہ سیالکوٹ میں عید گفٹ تقسیم کرتے ہوئے ڈپٹی کمشنر محمد ذوالقرنین لنگڑیال نے کہا کہ جسمانی معذوری کا شکار خصوصی بچوں کی نگہداشت پورے معاشرے کی اجتماعی ذمہ داری ہے۔ وزیر اعلیٰ پنجاب مریم نواز شریف نے عید الفطر پر ان کے لیے خصوصی تحائف بھیجے ہیں جس سے ان کی اور ان کے گھر والوں کی عید کی خوشیاں دوگنی ہو گئی ہیں۔ انہوں نے کہا کہ خصوصی بچوں کے لیے ضلع سیالکوٹ میں سرکاری سطح پر 8 ادارے کام کر رہے ہیں جہاں بچوں کو مفت تعلیم، مفت ٹرانسپورٹ اور ماہانہ وظائف بھی دیئے جاتے ہیں۔

ڈپٹی کمشنر نے مزید کہا کہ ان اداروں کی باقاعدگی سے نگرانی کی جاتی ہے جس کا مقصد ان سکولوں میں معیار تعلیم اور ڈسپلن کو بہتر بنانا اور ان بچوں کی شکایات کا ازالہ کرنا ہے۔ انہوں نے بہترین تقریب کے انعقاد پر ڈسٹرکٹ ایجوکیشن اتھارٹی کی کاوشوں کو سراہا۔ اس موقع پر سی ای او ایجوکیشن مجاہد حسین علوی، ڈی ای او ایلیمنٹری ایجوکیشن محمد احمد ججہ، اور ڈپٹی ڈی ای اوز محمد آصف اور افتخار احمد ساہی بھی موجود تھے۔

ڈسکہ (نامہ نگار باغی ٹی وی، ملک عمران): شیخ سلسلہ نقشبندیہ اویسیہ و سربراہ تنظیم الاخوان پاکستان، امیر عبدالقدیر اعوان نے جمعتہ المبارک کے موقع پر اپنے خطاب میں رمضان المبارک کے تیسرے عشرے کی اہمیت پر روشنی ڈالتے ہوئے کہا کہ اعتکاف اور لیلۃ القدر اللہ کریم کی بہت بڑی عطا ہے۔ یہ عشرہ جہنم سے برات کا ہے، جس میں اللہ تعالیٰ اپنے بندوں کو جہنم کی آگ سے آزادی کا پروانہ عطا فرماتا ہے۔

انہوں نے کہا کہ اگر دوسرے عشرے میں مغفرت اور بخشش نصیب ہوئی ہے تو اپنا جائزہ لیں کہ جسے مغفرت نصیب ہو اس کے اعمال کیسے ہو سکتے ہیں؟ تیسرے عشرے میں جس کو جہنم کی آگ سے آزادی کا پروانہ ملے گا اس کی زندگی کے شب و روز کیسے ہونے چاہیئں؟ جسے اعتکاف نصیب ہو، جسے لیلۃ القدر نصیب ہو اس کا کردار معاشرے میں کیسا ہونا چاہیے؟ ان باتوں کی تب سمجھ آتی ہے جب تعلق مع اللہ نصیب ہو، نبی کریم ﷺ سے اتباع کا رشتہ نصیب ہو۔

امیر عبدالقدیر اعوان نے مزید کہا کہ اگر یہ بات سمجھ آجائے کہ سب کچھ اللہ کا ہے، رزق کی تنگی اور رزق کی فراخی سب اسی قادر مطلق کے دست قدرت میں ہے، تو زندگی آسان ہو جائے۔ رزق صرف دولت نہیں بلکہ ہر وہ چیز ہے جو ہمارے پاس ہے، اللہ کی عطا ہے۔

یاد رہے کہ سلسلہ نقشبندیہ اویسیہ کے مرکز دارالعرفان منارہ میں ہر سال کی طرح امثال بھی اجتماعی سنت اعتکاف کے لیے ملک بھر سے اور بیرون ممالک سے بھی سالکین سلسلہ عالیہ تشریف لا رہے ہیں۔ مرکز دارالعرفان منارہ میں معتکفین کو تزکیہ نفس اور تصفیہ قلب کے خصوصی تربیتی پروگرام سے گزارا جاتا ہے۔ اس کے علاوہ ذکر اذکار کرائے جاتے ہیں اور ضروریات دین سکھایا جاتا ہے، جس کے امتحانات ہوتے ہیں جو پاس کرنے والوں میں شیخ المکرم مد ظلہ العالی اپنے دست مبارک سے اسناد تقسیم فرماتے ہیں۔

آخر میں انہوں نے ملکی سلامتی اور بقا کی اجتماعی دعا بھی فرمائی۔