Baaghi TV

Author: ڈاکٹرغلام مصطفی بڈانی

  • گوجرانوالہ:ستھرا پنجاب پروگرام کے تحت شہر کی خوبصورتی کے منصوبے جاری

    گوجرانوالہ:ستھرا پنجاب پروگرام کے تحت شہر کی خوبصورتی کے منصوبے جاری

    گوجرانوالہ ،باغی ٹی وی (نامہ نگار محمد رمضان نوشاہی) ڈپٹی کمشنر گوجرانوالہ نوید احمد نے وزیر اعلیٰ پنجاب مریم نواز شریف کے گڈ گورننس انیشیٹیوز کے تحت ستھرا پنجاب پروگرام کے مختلف منصوبوں کا تفصیلی جائزہ لیا۔ انہوں نے جی ٹی روڈ، چیانوالی ہل ریزارٹ، کامونکی لیڈیز پارک، لائبریری، گرین بیلٹس اور دیگر مقامات کا دورہ کیا۔

    چیانوالی میں وزیر اعلیٰ پنجاب کے "پلانٹ فار پاکستان” اور "پلانٹ فار پنجاب” مہم کے تحت شجرکاری مہم جاری ہے۔ چیانوالی ڈمپنگ سائٹ کو جنگل میں تبدیل کرنے کے پہلے مرحلے کا آغاز کر دیا گیا ہے، جہاں جدید واٹر سپرنکلنگ سسٹم کے ذریعے کم پانی میں پودوں کی آبیاری کا نظام نصب کیا گیا ہے۔ ڈپٹی کمشنر نے اس منصوبے کو ماحولیاتی تحفظ اور مستقبل کی نسلوں کے لیے اہم پیش رفت قرار دیا۔

    انہوں نے کامونکی میں لیڈیز پارک کے مختلف حصوں کا معائنہ کرتے ہوئے صفائی، پودوں اور گھاس کی دیکھ بھال، واکنگ ٹریک کی حالت کا جائزہ لیا اور بہتری کے لیے ہدایات جاری کیں۔ اس کے علاوہ، قومی شاہراہ پر واقع گرین بیلٹس پر مانومنٹس کی تنصیب، گھاس کی کانٹ چھانٹ اور مزید شجرکاری کے احکامات بھی دیے۔

    ڈپٹی کمشنر نے کہا کہ ستھرا پنجاب پروگرام حکومت پنجاب کا ایک انقلابی اقدام ہے جو صفائی کے مسائل کے حل اور شہر کی خوبصورتی میں نمایاں بہتری لائے گا۔ ضلعی انتظامیہ گوجرانوالہ پارکوں کی تزئین و آرائش، گرین بیلٹس کی بحالی اور شہر کی مجموعی خوبصورتی کو یقینی بنانے کے لیے تمام ممکنہ اقدامات کر رہی ہے۔

    انہوں نے مزید کہا کہ تجاوزات کے خاتمے، یکساں برینڈنگ اور غیر قانونی گیس ریفلنگ شاپس کے خلاف آپریشن تسلسل سے جاری ہیں، جنہیں ضلعی انتظامیہ خود مانیٹر کر رہی ہے۔ شہریوں سے اپیل کی گئی کہ وہ ستھرا پنجاب پروگرام کو کامیاب بنانے میں ضلعی انتظامیہ کے ساتھ تعاون کریں اور کوڑا کرکٹ مقررہ مقامات پر ڈالیں تاکہ شہر کو صاف ستھرا رکھا جا سکے۔

  • بابا گرو نانک یونیورسٹی میں خوشی اور فلاح پر سیمینار، ماہرین کی شرکت

    بابا گرو نانک یونیورسٹی میں خوشی اور فلاح پر سیمینار، ماہرین کی شرکت

    ننکانہ صاحب (باغی ٹی وی نامہ نگار احسان اللہ ایاز)بابا گرو نانک یونیورسٹی ننکانہ صاحب کے شعبہ نفسیات نے ریکھی فاؤنڈیشن فار ہیپینیس اور یونیورسٹی آف مینجمنٹ اینڈ ٹیکنالوجی (یو ایم ٹی) لاہور کے اسکول آف پروفیشنل سائیکالوجی کے اشتراک سے "خوشی کا انقلاب: فلاح و بہبود کا سائنس اور فن” کے عنوان سے ایک اہم سیمینار کا انعقاد کیا۔

    یہ سیمینار خوشی کے سائنسی اصولوں اور مثبت نفسیات کو تعلیمی و عملی زندگی میں شامل کرنے کے عزم کا عکاس تھا۔ وائس چانسلر پروفیسر ڈاکٹر محمد افضل کی رہنمائی میں منعقدہ اس تقریب نے بابا گرو نانک یونیورسٹی اور ریکھی فاؤنڈیشن کے درمیان تعاون کو مزید مستحکم کیا، جو مفاہمت کی یادداشت (MoU) کے بعد ایک اہم پیش رفت تھی۔

    سیمینار میں ماہرین نفسیات مس فاطمہ اسلم اور مس عائمہ شہزاد نے خوشی اور ذہنی فلاح پر تفصیلی لیکچرز دیے، جن میں خوشی کے سائنسی و فنی پہلوؤں پر روشنی ڈالی گئی۔ مقررین نے شرکاء کو خوشی کے اصولوں کو روزمرہ زندگی میں شامل کرنے کی اہمیت سے آگاہ کیا۔

    تقریب میں وائس چانسلر پروفیسر ڈاکٹر محمد افضل، رجسٹرار مبشر طارق، اور ڈاکٹر حاذق محمود (ہیڈ آف دی ڈیپارٹمنٹ آف سائیکالوجی، ایس پی پی، یو ایم ٹی) سمیت دیگر معززین نے شرکت کی۔ ان شخصیات کی رہنمائی اور تعاون نے سیمینار کی کامیابی میں کلیدی کردار ادا کیا۔

    مس حنا سمیرین، انچارج شعبہ نفسیات، اور ان کی ٹیم نے اس تقریب کے کامیاب انعقاد میں اہم کردار ادا کیا۔ بابا گرو نانک یونیورسٹی، ریکھی فاؤنڈیشن اور یو ایم ٹی کا یہ اشتراک مستقبل میں مزید تحقیق اور اقدامات کو فروغ دینے کے لیے پرعزم ہے، تاکہ خوشی، مثبتیت اور فلاح و بہبود کو عام کیا جا سکے۔

    یہ سیمینار محض ایک تعلیمی سرگرمی نہیں تھی بلکہ ایک ایسا اقدام تھا جو خوشحال اور صحت مند معاشرے کے قیام میں معاون ثابت ہو سکتا ہے۔ بابا گرو نانک یونیورسٹی مستقبل میں بھی ایسے علمی و عملی منصوبوں کے ذریعے مثبت نفسیات اور خوشی کے فروغ کے لیے اپنی کاوشیں جاری رکھے گی۔

  • گوجرانوالہ:ڈسکہ میں 62 کروڑ 92 لاکھ کے ترقیاتی منصوبوں کی منظوری

    گوجرانوالہ:ڈسکہ میں 62 کروڑ 92 لاکھ کے ترقیاتی منصوبوں کی منظوری

    گوجرانوالہ (نامہ نگار محمد رمضان نوشاہی) کمشنر گوجرانوالہ ڈویژن سید نوید حیدر شیرازی کی زیر صدارت ڈویژنل ڈویلپمنٹ ورکنگ پارٹی کے اجلاس میں ضلع سیالکوٹ، تحصیل ڈسکہ سٹی کی سیوریج اور سڑکوں کی تعمیر و بحالی کے 3 منصوبوں کی منظوری دے دی گئی۔ ان منصوبوں پر مجموعی طور پر 62 کروڑ 92 لاکھ روپے لاگت آئے گی۔

    اجلاس میں ڈائریکٹر ڈویلپمنٹ محمد عبدالرؤف، اسسٹنٹ کمشنر ڈسکہ، ہائی ویز اور پبلک ہیلتھ ڈیپارٹمنٹ کے افسران شریک ہوئے، جبکہ ڈپٹی کمشنر سیالکوٹ محمد ذوالقرنین ویڈیو لنک کے ذریعے اجلاس میں شامل رہے۔

    منظور شدہ اسکیموں میں اسٹیڈیم روڈ پر سیوریج لائن کی تعمیر کے لیے 12 کروڑ 37 لاکھ، سمبڑیال روڈ فیملی ہسپتال کے سامنے سڑک کی از سر نو تعمیر پر 25 کروڑ 21 لاکھ، جبکہ ڈسکہ سٹی میں شہباز شریف پارک کی تزئین و آرائش کے لیے 25 کروڑ 34 لاکھ روپے مختص کیے گئے ہیں۔

    کمشنر نے ڈپٹی کمشنر سیالکوٹ اور متعلقہ محکموں کو منصوبوں کی بروقت تکمیل اور معیاری تعمیراتی سامان کے استعمال کو یقینی بنانے کی ہدایت کی۔ بعد ازاں، کمشنر نوید حیدر شیرازی اور آر پی او طیب حفیظ چیمہ نے صوبائی وزیر صحت خواجہ سلمان رفیق کی زیر صدارت پنجاب کابینہ کمیٹی برائے لاء اینڈ آرڈر کے ویڈیو لنک اجلاس میں بھی شرکت کی۔

  • اوکاڑہ: ضلعی انتظامیہ متحرک، مہنگی چینی اور دودھ فروشوں کو جرمانے عائد

    اوکاڑہ: ضلعی انتظامیہ متحرک، مہنگی چینی اور دودھ فروشوں کو جرمانے عائد

    اوکاڑہ (نامہ نگار ملک ظفر) ڈپٹی کمشنر احمد عثمان جاوید کی ہدایت پر ضلعی انتظامیہ رمضان المبارک میں عوامی ریلیف کے لیے سرگرم ہو گئی۔ ایڈیشنل ڈپٹی کمشنر جنرل نے شہر کے مختلف کریانہ مارٹس کا دورہ کرتے ہوئے چینی کے نرخ چیک کیے اور مہنگے داموں فروخت پر دکانداروں کو 50 ہزار روپے جرمانہ عائد کر دیا۔

    اسی طرح ایڈیشنل ڈپٹی کمشنر فنانس اینڈ پلاننگ چوہدری عبدالجبار گجر نے دودھ اور دہی کی قیمتوں کو کنٹرول ریٹس پر یقینی بنانے کے لیے مختلف دکانوں کی چیکنگ کی۔

    ترجمان ضلعی انتظامیہ کا کہنا ہے کہ رمضان المبارک کے دوران مصنوعی مہنگائی پیدا کرنے والوں کے خلاف سخت ایکشن لیا جائے گا، بھاری جرمانے اور مقدمات درج کیے جائیں گے تاکہ عوام کو حقیقی ریلیف فراہم کیا جا سکے۔

  • ڈسکہ: تجاوزات کے خلاف آپریشن تیز، بھاری جرمانے عائد

    ڈسکہ: تجاوزات کے خلاف آپریشن تیز، بھاری جرمانے عائد

    ڈسکہ (نامہ نگار ملک عمران) اسسٹنٹ کمشنر ڈسکہ عثمان غنی کی زیر نگرانی شہر میں تجاوزات کے خلاف جاری مہم میں تیزی لائی گئی ہے۔ چیف آفیسر میونسپل کمیٹی ڈسکہ نے میونسپل آفیسر ریگولیشن کے ہمراہ پرانی کچہری روڈ، معراج چوک، فوارہ چوک اور کالج روڈ کا دورہ کیا۔

    دوران دورہ، چیف آفیسر میونسپل کمیٹی ڈسکہ نے تجاوزات کے خلاف جاری آپریشن کا معائنہ کیا اور موقع پر قائم عارضی تجاوزات کو فوری طور پر ہٹانے کے احکامات جاری کیے۔ اس کے ساتھ ہی، تجاوزات کرنے والوں کے خلاف بھاری جرمانے بھی عائد کیے گئے اور سامان کو تحویل میں لے لیا گیا۔

    اسسٹنٹ کمشنر ڈسکہ عثمان غنی نے کہا کہ شہر کو تجاوزات سے پاک کرنے کے لیے یہ مہم جاری رہے گی اور کسی کو بھی قانون کی خلاف ورزی کی اجازت نہیں دی جائے گی۔ انہوں نے شہریوں سے بھی اپیل کی کہ وہ تجاوزات سے گریز کریں اور شہر کو صاف ستھرا رکھنے میں انتظامیہ کا ساتھ دیں۔

  • اوکاڑہ : قصاب مافیا کا راج، بیمار جانوروں کا گوشت فروخت

    اوکاڑہ : قصاب مافیا کا راج، بیمار جانوروں کا گوشت فروخت

    اوکاڑہ (نامہ نگار،ملک ظفر) اوکاڑہ میں قصاب مافیا بے لگام ہو چکا ہے، جس کے سامنے محکمہ لائیو سٹاک اور انتظامیہ بے بس نظر آتی ہے۔ ملگدا چوک، اڈا نتھیں بودلہ اور گردونواح میں بیمار اور لاغر جانوروں کا گوشت ایک ہزار روپے فی کلو میں فروخت کیا جا رہا ہے۔ شہریوں نے وزیر اعلیٰ پنجاب سے اس صورتحال کا فوری نوٹس لینے کا مطالبہ کیا ہے۔

    تفصیلات کے مطابق، پرائس کنٹرول مجسٹریٹ، محکمہ لائیو سٹاک اور فوڈ سیفٹی ڈیپارٹمنٹ کی عدم دلچسپی اور غفلت کے باعث قصاب مافیا سرعام بیمار اور لاغر جانوروں کا گوشت فروخت کر رہا ہے۔ گوشت کی سرکاری ریٹ لسٹ محض کاغذ کا ٹکڑا بن کر رہ گئی ہے، اور ضلعی انتظامیہ دفاتر میں بیٹھ کر سب اوکے کی رپورٹ پیش کر رہی ہے۔

    شہریوں کا کہنا ہے کہ مضر صحت گوشت کی فروخت سے ان کی صحت کو خطرہ لاحق ہے۔ انہوں نے کمشنر ساہیوال اور ڈی سی اوکاڑہ سے مطالبہ کیا ہے کہ پرائس کنٹرول سسٹم کو بہتر بنایا جائے اور قصاب مافیا کے خلاف سخت کارروائی کی جائے۔ شہریوں نے یہ بھی مطالبہ کیا ہے کہ ذمہ دار افسران کو قانون کے کٹہرے میں لایا جائے اور انہیں انصاف فراہم کیا جائے۔

  • اوکاڑہ: ریسکیو 1122 نے گزشتہ ماہ 4567 ایمرجنسی کالز پر رسپانس کیا

    اوکاڑہ: ریسکیو 1122 نے گزشتہ ماہ 4567 ایمرجنسی کالز پر رسپانس کیا

    اوکاڑہ (نامہ نگار ملک ظفر) ڈسٹرکٹ ایمرجنسی آفیسر انجینئر احتشام کی زیر صدارت سنٹرل اسٹیشن اوکاڑہ میں ماہانہ کارکردگی اجلاس منعقد ہوا۔ اجلاس میں ریسکیو 1122 اوکاڑہ کی گزشتہ ماہ کی کارکردگی رپورٹ پیش کی گئی۔

    رپورٹ کے مطابق ریسکیو 1122 اوکاڑہ کو گزشتہ ماہ کل 14836 کالز موصول ہوئیں، جن میں 4567 ایمرجنسی کالز تھیں۔ ان میں 1021 روڈ ٹریفک حادثات، 3039 میڈیکل ایمرجنسیز، 49 آگ لگنے کے واقعات، 91 کرائم اور 367 دیگر حادثات شامل تھے۔

    روڈ ٹریفک حادثات میں 1174 افراد متاثر ہوئے، جن میں سے 12 افراد جان کی بازی ہار گئے۔ 632 افراد کو موقع پر ہی ابتدائی طبی امداد دی گئی اور 530 متاثرین کو ہسپتال منتقل کیا گیا۔ آگ لگنے کے 49 واقعات میں 31 کمرشل ایریا، 14 رہائشی علاقے اور 4 دیگر مقامات پر پیش آئے۔ ریسکیو 1122 نے تقریباً 27 ملین روپے سے زائد کی املاک کو محفوظ بنایا۔

    ڈسٹرکٹ ایمرجنسی آفیسر نے ریسکیو 1122 کے عملے کی کارکردگی کو سراہا اور شہریوں سے اپیل کی کہ ایمرجنسی کی صورت میں فوری طور پر ریسکیو 1122 سے رابطہ کریں۔

  • ڈیرہ غازی خان: وڈور روڈ ڈکیتوں کی آماجگاہ، شہری سےنقدی اور موٹرسائیکل چھین کر فرار

    ڈیرہ غازی خان: وڈور روڈ ڈکیتوں کی آماجگاہ، شہری سےنقدی اور موٹرسائیکل چھین کر فرار

    ڈیرہ غازی خان، باغی ٹی وی(نیوز رپورٹر شاہد خان) ڈیرہ غازی خان کے وڈور روڈ پر ریلوے پھاٹک کے قریب سحری کے وقت ڈکیتوں نے شہری مزمل اشفاق کو گن پوائنٹ پر لوٹ لیا۔ ڈکیت مزمل اشفاق سے سی ڈی موٹر سائیکل، 80 ہزار روپے نقد اور موبائل فون چھین کر فرار ہو گئے۔ مزمل اشفاق سبزی منڈی سے اپنی دکان کے لیے پھل لینے جا رہے تھے۔

    ذرائع کے مطابق وڈور روڈ ڈکیتوں کے لیے سیرگاہ بن چکا ہے، جہاں وہ جب چاہتے ہیں راہگیروں سے موٹر سائیکل، نقدی اور موبائل فون چھین لیتے ہیں۔ شہریوں کا کہنا ہے کہ رمضان المبارک میں سحری کے وقت پولیس کو یہاں گشت کرنا چاہیے۔ شہریوں کے جان و مال کی حفاظت کرنا پولیس کی اولین ترجیح ہونی چاہئے، لیکن اس علاقے میں پولیس کا گشت نہ ہونے کے برابر ہے، جس کی وجہ سے یہاں ڈکیتوں کا راج ہے۔

    شہریوں نے کمشنر ڈیرہ غازی خان، آر پی او ڈیرہ غازی خان، ڈی پی او ڈیرہ غازی خان اور ایس ایچ او تھانہ صدر جعفر حبیب سے مطالبہ کیا ہے کہ اس ڈکیتی کا فوری نوٹس لیا جائے اور مزمل اشفاق سے چھینی گئی اشیاء برآمد کر کے انہیں واپس کی جائیں۔

  • اوچ شریف:رمضان میں بھی قصابوں کا مکروہ دھندہ جاری، ناقص گوشت کی فروخت،انتظامیہ خاموش

    اوچ شریف:رمضان میں بھی قصابوں کا مکروہ دھندہ جاری، ناقص گوشت کی فروخت،انتظامیہ خاموش

    اوچ شریف، باغی ٹی وی(نامہ نگار حبیب خان) اوچ شریف اور گردونواح میں رمضان المبارک کے مقدس مہینے میں بھی مضر صحت، لاغر اور مردہ جانوروں کے گوشت کی فروخت کا سلسلہ جاری ہے۔ قصائی مافیا انسانی صحت سے کھیلنے میں مصروف ہے، جبکہ متعلقہ ادارے خاموش تماشائی بنے ہوئے ہیں۔ ناقص اور زہریلے گوشت کے استعمال سے شہری مختلف بیماریوں میں مبتلا ہو رہے ہیں، مگر انتظامیہ کی چشم پوشی کے باعث یہ مکروہ دھندہ کھلے عام جاری ہے۔

    ذرائع کے مطابق مختلف علاقوں میں غیر قانونی طور پر بیمار اور مردہ جانوروں کا گوشت فروخت کیا جا رہا ہے۔ قصائی مافیا دیہی علاقوں سے لاغر اور بیمار جانور انتہائی کم قیمت پر خرید کر ان کے گوشت کو مختلف کیمیکلز کے ذریعے مصنوعی طور پر تازہ بناتے ہیں اور پھر یہ گوشت شہر کی مختلف مارکیٹوں، ہوٹلوں، بیکریوں میں سپلائی کیا جاتا ہے۔

    رمضان المبارک میں شہری سحر و افطار میں زیادہ تر گوشت سے بنی اشیاء استعمال کرتے ہیں، لیکن ناقص گوشت کی فروخت کے باعث فوڈ پوائزننگ، معدے کی بیماریاں، یرقان اور دیگر سنگین مسائل میں اضافہ ہو رہا ہے۔ طبی ماہرین کے مطابق غیر معیاری گوشت کا استعمال بچوں اور بوڑھوں کے لیے زیادہ خطرناک ثابت ہو رہا ہے۔

    عوامی وسماجی حلقے متعلقہ اداروں کی خاموشی پر شدید غم و غصے کا اظہار کر رہے ہیں۔ لائیو اسٹاک، فوڈ اتھارٹی اور دیگر ذمہ دار ادارے اس غیر قانونی دھندے سے باخبر ہونے کے باوجود کوئی عملی اقدام نہیں کر رہے۔ رمضان المبارک کے دوران بھی مضر صحت گوشت کی فروخت کھلے عام جاری ہے، مگر انتظامیہ بے بس نظر آ رہی ہے۔

    اوچ شریف شہر کے مکینوں نے وزیراعلیٰ پنجاب، چیف سیکرٹری، ڈی سی بہاولپور اور دیگر متعلقہ حکام سے اپیل کی ہے کہ وہ فوری طور پر مضر صحت گوشت فروخت کرنے والے عناصر کو سخت سزائیں دی جائیں، ان کے خلاف مقدمات درج کیے جائیں اور غیر معیاری گوشت فروخت کرنے والی دکانوں کو فوری طور پر سیل کیا جائے۔

  • خانپور مہر پولیس کی کامیاب کارروائی، متعدد مقدمات میں مفرور ملزم گرفتار

    خانپور مہر پولیس کی کامیاب کارروائی، متعدد مقدمات میں مفرور ملزم گرفتار

    میرپور ماتھیلو ،باغی ٹی وی(نامہ نگار مشتاق علی لغاری) تھانہ خانپور مہر پولیس نے ڈی آئی جی سکھر کیپٹن (ر) فیصل عبداللہ چاچڑ اور ایس ایس پی گھوٹکی ڈاکٹر سمیع اللہ سومرو کی خصوصی ہدایات پر کارروائی کرتے ہوئے متعدد مقدمات میں مفرور ملزم معین علی ولد حامد میرانی کو گرفتار کر لیا۔

    ملزم معین علی گوٹھ ابل میربحر تعلقہ گھوٹکی کا رہائشی ہے اور کرائم نمبر 522/2024 اور کرائم نمبر 08/2025 میں مطلوب تھا۔ گرفتار ملزم کو مزید قانونی کارروائی کے لیے تھانہ اے سیکشن گھوٹکی کے حوالے کر دیا جائے گا۔

    ملزم کا سابقہ مجرمانہ ریکارڈ بھی موجود ہے، جس میں گٹکا ایکٹ، پولیس پر حملہ، اسلحہ ایکٹ، چوری، ڈکیتی اور منشیات کے مقدمات شامل ہیں۔ پولیس نے ملزم کی گرفتاری کو ایک بڑی کامیابی قرار دیا ہے اور اس عزم کا اظہار کیا ہے کہ جرائم پیشہ عناصر کے خلاف کارروائیاں جاری رہیں گی۔