علی پور (باغی ٹی وی، نامہ نگار حبیب خان) ایڈیشنل سیشن جج غلام مجتبیٰ خان بلوچ نے سات ماہ قبل اپنی بیوی اور سات بچوں کو قتل کرنے والے ملزم محمد سجاد کو آٹھ بار سزائے موت اور پانچ لاکھ روپے فی مقتول جرمانے کی سزا سنادی۔ جرمانہ ادا نہ کرنے کی صورت میں مجرم کو چھ ماہ اضافی قید کا سامنا کرنا ہوگا۔
تفصیلات کے مطابق مظفرگڑھ کی تحصیل علی پور کے علاقے مڈوالا میں رواں سال اپریل میں محمد سجاد نے گھریلو ناچاقی پر بیوی اور سات بچوں کو نشہ آور مٹھائی اور مشروب دینے کے بعد تیز دھار آلے سے بے دردی سے قتل کر دیا تھا۔ مقتولین میں سجاد کی بیوی کوثر مائی (35-40 سال) اور بچے انسہ (8 سال)، کنزا، رمشہ، مہناز، محمد انس (3 سال)، محمد سبحان، اور منزہ (6 ماہ) شامل ہیں۔
پولیس نے واقعے کے فوراً بعد ملزم کو گرفتار کرکے آلہ قتل برآمد کر لیا تھا۔ عدالت نے ایک ماہ کے مختصر عرصے میں مقدمے کا فیصلہ سناتے ہوئے ملزم کو آٹھ بار سزائے موت سنائی اور ہر مقتول کے لیے پانچ لاکھ روپے جرمانہ عائد کیا۔
یہ خبر بھی پڑھیں
علی پور : سفاک شخص نے بیوی اور 7 بچوں کوقتل کرڈالا
ملزم سجاد ایک معذور درزی تھا اور بیروزگاری کے باعث گھریلو جھگڑوں کا سامنا کر رہا تھا۔ اہل علاقہ کے مطابق قتل سے ایک دن قبل گھر میں لڑائی شدت اختیار کر گئی تھی، جس کے نتیجے میں ملزم نے یہ وحشیانہ اقدام اٹھایا۔
اہل علاقہ اور ورثاء نے عدالتی فیصلے کو سراہتے ہوئے حکومت سے اپیل کی ہے کہ ایسے سنگین جرائم کے مرتکب افراد کے خلاف سخت کارروائی کی جائے تاکہ آئندہ ایسے دل دہلا دینے والے واقعات کو روکا جا سکے۔
