Author: ڈاکٹرغلام مصطفی بڈانی

اوچ شریف (باغی ٹی وی نامہ نگار حبیب خان) شہر میں نوجوانوں کی جانب سے موٹر سائیکلوں پر فائرنگ ہارن، ایمبولینس ہارن، اور ون ویلنگ جیسے خطرناک رجحانات نے عوام کو شدید مشکلات میں مبتلا کر دیا ہے۔ مقامی پولیس کی مبینہ خاموشی اور غفلت کے سبب شہریوں نے ضلعی انتظامیہ اور ڈی پی او بہاولپور سے فوری کارروائی کرنے کا مطالبہ کیا ہے۔

تفصیلات کے مطابق، اوچ شریف کی گنجان آبادیوں اور شاہراہوں پر نوجوانوں کی موٹر سائیکلوں پر ایمرجنسی ہارن بجانے اور ون ویلنگ کا رجحان تیزی سے بڑھ رہا ہے۔ یہ خطرناک سرگرمیاں شہریوں کو نہ صرف صوتی آلودگی اور ذہنی دباؤ میں مبتلا کر رہی ہیں بلکہ حادثات کے امکانات بھی بڑھا رہی ہیں۔ متعدد لوگ اینگزائٹی، ڈپریشن اور بے خوابی جیسے مسائل کا سامنا کر رہے ہیں۔ ایک شہری نے بتایا کہ وہ موٹر سائیکل پر سفر کر رہے تھے جب چند نوجوان ایمرجنسی ہارن بجا کر اور ون ویلنگ کرتے ہوئے ان کے پیچھے آئے، جس پر انہوں نے ہارن کو اصل ایمبولینس سمجھ کر راستہ دیا اور نتیجتاً ایک حادثے سے بال بال بچے۔

مقامی پولیس اور ٹریفک اہلکاروں کی عدم توجہی کے باعث ون ویلنگ اور غیر قانونی ہارن کے استعمال کا یہ رجحان مزید خطرناک ہوتا جا رہا ہے۔ شہریوں کا کہنا ہے کہ یہ عمل نہ صرف حادثات کو فروغ دے رہا ہے بلکہ ایمرجنسی سروسز کی کارکردگی پر بھی منفی اثر ڈال رہا ہے۔

شہریوں نے ضلعی انتظامیہ اور مقامی پولیس سے مطالبہ کیا ہے کہ وہ ان غیر قانونی سرگرمیوں کے خلاف سخت کارروائی کریں۔ ان کا کہنا ہے کہ قانون نافذ کرنے والے ادارے ان سرگرمیوں کے خاتمے کے لیے بھرپور کریک ڈاؤن کریں تاکہ نہ صرف شہریوں کی جانوں کا تحفظ یقینی بنایا جا سکے بلکہ ایمرجنسی سروسز کی افادیت اور کارکردگی بھی بحال رہے۔

اوچ شریف (باغی ٹی وی نامہ نگار حبیب خان) اوچ شریف میں کروڑوں روپے مالیت کی سرکاری کمرشل اور رہائشی اراضی پر مبینہ لینڈ مافیا نے دوبارہ قبضہ جما لیا۔

اوچ شریف (باغی ٹی وی نامہ نگار حبیب خان) اوچ شریف میں کروڑوں روپے مالیت کی سرکاری کمرشل اور رہائشی اراضی پر دوبارہ قبضے کا انکشاف ہوا ہے، جسے حکومت کی جانب سے واگزار کرایا گیا تھا۔ ذرائع کے مطابق، لینڈ مافیا نے نائب تحصیلدار ملک شہباز اور ریونیو عملے کی مبینہ ملی بھگت سے دوبارہ تعمیرات کر کے اپنی جگہیں بحال کر لی ہیں، جس پر شہریوں نے شدید احتجاج کیا ہے اور اعلیٰ حکام سے نوٹس لینے کا مطالبہ کیا ہے۔

تفصیلات کے مطابق، چند سال قبل حکومت پنجاب کی مہم کے تحت اوچ شریف میں ریلوے لائن کے قریب موجود سرکاری کمرشل اراضی پر بنائے گئے دکانوں اور رہائشی عمارتوں کو مسمار کر دیا گیا تھا۔ کئی عرصے تک ملبہ اور خالی پلاٹ موجود رہے، تاہم حالیہ دنوں میں مبینہ طور پر لینڈ مافیا نے دوبارہ تعمیرات شروع کر دی ہیں۔ شہریوں کا الزام ہے کہ نائب تحصیلدار ملک شہباز، گرداور اور متعلقہ پٹواری نے بھاری رشوت کے عوض مافیا کو دوبارہ قبضہ جمانے کی اجازت دی، جس سے علاقے میں تشویش کی لہر دوڑ گئی ہے۔

شہریوں محمد عبداللہ، محمد سلمان، محمد عدنان اور دیگر کا کہنا ہے کہ حکومت کے تجاوزات کے خاتمے کا ایجنڈا یہاں بری طرح ناکام ہو چکا ہے۔ ان کا مؤقف ہے کہ مقامی انتظامیہ کے افسران کے مبینہ تعاون سے سرکاری زمینوں پر دوبارہ قبضہ کرایا جا رہا ہے، جو حکومتی پالیسی کی واضح خلاف ورزی ہے۔ شہریوں نے مطالبہ کیا کہ وزیراعلیٰ پنجاب، ڈی جی اینٹی کرپشن اور ڈپٹی کمشنر بہاولپور فوری نوٹس لیں اور لینڈ مافیا کے خلاف سخت کارروائی کی جائے۔

اس سلسلے میں جب نائب تحصیلدار ملک شہباز سے موقف لیا گیا تو ان کا کہنا تھا کہ معاملے کی ذمہ داری متعلقہ گرداور کو سونپ دی گئی ہے۔ شہریوں نے اس جواب کو غیر تسلی بخش قرار دیا ہے اور مزید مؤثر اقدامات کی ضرورت پر زور دیا ہے۔