ڈیرہ غازیخان(باغی ٹی وی رپورٹ)ٹیچنگ ہسپتال میں آپریشن کے بعد انفیکشنزمیں خطرناک اضافہ،مریض مرنے لگے
تفصیلات کے مطابق ڈیرہ غازی خان میں علامہ اقبال ٹیچنگ ہسپتال میں آپریشن کے بعد مریضوں کی بگڑتی ہوئی حالت اور بڑھتے ہوئے انفیکشنز نے مریضوں کی زندگیوں کو خطرے میں ڈال دیا ہے۔ذرئع کے مطابق ہسپتال کے ٹراما سینٹر، گائنی، یورالوجی اور سرجیکل ڈیپارٹمنٹ میں کیے جانے والے آپریشنز کے بعد اکثر مریضوں کو صحتیاب ہونے کے بجائے شدید انفیکشن اور دیگر خطرناک بیماریوں کا سامنا کرنا پڑرہاہے۔آپریشنز کے بعد انفیکشنز بڑھنے کی متعدد وجوہات ہیں سامنے آئی ہیں جن میں سب سے اہم ناقص سٹرلائزیشن، غیر معیاری علاج اور بے دھیانی شامل ہیں۔
ذرائع کے مطابق ہسپتال کے مختلف آپریشن تھیٹرز میں استعمال ہونے والے آلات(انسٹرومنٹس)کو بروقت اور موثر طریقے سے جراثیم سے پاک نہیں کیا جاتا۔ عموما آلات کو خالی پانی سے دھو کر دوبارہ استعمال میں لایا جاتا ہے، جس سے انفیکشن پھیلنے کے امکانات بڑھتے جارہے ہیں۔اسی طرح ہسپتال میں مریضوں کو فراہم کی جانے والی بیشتر ادویات خاص طور پر اینٹی بائیوٹک انجیکشنز ناقص اور غیر معیاری ہیں۔ ان ادویات کی تاثیر نہ ہونے کے برابر ہے اور ان کے استعمال سے انفیکشن کنٹرول ہونے کے بجائے مزید پھیل رہے ہیں ،مختلف ذرائع کی رپورٹوں کے مطابق ان ادویات کی لاگت میں کمی کی وجہ سے ایکسپائرڈ کیمیکلز استعمال کیے جا رہے ہیں۔
دوسری طرف ہسپتال میں اکثر نرسز اور طبی عملہ مناسب تربیت اور تجربے سے عاری ہے۔ آپریشن کے بعد مریضوں کی بروقت اور جراثیم سے پاک ڈریسنگ نہ ہونے کی وجہ سے زخم خراب ہوجاتے ہیں اور انفیکشن میں تیزی آتی ہے۔ ان میں سے بعض زخموں کو مناسب توجہ نہ ملنے کی وجہ سے پیچیدہ انفیکشنز میں تبدیل ہو جاتے ہیں۔ساتھ ہی ہسپتال کے مختلف وارڈز اور آپریشن تھیٹرز میں صفائی کا فقدان ہے۔ آپریشن تھیٹرز میں موجود ساز و سامان کو باقاعدگی سے صاف نہیں کیا جاتا، جس کی وجہ سے وہاں موجود بیکٹیریا اور دیگر جراثیم مریضوں کے زخموں میں منتقل ہو جاتے ہیں۔ہسپتال میں غفلت کی انتہا ہوگئی ہے کہ آپریشنز میں استعمال ہونے والے آلات کو بعض اوقات سٹرلائز کیے بغیر ایک سے دوسرے مریض پر استعمال کیا جاتا ہے۔ یہ غیر پیشہ ورانہ عمل زخموں میں انفیکشن کی ایک بڑی وجہ بن چکا ہے، اس کے علاوہ انہتائی خطرناک بیماریاں جن میں ہیپاٹائٹس،ایڈز ودیگر موذی امراض شامل ہیں پھیل رہے ہیں،جن کے باعث مریض مزید سنگین مسائل کا شکار ہو رہے ہیں۔
ایک رپورٹ کے مطابق انفیکشن اور مریضوں کی بگڑتی حالت کی بنیادی وجہ محکمہ صحت پنجاب میں کرپشن اور غیر ذمہ داری ہے۔ ذرائع کا کہنا ہے کہ کرپٹ افسران کے زیر اثر ناقص اور غیر معیاری ادویات کی سپلائی کو جاری رکھا گیا ہے۔ ان ادویات کی سپلائی میں افسران کی جانب سے کمیشن کی خاطر غیر معیاری اور سستے کیمیکلز استعمال کیے جا رہے ہیں جو مریضوں کے لیے جان لیوا ثابت ہو رہے ہیں۔ ایکسپائرڈ اور ناقص ادویات کی لیبارٹری رپورٹس کو رشوت دے کر پاس کروا لیا جاتا ہے جس سے ہسپتالوں میں غیر معیاری علاج اور انفیکشن کا سلسلہ بڑھتا جارہاہے۔
ڈیرہ غازیخان کے شہریوں نے حکام بالا سے اپیل کی ہے کہ وہ فوری نوٹس لیتے ہوئے اس میگا کرپشن کے خاتمے اور محکمہ صحت پنجاب کے کرپٹ افسران کے خلاف سخت کارروائی کریں۔ عوام کا کہنا ہے کہ ہسپتالوں میں انسٹرومنٹس کی سٹرلائزیشن اور ادویات کی فراہمی کو موثر اور معیاری بنایا جائے تاکہ مریضوں کی زندگیاں محفوظ بنائی جاسکیں ۔
