Baaghi TV

Author: ڈاکٹرغلام مصطفی بڈانی

  • سیالکوٹ: ناجائز منافع خوروں کے خلاف کریک ڈاؤن، 1152 دکانداروں کوجرمانہ، 68 گرفتار

    سیالکوٹ: ناجائز منافع خوروں کے خلاف کریک ڈاؤن، 1152 دکانداروں کوجرمانہ، 68 گرفتار

    سیالکوٹ (باغی ٹی وی، بیورو چیف شاہد ریاض) ناجائز منافع خوروں کے خلاف کریک ڈاؤن، 1152 دکانداروں کوجرمانہ، 68 گرفتار

    تفصیلات کے مطابق ڈپٹی کمشنر سیالکوٹ محمد ذوالقرنین نے اعلان کیا ہے کہ ضلع بھر میں ناجائز منافع خوری اور گراں فروشی کے خلاف کارروائیاں جاری ہیں۔ رواں ماہ کے دوران 1152 دکانداروں کو گراں فروشی پر 63 لاکھ 5 ہزار روپے جرمانہ کیا گیا جبکہ 68 افراد کو موقع پر گرفتارکیا گیا اور 36 دکانوں کو سیل جبکہ 4 کے خلاف پرائس ایکٹ کے تحت مقدمات درج کیے گئے۔

    ڈپٹی کمشنر نے بتایا کہ پرائس مجسٹریٹس نے 14,065 انسپکشنز مکمل کیں تاکہ قیمتوں کو کنٹرول میں رکھا جا سکے۔ اجلاس میں ایڈیشنل ڈپٹی کمشنرز، اسسٹنٹ کمشنرز، اور تمام پرائس مجسٹریٹس نے شرکت کی۔

    محمد ذوالقرنین نے ہدایت کی کہ پرائس مجسٹریٹس چھٹی کے دن بھی قیمتوں کی چیکنگ جاری رکھیں اور شہریوں کی شکایات کا فوری ازالہ کیا جائے۔ اشیائے خورد و نوش کے معیار اور مقدار کی بھی سخت نگرانی کی جائے اور ملاوٹ یا ناپ تول میں دھوکہ دہی کرنے والوں کے خلاف سخت کارروائی کی جائے۔

    ڈپٹی کمشنر نے مزید ہدایت کی کہ میرج ہالز اور مارکیز کا دورہ کرکے ون ڈش پالیسی پر عملدرآمد یقینی بنایا جائے۔ بیکریوں اور تندوروں پر روٹی اور دیگر اشیاء مقررہ نرخوں پر فراہم کرنے کی ریگولر انسپکشن بھی کی جائے۔

    ڈپٹی کمشنر نے بعدازاں ڈسٹرکٹ ڈیزاسٹر مینجمنٹ اتھارٹی اور ڈسٹرکٹ ایمرجنسی بورڈ کے مشترکہ اجلاس کی صدارت کی۔ ڈی او ایمرجنسی نوید اقبال نے ریسکیو 1122 کی کارکردگی رپورٹ پیش کی جبکہ ڈسٹرکٹ ایمرجنسی کنٹرول روم کے انچارج کیوان حسن نے قدرتی آفات سے متعلق بریفنگ دی۔

    محمد ذوالقرنین نے ہدایت کی کہ پسرور روڈ پر ٹریفک حادثات کی روک تھام کے لیے خصوصی آگاہی مہم چلائی جائے اور سول سوسائٹی کو اس میں شامل کیا جائے۔ انہوں نے اسکولوں میں بچوں کو ہنگامی حالات سے نمٹنے اور ابتدائی طبی امداد کی تربیت دینے کے اقدامات کی بھی تاکید کی۔

  • کے پی کے ،تعلیمی نظام بحران کا شکار، تنخواہیں نہ ملنے پراساتذہ سڑکوں پر، 23 اکتوبر کو دھرنا ہوگا

    کے پی کے ،تعلیمی نظام بحران کا شکار، تنخواہیں نہ ملنے پراساتذہ سڑکوں پر، 23 اکتوبر کو دھرنا ہوگا

    لنڈی کوتل (باغی ٹی وی رپورٹ) کے پی کےمیں تعلیمی نظام بحران کا شکار، تنخواہیں نہ ملنے پراساتذہ سڑکوں پر، 23 اکتوبر کو پشاور میں دھرنا

    تفصیلات کے مطابق اے آئی پی پراجیکٹ کے تحت بھرتی کیے گئے پی ٹی سی ہائیر ٹیچرز نے بند تنخواہوں کی فوری ادائیگی اور مستقل بھرتی کے مطالبے کے لیے آواز بلند کر دی ہے،لنڈی کوتل پریس کلب میں تنظیمِ اساتذہ ضلع خیبر کے صدر شریف اللہ آفریدی، ضم اضلاع کے صدر جمیل خان، جنرل سیکرٹری قاسم عثمان، نائب صدر سمیع اللہ اور دیگر کابینہ ممبران نے پریس کانفرنس سے خطاب کیا۔

    اساتذہ رہنماؤں نے کہا کہ 2022 میں ضم اضلاع کے گورنمنٹ پرائمری اسکولوں میں اساتذہ کی کمی پوری کرنے کے لیے پی ٹی سی ہائیر ٹیچرز کو بھرتی کیا گیا تھا۔ تاہم یہ اساتذہ گزشتہ آٹھ مہینوں سے تنخواہوں سے محروم ہیں اور محکمہ تعلیم نے سیکرٹری فنانس اور دیگر حکام کے تعاون سے ان کو فارغ کرنے کا نوٹیفکیشن بھی جاری کر دیا ہے۔

    رہنماؤں نے کہا کہ ان اساتذہ کی بھرتی سے اسکولوں میں عملے کی کمی پر قابو پا لیا گیا تھا مگر اب ان کو برطرف کرنے کی کوشش کی جا رہی ہے۔ انہوں نے افسوس کا اظہار کیا کہ بارہا ضلعی ایم پی ایز اور ایم این اے سے رابطے کے باوجود کوئی نتیجہ نہیں نکلا اور حکومت نے اس مسئلے پر کوئی سنجیدگی نہیں دکھائی۔

    شریف اللہ آفریدی نے حکومت پر تنقید کرتے ہوئے کہا کہ اساتذہ کے مسائل حل کرنا حکام کی ترجیحات میں شامل ہی نہیں ہے۔ انہوں نے مطالبہ کیا کہ ان اساتذہ کو مستقل کیا جائے اور آٹھ ماہ کی تنخواہیں فوری ادا کی جائیں۔

    پریس کانفرنس کے اختتام پر اساتذہ رہنماؤں نے اعلان کیا کہ اگر ان کے مطالبات پورے نہ کیے گئے تو 23 اکتوبر بروز بدھ کو پشاور میں صوبائی اسمبلی اور سیکریٹریٹ کے سامنے میل اور فیمیل اساتذہ بھرپور احتجاج اور دھرنا دیں گے۔

  • اوچ شریف: فرید ایکسپریس کی زد میں آ کر نوجوان جاں بحق

    اوچ شریف: فرید ایکسپریس کی زد میں آ کر نوجوان جاں بحق

    اوچ شریف (باغی ٹی وی، نامہ نگار: حبیب خان) احمد پور شرقیہ سے کراچی جانے والی فرید ایکسپریس کی ٹکر سے ایک نوجوان موقع پر ہی جاں بحق ہو گیا۔

    تفصیلات کے مطابق ہتھیجی کے رہائشی محمد بلال ولد فدا حسین اپنی اہلیہ کے ساتھ موٹر سائیکل پر سفر کر رہے تھے۔ احمد پور شرقیہ ریلوے پھاٹک بند ہونے کی وجہ سے انہوں نے دوسری جانب سے ریلوے لائن عبور کرنے کی کوشش کی تاہم اسی دوران فرید ایکسپریس کی زد میں آگئے اور موقع پر ہی جاں بحق ہو گئے۔

    حادثے کے دوران محمد بلال کی اہلیہ محفوظ رہی اور اسے کسی قسم کا جانی نقصان نہیں ہوا۔ اطلاع ملتے ہی ریسکیو 1122 کی ٹیم موقع پر پہنچ گئی اور قانونی کارروائی کے بعد لاش کو لواحقین کے حوالے کر دیا۔

    ریلوے لائن پر اس قسم کے واقعات کے بعد عوام نے متعلقہ حکام سے مطالبہ کیا ہے کہ ریلوے پھاٹک پر مناسب حفاظتی انتظامات کیے جائیں تاکہ مستقبل میں ایسے افسوسناک واقعات سے بچا جا سکے۔

  • گوجرہ: سڑک پر کھڈے نے فرسٹ ایئر کی طالبہ کی جان لے لی

    گوجرہ: سڑک پر کھڈے نے فرسٹ ایئر کی طالبہ کی جان لے لی

    گوجرہ (باغی ٹی وی، نامہ نگار عبد الرحمن جٹ) گوجرہ میں سڑک پر موجود کھڈے کے باعث افسوسناک حادثہ پیش آیا، جس میں فرسٹ ایئر کی طالبہ سدرہ یوسف جاں بحق ہو گئی۔

    تفصیلات کے مطابق نیو پلاٹ گلی نمبر 14 کے رہائشی محمد یوسف کی بیٹی سدرہ یوسف اپنے بھائی کے ساتھ موٹر سائیکل پر کالج جا رہی تھی۔ اسسٹنٹ کمشنر ہاؤس کے قریب سڑک پر ایک گہرے کھڈے سے موٹر سائیکل کا توازن بگڑ گیا، جس سے طالبہ گر کر پیچھے سے آنے والی ٹریکٹر ٹرالی کی زد میں آگئی۔

    سدرہ کو شدید زخمی حالت میں فوری طور پر تحصیل ہیڈ کوارٹرز اسپتال منتقل کیا گی لیکن حالت نازک ہونے کے باعث اسے الائیڈ اسپتال فیصل آباد ریفر کر دیا گیا جہاں وہ زخموں کی تاب نہ لاتے ہوئے زندگی کی بازی ہار گئی۔

    حادثے کے بعد ٹریکٹر ٹرالی کا ڈرائیور محمد سلیم (رہائشی چک نمبر 171 ج ب) موقع سے فرار ہو گیا۔ تھانہ سٹی پولیس نے طالبہ کی لاش کو تحویل میں لے کر قانونی کارروائی کے بعد ورثاء کے حوالے کر دیاسدرہ یوسف کی میت گھر پہنچتے ہی کہرام مچ گیا اور علاقے میں غم کی لہر دوڑ گئی۔

    اہل علاقہ کا کہنا ہے کہ سڑک پر پڑے یہ کھڈے انتہائی خطرناک ہو چکے ہیں اور حادثات روز کا معمول بن گئے ہیں۔ عوام نے متعلقہ حکام سے فوری اصلاحات کا مطالبہ کرتے ہوئے کہا ہے کہ سڑکوں کی حالت بہتر نہ کی گئی تو مزید قیمتی جانیں ضائع ہو سکتی ہیں۔

  • عرفان خان بزدار, فن کی بلندیوں کی طرف گامزن

    عرفان خان بزدار, فن کی بلندیوں کی طرف گامزن

    باغی ٹی وی رپورٹ :عرفان خان بزدار نے اپنی فنی زندگی کا آغاز محمد علی اور اسماعیل شاہ کی اداکاری سے متاثر ہو کر کیا۔ موسیقی میں ان کے آئیڈیل عطاء اللہ عیسیٰ خیلوی، نازیہ حسن اور زوہیب حسن ہیں جبکہ ادب کے میدان میں محسن نقوی کو اپنا رہنما مانتے ہیں۔ ڈیرہ غازی خان آرٹس کونسل میں اسٹیج ڈراموں اور موسیقی کے پروگراموں کے ذریعے مقامی فنکاروں کو نمایاں ہونے کے مواقع فراہم کیے گئے اور عرفان خان نے ابتدا میں معین شاہ اور سیلم ناز کے گروپ کے ساتھ کام کیا۔

    اداکاری اور پروڈکشن کا سفر
    عرفان خان بزدار نے متعدد کمرشل اور نان کمرشل اسٹیج ڈراموں میں بطور اداکار اور پروڈیوسر حصہ لیا۔ ان کے معروف ڈراموں میں "آپ کو کیا تکلیف ہے”، "حسینہ چکر باز”، "پہلا قطرہ”، "چاچا زیرو میٹر”، "ووہٹی دا سوال اے”، "آؤ خوشیاں ونڈو”اور اک واری مل ڈھولہ شامل ہیں۔ ان ڈراموں میں ان کی اداکاری نے ناظرین کو متاثر کیا اور شوبز کے ساتھ ساتھ ادب اور صحافت کے میدان میں بھی وہ اپنی صلاحیتوں کا لوہا منوا چکے ہیں۔

    صحافت میں خدمات
    عرفان خان بزدار نے کئی اہم صحافتی اداروں میں بیورو چیف کی حیثیت سے خدمات انجام دی ہیں۔ ان کا تجربہ ہفت روزہ صداۓ سنگھڑ، فخر معین، دورِ حاضر، ماہنامہ روہی میگزین کراچی اور دیگر اخبارات سے جڑا ہے۔اس وقت بھی کئی اداروں میں اپنی خدمات سرانجام دے رہے ہیں۔

    سرائیکی فلم انڈسٹری میں کردار
    جنوبی پنجاب میں سرائیکی فلموں کے آغاز کے وقت عرفان خان بزدار اور محمد سجاد کھوکھر نے مل کر فلمی سفر کا آغاز کیا۔ عرفان خان نے ڈیرہ غازی خان میں کہکشاں پرفارمنگ آرٹس فلم پروڈکشن اینڈ ایڈورٹائزنگ ایجنسی کی بنیاد رکھی۔ انہوں نے بلال اعوان کی ہدایت کاری میں سرائیکی فلم "وسایا تے ڈیوایا” بنائی، جس کے بعد "ماما بگا”، "اجڑی جھوک”، "رن دی مار” اور "رانجھا سب دا سانجھا” جیسی فلمیں بھی پیش کیں۔

    اسٹیج ڈرامے اور بڑے پروجیکٹس
    عرفان خان بزدار نے کئی اسٹیج ڈراموں اور پروگراموں کی پروڈیوسنگ اور ہدایت کاری کی۔ 2012 میں آرٹس کونسل ڈیرہ غازی خان کی نئی عمارت میں "ہنڑ موجاں ای موجاں” پیش کیا، جسے معین شاہ نے ڈائریکٹ کیا اور اطہر ببر اور ظفر عباس گوگا نے بھی حصہ لیا۔ اسی سال نعت خوانی اور حسن قرأت کے مقابلے بھی منعقد کیے۔ ان کے کامیڈی ڈرامے "آؤ خوشیاں ونڈو” میں آئمہ خان، نین شہزادی، عروج خان اور دیگر فنکاروں نے شاندار کارکردگی دکھائی۔

    فلموں میں نئے چہروں کا تعارف
    عرفان خان نے سرائیکی فلم انڈسٹری میں کئی نئے چہروں کو متعارف کرایا اور گلوکاروں کے ویڈیو البمز بھی تیار کیے، جن میں ایاز اللہ، تیمور خان اور زاہدہ نتھلی والی شامل ہیں۔ انہوں نے پاکستان ٹیلیویژن ملتان سینٹر میں بھی بطور اداکار خدمات انجام دیں اور اے کیٹگری کا اعزاز حاصل کیا۔

    15 سال پرانی فلم کی ریلیز
    حال ہی میں عرفان خان بزدار اور سجاد کھوکھر نے "اجڑی جھوک” کے نام سے 15 سال پرانی فلم ریلیز کی جو ماضی میں بعض وجوہات کے باعث پابندی کا شکار ہوگئی تھی۔ ان کا یہ سفر فن، صحافت، اور ادب کے میدان میں ان کی انتھک محنت اور جذبے کا مظہر ہے۔

    عرفان خان بزدار نہ صرف اپنے استاد بلال اعوان مرحوم کے شاگرد ہونے پر فخر محسوس کرتے ہیں بلکہ ان کے فن کی میراث کو بھی زندہ رکھے ہوئے ہیں۔

  • کراچی: فلیٹ سے 4 خواتین کی تشدد زدہ اور گلا کٹی لاشیں برآمد

    کراچی: فلیٹ سے 4 خواتین کی تشدد زدہ اور گلا کٹی لاشیں برآمد

    کراچی (باغی ٹی وی )کراچی کے علاقے لی مارکیٹ میں ایک فلیٹ سے 4 خواتین کی تشدد زدہ اور گلا کٹی ہوئی لاشیں برآمد ہوئی ہیں۔ پولیس نے لاشوں کو ضابطے کی کارروائی کے لیے سول اسپتال منتقل کر دیا ہے۔

    تفصیلات کے مطابق واقعہ رہائشی عمارت کی ساتویں منزل پر پیش آیا، جہاں چاروں خواتین کی لاشیں الگ الگ کمروں سے ملیں۔ پولیس کا کہنا ہے کہ قتل سے قبل خواتین پر تشدد کیا گیا تھا۔ کرائم سین یونٹ جائے وقوعہ پر موجود ہے اور شواہد اکٹھے کرنے کا عمل جاری ہے۔

    پولیس کے مطابق مقتولین میں ماں، بیٹی، نواسی اور بہو شامل ہیں جن کی عمریں بالترتیب 51، 18، 19 اور 13 سال ہیں۔ واقعے کی تحقیقات شروع کر دی گئی ہیں اور جائے وقوعہ سے مزید شواہد حاصل کیے جا رہے ہیں تاکہ قتل کے محرکات اور ملزمان کا پتہ چلایا جا سکے۔

    گھر کے سربراہ محمد فاروق نے بتایا کہ واردات کے وقت وہ اور اس کے دونوں بیٹے گھر پر موجود نہیں تھے۔ انہوں نے کہا کہ انہیں کسی پر شک نہیں ہے اور وہ بھی اس سانحے سے صدمے میں ہیں۔

    پولیس اس بات کی بھی تحقیقات کر رہی ہے کہ واردات ذاتی دشمنی کا شاخسانہ ہے یا اس کے پیچھے کوئی اور مقصد کارفرما تھا۔ علاقے کے لوگوں سے بھی پوچھ گچھ کی جا رہی ہے تاکہ واقعے کے بارے میں مزید معلومات حاصل کی جا سکیں۔

    معاملے کی سنگینی کے پیش نظر کیس کی تحقیقات میں تیزی لائی جا رہی ہے اور پولیس کا کہنا ہے کہ جلد ملزمان کو گرفتار کر کے حقائق منظرِ عام پر لائے جائیں گے۔

  • اوچ شریف: مینتھول سے بھرا 22 ویلر ٹینکر الٹ گیا

    اوچ شریف: مینتھول سے بھرا 22 ویلر ٹینکر الٹ گیا

    اوچ شریف (باغی ٹی وی ،نامہ نگارحبیب خان) قومی شاہراہ طاہر والی کے مقام پر 22 ویلر ٹینکر جو مینتھول آئل سے لوڈ تھا حادثے کا شکار ہو کر الٹ گیا۔ یہ ٹینکر کراچی سے خیبر پختونخواہ کے شہر جدون جا رہا تھا۔

    حادثے کی اطلاع ملتے ہی مقامی پولیس اور ریسکیو ٹیمیں فوری طور پر جائے وقوعہ پر پہنچ گئیں۔ ریسکیو کنٹرول روم بہاولپور کو اطلاع دینے والے کالر نے بتایا کہ آئل ٹینکر الٹنے کے باعث ممکنہ خطرات لاحق ہو سکتے ہیں۔

    کنٹرول روم بہاولپور نے فوری طور پر ایک ایمبولینس، فائر وہیکل اور ریسکیو گاڑی جائے وقوعہ پر روانہ کی۔ خوش قسمتی سے ٹینکر روڈ کے کنارے الٹا اور ٹریفک کی روانی متاثر نہیں ہوئی۔

    پولیس اور ریسکیو حکام نے علاقے کا جائزہ لیا تاکہ کسی بھی ممکنہ حادثے یا نقصان سے بچا جا سکے۔ ٹینکر میں موجود مینتھول آئل کی وجہ سے حفاظتی اقدامات پر خصوصی توجہ دی گئی۔

    حادثے کے بعد ٹریفک کی روانی معمول کے مطابق جاری رہی اور کسی قسم کی جانی نقصان کی اطلاع نہیں ملی۔

  • اوچ شریف: برطانوی ہائی کمشنر کا دورہ، تاریخی حیثیت کو سراہا

    اوچ شریف: برطانوی ہائی کمشنر کا دورہ، تاریخی حیثیت کو سراہا

    اوچ شریف(باغی ٹی وی،نامہ نگارحبیب خان ) برطانوی ہائی کمشنر کااوچ شریف کا دورہ، تاریخی ورثے اور اولیائے کرام کی سرزمین کو خراج تحسین کیا

    تفصیلات کے مطابق برٹش ہائی کمیشن اسلام آباد کے نمائندے جیک ویدر نے اپنے وفد کے ہمراہ تاریخی شہر اوچ شریف کا دورہ کیا۔ انہوں نے اس موقع پر کہا کہ اولیائے کرام کی سرزمین پر آنا ان کے لیے ایک اعزاز ہے اور اوچ شریف کی تاریخی و روحانی اہمیت کو سراہتے ہوئے اسے ایک یادگار تجربہ قرار دیا۔

    برطانوی وفد نے شمس محل کا وزٹ کیا اور دربار حضرت محبوب سبحانی مخدوم سید افتخار حسن گیلانی (سابق ایم پی اے) سے خصوصی ملاقات کی۔ دربار کے ولی عہد مخدوم زادہ سید عمر رضا گیلانی نے مہمانوں کو دربار کی زیارت کروائی اور نادر تاریخی نوادرات دکھائے۔

    جیک ویدر نے کہا کہ اوچ شریف کی تاریخی و روحانی عظمت کو نہ صرف پاکستان بلکہ یورپ، بالخصوص برطانیہ میں بھی بڑی عزت اور قدر کی نگاہ سے دیکھا جاتا ہے۔ انہوں نے مزید کہا کہ اوچ شریف کا ورثہ پاکستان کی ثقافتی و تاریخی شناخت کا ایک اہم حصہ ہے۔

    برطانوی وفد کے دورے کو مقامی سطح پر بھرپور سراہا گیا، اور شہریوں نے اس بات پر خوشی کا اظہار کیا کہ بین الاقوامی شخصیات اوچ شریف کے روحانی اور ثقافتی ورثے کو تسلیم کر رہی ہیں۔

    سجادہ نشین مخدوم سید افتخار حسن گیلانی نے برطانوی وفد کے دورے کا خیرمقدم کرتے ہوئے امید ظاہر کی کہ اس طرح کے دورے مستقبل میں ثقافتی اور سفارتی تعلقات کو مزید فروغ دیں گے۔ وفد کو اوچ شریف کے اولیاء کرام کے مزاروں اور دیگر تاریخی مقامات کے بارے میں تفصیلی بریفنگ بھی دی گئی۔

    جیک ویدر اور ان کا وفد اپنے دورہ اوچ شریف سے نہایت متاثر ہوا اور انہوں نے شہر کی تاریخی اور روحانی عظمت کو ایک یادگار تجربہ قرار دیا۔ وفد نے اپنے تاثرات میں کہا کہ اوچ شریف کا ورثہ نہ صرف پاکستان بلکہ دنیا بھر میں اہمیت کا حامل ہے اور ایسے مقامات کو محفوظ بنانا انتہائی ضروری ہے۔

  • اوچ شریف: پرائس کنٹرول خلاف ورزی اور تجاوزات کے خلاف کارروائی، متعدد دکانیں سیل

    اوچ شریف: پرائس کنٹرول خلاف ورزی اور تجاوزات کے خلاف کارروائی، متعدد دکانیں سیل

    اوچ شریف(باغی ٹی وی ،نامہ نگارحبیب خان ) اسسٹنٹ کمشنر عثمان امین نے پرائس کنٹرول لسٹ کی خلاف ورزی اور غیر قانونی تجاوزات کے خلاف سخت کارروائی کرتے ہوئے کئی دکانوں کو جرمانے کیے اور متعدد کو سیل کر دیا۔

    مین بازار، جہانیاں روڈ اور ہاتھی گیٹ بازار میں میونسپل کمیٹی نے تجاوزات کے خاتمے کے لیے آپریشن شروع کر دیا ہے۔ کارروائی کے دوران ان دکانداروں کو بھی نوٹس جاری کیے گئے جنہوں نے عوامی جگہوں پر غیر قانونی طور پر دکانیں اور تھڑے قائم کیے تھے۔ آپریشن کی اطلاع پر دکانداروں اور تھڑے والوں میں افراتفری پھیل گئی، تاہم بازاروں کی کشادگی پر شہریوں نے خوشی کا اظہار کیا۔

    اسسٹنٹ کمشنر عثمان امین نے خبردار کیا کہ دکاندار اپنی حدود میں سامان رکھیں اور سرکاری نرخوں پر اشیاء کی فروخت یقینی بنائیں، بصورت دیگر سخت کارروائی کی جائے گی۔ انہوں نے مزید کہا کہ یہ اقدامات شہر کی ترقی اور عوامی سہولت کے لیے ضروری ہیں۔

    شہریوں نے انتظامیہ کے اس اقدام کو سراہتے ہوئے کہا کہ اس سے بازاروں میں ٹریفک اور پیدل چلنے والوں کی مشکلات میں کمی آئے گی۔ شہریوں نے ڈپٹی کمشنر بہاولپور، اسسٹنٹ کمشنر اور میونسپل کمیٹی کے اقدامات کو مثبت قرار دیا۔

    میونسپل کمیٹی کے چیف آفیسر قاضی نعیم نے اعلان کیا کہ یہ آپریشن آئندہ بھی جاری رہیں گے اور خلاف ورزی کرنے والوں کے خلاف سخت قانونی کارروائی کی جائے گی۔ انہوں نے تاجروں سے اپیل کی کہ وہ تعاون کریں تاکہ اوچ شریف کو ایک منظم، کشادہ اور خوبصورت شہر بنایا جا سکے۔

  • بہاولنگر:اسلامیہ یونیورسٹی ، طالبہ کو ہراساں کرنے پر لیکچرار گرفتار

    بہاولنگر:اسلامیہ یونیورسٹی ، طالبہ کو ہراساں کرنے پر لیکچرار گرفتار

    بہاولنگر (باغی ٹی وی ،ویب نیوز) اسلامیہ یونیورسٹی میں طالبہ کو ہراساں کرنے کے سنگین الزام میں لیکچرار کو پولیس نے گرفتار کر لیا۔ طالبہ نے شکایت درج کرواتے ہوئے الزام لگایا کہ لیکچرار نے اسے واٹس ایپ پر غیراخلاقی پیغامات اور ویڈیوز بھیج کر ہراساں کیا اور امتحان میں ناکام کرنے اور یونیورسٹی سے نکالنے کی دھمکیاں دیں۔

    پولیس کے مطابق طالبہ نے اپنی درخواست میں بتایا کہ لیکچرار نے پہلے واٹس ایپ پر رابطہ کیا اور آہستہ آہستہ غیراخلاقی مواد بھیجنا شروع کیا۔ جب طالبہ نے اس رویے کی شکایت کی تو ملزم نے اسے مستقبل خراب کرنے کی دھمکی دیتے ہوئے کہا کہ اگر تعاون نہ کیا تو اسے امتحان میں فیل کر کے یونیورسٹی سے نکال دیا جائے گا۔

    طالبہ کی درخواست پر فوری کارروائی کرتے ہوئے پولیس نے ملزم لیکچرار کے خلاف ہراسانی اور دھمکیوں کا مقدمہ درج کر کے اسے حراست میں لے لیا۔ پولیس نے ملزم کا موبائل فون بھی قبضے میں لے کر تحقیقات کا آغاز کر دیا ہے تاکہ غیراخلاقی پیغامات اور ویڈیوز کے شواہد حاصل کیے جا سکیں۔

    اسلامیہ یونیورسٹی کی انتظامیہ نے واقعے پر گہرے افسوس کا اظہار کرتے ہوئے کہا ہے کہ تعلیمی اداروں میں اس قسم کے واقعات کسی صورت برداشت نہیں کیے جائیں گے۔ یونیورسٹی انتظامیہ نے مزید کہا کہ وہ واقعے کی مکمل تحقیقات میں پولیس کے ساتھ مکمل تعاون کرے گی تاکہ ذمہ دار کو قانون کے مطابق سزا ملے۔

    اس واقعے کے بعد یونیورسٹی کی طالبات میں خوف اور تشویش کی لہر دوڑ گئی ہے۔ طلبہ تنظیموں نے مطالبہ کیا ہے کہ یونیورسٹی میں ہراسانی کے واقعات کے خلاف سخت اقدامات کیے جائیں اور ایسے ملزمان کے لیے سخت سزائیں مقرر کی جائیں تاکہ مستقبل میں اس طرح کے واقعات کا سدباب ہو۔

    پولیس حکام کا کہنا ہے کہ واقعے کی تحقیقات مکمل ہونے کے بعد ملزم کے خلاف قانونی کارروائی کی جائے گی،تعلیمی ادارے میں کسی بھی قسم کی ہراسانی ناقابل قبول ہے اور ہم ملزم کو قانون کے مطابق سزا دلوائیں گے،