Author: ڈاکٹرغلام مصطفی بڈانی

ڈیرہ غازی خان (باغی ٹی وی،سٹی رپورٹرجواد اکبر) ڈی جی خان سے جامپور جانے والی الفرید مسافر بس تیز رفتاری کے باعث عالی والا کے قریب انڈس ہائی وے سے بے قابو ہو کر سڑک سے نیچے اتر گئی اور کھیتوں میں جا گری۔ حادثے میں 12 مسافر زخمی ہوگئے۔

ریسکیو 1122 کے کنٹرول روم کو اطلاع ملتے ہی فوری طور پر دو ایمبولینسیں، ایک موٹر بائیک ایمبولینس، ایک فائر وہیکل اور ریسکیو وہیکل روانہ کی گئیں۔ پولیس کو بھی حادثے کی اطلاع دی گئی۔

ریسکیو ٹیم نے موقع پر پہنچ کر زخمیوں کو ابتدائی طبی امداد فراہم کی اور 6 شدید زخمیوں کو علامہ اقبال ٹیچنگ ہسپتال ڈیرہ غازی خان منتقل کر دیا۔

زخمیوں میں رحمت اللہ،محمد سعد ،محمد باقر ،محمد وسیم ،محمد دانش،بہار مائی ،نظام بی بی ،نذر حسین ،محمد افضل ،سویرا بی بی ،سیمی بی بی اور
محمد علی شامل ہیں جن میں 6 زخمیوں کو ہسپتال منتقل کیا گیا.

ٹھٹھہ (باغی ٹی وی،نامہ نگار بلاول سموں)ناریجا گاؤں کے رہائشی عطا محمد جانوری نے عوامی پریس کلب ٹھٹھہ/مکلی میں پریس کانفرنس کرتے ہوئے سول ہسپتال مکلی کی انتظامیہ کے خلاف شکایات کا اظہار کیا۔ عطا محمد کا کہنا تھا کہ ان کے والد نذر محمد جانوری بیمار ہیں اور وہ گزشتہ پانچ مہینوں سے ہسپتال میں ان کے علاج کے لیے دربدر ہو رہے ہیں لیکن ڈاکٹروں کی جانب سے مسلسل آپریشن کی تاریخیں ملتوی کی جا رہی ہیں۔

انہوں نے بتایا کہ ڈاکٹروں نے والد کے علاج کے لیے فوری آپریشن کی تجویز دی ہے، مگر ہسپتال کی انتظامیہ ہر ہفتے نئی تاریخ دے کر انہیں ٹال رہی ہے۔ عطا محمد کے مطابق تمام ٹیسٹ مکمل ہونے کے باوجود آپریشن میں مسلسل تاخیر کی جا رہی ہے، جس کے باعث ان کے والد کی حالت دن بدن خراب ہو رہی ہے۔ انہوں نے کہا کہ آج دی گئی آپریشن کی تاریخ کو بھی بغیر کسی وجہ کے اگلی منگل تک ملتوی کر دیا گیا۔

عطا محمد نے ہسپتال میں بدانتظامی اور سفارش کے کلچر کی نشاندہی کرتے ہوئے کہا کہ ہسپتال میں غریبوں کی کوئی سنوائی نہیں ہو رہی اور مریضوں کو سفارش کے بغیر علاج کے لیے ترسایا جا رہا ہے۔ انہوں نے وزیر اعلیٰ سندھ، صوبائی وزیر صحت اور دیگر متعلقہ حکام سے مطالبہ کیا ہے کہ ان کے والد کے علاج میں مزید تاخیر نہ کی جائے اور انہیں انصاف فراہم کیا جائے۔ عطا محمد نے متنبہ کیا کہ اگر ان کے والد کی حالت بگڑتی ہے تو وہ قانونی کارروائی کے لیے مجبور ہوں گے۔

پریس کانفرنس کے دوران انہوں نے ہسپتال انتظامیہ سے اپیل کی کہ وہ سفارش کے بجائے مریضوں کو ان کے حق کے مطابق علاج فراہم کریں تاکہ غریب عوام کو مزید مشکلات کا سامنا نہ کرنا پڑے۔

ٹھٹھہ(باغی ٹی وی ،نامہ نگار بلاول سموں) دھابیجی پمپنگ سٹیشن پر کے الیکٹرک کی جانب سے بجلی کے بریک ڈاؤن کے باعث 72 انچ قطر کی لائن نمبر 5 متاثر ہوگئی۔ یہ واقعہ صبح 7 بجے پیش آیا جب اچانک بجلی کی فراہمی میں خلل کے سبب پانی کی فراہمی متاثر ہوئی۔

ترجمان واٹر کارپوریشن کے مطابق جیسے ہی متاثرہ لائن کی اطلاع ملی تو واٹر کارپوریشن کے حکام فوراً موقع پر پہنچے اور متاثرہ لائن کا معائنہ کیا۔ سی ای او واٹر کارپوریشن انجیئنر سید صلاح الدین احمد نے ہدایت کی کہ متاثرہ لائن کی بحالی کا کام ہنگامی بنیادوں پر شروع کیا جائے۔ انہوں نے یہ بھی بتایا کہ مرمتی کام کے لیے ماہر انجینئرز کی ٹیم تشکیل دی گئی ہے جو صورتحال کا فوری جائزہ لے گی۔

چیف انجینئر واٹر کارپوریشن کے مطابق متاثرہ لائن کا مرمتی کام اگلے 16 گھنٹوں میں مکمل کر لیا جائے گا۔ اس دوران شہر کو متبادل لائنوں کے ذریعے پانی کی فراہمی جاری رکھی جائے گی۔ انہوں نے شہریوں کو یقین دلایا کہ پانی کی فراہمی میں کسی قسم کی کمی واقع نہیں ہوگی اور صورتحال پر مکمل نگرانی رکھی جائے گی۔

اس کے علاوہ شہریوں سے درخواست کی گئی ہے کہ وہ پانی کے استعمال میں احتیاط برتیں اور اگر کسی قسم کی مزید معلومات درکار ہوں تو واٹر کارپوریشن کے ہیلپ لائن سے رابطہ کریں۔ حکام کا کہنا ہے کہ اس واقعے کے بعد مستقبل میں ایسی صورت حال سے بچنے کے لیے بجلی کی فراہمی کے نظام کی بہتری کے لیے اقدامات کیے جائیں گے۔