اوکاڑہ (باغی ٹی وی،نامہ نگارملک ظفر) تھانہ کینٹ کی حدود 17 فور ایل میں ایک شادی شدہ خاتون کی موت معمہ بن گئی ہے۔ خاتون کی لاش گھر میں پنکھے سے لٹکی ہوئی ملی، جس کے بعد پولیس نے تفتیش کا آغاز کر دیا ہے تاکہ معلوم ہو سکے کہ یہ قتل کا واقعہ ہے یا خودکشی۔
متوفیہ اقصیٰ بی بی کے ورثا نے الزام عائد کیا ہے کہ اس کے شوہر افتخار نے اسے نشہ آور چیز کھلا کر قتل کیا اور بعد ازاں لاش کو خودکشی کا رنگ دینے کے لیے پنکھے سے لٹکا دیا۔ اقصیٰ بی بی چار ماہ کے بچے کی ماں تھی، جبکہ واقعے کے بعد اس کا شوہر افتخار ساتھیوں سمیت موقع سے فرار ہو گیا ہے۔
پولیس نے موقع پر پہنچ کر لاش کو قبضے میں لے کر تحقیقات کا آغاز کر دیا ہے۔ اقصیٰ کی والدہ کی مدعیت میں داماد افتخار سمیت تین افراد کے خلاف قتل کا مقدمہ درج کیا گیا ہے۔ ایف آئی آر کے مطابق افتخار نے اپنی بیوی کا قتل اس کے بھائی عمران کی طرف سے اپنی بھانجی کو طلاق دینے کے تنازع پر کیا۔
ڈی پی او اوکاڑہ محمد راشد ہدایت نے واقعے کا فوری نوٹس لیتے ہوئے ملزمان کی گرفتاری کے لیے پولیس ٹیم تشکیل دے دی ہے، جبکہ خاتون کی لاش پوسٹ مارٹم کے لیے ڈی ایچ کیو ہسپتال منتقل کر دی گئی ہے۔
پولیس کا کہنا ہے کہ اصل حقائق پوسٹ مارٹم رپورٹ کے بعد سامنے آئیں گے، جس سے یہ معلوم ہو سکے گا کہ خاتون کا قتل ہوا یا اس نے خودکشی کی۔
