Author: ڈاکٹرغلام مصطفی بڈانی

کوئٹہ،باغی ٹی وی (نامہ نگار زبیرخان ) جعلی مشروبات بنانے والی فیکٹری اور گرانفروشوں کیخلاف کارروائیاں، 13افراد گرفتار
ڈپٹی کمشنر کوئٹہ شہک بلوچ کی خصوصی ہدایات کی روشنی میں سب ڈویژن سریاب انتظامیہ کی جعلی مشروبات بنانے فیکٹری اور گرانفروشوں کیخلاف کارروائیاں، 13افراد گرفتار

اطلاع ملی تھی کہ مشرقی بائی پاس کےعلاقے میں فیکٹری میں معرو ف برانڈز کے جعلی مشروبات بنانے کاعمل جاری ہے جس پر کارروائی کرتے ہوئے فیکٹری سے سیکڑوں کی تعداد میں معروف برانڈز کی تیار شدہ بوتلیں برآمد کرکے فیکٹری کو سیل کردیاگیا،

کارروائیاں اسپیشل مجسٹریٹ مسعود بگٹی کی زیر نگرانی ٹیم نے کی اس دوران 13 افراد کو گرفتار کرلیاگیا،کسی کو انسانی جانوں سے کھیلنے کی اجازت نہیں دی جائےگی فیکٹری مالک کیخلاف قانون کے مطابق کارروائی عمل میں لائی جائے گی، گرانفروش کسی رعایت کے مستحق نہیں عوام ایسے دکانداروں کا بائیکاٹ کریں اور نشاندہی کریں انتظامیہ روزانہ کی بنیاد پر کارروائیاں جاری رکھے ہوئے ہے،

کوئٹہ،باغی ٹی وی (نامہ نگار زبیرخان)ضلعی انتظامیہ کی تجاوزات اور گرانفروشوں کیخلاف کارروائیاں۔17دکانداروں کو گرفتار کر کے جیل بھجوا دیا گیا
تفصیل کے مطابق ڈپٹی کمشنر کوئٹہ میر شہک بلوچ کی ہدایت پر اسسٹنٹ کمشنر سٹی عطا المنعم نے دیگر عملے کے ہمراہ لیاقت بازار مسجد روڈ فاطمہ جناح روڈ اور ملحقہ علاقوں میں تجاوزات اور گرانفروشوں کیخلاف کارروائیاں کرتے ہوئے 17دکانداروں کو گرفتار کر کے جیل بھجوا دیا

ان کا کہنا تھا کہ تجاوزات سے نہ صرف ٹریفک روانی متاثر ہوتی ہے بلکہ شہر کا حسن بھی خراب ہو رہا ہے بارہا دکانداروں کو متنبہ بھی کیا گیا لیکن وہ اپنے روش ترک نہیں کر رہے جس کے باعث ہمیں سختی کرنا پڑتی ہے انہوں نے کہا کہ مستقبل میں بھی تجاوزات اور گرانفروشوں کیخلاف کارروائیوں کا سلسلہ جاری رہے گا۔

کوٹ ہیبت باغی ٹی وی (نامہ نگارشاہد خان)ٹیچنگ ہسپتال گائنی وارڈ،جرائم پیشہ سیکیورٹی گارڈ کے ہاتھوں خواتین کی تذلیل معمول بن گئی
تفصیل کے مطابق ڈیرہ غازی خان ہسپتال کے گائنی وارڈ میں خواتین کے ساتھ جانوروں جیسا سلوک کیا جا رہا ہے ڈیوٹی کیلئے رکھے گئے جرائم پیشہ سیکیورٹی گارڈز کا خواتین اور بزرگ عورتوں اوران کے ساتھ آنے والے مردوں سے بدتمیزی کے ساتھ پیش آنا ،انہیں دھکے دینا اوران کی تذلیل کرنا معمول بن گیا ہے،

ڈیوٹی پر مامور اہلکار گائنی وارڈ کے گیٹ پر لوگوں کو بلاوجہ روکے رکھتے ہیں اگر کوئی خاتون یا مرد ان سے اندر جانے کے لیے ریکویسٹ کرتا ہے تو اہلکار ان کے ساتھ بہت بدتمیزی کے ساتھ پیش آتے ہیں ذرائع نے یہ بھی بتایا ہے کہ اپنی جان پہچان والے مرد اور عورت کو تو اندر جانے کی اجازت دیتے ہیں

مگر جو بیچارے کوئی سفارش نہیں رکھتے وہ گیٹ پر ذلیل ہوتے رہتے ہیں اور یہ اہلکار بزرگ خواتین کا بھی لحاظ نہیں کرتے بلا وجہ لوگوں کو پریشان کرنے کے لیے کہتے ہیں کہ میڈیکل آفیسر وزٹ کر رہا ہے حالانکہ اس وقت وارڈ کے اندر کوئی وزٹ نہیں ہو رہا ہوتا ذرائع کے مطابق ہسپتال میں میڈیکل انچارج کے وزٹ کا بھی ٹائم ٹیبل ہے لیکن سیکیورٹی اہلکار کا ہر وقت لوگوں کو وزٹ کے نام پر تنگ کرنا باعث تشویش ہے-

شہریوں نے ضلعی انتظامیہ سے اپیل کے ہیں کہ ایسے سکیورٹی اہلکار جو خواتین خاص کر بزرگ خواتین کا بھی لحاظ نہیں رکھتے ان کے خلاف ایکشن لیں تاکہ دور دراز علاقوں سےآنے والی ہماری مائیں ،بہنیں جوکہ پہلے ہی تکلیف اور بیماری میں مبتلا ہوتی ہیں وہ یہاں آکر ان اہلکار کے ہاتھوں مزید ذلت اٹھانے سے بچ سکیں-

ننکانہ صاحب باغی ٹی وی(نامہ نگار احسان اللہ ایاز)سویڈن حکومت کی سرپرستی میں "قرآن مقدس” کی توہین کے خلاف اقوامِ متحدہ اور او آئی سی اسلامی شعائر کے توہین کے مرتکب ممالک ، تنظیموں اور افراد کیخلاف فوری تادیبی کارروائی کرے ،علامہ اسد مدنی
تفصیلات کےمطابق قائد اہلسنت خطیب اہلسنت فخر ننکانہ صاحب مذہبی سکالر علامہ مفتی محمد اسد مدنی امیر جماعت اہل سنت ضلع ننکانہ، ضلعی کوارڈینیٹر تنظیم المدارس اہل سنت پاکستان، مہتمم جامعہ محمدیہ غوثیہ رضویہ ننکانہ صاحب،انچارچ شعبہ اخلاقیات پاک گریژن سکول و کالج نے خصوصی گفتگو کرتے ہوۓ کہا کہ گزشتہ دنوں سویڈن حکومت کی سرپرستی میں اسکے ایک دہشت گرد ملعون شہری نے اللہ کی مقدس کتاب قرآن مجید” کی توہین کی اور یہ کسی بھی صورت معافی کے قابل عمل نہیں ہے ,سویڈن حکومت اور اسکے قابلِ نفرت دہشت گرد شہری کیخلاف عالمی سطح پر کاروائی ہونی چاہیے,

دنیا میں چند ممالک نام نہاد آزادئ اظہارِ رائے کے نام پر اسلام اور اسلامی شعائر کیخلاف مسلسل حملے کررہے ہیں جس سے دنیا میں موجود ڈیڑھ ارب سے ذائد مسلمانوں کے جذبات و احساسات مجروح ہو رہے ہیں۔ مسلمان نبی اکرم صلی اللہ علیہ وآلہ وسلم کی شانِ اقدس اور قرآن مقدس کی توہین کو کسی صورت ایک لمحے کیلئے برداشت نہیں کریں گے۔ علامہ اسد مدنی نے مزید کہا کہ سویڈن حکومت کی سرپرستی میں ایک فسادی شخص نے دنیا کے امن کو تباہی کی طرف دھکیلنے کی کوشش کی ہے جس پر اقوامِ متحدہ ،او آئی سی ، دنیا بھر کے امن اور انصاف پسند ممالک کو سامنے آکر سویڈن سمیت دیگر دہشت پسندانہ سوچ کے حامل ممالک ، تنظیموں اور افراد کو اسلام مخالف کارروائیوں سے روکنے کے اقدامات کرنے ہوں گے,

انہوں نے سویڈن حکومت اور اسکی ناکام انتظامیہ اور فسادی شخص کی شدید الفاظ میں مزمت کی جنہوں نے ایک منظم منصوبے کے تحت قرآنِ مقدس کی توہین کی ,اسلامی ممالک کے متفقہ فورم او آئی سی سے مطالبہ کیا کہ وہ صرف اور صرف قراردادوں  کو پاس کرنے تک محدود نہ رہیں بلکہ سویڈن کیخلاف تمام معاشی ، سیاسی اور دیگر تعلقات کو فوری طور منقطع کیا جاۓ

مظفرگڑھ( باغی ٹی وی) تھرمل کالونی میں تین بہنوں کے قتل کیس کی تفتیش میں نیا موڑ آ گیا۔ قاتل کون ہے پولیس بہت نزدیک پہنچ چکی ہے۔ اس بارے میں جلد بہت ہی تہلکہ خیز انکشافات سامنے آنے کی توقع کی جا رہی ہے۔

گزشتہ روز تین سگی بہنیں جن کی عمریں 6 ، 11 اور 13 سال بتائی جا رہی ہیں لاپتہ ہو گئی تھیں۔ شام کو حسب سابق میدان میں کھیلنے گئیں اور پھر لوٹ کے گھر نہ آئیں۔ آج دوران تلاش تینوں سگی بہنوں کی نعشیں ایک غیر آباد کوارٹر میں پائی گئیں۔ جنہیں گلے کاٹ کر قتل کر دیا گیا تھا

تھرمل کالونی جو کہ مظفرگڑھ تھرمل پاور اسٹیشن کی ملکیت ایک سرکاری رہائشی کالونی ہے جہاں تھرمل اسٹیشن کے ملازمین رہائش پزیر ہیں۔ اس کالونی کی اپنی سیکورٹی ہے جو بغیر شناخت کسی کو آنے اور جانے کی اجازت نہیں دیتی۔ یہاں پر تلہ گنگ کے نواحی قصبے ملتان خورد سے تعلق رکھنے والے سیکورٹی سارجنٹ اعجاز کی تین بچیاں گزشتہ روز لاپتہ ہوئیں اور پھر آج ان کی گلے کٹی نعشیں ایک خالی کوارٹر سے برآمد ہوئیں
یہ بھی پڑھیں
ڈی جی خان :مظفرگڑھ میں تھرمل کالونی میں 3 بہنیں قتل،آرپی او کانوٹس
3 معصوم بچیوں کی لاشیں خالی پلاٹ سے برآمد
ذرائع سے معلوم ہوا ہے کہ اج مظفرگڑھ میں میں بے دردی سے قتل کی جانے والی معصوم تین بہنوں کا قاتل بھائی نکلا ۔ذرائع نے یہ بھی بتایا ہے کہ بھائی شاہزیب آئس کا نشہ کرتا تھا، نشے کی رقم نہ ملنے پر ظالم نے اپنی بہنوں کو چھری سے زبح کر دیا ،تاہم پولیس کی طرف سے ابھی کوئی تصدیق یا تردید نہیں کی گئی –

سیالکوٹ،باغی ٹی وی( شاہد ریاض سٹی رپورٹر) ریٹ لسٹ نہ لگانے، ناپ تول میں کمی و اوور چارجنگ پر جرمانے عائد
تفصیل کے مطابق سیالکوٹ کے مختلف ایریاز میں پرائس چیکنگ کی گئی اسسٹنٹ کمشنرنے ریٹ لسٹ نہ لگانے/ناپ تول میں کمی و اوور چارجنگ پر مندر جہ ذیل جرمانے کیے ۔

1۔ چیز پلس کینٹ پر 1 لا کھ روپے،2۔ آمنہ مارٹ پسرور روڈ پر 50 ہزار روپے،3۔ البقا سٹور پسرور روڈ پر 25000 روپے،4۔ ثقلین فلنگ اسٹیشن پر 50 ہزار روپے،5۔ ولی خاں ڈیفیس روڈ پر 40 ہزار روپے،6۔ حسنات پٹرولیم ڈیفیس روڈ پر 30 ہزار روپے،7۔ پروانہ فلنگ اسٹیشن پر 40 ہزار روپے ،8۔ سیٹھ فلنگ اسٹیشن ایمن آباد روڈ پر 50 ہزار روپے،9۔ نسیم پٹرولیم ایمن آباد روڈ پر 20 ہزار روپے،کل 4 لاکھ 5ہزار روپے جر ما نہ عائد کیا گیا۔

کندھ کوٹ،باغی ٹی وی (نامہ نگار مختیاراعوان ) ضلع بھر سے اغوا ہونے والے 7 بچوں سمیت 30 سے زائد مغویوں کو پولیس بازیاب کرانے میں ناکام مغوی ایف سی اہلکار کی بازیابی کیلئے ورثاء کا انڈس ہائی وے پر دھرنا ٹریفک معطل مغوی کی بازیابی کا مطالبہ
تفصیل کے مطابق کندھ کوٹ سے اغوا ہونے والے ایف سی اہلکار احمد خان پٹھان کو پولیس بازیاب نہیں کروا سکی، مغوی کی بازیابی کیلئے ورثاء نے انڈس ہائی وے رانو اسٹاپ کے مقام پر احتجاجی مظاہرہ کر کے دھرنا دیا ،

مظاہرین نے انڈس ہائی وے پر رکاوٹیں کھڑی کر کے روڈ بلاک کر دیا ہے اور سخت نعرے بازی کی،دھرنے کے باعث سندھ بلوچستان اور پنجاب آنے جانے والی ٹریفک معطل ہو گئی، مظاہرین کا کہنا ہے 24 روز قبل پاکستان پیٹرولیم گیس فیلڈ کندھ کوٹ کے تیل کے کنوئیں پر سیکیورٹی پر مامور ایف سی اہلکار احمد خان پٹھان کو ڈاکوؤں نے اغوا کر لیا تھا اور ڈاکوؤں نے دو مرتبہ تشدد زدہ وڈیو وائرل کر کے تاوان طلب کیا ہے ، ہم تاوان کہاں سے لائیں پولیس اور پی پی ایل انتظامیہ ہماری کوئی مدد نہیں کر رہی ہے ، ہم مجبور ہو کر احتجاج کر رہے ہیں

ضلع بھر میں ڈاکو راج قائم ہونے سے شہری اور عوام کے محافظ بھی غیر محفوظ بن گئے ہیں مظاہرین نے سندھ حکومت اور پولیس حکام سے مطالبہ کیا کہ مغوی ایف سی اہلکار کو فوری طور پر بازیاب کروایا جائے بصورت دیگر دھرنا جاری رکھا جائے گا، واضح رہے کہ ضلع بھر میں ڈاکو راج قائم ہونے سے 7 بچوں سمیت 30 سے زائد مغوی ڈاکوؤں کے قید میں ہیں ،اغواء کر وارداتیں اور بڑھتی ہوئی بدامنی کے باعث شہریوں میں تشویش کی لہر پائی جاتی ہے ،پولیس ڈاکوؤں کے آگے بے بس دکھائی دے رہی ہے ۔