گوجرانوالہ باغی ٹی وی (نامہ نگار محمد رمضان نوشاہی)گوجرانوالہ میں انٹرنیشنل جٹ کونسل کی ٹیم کی چوہدری حافظ رضا مصطفیٰ چیمہ اور چوہدری نبی احمد چیمہ کی دعوت پر الحسین میرج ہال میں آمد ہوئی جہاں ان کے اعزاز میں عشائیہ دیا گیا۔ اس موقع پر ٹیم میں صدر پنجاب انٹرنیشنل جٹ کونسل چوہدری محمد صدیق جٹ، چیئرمین چوہدری محمد اظہر چیمہ، چوہدری محمد اصغر ساہی، چوہدری شفقت سمرا اور رضوان احمد سندھو شامل تھے۔
استقبال کرنے والوں میں چوہدری شوکت علی وڑائچ اور چوہدری وقاص پرویز چیمہ شامل تھے۔ اس موقع پر انٹرنیشنل جٹ کونسل کے بنیادی اصول، مقاصد اور تنظیمی ڈھانچے پر بھی روشنی ڈالی گئی۔
کونسل کے بنیادی مقاصد میں جٹ برادری کے اتحاد، ترقی اور فلاح کے لیے پالیسی سازی اور عملدرآمد، تعلیمی، معاشی اور سیاسی شعور پیدا کرنا، نوجوانوں کو ہنر، تعلیم اور کاروباری مواقع فراہم کرنا، جٹ برادری کی تاریخ، ثقافت اور ورثے کو محفوظ رکھنا، مستحق خاندانوں کی مدد کرنا اور قومی و بین الاقوامی سطح پر کمیونٹی کی نمائندگی کرنا شامل ہیں۔
قوانین و ضوابط کے مطابق رکنیت صرف جٹ برادری کے افراد کو دی جا سکتی ہے۔ رکنیت کی دو اقسام ہیں: جنرل ممبر اور ایگزیکٹو ممبر، جس کے لیے فارم، شناختی کارڈ اور حلف نامہ لازمی ہوگا۔ کونسل کے اجلاس سال میں کم از کم دو بار ہوں گے جبکہ بڑے فیصلے دو تہائی اکثریت سے کیے جائیں گے۔ مالی شفافیت کے لیے کونسل کا اپنا بینک اکاؤنٹ قائم کیا جائے گا اور سالانہ آڈٹ لازمی ہوگا۔
انتظامی ڈھانچے میں صدر، سینئر نائب صدر، جنرل سیکرٹری، فنانس سیکرٹری، پبلک ریلیشنز آفیسر، انفارمیشن سیکرٹری اور ضلعی و تحصیل سطح کے کوآرڈینیٹرز شامل ہوں گے۔ اس کے علاوہ پنجاب کے مختلف ڈویژنل چیپٹرز، یوتھ ونگ اور ویمن ونگ بھی فعال کردار ادا کریں گے۔
عملی تجاویز میں لاہور میں مرکزی دفتر کا قیام، سالانہ جٹ کنونشن کا انعقاد، اسکالرشپ فنڈ کی فراہمی، بزنس نیٹ ورکنگ پلیٹ فارم کی تیاری اور برادری کے فعال افراد کا ڈیجیٹل ڈیٹا بیس بنانا شامل ہیں۔
