ترکی کے شہرہ آفاق ڈرامے ‘ارطغرل غازی’ کے پروڈیوسر کمال تکیدین اور اداکار جلال آل کی جانب سے 5 روزہ دورہ پاکستان مکمل کرکے وطن واپس چلے جانے کے بعد ہمایوں سعید نے دعویٰ کیا ہے کہ وہ اور دیگر ارکان ترک ٹیم کے ہمراہ ٹی وی کا اب تک کا سب سے بڑا منصوبہ بنائیں گے۔
باغی ٹی وی :ہمایوں سعید نے گزشتہ روز13 جنوری کو اپنی ٹوئٹ میں ترک ٹیم کے ہمراہ کھچوائی گئی تصاویر کو شیئر کرتے ہوئے بتایا کہ وہ اور عدنان صدیقی پروڈیوسر کاشف انصاری کے ساتھ مل کر ٹی وی کا اب تک کا سب سے بڑا منصوبہ بنائیں گے۔
انہوں نے اپنی ٹوئٹ میں ترک ٹیم کی وزیر اعظم عمران خان کے ساتھ ہونے والی ملاقات کی تصویر بھی شیئر کی، ساتھ ہی انہوں نے ترک ٹیم کی گورنر سندھ عمران اسمٰعیل اور دیگر سرمایہ کاروں کے ساتھ ملاقات کی تصویر بھی شیئر کی۔
انہوں نے اپنی ٹوئٹ میں دعویٰ کیا کہ وہ اور ان کے دوست اداکار عدنان صدیقی پروڈیوسر کاشف انصاری کے ساتھ مل کر ترک ٹیم کے ساتھ ٹی وی سب سے کا بڑا منصوبہ پیش کریں گے۔
انہوں نے دونوں ممالک کے مشترکہ منصوبے پر تعاون کی یقین دہانی کرانے پر وزیر اعظم عمران خان، وفاقی وزیر شبلی فراز اور شہریار آفریدی کا بھی شکریہ ادا کیا۔
انہوں نے لکھا کہ مذکورہ مشترکہ منصوبہ پاکستان اور ترکی کی دوستی کا نیا آغاز ہوگا اور یہ اب تک کا سب سے بڑا منصوبہ ہوگا۔
ہمایوں سعید نے ترک پروڈیوسر کمال تکیدین کی ویڈیو بھی ٹوئٹ کی، جس میں وہ دونوں ممالک کے مشترکہ منصوبے ‘ترک لالا’ پر بات کرتے دکھائی دیئے۔
ترک پروڈیوسر نے بتایا کہ ‘ترک لالا’ ایک تاریخی کردار ہے، جس پر دونوں ممالک مشترکہ طور پر کام کریں گے۔
کمال تکیدین نے اپنی ویڈیو میں پاکستانی اداکاروں اور عوام کا شکریہ بھی ادا کیا۔
انہوں نے ویڈیو میں تعاون کی یقین دہانی کرانے پر صدر مملکت، وزیر اعظم، سی پیک کے چیئرمین، گورنر سندھ اور عدنان صدیقی سمیت ہمایوں سعید کا بھی شکریہ ادا کیا۔
ہمایوں سعید نے مذکورہ ٹوئٹ میں اس بات پر اطمینان کا اظہار کیا کہ انہوں نے ‘ارطغرل غازی’ کے پروڈیوسر کمال تکیدین اور اداکار جلال آل کی میزبانی کی اور ان کا شکریہ اداکیا ساتھ ہی ہمایوں سعید نے لکھا کہ وہ انشاءاللہ انہیں دوبارہ جلد ہی پاکستان میں دوبارہ ملیں گے-
دوسری جانب عدنان صدیقی نے بھی مذکوریہ ویڈیو انسٹاگرام پر پوسٹ کی -اور کمال تکیدین اور ان کی ٹیم کے ساتھ کام کرنے کو خوش آئند قرار دیا-
ہمایوں سعید کی پوسٹ اور کمال تکیدین کی ویڈیو سے واضح ہوتا ہے کہ دونوں ممالک ‘ترک لالا’ پر بنائے جانے والے ڈرامے کو نجی سطح پر بنائیں گے تاہم انہیں حکومتی تعاون حاصل رہے گا۔
تکیدین فلمز پروڈکشن اور کاشف انصاری فلمز پروڈکشن کمپنیوں نے گزشتہ برس کے اختتام پر مشترکہ پروڈکشن کے تحت منصوبے بنانے کا معاہدہ بھی ہوا تھا، تاہم اس وقت واضح نہیں کیا گیا تھا کہ دونوں کس معاہدے پر مل کر کام کریں گے اور ممکنہ طور پر پاکستانی پروڈکشن ادارے کو ہمایوں سعید اور عدنان صدیقی کی مالی معاونت حاصل ہوگی۔
اور تاحال دونوں اداروں نے واضح نہیں کیا کہ وہ ترک لالا کو مشترکہ طور پر بنائیں گے یا نہیں اور یہ بھی واضح نہیں ہے کہ مذکورہ ڈرامے کی شوٹنگ کب تک ہوگی اور اس کی کہانی کون لکھے گا اور اس کی کاسٹ میں کون شامل ہوں گےاور ترک لالا کی شوٹنگ کہاں ہوگی تاہم خیال کیا جا رہا ہے کہ اس منصوبے کے آغاز میں مزید ایک سال سے زائد کا وقت لگے گا۔
