Baaghi TV

Author: عائشہ ذوالفقار

  • چکن تکہ بنانے کی ترکیب

    چکن تکہ بنانے کی ترکیب

    چکن تکہ

    وقت : 35سے 40 منٹ

    4افراد کے لئے

    اجزائے ترکیبی مقدار
    پورا چکن 1کلو
    دہی 3کھانے کا چمچ
    لہسن ادرک کا پیسٹ 2کھانے کا چمچ
    نمک حسب ذائقہ
    سرخ مرچ پاؤڈر 1چائے کا چمچ
    خشک سرخ مرچ (موٹی کٹی ہوئی) 1چائے کا چمچ
    ہلدی پاؤڈر 1چائے کا چمچ
    سفید زیر ہ (بھنا اور کٹا ہوا) 1چائے کا چمچ
    سفید سرکہ 2کھانے کے چمچ
    گھی 2کھانے کے چمچ

    چھڑکنے کے لئے :
    لیموں کا رس 2کھانے کے چمچ
    چاٹ مصالحہ 2چائے کے چمچ

    طریقہ کار :
    چکن کو چار بڑے ٹکڑوں میں کاٹ لیں اور اس پر کٹ لگالیں۔ ایک باؤل میں دہی ڈالیں اور گھی کے علاوہ تمام مصالحے میں بھی شامل کردیں۔ اب چکن شامل کرکے اچھی طرح مکس کریں اور2گھنٹے کے لئے فریج میں رکھ دیں۔ کوئلوں کی انگیٹھی پر اسے پکائیں پکی ہوئی سائیڈ پر گھی لگاتے جائیں۔ اس وقت تک انگیٹھی پر پکائیں جب تک چکن اچھی طرح پک نہ جائے۔ اب اس پر لیمو ں کا رس اور چاٹ مصالحہ چھڑک کر پودینے کے رائتے کے ساتھ پیش کریں۔ زیاد ہ اچھا ذائقہ حاصل کرنے کے لئے چکن کو مصالحہ لگا کر ساری رات فریج میں رکھیں۔

  • پہلی ملاقات کے بعد کاجول سے دوبارہ کبھی نہیں ملنا چاہتا تھا اجے دیوگن

    پہلی ملاقات کے بعد کاجول سے دوبارہ کبھی نہیں ملنا چاہتا تھا اجے دیوگن

    ممبئی : با لی وڈ اداکار اجے دیوگن کا کہنا ہے کہ کاجول کو پہلی ملاقات میں مغرور پایا جس کے بعد اداکارہ سے کبھی نہ ملنے کا فیصلہ کیا تھا-

    باغی ٹی وی: اداکار اجے دیوگن نے 90 کی دہائی کی کامیاب اداکارہ کاجول سے 1999 میں شادی کرلی تھی جس سے ان کے دو بچے نیسا اور یوگ دیوگن ہیں۔

    ایک انٹرویو میں کم گو اور سنجیدہ شخصیت کے مالک اجے دیوگن نے پہلی بار یہ انکشاف کیا ہے کہ وہ کاجول سے پہلی ملاقات کے بعد کبھی نہیں ملنا چاہتے تھے-

    انہوں نے بتایا کہ ہماری پہلی ملاقات فلم ’ہلچل‘ کی شوٹنگ شروع ہونے سے پہلے ہوئی جس کے بعد ادکارہ سے ملنے کا شوق کبھی نہیں ہوا، آپ جب پہلی بار کاجول سے ملیں تو وہ آپ کو بہت باتونی، مغرور لگیں گی اور یہی مجھے پہلی ملاقات میں محسوس ہوا تھا جب کہ ہم دونوں کی شخصیت بھی بہت الگ تھی لیکن میرے خیال سے جو ہونا ہوتا ہے وہ ہوکر ہی رہتا ہے۔

    اداکار نے مزید کہا کہ ہمیں پیار ہوا جس کے بعد ہم نے ایک دوسرے کو وقت دیا، یہاں تک کہ ہمیں محسوس ہوا اب ہم باقی کی زندگی ایک ساتھ گزار سکتے ہیں لیکن اس دوران ہم نے کبھی ایک دوسرے سے پیار کا اظہار نہیں کیا اور نہ ہی کبھی شادی سے متعلق گفتگو کی تاہم ہمارا ارادہ شروع سے ہی شادی کا تھا بس ہم ایک دوسرے کو سمجھنے کے لیے وقت دینا چاہتے تھے۔

  • فیس بک کے بانی سمیت 50 کروڑ صارفین کی تفصیلات آن لائن لیک

    فیس بک کے بانی سمیت 50 کروڑ صارفین کی تفصیلات آن لائن لیک

    فیس بک کے بانی کے فون نمبر سمیت 50 کروڑ سے زیادہ صارفین کی ذاتی تفصیلات ہیکرز کے ہاتھ لگنے کے بعد اب آن لائن جاری کردی گئی ہیں-

    باغی ٹی وی : آن لائن مفت دستیاب اس ڈیٹا سے ایک بار پھر اندازہ ہوتا ہے کہ فیس بک صارفین کے بارے میں کتنی زیادہ تفصیلات اکٹھی کرتی ہے اور فیس بک کی اکٹھی کی گئی تفصیلات کچھ زیادہ محفوظ نہیں۔

    رپورٹ کے مطابق 53 کروڑ 30 لاکھ فیس بک صارفین کی مختلف تفصیلات جیسے فون نمبر، فیس بک آئی ڈیز، مکمل نام، لوکیشنز، تاریخ پیدائش، بائیو اور کچھ کے ای میل ایڈریسز ایک ویب سائٹ پر موجود ہیں۔

    صارفین کے ڈیٹا کے لیک ہونے کی تصدیق فیس بک کے ایک ترجمان نے کرتے ہوئے بتایا کہ یہ پرانا ڈیٹا ہے جس کے بارے میں 2019 میں رپورٹ سامنے آئی تھی، جس کو دریافت کرکے اگست 2019 میں مسئلے کو حل کردیا گیا تھا۔

    اگست 2019 میں کمپنی نے اپنے سرور میں موجود اس خامی کو دور کردیا تھا جس کے باعث یہ تفصیلات ہیکرز کو لیک کرنے کا موقع ملا، تاہم ایک بار سرور سے ڈیٹا نکلنے کے بعد کمپنی کے پاس اسے پھیلنے سے روکنا آسان نہیں ہوتا۔

    سائبر کرائم انٹیلی جنس کمپنی ہڈسن روک کے چیف ٹیکنالوجی آفیسر الون گال نے اس ڈیٹا کو 3 اپریل 2021 کو دریافت کیا۔

    انہوں نے ایک ٹوئٹ میں بتایا کہ اتنے بڑے ڈیٹابیس کو اکثر فوری طور پر بڑے پیمانے پر شیئر نہیں کیا جاتا کیونکہ ہیکرز اس سے طویل المعیاد بنیادوں پر کمانے کے خواہشمند ہوتے ہیں۔

    انہوں نے کہا کہ اس میں کئی ہفتے یا برس لگ سکتے ہیں مگر بتدریج یہ تمام ڈیٹابیس لیک ہوجاتا ہے۔

    53 کروڑ صارفین کا ڈیٹا اس وقت ایک ہیکنگ فورم میں مفت دستیاب ہے۔

    رپورٹ میں بتایا گیا کہ فیس بک کے بانی مارک زکربرگ کا فون نمبر بھی اس تفصیلات کا حصہ ہے بلکہ دعویٰ کیا جارہا ہے کہ مارک زکرگ کی ذاتی تفصیلات بشمول نام، لوکیشن، شادی کی تفصیلات، تاریخ پیدائش اور فیس بک یوزر آئی ڈی سب لیک ہوئی ہیں۔

  • صبا قمر نےاپنی نئی میوزک ویڈیو چنگاریاں کی ریلیز کی تاریخ کا اعلان کردیا

    صبا قمر نےاپنی نئی میوزک ویڈیو چنگاریاں کی ریلیز کی تاریخ کا اعلان کردیا

    پاکستانی ادکارہ و ماڈل صبا قمر نے اپنی آنے والی میوزک ویڈیو کی ریلیز کی تاریخ کا اعلان کردیا ہے۔

    باغی ٹی وی :صبا قمر نے فوٹو اینڈ ویڈیو شیئرنگ ایپ انسٹاگرام پر اپنی نئی میوزک ویڈیو ‘چنگاریاں’ کا ویڈیو کلپ شیئر کرتے ہوئے مداحوں کو ریلیز سے متعلق بتایا۔

    انہوں نے اپنی پوسٹ کے کیپشن میں لکھا کہ محبت ایک خاص قسم کی ہمت کا مطالبہ کرتی ہے، بار بار چوٹ سہنے کی ہمت کا-

    صبا قمر نے مزید لکھا کہ ‘چنگاریاں’ جو میرے دل سے بہت قریب ہے اور ایک ایسی کہانی جو آپ سب سے متعلق ہے۔

    انہوں نے اس گانے سے متعلق گلوکار مصطفیٰ زاہد کا بھی شکریہ ادا کیا اور ساتھ ہی لکھا کہ میرے آن اسکرین پسندیدہ ہیرو عماد عرفانی کا شکریہ کہ وہ اس کا حصہ بنے۔

    اداکارہ صبا قمر نے بتایا کہ ‘چنگاریاں’ گانا آنے والے کل یعنی 5 اپریل کو ان کی سالگرہ کے موقع پر ریلیز ہوگا۔

    واضح رہے کہ گزشتہ برس گلوکار بلال سعید اور اداکارہ صبا قمر کا ایک ساتھ پہلا ویڈیو گانا ‘قبول ہے’ بھی ریلیز ہوا تھا جسے چند ہی گھنٹوں میں 2 لاکھ کے قریب بار دیکھا گیا جبکہ یہ گانا کافی متنازع کا شکار بھی رہا جبکہ بلال سعید اور صبا قمر کو متعدد مقدمات کا بھی سامنا کرنا پڑا-

    ‘قبول’ کے ذریعے صبا قمر نے میوزک گانوں کی ہدایت کاری میں بھی قدم رکھا تھا اس سے قبل وہ اپنے یوٹیوب چینلز پر مختصر ڈراموں کی ہدایات بھی دیتی رہی ہیں۔

  • شرمیلا فاروقی کا ریکھا کی تصویر پر دلچسپ تبصرہ

    شرمیلا فاروقی کا ریکھا کی تصویر پر دلچسپ تبصرہ

    پاکستان پیپلز پارٹی (پی پی پی ) کی رہنما اور رکن سندھ اسمبلی شرمیلا فاروقی بالی وڈ کی سینئر اداکارہ ریکھا کی خوبصورتی کی دیوانی ہوگئیں۔

    باغی ٹی وی : شرمیلا فاروقی نے اپنے تصدیق شدہ ٹوئٹر اکاؤنٹ پر بالی وڈ کی لیجنڈری اور ورسٹائل اداکارہ ریکھا کی دلکش تصویر شیئر کی ٹوئٹر پر شیئر کی گئی تصویر میں ریکھا خوبصورت بنارسی ساڑھی میں ملبوس ہیں۔


    تصویر میں دیکھا جاسکتا ہے کہ ریکھا نے بھاری زیوارت میک اپ کے ساتھ گجرا بھی لگایا ہوا ہے اور وہ کسی بات پر حیرانگی کا اظہار کررہی ہیں اور ہمیشہ کی طرح اس تصویر میں بھی بےحد حسین لگ رہی ہیں۔

    شرمیلا فاروقی نے ریکھا کی خوبصورتی کی تعریف کرتے ہوئے لکھا کہ اس خاتون کی عُمر کیوں نہیں جھلکتی؟ یہ اس عُمر میں بھی کس قدر حسین ہیں۔


    پی پی رہنما کے ٹوئٹ پر ایک صارف نے لکھا کہ میں اس خاتون کو نہیں جانتا ہوں لیکن میرے اندازے سے ان کی عُمر 40 یا 45 سال ہے۔


    جبکہ کچھ پاکستانی صارفین نے حدیقہ کیانی ،ماہ نور بلوچ اور مسلم لیگ ن کی نائب صدر مریم نواز کی تصاویر شئیر کرتے ہوئے کہا ان کے بارے میں کیا خیال ہے صارفین نے لکھا کہ یہ بالی ووڈ‌ایکٹریس سے زیادہ ینگ دکھائی دیتی ہیں-
    https://twitter.com/Khalid_butt_/status/1378381745540587520?s=20


    واضح رہے کہ بالی ووڈ میں اپنی اداکارانہ صلاحیتوں کے جوہر دکھانے والی ریکھا اب تک 180سے زائد فلموں میں کئی لازوال کردار نبھا چکی ہیں۔

    اداکارہ نے امراؤ جان،خون بھری مانگ، کھلاڑیوں کا کھلاڑی، گھر، مقدر کا سکندر، جدائی، جیون دھارا، سلسلہ، مجھے انصاف چاہیے، پھول بنے انگارے اور لجا میں بہترین کارکردگی کا مظاہرہ کرکے لائف ٹائم اچیومنٹ ایوارڈ سمیت لاتعداد ایوارڈز اپنے نام کیے ہیں۔

    اداکار امیتابھ بچن کے ساتھ ان کی جوڑی بے حد پسند کی گئی اور دونوں نے کئی فلموں میں ایک ساتھ کام کیا-

    شادی شدہ مرد سے محبت کرنے کے سوال پر ریکھا نے میزبان کو لاجواب کر دیا

  • با لی وڈ میں کام کرنے کا تجربہ اچھا نہیں تھا متعدد فلمسازوں نے جنسی طور پر ہراساں کیا سومی علی

    با لی وڈ میں کام کرنے کا تجربہ اچھا نہیں تھا متعدد فلمسازوں نے جنسی طور پر ہراساں کیا سومی علی

    ماضی کی مقبول پاکستانی نژاد بالی ووڈ اداکارہ، مصنفہ اور پروڈیوسر سومی علی نے کہا کہ جب وہ با لی وڈ میں کام کرتی تھیں، تب متعدد فلم سازوں نے ان کے ساتھ جنسی تعلقات استوار کرنے کی کوشش کی۔

    باغی ٹی وی : گزشتہ ماہ سومی علی نے ایک انٹرویو میں انکشاف کیا تھا کہ ان کا بچپن میں یعنی 5 سال کی عمر میں کراچی میں استحصال ہوا جب کہ 14 برس کی عمر میں امریکا میں ان کا ’ریپ‘ کیا گیا تھا۔

    انہوں نے بتایا تھا کہ وہ بالی وڈ میں بس تحفظ کے لئے سلمان خان کے ساتھ شادی کرنے گئیں تھیں-

    اور اب انہوں نے تازہ انٹرویو میں انکشاف کیا ہے کہ با لی وڈ میں کام کرنے کے دوران متعدد بھارتی فلم سازوں نے ان کے ساتھ جنسی روابط استوار کرنے کی کوشش کی۔

    بھارتی شوبز ویب سائٹ ’زوم ٹی وی‘ کو دیے گئے انٹرویو میں سومی علی نے بتایا کہ با لی وڈ میں کام کرنے کا ان کا تجربہ اچھا نہیں تھا اور اب وہ کسی بھی حال میں با لی وڈ میں دوبارہ کام نہیں کریں گی۔

    سومی علی نے بتایا کہ با لی وڈ انڈسٹری میں کام کے دوران متعدد ہدایت کاروں نے انہیں مختلف انداز سے پریشان کرکے ان کے ساتھ جنسی تعلقات استوار کرنے کی خوب کوشش کی مگر انہوں نے ایسی تمام کوششوں کو ناکام بنایا۔

    سومی علی نے کسی بھی با لی وڈ ہدایت کار کا نام لیے بغیر بتایا کہ کئی فلم سازوں نے انہیں پھنسانے کی کوشش کی۔

    سومی علی نے اس زمانے میں سلمان خان سے تعلقات اور ان کے گھر میں رہائش سے متعلق بھی کھل کر بات کی اور کہا کہ انہوں نے سلمان خان سے بہت ساری چیزیں سیکھیں۔

    سومی علی کا کہنا تھا کہ سلمان خان کے گھر کے دروازے ہر کسی کے لیے کسی بھی مذہبی تفریق کے بغیر کھلے رہتےہیں اور سلمان خان کی والدہ انتہائی اچھی خاتون ہیں۔

    واضح رہے کہ سومی علی کا شمار 1990 کی مقبول با لی وڈ ہیروئنز میں ہوتا ہے سومی علی نے تقریبا ایک درجن کے قریب با لی وڈ فلموں میں کام کیا تھا، وہ 1990 سے قبل 16 برس کی عمر میں فلموں میں کام کرنے کے لیے امریکا سے بھارت گئی تھیں۔

    انہوں نے سلمان خان، سنجے دت، سنیل شیٹھی اور متھن چکرورتی سمیت اس دور کے مقبول ہیروز کے ساتھ فلمیں کیں۔

    سومی علی کی پیدائش پاکستان کے صوبہ سندھ کے دارالحکومت کراچی میں ہوئی، وہ 12 سال کی عمر میں اہل خانہ سمیت کراچی سے امریکا منتقل ہوگئی تھیں بعد ازاں 1990 سے قبل وہ امریکا سے بھارت گئیں سومی علی نے ڈیڑھ دہائی تک بھارت میں وقت گزارا اور 2000 کے بعد واپس امریکا چلی گئیں –

    سومی علی اس وقت امریکا میں مقیم ہیں اور وہ ریپ اور جنسی استحصال کی شکار خواتین کی مدد کرنے کی ’نو مور ٹیئرز‘ نامی ایک سماجی تنظیم چلا رہی ہیں۔

    سومی علی کا سلمان خان پر دھوکہ دہی کا الزام

    تحفظ کے لئے سلمان خان سے شادی کرنا چاہتی تھی، پاکستانی نژاد سابق بالی وڈ اداکارہ…

    سلمان خان کی سابقہ دوست کا جنسی ہراسانی کا شکار ہونے کا انکشاف

    سومی علی کی متھن دا اور سلمان خان سمیت کئی بالی ووڈ اداکاروں سے معذرت

  • کیا تقریباً ساری دنیا میں اس سال رمضان المبارک کا آغاز 14 اپریل سے ایک ساتھ ہوگا؟ عالمی ماہرین کا تجزیہ

    کیا تقریباً ساری دنیا میں اس سال رمضان المبارک کا آغاز 14 اپریل سے ایک ساتھ ہوگا؟ عالمی ماہرین کا تجزیہ

    رویتِ ہلال کی مستند عالمی ویب سائٹ ’مون سائٹنگ ڈاٹ کام‘ کے ماہرین کا کہنا ہے کہ 13 اپریل 2021 کی شام دنیا کے تقریباً تمام ممالک میں رمضان المبارک کا چاند بہ آسانی دیکھا جاسکے گا یعنی تقریباً ساری دنیا میں اس سال رمضان المبارک کا آغاز 14 اپریل سے ایک ساتھ ہوگا۔

    باغی ٹی وی : اس ویب سائٹ پر ایک تفصیلی نقشے کے ذریعے رمضان المبارک 1442 ہجری کے چاند سے متعلق پیش گوئی کی گئی ہےدنیا کے وہ ممالک جہاں رمضان المبارک کا چاند صرف آنکھ سے بہ آسانی دیکھا جاسکے گا، انہیں اس نقشے میں سبز رنگ سے ظاہر کیا گیا ہے۔

    فوٹو بشکریہ :عالمی ویب سائٹ ’مون سائٹنگ ڈاٹ کام‘

    نقشے میں دیکھا جاسکتا ہے کہ ان ملکوں میں پورا پاکستان شامل ہے یعنی مطلع صاف ہونے پر پاکستان کے ہر شہر، ہر قصبے، ہر دیہات، غرض ہر علاقے میں رمضان المبارک 1422 ہجری کا چاند بہت آسانی سے دیکھا جاسکے گا۔

    اسی ویب سائٹ پر مزید بتایا گیا ہے کہ 12 اپریل 2021 کی شام جنوبی اور شمالی امریکا میں رمضان المبارک کا چاند مشکل سے دکھائی دے گا جبکہ ہوائی اور جزائر پولینیشیا میں چاند کا نظارہ بہتر ہوگا۔

    نقشے کے مطابق اس سال رمضان المبارک کے ’نئے چاند‘ کی پیدائش، پاکستانی معیاری وقت کے مطابق، 12 اپریل 2021 کی صبح 7 بج کر 30 منٹ پر ہوگی۔

    تاہم اس نئے چاند کے انسانی آنکھ کےلیے قابلِ مشاہدہ ہونے میں مزید 18 گھنٹے لگ جائیں گے۔ تب تک پاکستان میں 13 اپریل شروع ہوچکی ہوگی اور آدھی رات کے بعد کا وقت ہوگا۔

    لہذا 13 اپریل کی شام، پاکستان میں غروبِ آفتاب کے وقت چاند کی عمر تقریباً 36 گھنٹے ہوگی جس کے باعث رمضان کا چاند خاصا بڑا اور نمایاں ہوچکا ہوگا، جو مطلع صاف ہونے کی صورت میں بہ آسانی نظر آجائے گا۔

  • گووندا کا بھی کورونا ٹیسٹ مثبت آ گیا

    گووندا کا بھی کورونا ٹیسٹ مثبت آ گیا

    بھارتی معروف اداکار گووندا بھی کورونا وائرس میں مبتلاہو گئے ہیں-

    باغی ٹی وی :بھارتی میڈیا رپورٹس کے مطابق اداکار اکشے کمار کے بعد اداکار گووندا کا بھی کورونا ٹیسٹ مثبت آگیا ہے جس کے بعد تمام احتیاطی تدابیر اختیار کرتے ہوئے میں نے خود کو فوری طور پر آئسو لیٹ کرلیا ہے۔

    گووندا نے بتایا کہ انہوں نے خود کو گھر میں قرنطینہ کرلیا ہے اور تمام ضروری طبی امداد بھی لے رہے ہیں۔ اس کے علاوہ انہوں نے ان تمام لوگوں سے اپنا کورونا ٹیسٹ کروانے کی درخواست کی جو ان کے رابطے میں آئے تھے اور انہیں اپنا خیال رکھنے کی ہدایت کی۔

    اداکار کا کہنا تھا کہ "میں خود جانچ کر رہا ہوں اور کورونا وائرس کو دور رکھنے کے لئے تمام ضروری احتیاطی تدابیر اختیار کر رہا ہوں۔ تاہم ، میں نے ہلکی علامات کے بعد آج مثبت ٹیسٹ کیا۔

    جبکہ گھر میں موجود دیگر تمام افرادکا ٹیسٹ نیگیٹیو آیا ہے انہوں نے بتایا کہ ان کی اہلیہ سنیتا کچھ ہفتے پہلے ہی کوویڈ ۔19 سے صحت یاب ہوئی ہیں۔

    اداکار نے مزید کہا کہ میں سب سے درخواست کرتا ہوں کہ براہ کرم تمام ضروری احتیاطی تدابیر پر عمل کریں اور اپنا اور دوسروں کا خیال رکھیں۔

    واضح رہے کہ دو روز قبل اداکارہ عالیہ بھٹ نے بھی کورونا میں مبتلا ہونے کی خبر دیتے ہوئے کہا تھا کہ انہوں نے خود کو گھر میں قرنطینہ کرلیا ہے عالیہ بھٹ کے علاوہ بالی ووڈ کے مسٹر پرفیکشنسٹ عامر خان بھی کورونا وائرس کا شکار ہیں اور اپنے گھر میں آئسولیٹ ہیں

    علاوہ ازیں اداکار منوج باجپائی، سدھانت چترویدی، تاراسوتاریا، ستیش کوشک اور ہدایت کار سنجے لیلا بھنسالی، رنبیر کپور و دیگر بھی کورونا وائرس کا شکار ہوچکے ہیں-

    اکشے کمار بھی عالمی وبا کورونا وائرس کا شکار

  • دیا مرزا سلمان خان کی شکر گزار کیوں؟

    دیا مرزا سلمان خان کی شکر گزار کیوں؟

    بھارتی شوبز انڈسٹری کی اداکارہ و ماڈل دیا مرزا نے بتایا کہ کس طرح سُپراسٹارسلمان خان نے ان کی والدہ کی زندگی بچائی تھی۔

    باغی ٹی وی :بالی ووڈ کے سلطان سلمان خان ماضی قریب میں راکھی ساونت کی والدہ کے علاج میں مدد کی اور گزشتہ سال کوریوگرافر اور ہدایتکار ریمو ڈی سوزا کی جان بچانے کا بھی سبب بنے تھے، اس حوالے سے خود ریمو اور ان کی اہلیہ نے بھی آگاہ کیا تھا نہ صرف ریمو ڈی سوزا بلکہ کئی بالی ووڈ سے وابستہ شخصیات کی مدد کے لئے آگے آگے رہتے ہیں-

    بالی ووڈ میں سلمان خان کا شمار مضبوط دوستانہ تعلقات اور بڑے دل رکھنے والوں میں ہوتا ہے اور وہ ہمہ وقت دوسروں کی مدد کے لئے تیار رہتے ہیں-

    اسی سے متعلق دیا مرزا نے بھی ایک انکشاف کیا اور بتایا کہ کس طرح سلمان خان نے ان کے گھرانے کی خوشیاں بچانے کا سبب بنے تھے۔

    اپنے ایک انٹرویو کے دوران دیا مرزا کا کہنا تھا کہ ان کی والدہ کی اچانک طبیعت خراب ہوگئی تھی، اسی دوران انھوں نے سلمان خان کو ٹیلی فون کیا اور وہ ان کی والدہ کو لے کر اسپتال گئے۔

    دیا کا کہنا تھا کہ اسپتال پہنچنے کے بعد ڈاکٹرز نے انھیں کہا کہ اگر وہ مزید 15 منٹ دیر سے والدہ کو اسپتال میں داخل کرواتیں تو ان کے بچنے کی امید کم ہوجاتی۔

    اداکارہ نے کہا کہ میں دل سے سلمان خان کی شکر گزار ہوں اور ہمیشہ ان کے ساتھ کھڑی ہوں چاہیے کچھ بھی ہو۔

    واضح رہے کہ اداکارہ دیا مرزا حال ہی میں بزنس مین وئیبھوو ریکھی کے ساتھ شادی کے بندھن میں بندھ گئی ہیں۔

  • کنیسر میں مبتلا اداکارہ نائلہ جعفری کی حکومت سے بیمار اور سینئراداکاروں کی مالی معاونت کی اپیل

    کنیسر میں مبتلا اداکارہ نائلہ جعفری کی حکومت سے بیمار اور سینئراداکاروں کی مالی معاونت کی اپیل

    پاکستان کی سینئر اداکارہ نائلہ جعفری گزشتہ کئی برس سے کینسر جیسے موذی مرض سے جنگ لڑ رہی ہیں انہوں نے حکومت اورڈراما پروڈیوسرز سے درخواست کی ہے کہ بیمار اور سینئراداکاروں کی مالی معاونت کی جائے۔

    باغی ٹی وی : نائلہ جعفری کی ایک ویڈیو گزشتہ روزسے سوشل میڈیا پر وائرل ہورہی ہے جس میں وہ اسپتال کے بستر پر موجود حکومت اور مختلف ڈراما پروڈیوسرز سے درخواست کرتی نظر آئیں کہ بیمار اور سینئر فنکاروں کی مالی معاونت کی جائے۔

    نائلہ جعفری نے کہا کہ وہ پچھلے 6 برسوں سے کینسر جیسے موذی مرض سے لڑرہی ہیں۔ پہلی کیموتھراپی کے بعد انہیں انفیکشن ہوگیا تھا اور انہیں اسپتال میں داخل کیا گیا جس کی وجہ سے ان کی کیموتھراپی کا دوسرا سیشن نہیں ہوسکا۔

    نائلہ جعفری نے کہا ایک بات جو میں اس دوران سوچتی رہی ہوں کتنا بہتر ہو کہ ہماری گورنمنٹ اور فن و اسپورٹس کے شعبے سے تعلق رکھنے والے پالیسی میکرز ان شعبوں سے تعلق رکھنے والے افراد کے بارے میں سوچیں۔

    اداکارہ نے کہا میں نے جب پی ٹی وی جوائن کیا تھا تو اس وقت جب ہمارے ڈرامے دوبارہ ٹی وی پر نشر کیے جاتے تھے تو ہمیں ان ڈراموں کی رائلٹی ملتی تھی گو کہ وہ پیسے بہت کم ہوتے تھے لیکن ہمیں اچھا لگتاتھا اور وہ پیسے برے نہیں لگتے تھے۔

    انہوں نے کہا کہ میں گزشتہ 6 برسوں سے بیمار ہوکر پڑی ہوئی ہوں سب نے بڑا سپورٹ کیا ہے بہت مدد کی ہے، پیار دیا ہے، میں اکیلی تھی سب نے مل کر مجھے سنبھالا ہے لیکن میں سوچتی ہوں کہ کاش ایسا کوئی سلسلہ ہوتا کہ ہمارے وہ ڈرامے جو ٹی وی پر ایک بار دکھائے جاچکے ہیں اور جب انہیں دوبارہ دکھایا جاتاہے اس کے معاوضے کے طور پر ہمیں دوبارہ کچھ پیسے ملیں۔

    نائلہ جعفری نے بتایا کہ ان کا ایک ڈراما جو گزشتہ 6 برسوں میں 4 سے 5 بارٹی وی دکھایا جاچکا ہے اور بھی ایسے ڈرامے ہیں جو دوبارہ دکھائے جارہے ہیں اگر ان ڈراموں سے ہونے والی آمدنی میں سے کچھ معاوضہ ہم جیسے لوگوں کو ملتا رہتا تو ہمیں بڑی سہولت اور آسانی ہوجاتی۔ ہوسکتا ہے کچھ لوگوں کو نہ ہوتی ہو لیکن جب آپ بہت عرصے سے کام نہیں کررہے ہوتے تو یہ پیسے بہت ضروری ہوجاتے ہیں۔

    نائلہ جعفری نے حکومت سے اپیل کرتے ہوئے کہا میں درخواست اور مطالبہ کروں گی کہ اس سلسلے میں کچھ کیا جائے تاکہ آنے والے وقت میں مجھ جیسے سینئر اور بیمار اداکاروں کی مدد ہوسکے کیونکہ ہمارے لیے چیزیں مینیج کرنا بہت مشکل ہوتا ہے۔

    واضح رہے کہ 1990 کی مقبول ٹی وی اداکارہ، ماڈل و فیشن ڈیزائنر نائلہ جعفری 2016 سے بیمار ہیں ابتدائی طور پر ان میں اوورین کینسر کی تشخیص ہوئی تھی، بعد ازاں ان میں معدے کے کینسر کی بھی تشخیص ہوئی تھی۔

    اداکارہ نائلہ جعفری نے 2017 میں اس وقت کی مرکزی پاکستان مسلم لیگ (ن) کی حکومت کی مالی مدد لینے سے انکار کردیا تھا۔ تاہم بعد میں انہوں نے اس وقت کے صدر مملکت ممنون حسین کی معاونت قبول کی تھی، ساتھ ہی انہوں نے حکومت سندھ کی مالی مدد بھی قبول کی تھی۔