Author: Ayesha Rehmani

اسلام آباد: کابینہ کی اقتصادی رابطہ کمیٹی(ای سی سی) نے داسو ہائیڈرو پاور پراجیکٹ حادثے کا شکار ہونے والے چینی مزدورں کے لواحقین کی امداد کیلئے 25 لاکھ 80 ہزار ڈالر(تقریباً 71 کروڑ 86 لاکھ پاکستانی روپے) کی رقم کی منظور ی دیدی-

تفصیلات کے مطابق وزیرخزانہ کی زیر صدارت ای سی سی اجلاس میں داسو حملے میں جاں بحق مقامی افراد کے لواحقین کی زرتلافی کیلئے 25 لاکھ روپے کے امدادی پیکج کی منظوری دی گئی جبکہ وزارت آبی وسائل کو ہائیڈرو پاور پراجیکٹس کیلئے 70ارب 48کروڑ40لالھ روپے کی تکنیکی ضمنی گرانٹ فراہم کرنے کی منظوری سمیت اہم فیصلے کیے گئے۔

وفاقی وزیر خزانہ محمد اورنگزیب کی زیر صدارت اجلاس میں دس نکاتی ایجنڈے کا جائزہ لیا گیا، روز ویلٹ ہوٹل نیویارک کو درپیش مالی مشکلات کے باعث حکومتی سپورٹ کی فراہمی کیلئے نیشنل بینک آف پاکستان میں موجود 80 لاکھ روپے استعمال کرنے کی منظوری دی، ایرا کیلئے ایک ارب دو کروڑ78 لاکھ روپے کی تکنیکی ضمنی گرانٹ کی منظوری دی گئی اجلاس میں سوئی سدرن گیس کمپنی کو پاکستان اسٹیل ملز کے گیس کے بلز کی ادائیگی کیلئے دو ارب پندرہ کروڑ 95 لاکھ تیس ہزار روپے جاری کرنے کی بھی منظوری دی گئی۔

وزارتِ داخلہ کے لئے 6 کروڑ چالیس لاکھ روپے کی تکنیکی ضمنی گرانٹس کی دو سمریوں، نیشنل ہیلتھ، ریگولیشن اینڈ کوارڈینیشن کے ادارے فیڈرل ڈائریکٹریٹ آف ایمیونائزین کو12 ارب تین کروڑ اکسٹھ لاکھ روپے کی تکنیکی ضمنی گرانٹ فراہم کرنے کی منظوری بھی دی گئی۔ پاور ڈویژن کیلئے 2 ارب 21 کروڑ 70 لاکھ روپے کی تکنیکی ضمنی گرانٹ فراہم کرنے کی منظوری بھی دی گئی ہے جبکہ نیو کلیئر ریگولیٹری اتھارٹی کیلئے 18 کروڑ 45لاکھ روپے کی منظوری دی گئی ہے-

اسلام آباد: کیپیٹل ڈیولپمنٹ اتھارٹی (سی ڈی اے) نے پاکستان تحریک انصاف (پی ٹی آئی) کا اسلام آباد میں قائم مرکزی دفتر سیل کردیا۔

سی ڈی اے قوانین کی خلاف ورزی اور ناجائز تجاوزات پر پی ٹی آئی سیکریٹریٹ اسلام آباد کیخلاف سی ڈی اے کا آپریشن
، تحریک انصاف کادفتر غیر قانونی قرار دے کر گرانے کا عمل شروع کر دیا گیا پولیس کی بھاری نفری پی ٹی آئی مرکزی سیکرٹریٹ کے باہر پہنچی، اور پی ٹی آئی سیکرٹریٹ جانے والے راستوں کو بند کردیا۔

ڈی سی اسلام آباد نے کہا کہ اسلام آباد پولیس نے پی ٹی آئی سیکرٹریٹ جانےوالےراستوں کو بند کر دیاگیا بلڈنگ بائی لاز کی خلاف ورزیوں,غیر قانونی تعمیرات اور تجاوزات کے خاتمے کےلئےCDAکا آپریشن کیا ،سیکٹرG-8/4میں(تحریک انصاف)کی طرف سے پلاٹ پر قائم کی گئی تجاوزات اورغیرقانونی تعمیرات کوختم کیاجارہاہے۔

پی ٹی آئی کا مرکزی سیکرٹریٹ G-8/4 اسلام آباد میں واقع ہے جبکہ پلاٹ سرتاج علی کے نام پر ہے سی ڈی اے کے ضمنی قوانین کی بڑی خلاف ورزیاں کی گئی ہیں جن میں بڑے پیمانے پر ملحقہ سی ڈی اے کی اراضی پر ناجائز قبضہ و تجاوزات اور غیر قانونی تعمیرات شامل ہیں۔

19 نومبر 2020، 22 فروری 2021 اور 14 جون 2022 کو پہلے ہی تین نوٹسز جاری کیے جا چکے ہیں جبکہ شوکاز نوٹس 4 ستمبر 23 کو جاری کیا گیا تھامزید برآں، 10 مئی 24 کو سیل کرنے کا حکم جاری کیا گیا ہے۔ (نوٹس اور سیل کرنے کے احکامات کی کاپیاں CDA کی پریس ریلیز کے ساتھ منسلک ہیں)سی ڈی اے کا اینٹی انکروچمنٹ ونگ کارروائی کرتے ہوئے ناجائز تجاوزات اور قبضہ کی ہوئی اراضی کو خالی کر وا رہا ہے جبکہ دفتر کو بائی لاز کی خلاف ورزی پر سیل کیا جا رہا ہے۔

پی ٹی آئی کے سیکریٹری جنرل عمر ایوب نے اس حوالے سے ایکس پر پیغام جارہی کرتے ہوئے لکھا کہ اسلام آباد پولیس پی ٹی آئی کے مرکزی آفس کے باہر جمع ہو رہی ہے، اسلام آباد پولیس نے گزشتہ روز بھی پی ٹی آئی سیکرٹیریٹ پر چھاپہ مارا تھا، لیکن رؤف حس پر حملہ کرنے والوں کو گرفتار کرنے سے قاصر ہے‘۔

ترجمان تحریک انصاف نے کہا کہ مینڈیٹ چور سرکار کی جانب سے بالکل غیرقانونی اور ظالمانہ طور پر پاکستان تحریک انصاف کے مرکزی سیکرٹریٹ کو گرانے کا عمل شروع کر دیا گیا ہے۔ تمام کارکنان سے اپیل ہے کہ فوراً جی ایٹ فور، اسلام آباد میں مرکزی سیکرٹریٹ پہنچیں۔

گزشتہ روز بھی اسلام آباد پولیس نے پی ٹی آئی سیکریٹیریٹ پر حماد اظہر کی گرفتاری کیلئے چھاپہ مارا تھا،اس دوران اقوام متحدہ کا وفد بھی محصور ہو کر رہ گیا تھا۔

راولپنڈی : گورنر پنجاب سردار سلیم خان کی جانب سے ہتک عزت کا بل پنجاب اسمبلی کو واپس بھجوانے کا امکان ہے۔

نجی خبررساں اداے سے گفتگو کرتے ہوئے گورنر سلیم خان نے کہا کہ پنجاب اسمبلی کے ہتک عزت بل پر نظر ثانی کی ضرورت ہے ، یہ بل حرف آخر نہیں ہے ، پنجاب حکومت اسے دوبارہ دیکھ کر قابل اعتراض باتیں نکالے، ہتک عزت بل کی وجہ سے ملک میں طوفان برپا ہے جس کو ختم کرنے کیلئے اگر ان کی ضرورت پڑی تو وہ تمام اسٹیک ہولڈرز کو بٹھا کر مسئلہ حل کرانے کی کوشش کریں گے۔

دوسری جانب راولپنڈی میں نابینا افراد کو تقرر نامے دئیے جانے کی تقریب سے خطاب کرتے ہوئے گورنر پنجاب نپے کہا کہ ہتک عزت قانون حرف آخر نہیں اس پر صحافتی تنظیموں اور اسٹیک ہولڈرز سے بات ہونی چاہیے، یہ قانون میں نے ابھی پڑھا نہیں، مطالعے کے بعد اسے اپنی قانونی ٹیم کو دوں گا وہ بھی اسے دیکھیں گے امکان ہے میں پنجاب حکومت کو ہتک عزت قانون پر نظر ثانی کا کہوں اور میں پُرامید ہوں کہ ہتک عزت قانون کا دوبارہ جائزہ لیا جائے گا۔

گورنر پنجاب نے کہا کہ میں 15 دنوں سے کرپشن کے باعث بہت پریشان ہوں، آج صورتحال اس اسٹیج پر پہنچ گئی ہے کہ اس غریب قوم کا اربوں روپے ایک ڈکار مار کر کھا لیا جاتا ہے اور کوئی پوچھنے والا نہیں، ہمارے قوانین اور سسٹم میں اتنی کمزوری ہے کہ لوگوں کو پرواہ ہی نہیں، پاکستان کی تاریخ پر نظر ڈالیں تو ہر الیکشن میں مِیں کرپشن ہوئی ہے، ساری سیاسی جماعتیں اس کی ذمہ دار ہیں، اسمبلی میں بیٹھ کر کوئی ایسی قانون سازی نہیں کر سکتے تو پھر کوئی فائدہ نہیں ہے۔

گورنر پنجاب نے پنجاب کے مختلف محکموں میں 49 نابینا افراد کے تقرر نامے دئیے اور اس عزم کا اعادہ کیا کہ نابینا افراد کی فلاح کے لیے تمام وسائل بروئے کار لائے جائیں گے دکھی انسانیت کی خدمت عبادت کا درجہ رکھتی ہے سردار سلیم حیدر باعزت روزگار سب کا بنیادی حق ہے،نابینا افراد نے معذوری کو مجبوری نہیں بننے دیا جو قابل ستائش ہے۔

واضح رہے کہ جوڈیشل ایکٹوزم پینل نے ہتک عزت قانون 2024 کو پنجاب اسمبلی کو واپس بھیجنے کیلئے گورنر پنجاب کو خط ارسال کردیا ہے،جوڈیشل ایکٹوازم پینل کی جانب سے گورنر پنجاب کو بھجوائے جانے والے خط میں کہا گیا ہے کہ ہتک عزت کا قانون آئین کے آرٹیکل 19 کے منافی ہے۔ اس کے نفاذ سے آزادی اظہار رائے کو روکا گیا جو بنیادی حقوق کے خلاف ورزی ہے-