کراچی: زرمبادلہ کے سرکاری ذخائر 8 ارب ڈالر کی سطح پر مستحکم ہیں۔
باغی ٹی وی: اسٹیٹ بینک آف پاکستان نے ملکی زرمبادلہ کے حوالے سے تازہ ترین اعداد و شمار جاری کردئیے،اسٹیٹ بینک کے مطابق ملکی زرمبادلہ ذخائر 22 مارچ تک 13 ارب 42 کروڑ ڈالر رہےملکی زرمبادلہ ذخائر میں 22 مارچ کو ختم ہونے والے ہفتے میں 3 کروڑ 69 لاکھ ڈالر اضافہ ہوا، اسٹیٹ بینک کے ذخائر 22 مارچ تک 40 لاکھ ڈالر اضافے سے 8.02 ارب ڈالر رہے جب کہ کمرشل بینکوں کے ذخائر 22 مارچ تک 3 کروڑ 29 لاکھ ڈالر اضافے سے 5 ارب 40 کروڑ ڈالر رہے۔
لاہور: پنجاب یونیورسٹی میں لڑکی کو چھیڑنے سے روکنے پر ملزم نے کلرک پر فائرنگ کردی۔
باغی ٹی وی : تفصیلات کے مطابق پنجاب یونیورسٹی میں اوباش نوجوان نے لڑکی کو چھیڑا جس پر کلرک انس نے اُسے روکنے کی کوشش کی، ملزم نے مشتعل ہوکر یونیورسٹی ملازم پر فائرنگ کردی جس کے نتیجے میں وہ زخمی ہوا اور پھر ملزم فرار ہوگیا پولیس کے مطابق زخمی ملازم کی کی حالت خطرے سے باہر ہے،گولی انس کے بازو میں لگی۔
پنجاب یونیورسٹی کے ترجمان نے بتایا کہ زخمی کلرک سوشیالوجی ڈیپارٹمنٹ میں ڈیوٹی انجام دے رہا تھا، ایس پی اقبال ٹاؤن نے ایس ایچ او مسلم ٹاون کو فوری ملزم کی گرفتاری کی ہدایت کردی جبکہ واقعے کی اطلاع ملنے پر مسلم ٹاؤن پولیس فوری موقعہ پر پہنچی ایس پی اقبال ٹاؤن نے بتایا کہ سیف سٹی کیمروں، سی سی ٹی وی کیمروں سمیت تمام وسائل بروئے کار لائے جا رہے ہیں، ملزم کو جلد از جلد گرفتار کیا جائے گا۔
دوسری جانب کراچی میں پیر آباد فرنٹیئر کالونی فرحانیہ محلہ میں گھر کے اندر نامعلوم ملزم کی فائرنگ کے واقعہ میں ماں جاں بحق جبکہ بیٹی زخمی ہوگئی ، واقعہ کی اطلاع ملتے ہی ایس ایس پی ڈسٹرکٹ ویسٹ عبدالحفیظ بگٹی اور ایس ایچ او پیر آباد شاہد تاج موقع پر پہنچ گئے۔
پولیس نے فوری طور پر مقتولہ کی لاش اور زخمی بیٹی کو عباسی شہید اسپتال منتقل کرایا جبکہ کرائم سین یونٹ کو طلب کر کے شواہد بھی محفوظ کرلیے گئے اس حوالے سے ایس ایس پی ڈسٹرکٹ ویسٹ نے بتایا کہ فائرنگ سے جاں بحق ماں کی شناخت 40 سالہ حبیبہ کے نام سے کی گئی جبکہ اس کی بیٹی 18 سالہ مروہ دختر فضل کو طبی امداد فراہم کی جا رہی ہے-
ابتدائی معلومات کے مطابق مقتولہ خاتون کی شوہر سے کچھ عرصے سے ناراضگی چل رہی تھی اور دونوں ماں بیٹی نے مذکورہ مکان 6 ماہ سے کرایے پر لیا ہوا تھا جبکہ مقتولہ حبیبہ اپنی بیٹی کی رشتہ طے کررہی تھی، دونوں ماں بیٹی افطاری کے لیے دسترخوان پر بیٹھے تھیں کہ اس دوران ملزم نے گھر میں داخل ہو کر ان پر فائرنگ کر کے ماں کو قتل اور بیٹی کو زخمی کر دیا اور موقع سے فرار ہوگیا مقتولہ کا آبائی تعلق خیبر پختونخوا سے تھا، پولیس کو جائے وقوعہ سے 30 بور پستول کا خول ملا ہے،مقتولہ کے شوہر کا کہنا ہے کہ مجھے نہیں معلوم کہ اس کی اہلیہ اور بچے یہاں رہتے تھے-
واشنگٹن: امریکی محکمہ خارجہ کے ترجمان میتھیو ملر نے کہا ہے کہ توانائی کی کمی کے بحران سے نمٹنے میں پاکستان کی مدد امریکا کی ترجیح ہے۔
باغی ٹی وی : واشنگٹن میں پریس بریفنگ کے ترجمان محکمہ خارجہ نے کہا کہ ہم نے پاکستان میں تقریباً 4,000 میگاواٹ صاف توانائی کی صلاحیت بڑھانے میں مدد کی،امریکی منصوبوں نے بجلی کی صلاحیت میں ڈرامائی طور پر اضافہ کیا ہے، منصوبوں کے ذریعے آج لاکھوں پاکستانیوں کے گھروں کو بجلی فراہم کر رہے ہیں۔
ترجمان نے کہا کہ یو ایس پاکستان گرین الائنس دونوں ممالک کے درمیان تبدیلی کا اقدام ہے، آج کے انتہائی اہم ماحولیاتی چیلنجوں خاص طور پر پانی کے انتظام سے نمٹنے کیلئے مل کر کام کررہے ہیں۔
دوسری جانب امریکی وفد نے سینئر وزیر مریم اورنگزیب سے ملاقات کی جس میں اسموگ اور ماحولیاتی مسائل سے نمٹنے میں تعاون کی یقین دہانی کروائی، ملاقات میں تعلیم، صحت، ماحولیات سمیت دیگر شعبوں میں تعاون پر تبادلہ خیال کیا گیا ، ٹرانسپورٹ، شرمپس کی پیداوار، سالڈ ویسٹ مینجمنٹ میں تعاون پر بات چیت بھی ہوئی، مریم اورنگزیب نے وزیراعلی مریم نواز کے مختلف شعبوں میں بہتری کے ایجنڈے پر بریف کیا،ملاقات میں مریم اورنگزیب نے وزیراعلی پنجاب کی نمائندگی کی جبکہ مریکی وفد کی قیادت قونصل جنرل کرسٹن ہاکن کر رہی تھی، وفد میں سیاسی و اقتصادی امور کے سربراہ نکولس کٹساکس اور صدف سعد بھی شامل تھے۔
لاہور: امریکی وفد نے وزیراعلی پنجاب کے ماحولیاتی اصلاحات ایجنڈے میں تعاون کی یقین دہانی کروا دی۔
باغی ٹی وی : امریکی وفد نے سینئر وزیر مریم اورنگزیب سے ملاقات کی جس میں اسموگ اور ماحولیاتی مسائل سے نمٹنے میں تعاون کی یقین دہانی کروائی، ملاقات میں تعلیم، صحت، ماحولیات سمیت دیگر شعبوں میں تعاون پر تبادلہ خیال کیا گیا ، ٹرانسپورٹ، شرمپس کی پیداوار، سالڈ ویسٹ مینجمنٹ میں تعاون پر بات چیت بھی ہوئی، مریم اورنگزیب نے وزیراعلی مریم نواز کے مختلف شعبوں میں بہتری کے ایجنڈے پر بریف کیا۔
مریم اورنگزیب نے کہا کہ ہم اسموگ کے خاتمے اور ماحولیات کے حوالے سے قوانین کی بہتری پر کام کررہے ہیں، وزیراعلی نے صوبے کی تاریخ کی سب سے بڑی مہم ’پلانٹ فار پاکستان‘شروع کی ہے۔ حکومت نجی شعبے کے تعاون سے ماحولیاتی بہتری کے لئے اقدامات کررہے ہیں، پنجاب کو پاکستان کا پہلا ڈیجیٹل صوبہ بنارہے ہیں، 40 سے زائد خدمات گھر کی دہلیز پر فراہم کریں گے۔
ملاقات میں مریم اورنگزیب نے وزیراعلی پنجاب کی نمائندگی کی جبکہ مریکی وفد کی قیادت قونصل جنرل کرسٹن ہاکن کر رہی تھی، وفد میں سیاسی و اقتصادی امور کے سربراہ نکولس کٹساکس اور صدف سعد بھی شامل تھے۔
اسلام آباد: چینی باشندوں کی حفاظت اورنقل وحرکت سےمتعلق ایس اوپیزجاری کر دی گئیں، ایس او پیز ڈی آئی جی کی جانب سے وزارت داخلہ کی ہدایات کی روشنی میں جاری کی گئی ہیں ، ڈی آئی جی سپیشل پروٹیکشن یونٹ منتظر مہدی نے متعلقہ حکام کو چینی شہریوں سمیت غیر ملکیوں کیلئے بلٹ پروف گاڑیاں استعمال کرنے کی ہدایت کر دی۔
باغی ٹی وی : امن و امان اور سکیورٹی سے متعلق اجلاس کے دوران ڈپٹی انسپکٹر جنرل سپیشل پروٹیکشن یونٹ منتظر مہدی کا کہنا تھا کہ تمام غیر ملکیوں کے ساتھ ڈیوٹی کرنیوالے سٹاف کا سکیورٹی آڈٹ کروایا جائے اور سیف سٹی کے سی سی ٹی وی کیمروں کے ذریعے غیر ملکیوں کی آمدورفت کی نگرانی کی جائے پنجاب حکومت کی جانب سے جاری کردہ غیر ملکیوں کی ایڈوائزری پر مکمل عمل درآمد کروایا جائے –
وزارت داخلہ کی جانب سے جاری کردہ ہدایات میں کہا گیا ہے کہ اسپیشل پروٹیکشن یونٹ کے جوان غیرملکیوں کی حفاظت اور فول پروف سکیورٹی کو یقینی بنائیں،چینی باشندے بغیر حفاظتی اقدامات کے نقل و حمل سے متعلق فوری طور پر متعلقہ اداروں کو مطلع کریں گے، چینی باشندوں کی نقل و حرکت سے متعلق تمام متعلقہ ادارے ایک دوسرے سے اضلاع کی سطح پر رابطے میں رہیں گے، جبکہ غیر ملکیوں کے لئے پہلے سے طے شدہ ایس اوپیز پر بھی عملدرآمد کیا جائے گا۔
27 مارچ کو پیدا ہونے والی چند مشہور شخصیات
1677ء ملا نظام الدین محمد بن ملا قطب الدین سہالوی ، فاضلِ جید،عارف فنون رسمیہ، ماہر علوم نقلیہ و عقلیہ، فقیہ اصولی و بانی درسِ نظامیہ ۔ (وفات: 8 مئی 1748ء)
1845ء ولہیلم رونٹیگن ، نوبل انعام برائے طبیعیات (1901ء) یافتہ جرمن ماہر طبعیات و استاد جامعہ ، جس نے 1895ء میں اس نے ایکس شعاع دریافت کیں۔ ان شعاعوں کو اس کے نام کی مناسبت سے رونتجن شعاع بھی کہتے ہیں ۔ (وفات: 10 فروری 1923ء)
1847ء اوتو والاخ ، نوبل انعام برائے کیمیاء (1910ء) یافتہ جرمن کیمیاء دان و استاد جامعہ ، جس نے نامیاتی کیمیاء اور کیمیائی صنعت میں تحقیق کی اور ایک الیسائیکلک کمپاونڈ کی گئی اولین تحقیقات تھی۔ (وفات : 26 فروری 1931ء)
1901ء ایساکو ساٹو ، نوبل امن انعام (1974ء) یافتہ جاپانی سیاستدان ، (7 نومبر 1964ء تا 9 جولائی 1972ء) 39 ویں وزیراعظم جاپان (وفات : 3 جون 1975ء)
1942ء جان ایڈورڈ سلسٹن ، نوبل انعام برائے فزیالوجی و طِب (2002ء) یافتہ برطانوی حیاتیات دان، ماہرِ جینیات و استاد جامعہ (وفات : 6 مارچ 2018ء)
1961ء سید سردار احمد پیرزادہ ، پاکستان سے تعلق رکھنے والے اردو زبان کے پہلے نابینا صحافی، دانشور، تجزیہ و کالم نگار، مقتدرہ قومی زبان کے ماہانہ جریدہ اخبار اردو کے ایڈیٹر اور ریڈیو، ٹی وی کے اینکر پرسن
1963ء قوینٹن ٹیرنٹینو ، امریکی فلمساز
1965ء رینوکا شاہانے ، بھارتی فلمی اداکارہ اور ٹی وی اینکر
1970ء رانا محمود الحسن ، ملتان سے تعلق رکھنے والے پاکستانی سیاستدان، مارچ 2018ء رکنِ ایوان بالا پاکستان
1975ء سٹیسی فرگوسن، امریکی اداکارہ و گلوکارہ
1979ء عمران طاہر ، پاکستانی نژاد جنوبی افریقی کرکٹ کھلاڑی
1982ء تہمینہ افضل ، پاکستانی نژاد امریکی ماڈل، اداکارہ اور گلوکارہ ، وہ کھیل کے میدان میں بھی شہرت رکھتی ہیں۔
1987ء نور العین خالد المعروف عینی جاں عینی خالد ، پاکستانی نژاد برطانوی موسیقار اور ماڈل
اسلام آباد: وزیر اعظم شہباز شریف کا کہنا ہے کہ پاکستان میں ہر برادری کو اپنی عبادت گاہوں میں عبادت کرنے کی مکمل آزادی ہے اور پاکستانی معاشرے کے اس مثبت پہلو کو اجاگر کرنے کی ضرورت ہے-
باغی ٹی وی : اسلام آباد میں وزارت خارجہ میں سفراء کے اعزاز میں دیے گئے عشائیے سے خطاب کرتے ہوئے وزیر اعظم نے کہا کہ رمضان کے بابرکت موقع پر آپ سب کو دل کی گہرائیوں سے مبارکباد پیش کرتا ہوں جہاں یہ مقدس مہینہ نہ صرف روزہ رکھنے بلکہ قربانی اور نظم وضبط کا درس دیتا ہے، ہمیں انہی اقدار کی موجودہ دور میں شدید ضرورت ہے کیونکہ ہم اس وقت مختلف شعبوں میں ہر سطح پر متعدد چیلنجوں میں گھرے ہوئے ہیں، تنازعات سے گھری اس دنیا میں رمضان کی روح ہمیں دنیا بھر میں امید اور امن کے پیغام کو پھیلانے میں مدد فراہم کرتی ہے۔
انہوں نے کہا کہ ہمارا آئین تمام پاکستانی شہریوں کو بلاتفریق یکساں انسانی حقوق کی فراہمی کا ضامن ہے اور آئین میں دیے گئے ان حقوق کو حقیقی شکل دینے کے لیے ہم نے متعدد قانونی اقدامات کیے ہیں جس کے نتیجے میں پاکستان میں ہر برادری کو اپنی عبادت گاہوں میں عبادت کرنے کی مکمل آزادی ہے اور پاکستانی معاشرے کے اس مثبت پہلو کو اجاگر کرنے کی ضرورت ہے پاکستان امن پسند قوم کی حیثیت سے عالمی برادری کے تمام رکن ممالک کے ساتھ دوستانہ تعلقات رکھنے کا خواہاں ہے اور کسی سے بھی دشمنی نہیں چاہتا ،بین الاقوامی برادری کے ذمہ دار رکن کی حیثیت سے پاکستان امن، خوشحالی اور پائیدار ترقی کے لیے علاقائی اور عالمی کوششوں میں اپنا کردار ادا کرتا رہے گا،اور اور میری حکومت ہمارے بانیان کے اس وژن پر عمل پیرا ہوتی رہے گی-
انہوں نے اقوم متحدہ کی سلامتی کونسل میں حال ہی میں غزہ میں جنگ بندی کے حوالے سے پیش کی گئی قرارداد کا خیر مقدم کرتے ہوئے کہا کہ میں فلسطین کے عوام کی حق خودارادیت کی جدوجہد میں پاکستان کی بھرپور حمایت کا اعادہ کرنا چاہتا ہوں اور ہم امید کرتے ہیں سیکیورٹی کونسل کی اس قرارداد پر فوری طور پر اس کی روح کے مطابق عمل کیا جائے گا اور فلسطینیوں کے خلاف جاری سفاکیت کا خاتمہ ہو گا۔
وزیر اعظم نے کہا کہ ہم تیز رفتار ترقی کے حصول کی راہ پر گامزن ہیں اور چیلنجوں کو مواقع میں تبدیل کرنے کے لیے ہم تجارت کو فروغ، اقتصادی شراکت داری کے قیام اور غیر ملکی سرمایہ کاری کو راغب کرنے کے لیے کوشش کریں گے اور دوسرے ممالک کے ساتھ ہمارے دوطرفہ تعاون اور روابط کے لیے یہی بنیادی ستون کا کام انجام دیں گے پاکستان کے عوام کے تحفظ اور سلامتی کے ہمارے بنیادی قومی مفاد، ملکی خودمختاری اور علاقائی سالمیت پر کوئی سمجھوتہ نہیں کیا جائے گا۔
27 مارچ تاریخ کے آئینے میں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
1668ء انگلینڈ کے حکمران چارلس دوئم نے ممبئی کو ایسٹ انڈیا کمپنی سونپی۔
1721ء فرانس اور اسپین نے میڈرڈ معاہدے پر دستخط کئے۔
1794ء امریکی کانگریس نے ملک میں بحری فوج قائم کرنے کی منظوری دی۔
1824ء کینیڈا نے سوویت یونین کو تسلیم کیا۔
1854ء کریمین جنگ میں برطانیہ نے روس کے خلاف جنگ کا اعلان کیا۔
1855ء امریکی ابراہام گیسز نے کوئلے سے ایک نئی قسم کا تیل کیروسین آئل (مٹی کا تیل) کے نام سے ایجاد کر کے پیٹنٹ کروایا۔
1871ء پہلا بین الاقوامی رگبی میچ اسکاٹ لینڈ اور انگلینڈ کے درمیان کھیلا گیا جو اسكاٹ لینڈ نے جیتا۔
1884ء بوسٹن سے نیویارک کے درمیان پہلی بار فون پر لمبی بات چیت ہوئی۔
1899ء انگلینڈ اور فرانس کے درمیان پہلی بین الاقوامی ریڈیو نشریات اطالوی موجد جی مارکونی کی طرف سے کیا گیا۔
1901ء امریکہ نے فلپائن کے باغی لیڈر ایمیلیو ایگونالڈو کو اپنے قبضے میں لیا۔
1905ء برطانیہ میں پہلی بار قتل کے ایک مقدمے میں انگلیوں کے نشانات کو بطور ثبوت استعمال کیا۔
1933ء جاپان نے لیگ آف نیشنز سے خود کو الگ کر لیا۔
1944ء لتھوانیا میں دو ہزار یہودیوں کو قتل کیا گیا ۔
1956ء امریکی حکومت نے کمیونسٹ اخبار ڈیلی ورکر پر قبضہ کر لیا۔
1958ء نکیتا خروشیف سوویت یونین کے وزیر اعظم بنے۔
1964ء الاسکا میں 4ء7؍کی شدت والے زلزلے سے ۱۱۸؍افراد ہلاک۔
27 مارچ 1964ء کو حکومت نے نیشنل پریس ٹرسٹ (این پی ٹی) کے قیام کا اعلان کردیا۔ بعض سینئر صحافیوں کے مطابق این پی ٹی خواجہ شہاب الدین کے اور بعض کے مطابق الطاف گوہر کے ذہن کی پیداوار تھا مگر قدرت اللہ شہاب نے شہاب نامہ میں واضح طور پر لکھا ہے کہ اس ٹرسٹ کے خالق ایوب خان کے عہد کے ’’سپر بیوروکریٹ‘‘ غلام فاروق تھے جنہوں نے ایوب خان کے ایما پر اس کے خدوخال اور دائرہ کار متعین کیے تھے۔ این پی ٹی کے قیام کی مزاحمت سب سے پہلے پی ایف یو جے کی جانب سے ہوئی اس کے بعد ملک بھر کے مدیران اخبار و جرائد‘ ناشروں اور (کنونشن مسلم لیگ کے علاوہ) تمام سیاسی پارٹیوں نے اس کی مخالفت کی مگر حکمران جنتا نے اپنے منصوبے پر عمل کیا۔ غلام فاروق نے این پی ٹی کے لیے سرمایہ فراہم کرنے کی غرض سے ’’مخیر حضرات‘‘ کا ایک ڈھونگ تیار کیا اور 27 مارچ 1964ء کو اس کے قیام کا اعلان کردیا۔ ٹرسٹ کا ابتدائی سرمایہ پچاس لاکھ روپے تھا تاہم حکومت کی ایما پر نیشنل بنک آف پاکستان نے اسے ایک کروڑ روپے کا قرضہ بھی فراہم کیا تھا۔ این پی ٹی میں شروع شروع میں وہی اخبارات و جرائد شامل تھے جو میاں افتخار الدین کے پروگریسو پیپرز لمیٹڈ پر قبضے کے ذریعے ہتھیائے گئے تھے لیکن بعد میں اس کے دائرے میں مارننگ نیوز‘ مشرق‘ دینک پاکستان‘ اخبار خواتین‘ اسپورٹس ٹائمز اور انجام بھی شامل ہوگئے۔ ابتدا ہی سے ٹرسٹ کے اخباروں نے سرکاری ترجمان کا کردار ادا کرنا شروع کردیا اور بغیر کسی خلش کے سرکاری موقف کی پیروی کرنے لگے۔ خوشامد اور چاکری نے اسم اعظم کی حیثیت اختیار کرلی اور وہ اخبارات جو کبھی حکومت کی کڑی نگرانی کیا کرتے تھے اب انتظامیہ کے پالتو بن کر رہ گئے۔ این پی ٹی لفظی اور کاغذی طور پر ایک آزاد ادارہ تھا لیکن حقیقت میں اس کے اخباروں نے ہمیشہ انتظامیہ کے ترجمان کا کردار ادا کیا۔ انہوں نے اپنے مالکان ایوب اور یحییٰ کی‘ یکساں جوش اور جذبے کے ساتھ غلامی کی۔ عوامی مارشل لا نافذ ہونے پر انہوں نے اپنی وفاداری کا رخ ’’عوامی صدر اور چیف مارشل لا ایڈمنسٹریٹر‘‘ کی جانب موڑ دیا‘ جن کے نامساعد دور میں وہ دن رات ان کی بدگوئی کیا کرتے تھے۔ مزے کی بات یہ ہے کہ خود پاکستان پیپلز پارٹی‘ جس کے منشور میں‘ این پی ٹی کا توڑا جانا شامل تھا‘ این پی ٹی کو قومی تحویل میں رکھنے کی سب سے بڑی حامی بن گئی جس کا منطقی نتیجہ یہ برآمد ہوا کہ جب جولائی 1977ء میں پیپلز پارٹی کے خلاف فوجی بغاوت برپا ہوئی تو یہ اخبارات اتنی ہی خوشی اور سہولت کے ساتھ پیپلزپارٹی کے مخالف بن گئے جیسے اس کی حکومت قائم ہونے پر اس کے حامی بن گئے تھے۔ 1988ء میں نیشنل پریس ٹرسٹ توڑے جانے کا عمل پاکستان کے اس وزیر اعظم کے ذریعے پایہ تکمیل کو پہنچا جسے بظاہر پاکستان کا سب سے کمزور وزیر اعظم سمجھا جاتا تھا، یہ وزیر اعظم محمد خان جونیجو تھے۔ بقول میر تقی میر: سب پہ جس بار نے گرانی کی اس کو یہ ناتواں اٹھا لایا
1977ء ہوا بازی کی تاریخ کا سب سے بڑا اور خوفناک حادثہ پیش آيا جب جزائر کینرلی کے ایئر پورٹ پر دو 747 جیٹ طیارے آپس میں ٹکرائے۔ اس حادثے میں 852 افراد ہلاک ہوئے۔
ملک معراج خالد 27 مارچ 1977ء سے 05 جولائی 1977 تک پاکستان کی قومی اسمبلی کے دسویں اسپیکر رہے۔ملک معراج خالد 20ستمبر 1916ء کو برکی لاہور میں پیدا ہوئے۔ 2 مئی1972ء سے 10نومبر 1973ء تک پنجاب کے وزیر اعلیٰ رہے۔ مارچ 1977ء کے الیکشن میں قومی اسمبلی کے رکن اور 27مارچ 1977ء کو قومی اسمبلی کے اسپیکر منتخب ہوئے اور 5 جولائی 1977ء تک اس عہدے پر فائز رہے۔ 1988ء میں جب پیپلز پارٹی دوبارہ برسر اقتدار آئی تو ملک معراج خالد ایک مرتبہ پھر قومی اسمبلی کے رکن اور اسپیکر منتخب ہوئے۔ اس مرتبہ وہ اس عہدے پر 3 دسمبر 1988ء سے 4 نومبر 1990ء تک فائز رہے۔ 5 نومبر1996ء کو صدر فاروق لغاری نے بے نظیر بھٹو کی حکومت کا خاتمہ کیا ملک معراج خالد نگراں وزیر اعظم کے عہدے پر فائز ہوئے۔اس عہدے پر وہ 16فروری 1997ء تک فائز رہے۔ ملک معراج خالد کا انتقال 13جون 2003ء کو ہوا۔
1989ء خلا میں امریکہ کے میزائل اینٹی سیٹلائٹ تجربہ ناکام ہوا۔
27 مارچ 1998ء کو پاکستان کے محکمہ ڈاک نے سر سید احمد خان کی صد سالہ برسی کے موقع پر ایک یادگاری ڈاک ٹکٹ جاری کیا جس کی مالیت سات روپے تھی۔ اس ڈاک ٹکٹ پرسر سید احمد خان کا خوب صورت پورٹریٹ بنا تھا اور انگریزی میں DEATH CENTENARY OF SIR SYED AHMAED KHAN 1898-1998 کے الفاظ تحریر تھے۔ یہ ڈاک ٹکٹ پاکستان سیکیورٹی پرنٹنگ کارپوریشن کے ڈیزائنر عادل صلاح الدین نے ڈیزائن کیا تھا۔
2002ء اسرائیل کے نتنيا میں خود کش حملے میں 29؍ افراد مارے گئے ۔
2008ء ناروے اور جنوبی کوریا نے کوسوو کو آزاد ریاست کے طور پر تسلیم کیا۔
2008ء لاہور کے ریس کورس پارک میں بم دھماکہ ہوا جس میں 67 افراد شہید اور 50 کے قریب زخمی ہوئے۔
2016ء۔اقبال پارک لاہور میں ایسٹر کے موقع پہ خودکش حملہ۔74 افراد جاں سے گئے اور 300 سے زائد افراد زخمی ہوئے
2023ء۔۔اسلام آباد کے پریڈ گراؤنڈ میں منعقد جلسہ عام میں وزیراعظم پاکستان عمران خان نے امریکی حکومت کی جانب سے دی گئی دھمکی کا انکشاف کیا جو امریکہ میں تعینات پاکستانی سفیر اسد مجید نے مشہور زمانہ سائفر میں بھیجی تھی۔
فلوریڈا: امریکی ریاست فلوریڈا میں 14 سال سےکم عمربچوں کے لیے سوشل میڈیا استعمال کرنے پرپابندی عائد کردی گئی ہے۔
باغی ٹی وی : امریکی میڈیا کے مطابق 14 سال سے کم عمربچوں کو سوشل میڈیا پلیٹ فارمز پر اکاؤنٹ بنانے کی اجازت نہیں ہوگی جب کہ سوشل میڈیا پلیٹ فارمز کو 14 سال سےکم عمربچوں کے موجودہ اکاؤنٹس کو حذف کرنا ہوگا، ریاست فلوریڈا کےگورنر رون ڈی سانٹس نے بچوں کے سوشل میڈیا استعمال پرپابندیوں کے قانون پر دستخط کردئیے پابندی کا اطلاق یکم جنوری 2025 سے ہوگا۔
امریکی میڈیا کے مطابق حفاظتی خدشات کے پیش نظر بچوں کے سوشل میڈیا استعمال کے خلاف پابندی لگائی گئی ہےکیلیفورنیا، کنساس اور دیگر کئی امریکی ریاستوں میں بھی بچوں کےسوشل میڈیا استعمال کی حدیں مقرر کی گئی ہیں بچوں میں ڈپریشن اور خودکشی کے رجحان میں اضافےکی وجہ سے امریکی ریاستوں میں یہ اقدام کیےگئے ہیں جب کہ میٹا اور ٹک ٹاک سمیت سوشل میڈیا کمپنیوں کے اتحاد نے امریکی ریاستوں کے اقدام کوعدالت میں چیلنج کر رکھا ہے۔
دوسری جانب سوشل میڈیاکمپنیوں کا مؤقف ہے کہ پابندی بچوں کے آزادی اظہار کے حق کی پہلی ترمیم کی خلاف ورزی کرتی ہے۔
اسلام آباد:شہریوں کا ڈیٹا چوری ہونے کے معاملے پر نادرا کے 8 سے زائد افسران کو معطل کرکے چارج شیٹ دے دی گئی۔
باغی ٹی وی: ذرائع کے مطابق نیشنل ڈیٹابیس اینڈ رجسٹریشن اتھارٹی (نادرا) میں مشترکہ تحقیقاتی ٹیم کی سفارش پرکارروائی کا آغاز کردیا گیا نادرا میں ایک درجن کے قریب افسران کے خلاف تادیبی کارروائی شروع کردی گئی ہے 8 سے زائد افسران کو معطل کرکے چارج شیٹ دے دی گئی۔
ترجمان نادرا نے ادارے میں جے آئی ٹی کی روشنی میں کارروائی کی تصدیق کردی ہے،ترجمان نے کہا کہ ادارے میں جے آئی ٹی سفارشات کی روشنی میں کارروائی شروع کردی ہے، ڈیٹا پرائیویسی اور عدالتی نوعیت کی کارروائی کے باعث انفرادی نام جاری نہیں کرسکتے۔
واضح رہےکہ نادرا سے شہریوں کا ڈیٹا چوری ہونے کے بڑے اسکینڈل کی تحقیقات میں مشترکہ تحقیقاتی ٹیم (جے آئی ٹی) نے 27 لاکھ پاکستانیوں کا ڈیٹا چوری ہونے کی تصدیق کی ہے۔